पिलातसरे़ ये़सुःन् खासे़न् लोःन्दुॽ
23
मत्ति २७.११-२६, मर्कुस १५.१-१५, युहुन्ना १८.२८-४०, १९.१-१६
1 ये़जुम्भोबा के़रे़क् मनाहाॽ मे़बोगे़आङ् ये़सुःन् रोमि सुहाङ्गे़म्बा पिलातसरो मे़दारुआङ्
2 फोत्या कुःप्मा मे़हेःक्तु, “आनिगे़ कन् मनाःल्ले़ कन् सुवाङ्हाॽ इङ्गाॽए निङ्वाॽफुमाङ्ङिल्ले़ सेःन्दुबा ख्रिस्त हाङ्आ मे़त्तुसिर पयम् हाङ् सिजरे़न् एःङ्याङ् पिमा मे़ःन् फाॽआङ् हुसुसिबा तुमुम्बे़रो॥”
3 हे़क्क्याङ् पिलातसरे़ ये़सुःन् सेःन्दोसु, “से़क्खा खे़ने़ॽ यहुदि हाङ्ने़बि?”
ये़सुरे़ खे़न् नोगप् पिरु, “खे़ङ्ग खे़ने़ॽए के़बाःत्तुर के़बत्लो॥”
4 हे़क्क्याङ् पिलातसरे़ तुम्निङ्वाॽफुसाम्बाहाॽ नु खे़न् मनाहाॽ मे़त्तुसि, “इङ्गाॽग कन् मनाःल्ले़ थेआङ् फे़न् याःम्बक् चोगुबा मे़ङ्घोःबान्लो॥”
5 कर खे़ङ्हाॽरे़ याम्मो ये़सुःन् अक्खे मे़मे़त्तुर आप्तिक् मे़गुःत्तु, “कन् मनाःल्ले़ कुनिसाम्मिल्ले़ कन् के़रे़क् मनाहाॽ के़रे़क् यहुदिया नु गालिललाम् कप्मो थारिक् हाङ्बिफ्युङ् चोःक्मा हुसुसिर वाॽरो॥”
ये़सुःन् हे़रोद हाङ्ङिल्ले़ कुदगि
6 हे़क्क्याङ् पिलातसरे़ खे़न् खे़प्सुआङ् कन् मनाःन् गालिलस्माबि? फाॽआङ् सेःन्दोसुसि॥
7 पिलातसरे़ कन् पाःन्निन् हे़रोद हाङ्ङिल्ले़ कुलाजेॽओबा के़लॽबा निङ्वाॽ खोःसुआङ् ये़सुःन् हे़रोद हाङ्ङिल्लोए पाङ्घुदेःसुरो॥ खे़न् ये़म्मो हे़रोदे़न यरुसले़म्मो वये़रो॥
8 हे़रोदरे़ ये़सुःन् निःसुआङ् साॽरिक् सःत्ते़, थेआङ्भे़ल्ले़ खुने़ॽ चोगुबा पाःन्निन् खे़प्सुआङ् तगिआङ्धो तुम्मा निङ्वाॽ चोगुआङ् वये़॥ आल्ल खुने़ॽ कुदगि ये़सुरे़ निङ्वाॽ के़माबा याःम्बक्हाॽ चोगुबा ओमे़प्मा कुसिराॽ थाङे़आङ् वये़रो॥
9 हे़रोदरे़ खुने़ॽ यरिक् पाःन्हाॽ सेःन्दोसु, कर ये़सुरे़ थेआङ् नोगप् मे़बिरुन्लो॥
10 हे़क्क्याङ् तुम्निङ्वाॽफुसाम्बाहाॽ नु साम्योथिम्साम्बाहाॽ मे़बोगे़आङ् खुने़ॽ ये़क्कप् फोत्या कुःप्मा मे़हेःक्तु॥
11 हे़रोदे़न नु कुधक्सुबाहाॽरे़ ये़सुःन् किनाःन्दि मे़बिरुर कुजाःत्थि मे़देःसु, हे़क्क्याङ् परान्ला हाङ्तेःत्तिन् मे़जाक्तु मे़बिरुआङ् याङ्ना पिलातसरो मे़बाङ्घु मे़देःसुरो॥
12 बा खे़न् ये़न्नाङ्धो हे़रोद हाङ्ङिन् नु पिलातसे़न् याम्मो तङे़त्छिरो॥ खे़न्नुःल्ले़ तगि खुन्छिॽ ने़प्माङ् निङ्मि वये़त्छिरो॥
ये़सुरे़ सिःमे़ल्ले़न् खुम्दिङ् खोःसुॽ
13 हे़क्क्याङ् पिलातसरे़ तुम्निङ्वाॽफुसाम्बाहाॽ, यहुदि लाम्लोःबाहाॽ नु मनाहाॽ उःत्तुसिआङ्
14 खे़ङ्हाॽ मे़त्तुसि, “खिनिॽ कन् हाङ्बिफ्युङ् के़जोःक्पा फाॽआङ् फोत्या के़गुःत्तुम्माङ् के़दारुम्बा मनाःन् खिनिॽ तगिए इङ्गाॽ यरिक् पाःन् सेःन्दोसुङ्, कर इङ्गाॽ थेआङ् याःम्बक् फेःन्दुबा मे़ङ्घोःबान्लो॥
15 हे़क्क्याङ् हे़रोद हाङ्ङिल्ले़आङ् थेआङ् मे़घोःसुन्नाङ्याङ्ना इङ्गाॽओ नुःक्तु फे़न्छुआङ् वाॽरो॥ ओमे़त्ते़म्मे़ॽ, कल्ले़ सिःमे़ल्ले़ खुम्दिङ् खोःमा के़बोःङ्बा याःम्बक् थे़माआङ् मे़न्जोःक्के वाॽरो॥
16 हे़क्केःल्ले़ इङ्गाॽ खुने़ॽ ते़ःम्भुक् याक् पाङ्घुङ्सिङ्ङाङ् ले़रुङ्देःसुङ्लो॥”
17 ((आल्ल तङ्नाम्मो पुङ्लाहिम्मो साक्पा के़धाःबाधिक् ले़प्मा थिम् वये़रो॥))
18 कर खे़ङ्हाॽ थिक्हुप् मे़बोःक्खे़आङ् मे़अःक्ते़, “कन् मनाःन् खुम्दिङ् पिरे़ॽआङ् आनिगे़ लागि बरब्बासे़न ले़रे़ आबिरे़ॽ!”
19 (खे़न् मनाःन् ये़क्यक्को हाङ्बिफ्युङ् चोगुबा नु मना से़रुसिबा आप्तिक्को पुङ्लाहिम्मो साक्पा थ्ये़आङ् यागे़रो॥)
20 पिलातसरे़ ये़सुःन् ले़प्मा निङ्वाॽ चोगुर खे़ङ्हाॽ याम्मो ताॽजे़क्तुसि,
21 कर खे़ङ्हाॽ मे़अःक्ते़, “खे़न् सिलाम्साक्मा सिङ्सम्दाङ् फोःन्दे़ॽ! सिलाम्साक्मा सिङ्सम्दाङ् फोःन्दे़ॽ!”
22 हे़क्क्याङ् सुम्ले़ङ्ङो पिलातसरे़ खे़ङ्हाॽ याम्मो मे़त्तुसि, “थेआङ्बे? खे़ल्ले़ थे याःम्बक् फेःन्दुआङ् वाॽबे? खुने़ॽ सिःमे़ल्ले़ खुम्दिङ् खोःमा याःम्बक् चोगुबा इङ्गाॽ मे़ङ्घोःबान्लो, हे़क्केःल्ले़ खुने़ॽ ते़ःम्भुक् याक्पाङ्घुङ्सिङ्ङाङ् ले़रुङ्देःसुङ्लो॥”
23 कर खे़ङ्हाॽ अयाक् मे़ल्लॽए यम्बा इक्लाओ मे़अःक्ते़, “सिलाम्साक्मा सिङ्सम्दाङ् फोःन्दे़ॽ॥” खे़ङ्हाॽ थिक्हुप् मे़बोःक्खे़आङ् साॽरिक् मे़अःक्ते़बाल्ले़ खुनिॽ पाःन्निन् के़रे़रो॥
24 हे़क्केःल्ले़ खे़ङ्हाॽरे़ मे़बाःत्तुबा पाःन्निन् कुइसिःक् पिलातसरे़ खुम्दिङ् पिरुरो॥
25 खुने़ॽ खे़न् ये़क्यक्को हाङ्बिफ्युङ् चोःक्मा नु मना से़प्मा आप्तिक्को पुङ्लाहिम्मो साक्पा के़धाबे़न् ले़प्मा पाङ्घुसि, कर ये़सुःन् खे़ङ्हाॽरे़ मे़इःत्तुबा हे़क्के मे़जोगुर फाॽआङ् ले़रु पिरुसिरो॥
ये़सुःन् सिलाम्साक्मा सिङ्सम्दाङ् मे़भोःन्दुॽ
मत्ति २७.३२-४४, मर्कुस १५.२१-३२, युहुन्ना १९.१७-२७
26 हे़क्क्याङ् थक्सुबाहाॽरे़ खुने़ॽ लाःक्कात् मे़लःत्तु मे़देॽरुआङ् खे़ङ्हाॽरे़ पाङ्भेॽओनु के़भे़म्बार के़बप्पा सिमोन मे़प्मनाबा साइरेनि ये़क्यक्को के़युङ्बे़न् मे़दे़म्सु, हे़क्क्याङ् ये़सुरे़ कुसिलाम्साक्मा सिङ्ङिन् पङ्माआङ् ये़सुःन् तिम्मा मे़बाङ्घुरो॥
27 हे़क्क्याङ् खे़प्मो यरिक् मनाहाॽरे़ खुने़ॽ मे़दिम्दुरो॥ खे़प्मो के़हाःप्मार मेरिङ् के़धक्मा मे़न्छुमाहाॽआङ् मे़वये़रो॥
28 कर ये़सुरे़ खिरि हिसिङ्ङाङ् खे़ङ्हाॽ मे़त्तुसि, “यरुसले़म्मिल्ले़ कुस्साः मे़न्छुमाॽसे, खिनिॽ आलागि मे़हाबे़म्मिन्ने़ॽ, कर खिनिॽ आबाङे लागि नु खिनिॽ साःहाॽरे़ लागि हाबे़म्मे़ॽओ,
29 थेआङ्भे़ल्ले़ मनाहाॽरे़ आप्फाल्ले़आङ् साःमे़ङ्गप्मनामाहाॽ हे़क्क्याङ् अङे़ःक्वा नुमे़न्धुक्नामाहाॽ मुइॽसामासिरो लॽरिक् पाःप्मा ये़म् तार पत्लो॥
30 खे़न् ये़म्मो मनाहाॽरे़ नाङ्जङ्हाॽ आनिगे़ सम्दाङ् मक्थ्ये़ॽओ! हे़क्क्याङ् कोःक्माहाॽ याप्मि आलुप्ते़ओ! फाॽआङ् मे़मे़त्तुसिरो॥
31 थेआङ्भे़ल्ले़ सरिःत्क्याःप्पा कुहिङ्वे़त् सिङ्ङिन्ने अक्खे मे़मे़त्तुल्ले़, के़हेबा सिङ्ङिङ्ग आक्खे मे़मे़त्तुइरो?”
32 खुने़ॽनुए ने़प्फु कुभाङ्के़भेःम्बाहाॽआङ् सिःमे़ल्ले़ खुम्दिङ् पिमासि फाॽआङ् मे़देॽरुसि॥
33 खे़ङ्हाॽ मिक्खोःक्पा मे़प्मनाबा कोःक्माओ मे़गे़रे़आङ् ये़सुःन् सिलाम्साक्मा सिङ्सम्दाङ् मे़भोःन्दुरो॥ खे़न् ने़प्फु कुभाङ्के़भेःम्बाहाॽ ये़सुरे़ कुजुप्साङ् नु कुभे़न्छाङ्बा सिलाम्साक्मा सिङ्हाॽ सम्दाङ् मे़भोःन्दुसिरो॥
34 हे़क्क्याङ् ये़सुरे़ पाःत्तु, “पानुदिङ् आम्बौ, कङ्हाॽ ले़प्मि पिरे़से़ॽओ, थेआङ्भे़ल्ले़ कङ्हाॽरे़ थे़मा मे़जोगुर मे़बत् थेआङ् मे़न्निःसुन्लो॥” हे़क्क्याङ् खे़ङ्हाॽरे़ ये़सुरे़ कुदेःत्हाॽ हाःत्छिङ्मा फाॽआङ् तॽयाःन्सोःन् मे़गे़सुरो॥
35 माःङ्घालाम् मनाहाॽ ओमे़मये़र मे़ये़बे़, कर यहुदि लाम्लोःबाहाॽरे़ खुने़ॽ किनाःन्दि मे़बिरुर अक्खे मे़मे़त्तु, “खे़ल्ले़ वेॽ मनाहाॽग से़ःप्तुसि, आल्ल निङ्वाॽफुमाङ्ङिल्ले़ सेःन्दुबा ख्रिस्तने़ फाॽग्र आबाङे से़ःप्सिङ्ल!”
36 हे़क्क्याङ् थक्सुबाहाॽरे़ मे़धाङे़आङ् किनाःन्दि मे़बिरु हे़क्क्याङ् के़सुःप्पा चे़ल्ले़क्सेॽ थिःन् मे़धुङ्घुर
37 मे़मे़त्तु, “खे़ने़ॽ यहुदि हाङ्ने़ फाॽग्र आबाङे से़ःप्सिङ्ङे़ॽओ॥”
38 हे़क्क्याङ् ये़सुरे़ कुधे़गेःक् सम्दाङ् कङ्ग यहुदिहाॽरे़ खुनिॽ हाङ्लो लॽरिक् आप्तिक् सक्किन् मे़साप्तुआङ् मे़भत्छु॥
39 खे़प्मो सिलाम्साक्मा सिङ्सम्दाङ् मे़भोःन्दुबा कुभाङ्के़भेःम्बाधिक्ले़ खुने़ॽ पाःन्निल्ले़ लक्तुर अक्खे मे़त्तु, “खे़ने़ॽ निङ्वाॽफुमाङ्ङिल्ले़ सेःन्दुबा ख्रिस्तने़ मे़ःम्बि? खे़ने़ॽ से़ःप्सिङ्ङे़ॽआङ् आन्छिगे़आङ् याप्मि आसे़ःप्ते़ॽ॥”
40 कर वेॽस्मा कुभाङ्के़भेःम्बाल्ले़ खे़न् फे़ःक्तुर अक्खे मे़त्तु, “खे़ने़ॽ निङ्वाॽफुमाङ्ङिन् के़ङ्गिरुन्बि? आनिॽ सुम्ब्राङ्ङे़ लत्छा परिक्पा खुम्दिङ्ङो आध्ये़आङ् आवाॽ,
41 च्यासाङ् आन्छिॽग आजोगे़त्छुबा याःम्बक् कुइसिःक् सिःमे़ल्ले़ खुम्दिङ् आघोःसे़त्छुबारो, कर खुने़ॽग थेआङ् फे़न् याःम्बक् मे़न्जोःक्के वाॽरो॥”
42 हे़क्क्याङ् खुने़ॽ ये़सुःन् मे़त्तु, “ये़सुए, खे़ने़ॽ के़हाङ्जुम्मो के़युःल्ले़ इङ्गाॽआङ् निङ्वाॽ इःत्ताङ्ङे़ॽओ॥”
43 ये़सुरे़ खुने़ॽ मे़त्तु, “इङ्गाॽ खे़ने़ॽ मे़त्ने़ॽ, से़क्खाए खे़ने़ॽ आइन्छा साङ्ग्राम्पेदाङ्ङो इङ्गाॽनु सोरिक् के़वाॽरो॥”
ये़सुरे़ कुसिःमे़न्
मत्ति २७.४५-५६, मर्कुस १५.३३-४१, युहुन्ना १९.२८-३०
44-45 आल्ल कुमुक् थिक्-ने़त् (१२) खिरि पोःक्खे़आङ् वये़ल्ले़ नाम्मिन् मे़ओःत्ते़न्नाङ्कुमुक् सुम्सि थारिक् खादाम्माल्ले़ खे़न् लाजेॽइन्सिदे़प् ते़प्तुरो॥ हे़क्क्याङ् माङ्हिम्मो फोःम्मनाबा फोःन्दाःन् थोनु यो थारिक् कुलुम्मो ते़रे़ॽ ते़ःक्खे़रो॥
46 ये़सुःन् यम्बा इक्लाओ अःक्ते़र अक्खे पाःत्तु, “पानुदिङ् आम्बे, इङ्गाॽ आयाम्साम्मिन् हुक्सुप्ने़ॽरो॥” हे़क्क्याङ् खुने़ॽ कुसक्मा पेरो॥
47 हे़क्क्याङ् खे़प्मो के़ये़प्पा रोमि थक्तुम्बाल्ले़ कन् हिन्दोःक्हाॽ निःसुआङ् निङ्वाॽफुमाङ्ङिल्ले़ कुनारा फोःसुर अक्खे पाःत्तु, “से़क्खासाङ् कन् मनाःन् साम्योनिबा वये़रो॥”
48 हे़क्क्याङ् खे़प्मो कन् हिन्दोःक् ओमे़त्छे़ के़जुम्बाआङ् के़वाॽबाहाॽरे़ कन् मे़निःसुआङ् खुनिॽ सङ्बेन् मे़हिप्तुर मेरिङ् थक्नु हिम्मो मे़नुःक्खे़ मे़बेरो॥
49 हे़क्क्याङ् ये़सुरे़ काक् कुन्देःङ्-कुन्जुम्हाॽ नु खुने़ॽ गालिललाम् के़दिम्मार के़दाःमा मे़न्छुमाहाॽरे़ माःङ्घालाम् कन् हिन्दोःक्किन् ओमे़मे़त्तुर मे़ये़बे़रो॥
ये़सुःन् इप्पुङ्ङो मे़ने़स्सुॽ
मत्ति २७.५७-६१, मर्कुस १५.४२-४७, युहुन्ना १९.३८-४२
50-51 आल्ल आरिमाथिया पाङ्जुम्बा युसुफ मे़प्मनाबा मनाधिक् वये़॥ खे़न् यहुदि ये़जुम्भोबा पासिङ्पादाङ्लाआङ् वये़रो॥ खुने़ॽ निङ्वाॽफुहाङ्जुम्मिन् के़हाङ्बा नुःबा नु साम्योनिबा मना चोगे़, हे़क्केःल्ले़ खुने़ॽ कन् याःम्बक्को थेआङ् ते़न्दिङ् मे़म्बिए वये़रो॥
52 खुने़ॽ पिलातसरो पेआङ् ये़सुरे़ कुधक्किन् नाःक्तु॥
53 हे़क्क्याङ् खुने़ॽ ये़सुरे़ कुधक्किन् सिलाम्साक्मा सिङ्सम्दाङ्लाम् थाःसुआङ् नुःबा चेदेःत्तिल्ले़ कित्तुआङ् खोःम्मनाबा लुङ् इप्पुङ्ङो ने़स्सुरो॥ खे़न् इप्पुङ्ङो तगि आत्तिन्नाङ् मे़न्ने़ए वये़रो॥
54 आल्ल कन् नाःम्सिङ्ये़न् यारिप् चोःक्मा ये़न् वये़ हे़क्क्याङ् नाःम्सिङ्ये़न् ताःमा इःत्ते़आङ् वये़॥
55 हे़क्क्याङ् गालिललाम् खुने़ॽनु सोरिक् के़दाःमा मे़न्छुमाहाॽरे़ युसुफे़न् मे़दिम्दुर ये़सुरे़ कुधक्किन् मे़ने़स्सुबा इप्पुङ्ङिन् मे़निःसुआङ्
56 खे़ङ्हाॽ हिम्मो मे़नुःक्खे़ मे़बेआङ् ये़सुरे़ कुधक्को हुःप्मा फाॽआङ् मारुक् नु सिदाॽहाॽ यारिप् मे़जोगुरो॥ हे़क्क्याङ् कन् साम्यो इङ्जाःङ्ङिन् कुइसिःक् नाःम्सिङ्ये़न्नो खे़ङ्हाॽ मे़नाःम्सिङ्लो॥
ये़सुःन् सिःमे़न्लाम् याम्मो हिङ्
24
मत्ति २८.१-१०, मर्कुस १६.१-११, युहुन्ना २०.१-१०
1 ते़ने़बा ये़न्नो खाओःत्ते़र पत्छे़ल्ले़ खे़न् मे़न्छुमाहाॽरे़ ये़सुरे़ कुधक्को हुःप्मा फाॽआङ् यारिप् मे़जोगुबा मारुक् नु सिदाॽहाॽ मे़याङ्सिङ्ङाङ् इप्पुङ्दे़न्नो मे़बे॥
2 खे़ङ्हाॽरे़ इप्पुङ्ङिल्ले़ कुमुराओ मे़ये़प्सुबा यम्बा लुङ्ङिन् थिक्ले़प्माङ् मे़इसुआङ् ने़स्से़बा मे़निःसु,
3 कर खे़ङ्हाॽ सिगाङ् मे़लाःस्से़ल्ले़ दाङ्बा ये़सुरे़ कुधक्किन् मे़ङ्घोःसुन्लो॥
4 खे़ङ्हाॽ खे़प्मो खुनिॽ निङ्वाॽ मये़र मे़ये़बे़ल्ले़ खुन्छिॽ पेसाङ् मिक्किन्ने के़जे़म्बा फसुःत्क्याःप्पा तेःत् के़जाङ्बा ने़प्फु मनाहाॽ ये़बे़त्छिबा मे़निःसुसि॥
5 खे़ङ्हाॽ खुनिॽ यङ्मा के़रे़आङ् खाम्मो साम्बोःन् हबत्मे़बोःक्खे़ल्ले़ खे़ङ्हाॽरे़ खे़न् मे़न्छुमाहाॽ थेआङ् खिनिॽ कुहिङ्वे़त् मनाःन् कुसिवे़त् मनालुम्मो के़गोःत्तुम्बाबे फाॽआङ्सेःन्मे़दोसुसि॥
6 “खुने़ॽग कप्मो होःप्लो! खुने़ॽग याम्मो हिङे़आङ् वाॽरो॥ गालिलओ खिनिॽनु वये़ल्ले़ खुने़ॽ पाःत्तुबा पाःन्निन् निङ्वाॽ इःत्ते़म्मे़ॽओ–
7 ‘मे़न्छाम्साःन् लायोबा मनाहाॽरे़ खुनिॽ हुक्को इङ्मे़ले़क्तुॽआङ् खुने़ॽ सिलाम्साक्मा सिङ्सम्दाङ् मे़भोःन्दु मे़से़रुॽ, कर सुम्सिगेःक्पा ये़न्नो याम्मो हिङ्लो॥’ ”
8 हे़क्क्याङ् खे़ङ्हाॽरे़ कन् ये़सुरे़ कुबाःन्निन् निङ्वाॽ मे़इःत्तुर
9 इप्पुङ्लाम् मे़नुःक्खे़आङ् थिक्-थिक् (११) कुहुॽसाम्बाहाॽ नु वेॽ मनाहाॽ के़रे़क् मे़जे़क्तुसिरो॥
10 आल्ल खे़न् मे़न्छुमाहाॽग मरियम मग्दलिनि, योआन्ना, याकुबरे़ कुम्मा मरियम हे़क्क्याङ् वेॽ मे़न्छुमाहाॽआङ् मे़वये़रो॥
11 कर खे़ङ्हाॽरे़ खे़न् मे़न्छुमाहाॽरे़ खुनिॽ पाःन्निन् नामे़न्छाॽरुन्॥ कङ्ग मे़न्वाॽमना पाःन्लक् फाॽआङ् मे़इःत्तुरो॥
12 कर पत्रुसे़न् मुत्थ्रिक् पोगे़आङ् इप्पुङ्ङो लोःक्ते़र पे॥ खे़प्मो अःक्खुम् फन्छिङ्ङाङ् ओमे़त्तुल्ले़ग खे़प्मो फःगे़लॽबा चेदेःत्तिन्से़ःरे़आङ् ने़स्से़बा निःसु॥ खुने़ॽग थेःन्ने़ पोःक्खे़बे फाॽआङ् साॽरिक् कुनिङ्वाॽ मये़र नुःक्खे़ पेरो॥
ये़सुःन् ने़प्फु कुहुॽसाम्बाहाॽओ ओसेःन्धाक्सिङ्
मर्कुस १६.१२-१३
13 आल्ल बा खे़न् ये़म्मो ये़सुरे़ ने़प्फु कुहुॽसाम्बाहाॽ यरुसले़म्लाम् थिक्-थिक् (११) किलोमितर माःङ्घा इम्माउस पाङ्भेॽबा लाम्मो
14 खे़ङ्हाॽरे़ आइन् पोःक्खे़बा हिन्दोःक्किल्ले़ कुयाःम्बेओ ताॽजे़क्खे़त्छिर पेसिरो॥
15 खे़ङ्हाॽ हे़क्केलॽरिक् ताॽजे़क्खे़सिल्ले़ खे़प्मो ये़सुःन् त्ये़आङ् खे़ङ्हाॽनु सोरिक् लाङ्घेःक्मा हेःक्ते़,
16 कर खे़ङ्हाॽरे़ खुने़ॽ कुसिङ् मे़निःत्छुन्ल फाॽआङ् खुन्छिॽ मिक्किन् थेःक्तु पिरुसिआङ् वये़रो॥
17 ये़सुरे़ खे़ङ्हाॽ सेःन्दोसुसि, “मे़ःम्बे़, खिन्छिॽ थे़मा पाःन्निन्ने़ के़जे़ङ्सुर लाङ्गे़घेःक्सिबे?”
हे़क्केःल्ले़ खे़ङ्हाॽ खुन्छिॽ मिङ्वा कुधिम् थप्पे़त् ये़बे़त्छिरो॥
18 खे़ङ्हाॽओ क्लिओपास मे़प्मनाबा थिक्ले़ खुने़ॽ सेःन्दोसु, “मे़ःम्बे़, खे़ने़ॽ यरुसले़म्मो के़न्युङ्ने़न्बि? आइन् ताःन्दिक् खे़प्मो पोःक्खे़बा पाःन्निन् खे़ने़ॽ निङ्वाॽ के़ङ्घोःसुन्बि?”
19 ये़सुरे़ मे़त्तुसि, “मे़ःम्बे़, थे़मा पाःन्निन्बे?”
खे़ङ्हाॽरे़ नोगप् पिरे़त्छु, “नासरतबा ये़सुरे़ कुयाःम्बेओआ, खुने़ॽग माङ्निङ्वाॽपाःन् के़बाःप्पा वये़, हे़क्क्याङ् निङ्वाॽफुमाङ्ङिन् नु मे़न्छाम्गे़न् याप्मि लुम्मो खुने़ॽ पेलिगे़न् पाःन्जाक्को नु याःम्बक्को मुक्साम्साबा चोगे़रो॥
20 तुम्निङ्वाॽफुसाम्बाहाॽ नु आनिगे़ हाङ्युक्पाहाॽरे़ खुने़ॽग सिःमे़ल्ले़न् खुम्दिङ् मे़बिरुर फाॽआङ् थिम्मे़न्दङ् सुवाङ्हाॽ हुक्मे़सुप्तुसि, हे़क्क्याङ् खुने़ॽ सिलाम्साक्मा सिङ्सम्दाङ् मे़भोःन्दुरो,
21 कर खुने़ॽ इस्राइलिहाॽ चोःक्युम्भो के़बिबा मना फाॽआङ् आनिगे़ग कुलाम् ओमे़त्तुम्बे़आङ् वयिगे़रो॥ खे़न्नाङ्धो आल्लो कन् हिन्दोःक् पोःक्खे़बा सुम् ये़न् के़रे़रो॥
22-23 आनिगे़ लुम्मो कुभा मे़न्छुमाहाॽरे़ आनिगे़ निङ्वाॽ मे़मासुरो॥ आइन् तानाम्सा खे़ङ्हाॽ इप्पुङ्ङो मे़बे, कर खे़ङ्हाॽरे़ ये़सुरे़ कुधक्किन् खे़प्मो मे़ङ्घोःसुन्॥ खे़ङ्हाॽ मे़नुःक्खे़ मे़द्ये़आङ् खे़ङ्हाॽरे़ माङ्लाइङ्बाहाॽ मे़निःसुसिबा पाःन्निन् नु खे़न् माङ्लाइङ्बाहाॽरे़ खुने़ॽग कुहिङ्वे़त् पोःक्खे़आङ् हिङे़रो फाॽआङ् पाःत्ते़त्छुबा पाःन्निन् मे़जे़क्तिगे़रो॥
24 हे़क्क्याङ् आनिगे़ कुभा तेःङ्जुम्हाॽ इप्पुङ्दे़न्नो मे़बेःल्ले़ खे़न् मे़न्छुमाहाॽरे़ मे़बाःत्तुबा हे़क्केए खे़प्मो मे़निःसु, कर खे़ङ्हाॽरे़आङ् ये़सुःन् मे़न्निःसुन्लो॥”
25 हे़क्क्याङ् ये़सुरे़ खे़ङ्हाॽ मे़त्तुसि, “खिन्छिॽ निङ्वाॽइन्आक्खे़न् साॽरिक् थुङ्बाबे! हे़क्क्याङ् माङ्निङ्वाॽपाःन् के़बाःप्पाहाॽरे़ मे़बाःत्तुबा पाःन्निन् नसाःन् चोःक्मा आक्खे़न् खिनिॽ निङ्वाॽ पाःक्पाबे?
26 निङ्वाॽफुमाङ्ङिल्ले़ सेःन्दुबा ख्रिस्ते़न्तुक्खे चामाआङ् कुमिमिदिङ्ङो पेःक्मा के़बोःङ्बा वये़ बि मे़ःम्बि?”
27 हे़क्क्याङ् ये़सुरे़ खे़ङ्हाॽ आबाङे कुयाःम्बेओ मोसारे़ कुसाप्पन्हाॽ हे़क्क्याङ् माङ्निङ्वाॽपाःन् के़बाःप्पाहाॽरे़ खुनिॽ साप्पन्नो थारिक् कुबेःन् पोधक् चोगु पिरुसिरो॥
28 हे़क्क्याङ् खे़ङ्हाॽ मे़बेर मे़बत्छे़बा पाङ्भेॽइल्ले़ कुबेसाङ् मे़गे़रे़आङ् ये़सुःन् मिसाक् माःङ्घा के़बेःक्पा लाम्सिङ्लो,
29 कर खे़ङ्हाॽरे़ खुने़ॽ अक्खे मे़त्ते़छुर पेलि फाक्ते़त्छु, “खे़ने़ॽ आन्छिगे़नुए आइन् से़न्दिक् याङ्धोःक्ते़ॽओ, थेआङ्भे़ल्ले़ आल्लो नाम्ध्ये़आङ् खादाम्ल पत्लो॥” हे़क्केःल्ले़ खुने़ॽ खे़ङ्हाॽनु याङ्धोःक्से़ पेरो॥
30 हे़क्क्याङ् खुने़ॽ चामादे़न्नो युङ्सिङ्ङिल्ले़ खरे़ःङ्ङिन् खप्सु हे़क्क्याङ् नोगे़न् पिरुआङ् फुॽरुर खे़ङ्हाॽ पिरुसि॥
31 हे़क्क्याङ् खे़ङ्हाॽरे़ खुन्छिॽ मिक्किन् हरे़आङ् खुने़ॽ कुसिङ् निःत्ते़त्छु, कर खे़प्मोए खुन्छिॽ तगिलाम् खुने़ॽ आलाप्पोःक्खे़ पेरो॥
32 हे़क्क्याङ् खे़ङ्हाॽ अक्खे मे़त्ने़त्छि, “मे़ःम्बे़, लाम्मो आनिॽ ताॽआजे़क्खे़र आभे़रे़र आबत्छे़ल्ले़ खुने़ॽ साम्योसाप्लाःन् पोधक् आजोगे़त्छि आबिरे़त्छिल्ले़ आन्छिॽ सिक् पसम्समे़आङ् वये़बि मे़ःम्बि?”
33 हे़क्क्याङ् खिमो ने़प्माङ् बा खे़न् ये़म्मो पोगे़त्छिआङ् यरुसले़म ले़प्माङ् थाने़त्छिरो॥ खे़प्मो थिक्-थिक् (११) हुॽसाम्बाहाॽ नु वेॽहाॽ सोरिक् मे़युङे़बा तुमे़त्छुसि॥
34 हे़क्क्याङ् खे़ङ्हाॽरे़ खुन्छिॽ मे़मे़त्तुसि, “दाङ्बान् से़क्खाए स्ये़आङ् याम्मो हिङे़रो, हे़क्क्याङ् सिमोने़ल्लो ओसेःन्धाक्सिङ्बाएरो!”
35 हे़क्क्याङ् खे़ङ्हाॽरे़ अक्खेलॽरिक् लाम्मो ये़सुःन् तुमे़त्छुआङ् पोःक्खे़बा पाःन्निन् नु चाजामा ये़म्मो खुने़ॽ खरे़ःङ्ङिन् फुॽरुल्ले़ कुसिङ् निःत्ते़त्छुबान्के़रे़क् चे़क्खे़त्छुरो॥
ये़सुःन् कुहुॽसाम्बाहाॽरो ओसेःन्धाक्सिङ्
मत्ति २८.१६-२०, मर्कुस १६.१४-१८, युहुन्ना २०.१९-२३, सेःक्युक्मिबाहाॽ १.४-८
36 हे़क्क्याङ् आल्लसाङ् मे़बारे़र मे़बत्छे़ल्ले़ ये़सुःन् आबाङे खुनिॽ लुम्मो थाःम्सिङ्ङाङ् मे़त्तुसि, “खिनिॽ सनारुङ् के़घोःसुम्लरो॥”
37 हे़क्क्याङ् के़रे़क्ले़ खुनिॽ निङ्वाॽ मये़आङ् साॽरिक् मे़गिसे़॥ खे़ङ्हाॽरे़ग आल्ल सिःसाम्मिन्ने़ आनिःसुम् फाॽआङ् मे़इःत्तु॥
38 कर ये़सुरे़ खे़ङ्हाॽ मे़त्तुसि, “थेआङ् खिनिॽ यङ्मा के़रे़बा? हे़क्क्याङ् खिनिॽ निङ्वाॽबो थेआङ् चप्चि के़जोगुम्बाबे?
39 आहुक् आलाङ्हाॽ ओमे़त्ते़म्मे़ॽ! से़क्खाए कङ्ग इङ्गाॽएरो॥ इङ्गाॽ आसुःसे़म्मे़ॽआङ् ओआमे़त्ते़म्मे़ॽ! सिःसाम्मिल्ले़न्इङ्गाॽ कत्तुङ्बा हे़क्के ने़क्सा नु ये़प् होःप्लो॥”
40 हे़क्के मे़त्तुसिर खुने़ॽ कुलाङ् कुहुक्हाॽ ओसेःन्धाक्तुसिरो॥
41 खे़ङ्हाॽरे़ खुनिॽ सिक् पसम्समे़आङ् कन् पाःन्निन् से़क्खाबि मे़ःम्बि फाॽआङ् हःन्दा मे़ले़क्ते़आङ् मे़ये़बे़रो॥ हे़क्केःल्ले़ ये़सुरे़ खे़ङ्हाॽ मे़त्तुसि, “खिनिॽ चामा कुजाधिक् के़गत्तुम्बि?”
42 खे़ङ्हाॽरे़ ओॽमनाबा कुले़प्थिक् ङा मे़बिरुआङ्
43 ये़सुरे़ खुनिॽ तगाङ्ङे़ खे़न् ताःक्तुआङ् चदेःसुरो॥
44 हे़क्क्याङ् खुने़ॽ अक्खे पाःत्तु, “इङ्गाॽ खिनिॽनु वयाङ्ङिल्ले़साए मोसारे़ साप्तुबा साम्योथिम् साप्लाओ, माङ्निङ्वाॽपाःन् के़बाःप्पाहाॽरे़ खुनिॽ साप्पन्हाॽओ नु साम्लो सुम् साप्पन्नो इङ्गाॽ आयाःम्बेओ साप्ते़बा के़रे़क् पाःन्हाॽ के़त्लो फाॽआङ् मे़त्निङ्ङाङ् वयाङ्लो॥”
45 हे़क्क्याङ् ये़सुरे़ खे़ङ्हाॽरे़ साम्योसाप्लाःन् कुसिङ् मे़निःत्तुर फाॽआङ् खुनिॽ निङ्वाॽ हन्दुबिरुसिआङ्
46 खे़ङ्हाॽ अक्खे मे़त्तुसि, “निङ्वाॽफुमाङ्ङिल्ले़ सेःन्दुबा ख्रिस्ते़ङ्ग तुक्खे चामाए पोःङ्, हे़क्क्याङ् सिःमाआङ् सुम् ये़न्नो याम्मो हिङ्माए पोःङ् फाॽआङ् साप्ते़आङ् पत्लो॥
47 हे़क्क्याङ् खुने़ॽ कुमिङ्ङो लायोलाम् हिन्छिङ्मा नु ले़प्मिरे़न् सुनाइङ्ङिन् यरुसले़म्मो हेःक्माआङ्के़रे़क् मे़न्छाम् सुवाङ्हाॽओ इङ्भोःमाए पोःङ्लो॥
48 हे़क्क्याङ् खिनिॽ के़रे़क् कन् पाःन्निल्ले़न् हिन्धोःक्मिबा के़वयिॽरो॥
49 आल्ल खे़प्से़म्मे़ॽओ, इङ्गाॽ पानुदिङ् आम्बारे़ चोगुबा माङ्हे़क्किन्खिनिॽओ पाङ्घुङ् युःसुङ्लो, कर निङ्वाॽफुमाङ्लाम् मुक्साम्मिल्ले़ कुधिम् मे़म्बोःङ्ङे थारिक् बा कन् ये़क्यक्कोए वये़म्मे़ॽओ॥”
ये़सुःन् साङ्ग्राम्पेदाङ्ङो नुःङ्
मर्कुस १६.१९-२०, सेःक्युक्मिबाहाॽ १.९-११
50 हे़क्क्याङ् ये़सुरे़ खे़ङ्हाॽ बे़थानि थारिक् तेॽरुसिआङ् कुहुक्हाॽ थाःङ् फोःक्खुर खे़ङ्हाॽ मुॽइसाम् थाःसु पिरुसिरो॥
51 खे़ङ्हाॽ मुॽइसाम् थाःसु पिरुसिर पत्छे़ल्ले़ खुने़ॽ थाःङ्धाःङ् साङ्ग्राम्पेदाङ् ले़प्माङ् पक्खे़र पेरो॥
52 हे़क्क्याङ् कुहुॽसाम्बाहाॽ साॽरिक् खुनिॽ सिक् समे़र खुने़ॽ सेवा मे़जोगुआङ् यरुसले़म्मो मे़नुःक्खे़ मे़बे,
53 हे़क्क्याङ् चक्मे़ल्लॽए माङ्हिम्मो निङ्वाॽफुमाङ्ङिल्ले़ कुनारा मे़भोःसुर मे़वये़रो॥
युहुन्नारे़ साप्तुबा ये़सुरे़ कुसुनाइङ्
निःसुम्
कन् साप्पन्निन् सेःक्युक्मिबा युहुन्नारे़ साप्तुबा सःप्मा नु सिराॽ थाङ्माल्ले़न् सुनाइङ्लो॥ कन् साप्पन्नो युहुन्नाःल्ले़ ये़सुःन् निङ्वाॽफुमाङ्ङिल्ले़ मे़न्नुप्मनाबा कुबाःन्जाक्किन् हे़क्क्याङ् मे़न्छाम्गे़न् याप्मि ले़ङ्सिङ्ङाङ् मनालुम्मो थाःम्सिङ्लो फाॽआङ् साप्तुआङ् पत्॥ ये़सुःन्ने निङ्वाॽफुसाः नु माङ्हे़क् चोगे़बा से़न्लप्दाङ्बा फाॽआङ् कन् साप्पन्निन्के़निःप्पाहाॽरे़ नसाःन् मे़जोगुर हे़क्क्याङ् खे़न् नसाःन्लाम्बा मे़न्नुप्मनाबा हिङ्मन्निन् मे़घोःसुर के़लॽबा कन् साप्पन्निल्ले़ कुदाराप्लो॥
निङ्वाॽफु पाःन्जाक् नु ये़सुःङ्ग लत्छासि लॽरिक् कन् साप्पन्निल्ले़ पाःत्तुॽरो॥ हे़क्क्याङ् कन् सुनाइङ्ङिल्ले़न् थिक्सिगेःक्पा लक्को ये़सुरे़ चोगुबा निङ्वाॽ के़माबा याःम्बक्हाॽरे़ खुने़ॽए निङ्वाॽफुसाः नु माङ्हे़क् चोगे़बा से़न्लप्दाङ्बा फाॽआङ् ओसेःन्दाङ् चोगुरो॥ कन् थिक्सिगेःक्पा लक्को आक्खेलॽरिक् मनाहाॽरे़ ये़सुःन् नसाःन् मे़जोगुआङ् कुहुॽसाम्बा मे़बोःक्खे़ के़लॽबान् हे़क्क्याङ् वेॽहाॽरे़ खुने़ॽ मे़अत्तुर कुदक्ले़ङ्वाओ मे़बोगे़बा हे़क्क्याङ् खुने़ॽ नसाःन् मे़न्जोगुन्बा पाःन्निन् साप्ते़आङ् पत्लो॥ हे़क्क्याङ् नाःत्ला १३-१८ ओ खुने़ॽ सिलाम्साक्मा सिङ्सम्दाङ् फोःम्मानुःल्ले़ तगि हुॽसाम्बाहाॽनु सेसे तङ्जुम् नु माङ्सेवा चोगुबा, हे़क्क्याङ् खे़ङ्हाॽ माङ्सेवा याःम्बक्को यारिप् चोगुसिबा नु आःन्छिङ्मा पिरुसिबा पाःन्निन् पत्लो॥ हे़क्क्याङ् एगाङ्समा नाःत्लाहाॽओ ये़सुःन् मे़दे़म्सुबा, सुहाङ्युक्पाल्ले़ हङ्साॽरुबा नु खुने़ॽ सिलाम्साक्मा सिङ्सम्दाङ् स्ये़आङ् सिःमे़न्लाम्बा याम्मो हिङे़आङ् हुॽसाम्बाहाॽरो ओसेःन्धाक्सिङ्बा पाःन्हाॽ पत्लो॥
युहुन्नाःल्ले़ मे़न्नुप्मनाबा हिङ्मन्निन् ये़सुओरक् खोःदे़त्लो हे़क्क्याङ् कङ्ग ये़सुःन् लाम्, से़क्खा नु हिङ्मन् फाॽआङ्नसाःन् चोःक्माआङ् खुने़ॽओ ताःमाल्ले़रक् खोःदे़त् लॽरिक्आहुॽरो॥ कन् सुनाइङ्ङो निङ्वाॽ के़माबा पाःन्निन् थे वाॽभे़ल्ले़ याम्साम्गे़न् पाःन्निन् मनाहाॽरे़ कुसिङ् मे़निःत्तुर फाॽआङ् च्वाःत्, खरे़ःङ्, ओःत्ति, मे़ल्लुक्कम्बा नु मे़ल्लुक्, हे़क्क्याङ् चे़ल्ले़क्सेॽ पुङ्मान् नु कुसेॽ हे़क्तङ्बा उसुरुबा पाःन्हाॽरे़ कुबिहाॽ ओगप् चोगुआङ् वाॽरो॥
थामिङ्
कुहेःक्सिङ्मा पाःन् १.१-१८
बप्तिस्मा के़बिबा युहुन्नाःन् नु ये़सुरे़ कुहुॽसाम्बाहाॽ १.१९-५१
ये़सुरे़ मे़न्जिङ्सिङ्ङे माङ्सेवा याःम्बक् चोगुॽ २.१-१२.५०
ये़सुःन् यरुसले़म ना-कत्ना वये़बा कुनुप्मा ये़न्हाॽ १३.१-१९.४२
दाङ्बान् सिःमे़न्लाम् याम्मो हिङे़आङ् ओसेःन्धाक्सिङ्२०.१-३१
ये़सुःन् याम्मो गालिल थुम्मो कुहुॽसाम्बाहाॽरो ओसेःन्धाक्सिङ्२१.१-२५
निङ्वाॽफु पाःन्जाक्किन् मे़न्छाम्गे़न् थक्ला पोःक्खे़
1
1 तोलिङ्सोमुओ इक्सादिङ् खाम्बेःक्माल्ले़न् नावागे़न् चइःत् ने़मानुःल्ले़ तगिए, निङ्वाॽफु पाःन्जाक्किन् वये़रो॥ निङ्वाॽफु पाःन्जाक्किन् निङ्वाॽफुमाङ्ङिन्नु वये़ हे़क्क्याङ् खुने़ॽग निङ्वाॽफुमाङ् वये़रो॥
2 खुने़ॽग तोलिङ्सोमुओ निङ्वाॽफुमाङ्ङिन्नु वये़रो॥
3 खुने़ॽलाम्मे नावागे़न् चइःत्तोबा काक् पाःन्हाॽ पोःक्खे़बारो॥ हे़क्क्याङ् कन् के़बोःङ्बाहाॽओ खुने़ॽ मे़ःन्ने थेधिक्काङ्मे़बोःक्खे़न्॥
4 ने़त्तिगे़न् हिङ्मन्निन् खुने़ॽनु वये़रो॥ हे़क्क्याङ् खे़न् ने़त्तिगे़न् हिङ्मन्निल्ले़ काक् मे़न्छाम् याप्मिहाॽ से़न्दाङ्गे़न् ओःत्ति पिरुसिरो॥
5 खे़न् से़न्दाङ्गे़न् ओःत्तिःङ्ग माक्चिगे़न् खादाम्मो ओःत्लो, कर माक्चिगे़न् खादाम्माल्ले़ आप्फाल्ले़आङ् से़न्दाङ्गे़न् ओःत्तिःन् मे़न्नाःन्ने वाॽरो॥
6 निङ्वाॽफुमाङ्ङिल्ले़ पाङ्घुबा मनाधिक् वये़॥ खे़ल्ले़ कुमिङ्ङिङ्ग युहुन्ना वये़रो॥
7 काक् मे़न्छाम्गे़न् याप्मिहाॽरे़ खे़न् से़न्दाङ्गे़न् ओःत्तिःन् नसाःन् मे़जोगुर फाॽआङ् खे़न् ओःत्तिःल्ले़ कुयाःम्बेओ तोःन्दि पिसे़ खुने़ॽ त्ये़बारो॥
8 युहुन्नाःन् आबाङेग से़न्दाङ्गे़न् ओःत्ति मे़वये़न्, खुने़ॽग से़न्दाङ्गे़न् ओःत्तिःल्ले़ कुयाःम्बेओ मनाहाॽ मे़त्छे़रक् त्ये़बारो॥
9 के़रे़क् मे़न्छाम् सुवाङ्हाॽ ओःत्ति के़बिबा खे़न् से़क्खादिङ् से़न्दाङ्गे़न् ओःत्तिःन् इक्सादिङ् खाम्बेःक्मो के़दाःबा वये़रो॥
10 खुने़ॽ इक्सादिङ् खाम्बेःक्मो वये़ हे़क्क्याङ् खुने़ॽए इक्सादिङ् खाम्बेःक्माल्ले़न् नावागे़न् चइःत् ने़स्सुसाङ् खे़प्मो त्ये़ःल्ले़ खे़ल्ले़ कुसिङ् मे़निःत्तुन्लो॥
11 अक्खेलॽरिक् खुने़ॽ आबाङे कुमनाहाॽओ त्ये़साङ् खे़ङ्हाॽरे़ खुने़ॽ मे़न्दाःक्तुन्लो॥
12 कर खुने़ॽ नसाःन् के़जोःक्पाहाॽ नु निङ्वाॽओ के़दाःक्पाहाॽ के़रे़क् निङ्वाॽफुमाङ्ङिल्ले़ कुमुॽइदाङ्साः पोःङ्मा युक् पिरुसिरो॥
13 खे़ङ्हाॽग मा-बालाम् सामे़वाःन्छिङ्बा नु मे़न्छाम् निङ्वाॽलाम्बा सा-ए मे़बोःक्खे़बा मे़ःन्, कर निङ्वाॽफुमाङ्ङिल्ले़ खे़ङ्हाॽ आबाङे कुस्साः चोगुसिबारो॥
14 निङ्वाॽफु पाःन्जाक्किन् नासिङ्गे़न् थक्लादिङ् पोःक्खे़आङ् इक्सादिङ् खाम्बेःक्मो आनिॽ लुम्मो वये़रो॥ खुने़ॽग लुङ्गुम् नु से़क्खाःल्ले़ कुधिम् चोगे़आङ् कुमिमिदिङ्ङिन् आनिःसुम्माङ् आवाॽरो॥ खे़न् मिमिदिङ्ङिन् पानुदिङ् पाः निङ्वाॽफुमाङ्लाम् के़दाःबा थिक्लक् कुस्साःल्ले़न् हे़क्तङ्बा चोगे़रो॥
15 युहुन्नाःल्ले़ खुने़ॽ कुयाःम्बेओ मनाहाॽ यम्बा इक्लाःल्ले़ अक्खे मे़त्तुसि, “इङ्गाॽ खुने़ॽ कुयाःम्बेओ अक्खेलॽरिक् पाःत्तुङ्ङाङ् वये़, ‘आएगाङ् के़दाःबाङ्ग इङ्गाॽनुःल्ले़ पयम् यम्बारो, थेआङ्भे़ल्ले़ खुने़ॽ इङ्गाॽनुःल्ले़आङ् तगिसा वये़रो॥’ ”
16 खुने़ॽ कुलुङ्गुम् कुधिम्लाम् हाङ्वासाम्मे हाङ्वासाम् आघोःसुम्माङ् आवाॽरो॥
17 थेआङ्भे़ल्ले़ निङ्वाॽफुमाङ्ङिल्ले़ साम्योथिम्मिन् मोसालाम्बा आबिरे़, कर लुङ्गुम्मिन् नु से़क्खाःङ्ग ये़सु ख्रिस्तलाम्बाए त्ये़बारो॥
18 निङ्वाॽफुमाङ्ङिङ्ग आत्तिल्ले़आङ् आप्फाल्ले़आङ् मे़न्निए वाॽरो, कर पानुदिङ् पाः निङ्वाॽफुमाङ्ङिन्नु सोरिक् के़वाॽबा थिक्लक् कुस्साःल्ले़ निङ्वाॽफुमाङ्ङिन् ओसेःन्दाङ् चोगुआङ् वाॽरो॥
बप्तिस्मा के़बिबा युहुन्नाःल्ले़ कुदोःन्दि
मत्ति ३.१-१२, मर्कुस १.१-८, लुका ३.१-१८
19 यरुसले़म्बा यहुदि लाम्लोःबाहाॽरे़ निङ्वाॽफुसाम्बाहाॽ नु माङ्हिम्मो सेवा के़जोःक्पा ले़बिहाॽ युहुन्नाओ खे़ने़ॽ हाःत्ने़न्बे? लॽरिक् सेःन्दोःसे़ मे़बाङ्सुसिल्ले़ युहुन्नाःल्ले़ कुदोःन्दिन् अक्तङ्बा चोगे़रो॥
20 युहुन्नाःल्ले़ इङ्गाॽ निङ्वाॽफुमाङ्ङिल्ले़ सेःन्दुबा ख्रिस्त मे़ःन्नारो लॽरिक् कुदोःप्मा नोगप् पिरुसि॥
21 हे़क्केःल्ले़ खे़ङ्हाॽरे़ सेःन्मे़दोसु, “हे़क्केने़ फाॽग्र खे़ने़ॽ हाःत्ने़बे? खे़ने़ॽ माङ्निङ्वाॽपाःन् के़बाःप्पा एलियाःन्ने़न्बि?” युहुन्नारे़ खे़ङ्हाॽ मे़त्तुसि, “इङ्गाॽ मे़ःन्नाॽरो॥” खे़ङ्हाॽरे़ याम्मो सेःन्मे़दोसु, “खे़ने़ॽ माङ्निङ्वाॽपाःन् के़बाःप्पाने़बि?” इङ्गाॽ मे़ःन्नाॽरो लॽरिक् याम्मो मे़त्तुसि॥
22 हे़क्केःल्ले़ खे़ङ्हाॽरे़ याम्मो सेःन्मे़दोसु, “हे़क्केने़ फाॽग्र खे़ने़ॽ हाःत्ने़बे? आनिगे़ याप्मि के़बाङ्बाहाॽ थे नोगप् पिरुम्सिम्बे़बाबे? खे़ने़ॽ हाःत्ने़बे फाॽआङ् से़क्खा याप्मि आमे़त्ते़ॽओ?”
23 युहुन्नारे़ माङ्निङ्वाॽपाःन् के़बाःप्पा यसैयाःल्ले़ कुबाःन् सुत्लाओ खे़ङ्हाॽ नोगप् पिरुसि,
“इङ्गाॽग दाङ्बाल्ले़ कुलाम्मिन् तोःन्दोःन्चोगे़म्मे़ॽ लॽरिक् एःक्सादे़न्नो के़अःक्पा इक्लाआरो॥”
24 हे़क्क्याङ् यहुदिहाॽरे़ मे़बाङ्घुसिबा खे़न् फरिसिहाॽरे़
25 खे़ने़ॽ निङ्वाॽफुमाङ्ङिल्ले़ के़सेःन्दे़बा ख्रिस्त, एलिया हे़क्क्याङ् आनिगे़ हाङ्घुम्बे़बा माङ्निङ्वाॽपाःन् के़बाःप्पे़न्नाङ् मे़ःन्ने़ फाॽग्र थेआङ् बप्तिस्मा के़बिरुसिबाबे लॽरिक् सेःन्मे़दोसु॥
26 हे़क्केःल्ले़ युहुन्नारे़ खे़ङ्हाॽ नोगप् पिरुसि, “इङ्गाॽग च्वाःत्तिल्ले़ बप्तिस्मा पिरुङ्सिङ्लो, कर खिनिॽ लुम्मो कुसिङ् के़न्निःत्तुम्मिन्बा मनाधिक् वाॽरो॥
27 इङ्गाॽ आएगाङ् के़दाःबाङ्ग खुने़ॽएरो॥ इङ्गाॽग योःक् कुइसिःक् कुलाङ्सुःप्नाम्हाॽ फाःङ्माआङ् मे़लाॽआन्लो॥”
28 कन् पाःन्निङ्ग यर्दन यङ्घङ्ङिल्ले़ नाधाःम्बिबा बे़थानि पाङ्भेॽओ पोःक्खे़आङ् वये़, खे़प्मोए युहुन्नाःल्ले़ बप्तिस्मा पिरुसिर यागे़रो॥
निङ्वाॽफुमाङ्ङिल्ले़न् मे़ल्लुक्साःन्
29 कुदाःन्दिक्मा युहुन्नाःल्ले़ ये़सुःन् खुने़ॽ ले़प्माङ् फे़रे़र पत्छे़बा निःसुआङ् अक्खे पाःत्तु, “ओमे़त्ते़म्मे़ॽ, इक्सादिङ् खाम्बेःक्मोबा लायो लासोःत्हाॽ के़गुबाआङ् के़देॽबा निङ्वाॽफुमाङ्ङिल्ले़ कुमे़ल्लुक्साःन् खा फे़न्ल पत्लो!
30 आएगाङ् के़दाःबाङ्ग इङ्गाॽनुःल्ले़ पयम् यम्बारो, थेआङ्भे़ल्ले़ खुने़ॽ इङ्गाॽनुःल्ले़आङ् तगिसा वये़रो लॽरिक् इङ्गाॽ खुने़ॽ कुयाःम्बेओए पाःत्तुङ्ङाङ् वये़बारो॥
31 तगिग इङ्गाॽ आबाङेआङ् खुने़ॽ कुसिङ् मे़न्निःत्ते वयाङ् कर खुने़ॽ इस्राइल लाजेॽओ ओसेःन्धाक्सिङ्ल फाॽआङ् च्वाःत्तो बप्तिस्मा पिरुङ्सिङ्ल त्याङ्बारो॥”
32 हे़क्क्याङ् युहुन्नाःल्ले़ याम्मो पाःत्तु, “इङ्गाॽ सेसेमाङ्ङिन् साङ्ग्राम्पेदाङ्ङोलाम् पुत्तुःक्के हे़क्के खुने़ॽओ चुक्ते़आङ् युङे़बा निःसुङ्लो
33 खुने़ॽए ख्रिस्तरो फाॽआङ् कुसिङ् मे़न्निःप्पे़न्लो, कर च्वाःत्तो बप्तिस्मा पिसे़ याप्मि के़बाङ्बा निङ्वाॽफुमाङ्ङिल्ले़ आत्तिन् सम्दाङ् सेसेमाङ्ङिन् युःआङ् चुक्पा के़निःसुॽ, खे़ने़ॽ के़हाङ्घुबाङ्ग खुने़ॽएरो, हे़क्क्याङ् खुने़ॽए सेसेमाङ्ङिल्ले़ बप्तिस्मा पिरुसिॽ फाॽआङ् मे़त्ताङ्लो॥
34 हे़क्क्याङ् कन् पाःन्हाॽ ये़सुओ पोःक्खे़बा निःसुङ्ङाङ् खुने़ॽए निङ्वाॽफुमाङ्ङिल्ले कुस्साः फाॽआङ् कुसिङ् निःत्तुङ्ङाङ् मनाहाॽ तोःन्दि पिरुङ्सिङ्लो॥”
ये़सुरे़ थिक्-ने़त् (१२) कुहुॽसाम्बाहाॽ
35 कुदाःन्दिक्मा याम्मो युहुन्नाःन् ने़प्फु कुहुॽसाम्बाहाॽनु खे़प्मो वये़ल्ले़,
36 ये़सुःन् खुनिॽ पेसाङ्लाम् पेर पत्छे़बा निःसुआङ् युहुन्नाःल्ले़ खुने़ॽ ओमे़त्तुर अक्खे पाःत्तु, “निङ्वाॽफुमाङ्ङिल्ले़ कुमे़ल्लुक्साःन् ओमे़त्ते़म्मे़ॽ!”
37 युहुन्नाःल्ले़ हे़क्के पाःत्तुबा कुहुॽसाम्बाहाॽरे़ खे़प्से़त्छुआङ् ये़सुःन् तिम्दे़सुरो॥
38 ये़सुःन् एगाङ् हिसिङ्ङिल्ले़ खे़ङ्हाॽ कुएगाङ् फे़रे़त्छिबा निःसुसिआङ् सेःन्दोसुसि, “खिन्छिॽ थे़माःन् के़गोःत्छुर के़वाॽसिबाबे?”
खे़ङ्हाॽरे़ नोगप् पिरे़त्छु, “रब्बि (खे़न् फाॽइङ्ग ‘सिक्साम्बे’ पोःङ्लो) खे़ने़ॽ आत्तो के़याःक्पे?”
39 ये़सुरे़ खे़ङ्हाॽ मे़त्तुसि, “फे़रे़त्छे़ॽआङ् ओमे़त्ते़त्छे़ॽ॥” हे़क्क्याङ् खे़ङ्हाॽ कुमुक् लिसि (४) मुक्ते़आङ् वये़ल्ले़ पेसिआङ् खे़ङ्हाॽरे़ ये़सुःन् युङे़बा ते़न्निन् ओमे़त्ते़त्छु॥ खे़ङ्हाॽ खे़न् ये़न् ये़सुःन्नुए याःक्ते़त्छिरो॥
40 खे़न् ने़प्फुहाॽओ थिक्किङ्ग सिमोन पत्रुसरे़ कुन्साॽ आन्द्रियासे़न् वये़रो॥ खुने़ॽग बप्तिस्मा के़बिबा युहुन्नाःल्ले़ पाःत्तुबा के़घे़म्बा नु ये़सुःन्नु लाङ्गे़घेःक्पा वये़रो॥
41 अन्द्रियासरे़ काक्नु तगि कुम्भुॽ सिमोने़न्तुमुआङ् मे़त्तु, “आन्छिगे़ मसिह मे़प्मनाबा निङ्वाॽफुमाङ्ङिल्ले़ सेःन्दुबा ख्रिस्ते़न्तुमे़त्छुगे़रो” (ग्रिक पाःन्दाङ्ङो “ ‘ख्रिस्त’ पोःङ्, हिब्रु पाःन्दाङ्ङो ‘मसिह’ ” पोःङ्लो)॥
42 हे़क्क्याङ् अन्द्रियासरे़ सिमोने़न् ये़सुरो तारुल्ले़ ये़सुरे़ नुःरिक् ओमे़त्तुर अक्खे मे़त्तु, “खे़ने़ॽग युहुन्नाःल्ले़ कुस्साः सिमोन्ने़रो, हे़क्क्याङ् खे़ने़ॽग के़फास लॽरिक् के़म्मे़त्लो” (खे़न् फाॽइङ्ग “पत्रुस” पोःङ्)॥
ये़सुरे़ फिलिप्पे़न् नु नाथाने़ल्ले़न् उःत्तुसिॽ
43 हे़क्क्याङ् कुदाःन्दिक्मा ये़सुरे़ गालिल थुम्मो पेःक्मा निङ्वाॽ चोगु॥ खुने़ॽ फिलिप्पे़न् तुमुआङ् अक्खे मे़त्तु, “इङ्गाॽ तिम्दाङ्ङे़ॽओ॥”
44 आल्ल फिलिप्पे़ङ्ग, आन्द्रियास नु पत्रुसरे़ खुन्छिॽ बे़थसेदा पाङ्जुम् के़युङ्बा वये़रो॥
45 फिलिपरे़ नाथाने़ल्ले़न् तुमुआङ् मे़त्तु, “आनिगे़ग मोसा नु माङ्निङ्वाॽपाःन् के़बाःप्पाहाॽरे़आङ् साम्योसाप्लाओ मे़साप्तुआङ् के़बप्पा युसुफरे़ कुस्साः नासरतबा ये़सुःन् तुमुम्बे़रो॥”
46 हे़क्केःल्ले़ नाथाने़लरे़ कुनिङ्वाॽ मये़र पाःत्तु, “मे़ःम्बे़! नासरतलाम् नुःबा पाःन्हाॽ ताबि हौ?” हे़क्केःल्ले़ फिलिपरे़ मे़त्तु, “खे़ने़ॽ आबाङे फे़रे़ॽआङ् ओमे़त्ते़ॽओ॥”
47 ये़सुरे़ नाथाने़ल्ले़न् निःत्ताङ् फे़रे़र पत्छे़बा निःसुआङ् मे़त्तु, “ओमे़त्ते़म्मे़ॽओ, से़क्खाबा इस्राइलिःन् फे़न्ल पत्लो॥ खुने़ॽ कुनिङ्वाॽबो थेआङ् ताप्फे़ःम्बा होःप्लो॥”
48 हे़क्केःल्ले़ नाथाने़लरे़ सेःन्दोसु, “मे़ःम्बे़, खे़ने़ॽ आक्खेलॽरिक् इङ्गाॽ कुसिङ् के़निःत्ताङ्बे?”
ये़सुरे़ नोगप् पिरु, “फिलिपरे़ मे़न्उःत्ते के़वये़ल्ले़सा खे़ने़ॽग पःत्छेॽ बुङ्मो के़वये़बा निःने़रो॥”
49 नाथाने़लरे़ नोगप् पिरु, “सिक्साम्बे, खे़ने़ॽग निङ्वाॽफुसाःने़रो, खे़ने़ॽग इस्राइलबा हाङ्ने़रो॥”
50 ये़सुरे़ खे़न् मे़त्तु, “मे़ःम्बे़! खे़ने़ॽ पःत्छेॽ बुङ्मो के़वये़बा निःने़ लॽरिक् मे़त्ने़बाल्ले़ चोगुल्ले़सा नसाःन् के़जोगुबाबि? कर कन्नुःल्ले़आङ् यम्बा पाःन्हाॽ के़निःसुॽरो॥”
51 खुने़ॽ आल्लसाङ् योॽरुर पाःत्तु, “खे़ने़ॽ से़क्खाए मे़त्ने़ॽ, साङ्ग्राम्पेदाङ्ङिन् हन्नाङ् निङ्वाॽफुमाङ्ङिल्ले़ कुमाङ्लाइङ्बाहाॽ मे़न्छाम्साःओ मे़युबा नु थाःङ् मे़बेःक्पा के़निःसुसिॽरो॥”