Yunus
Yunus waaɗ penduk nakohiŋ Kooh
1
1 Yunus, a nikee kuɓu Amitay. Raakka mbeh, Nikiɗi woosa ɗe ne :
2 « Kaɗa win-win Niniw, kur ka yakka, looƴkaa ɓa ne aƴaarkaŋ ɓa reyiɗ nga so. »
3 Waaye Yunus taambohha ndeem a saandohha Tarsis, ne a fus Nikiɗi. A reesa ŋ Joppa, a raakka nga batoona na kaɗe Tarsis, a wirinnda, a aassa na ɓi ɓo' ŋ batoona haang ɓa coottohe nga ne a min ki us Nikiɗi.
4 Waaye, wa ɓa nik ŋ ɗooƴ cookma, Nikiɗi fuuɗissa ŋ ɗafuk cookma puuɗis ayrukiɗ, pahul yakak yoppa cookma po batoona waaɗeeɗa ɓaltukoh.
5 Ɓooɓa ambohee batoona neƴƴohha ; yaa nik nga ɓa looƴukka tiikaŋ koohaŋ ɗe, ɓa aammba unung caŋ ɓa ŋ cookma ne ɓa eɗfiɗ batoona.
Raakka waam Yunus ruhsiɗ ngaŋ tasaŋ batoona ; a nikee faankiɗ, a neeheeɗa pani nooɗiɗ.
6 Ƴaara adgiɗee amboh ca reɓpa ɗe, woosa ɗe ne : « Fu neehang ye ? Kurka, koolɗa hooso po ŋ koohiŋ ɗa ! Wa miniɗ raak Kooh liiɓsiɗoh ɓoo po ɓoo sooƴuu. »
7 Ŋ ndeem, ɓa woytiɗohha an : « Ɓoo markiskaat ŋ petaaw ci, ɓoo marak miskiɗi rahas ɓoo pulkoh nga ɓa. » Ɓa markisukka, petaaw ca teeɓohha Yunus.
8 Ɓa woyissa ɗe ne : « Teeɓa ɓoo ɓoyi ɓek ɓoo inii ! Fu na haɓɗe ye ? Fu kurkoh nde ? Kur ɗu teeku na ? Fu ɓaah ngaŋ wi nde cuuɓ ? »
9 A loffa ɓa ne : « Ŋ Heber, Nikiɗi, a yi mi na yakɗe, Kooh ŋ ɗafki, yi fer cookmi na kehƴi. »
10 Wa ɓa kerah woo kaŋ ɗe, amboh ca neƴƴohha, ɓa tummba ɗe ne : « Fu haɓiɗ ye an ? » Ɓa inheen ɓal ne a na saandohe fusoha Nikiɗi laam a naandsukeen ɓa wa.
11 Ɓa meekissa ɗe ne : « Ɓoo haang na tumtiɗohe na ɗa po cookmi yeeɓuk ? » Laam raak cookma koolɗukeeɗa koolɗuk.
12 A loffa ɓa an : « Meeɓaat to ɗu biir ro ŋ cookmi, ɗah cookmi hey yeeɓke. Laam ŋ inhiɗa, wa nga so findi wa taamboh po pahuli ayrukiɗii bipukka ŋ ɗafuk ɗu. »
13 Joy ne ɓa tum ini a woo, amboh ca joowwa ne ɓa teer ŋ tefsa, waaye ŋ ɓarang-ɓarang, laam cookma nikee uupeeɗa ɓa uup ayruk.
14 Ndeem, ɓa kiimmba Nikiɗi ne : « Ceey ! Nikiɗi, kana ɓoo ap sagu ƴaarii ! Te kan ɓoo yamb kakaan ɓo' yurhiɗ. Laam a yaf, Nikiɗi, tum findi wa neɓoh ɗa. »
15 Ɓa jaarra, ɓa meeɓpa Yunus, ɓa njaffa ɗe ŋ cookma, cookma hannda seemiɗ ɗuuɗaŋ wa.
16 Ɓooɓa neƴƴohha ŋ Nikiɗi ; ɓa seeƴkiɗta ɗe, ɓa giñiɗta ɗe ne ɓa hey ɗe tumɗe in, ɓa cooteeɗa.
Kiimaŋ Yunus ŋ rookaŋ cuurnda
2
1 Yunus, ŋ tasaŋ ɗe ŋ ɗooƴ cookma, Nikiɗi kerhiɗ ɗe. A tummba po cuurund duu'in pulla a onnda ɗe. Yunus nikka ngaŋ rookaŋ cuurnda neeh kaahay na wek kaahay.
2 Ngaŋ ɗooƴ rookaŋ cuurnda a kiimmba Nikiɗi, Koohiŋ ɗe.
3 A woosa ne :
« Wa ŋ nikoh ngaŋ mbugala, ŋ looƴkiɗ po ngaŋ Nikiɗi, te a tahsiɗ to ;
ŋ ɗooƴ oon caŋ Jaanim, ŋ leehkiɗ,
fu kerhiɗ hoosooriŋ ngo.
4 Fu juleen ndo ngaŋ nooɗ-nooɗa, ŋ ɗooƴ cookma,
te masma wileen ndo.
Ginaah caŋ ɗa jen na wal-wal ca mburfuñeen ndo.
5 Mi nak ŋ woyee ne :
“ Fu aañiɗ to, fu waaɗisɗi so deg has. ”
Hondohɗi ŋ ambiɗ ne ŋ hey hotisse Kahnaŋ ɗa Hoolɗa.
6 Masuɓ ca goɗeen mbooh kiŋ ngo,
nooɗaŋ masma wileen ndo.
Paangi-cookom duluurkeen hafiŋ ngo.
7 Ngaŋ tasaŋ tangooca ŋ ruhseen,
ŋ rangseen po faw ngaŋ kur caŋ fiɗaaf ca, ŋ ɓak ɓooɓa ɗeɓgaan.
Waaye fu tumiɗ po kipes kiŋ ngo pulla ruy-ruya,
Nikiɗi, Koohiŋ ngo.
8 Wa maa waaɗe ñak kiñin,
ŋ haltuk ɗa, Nikiɗi
te fu kerhiɗ kiimaŋ ngo
ŋ Kahnaŋ ɗa Hoolɗa.
9 Ɓi na taambkohe ɓonaah ci,
ɓa na fañe muuɗiŋ ɓa.
10 Mi, faan ndo, ngaŋ ɓi hooso jangtuk, ŋ hey ɗa seeƴke ɓi hoosuuɗ.
Ini ŋ giñ, ŋ heya reytine.
A Nikiɗi naafohi. »
11 Nikiɗi woossa cuurnda, cuurnda huukka Yunus ŋ sereendaŋ cookma.
Ɓi Niniw ɓoƴsiɗohiɗ tumohaaɗ, Kooh ɗaasiɗ ɓa
3
1 Wa a pul ŋ cuurnda, Nikiɗi kanakɗukka woo Yunus ne :
2 « Kaɗa win-win Niniw, kur ka yakka. Kataa ɓa ini ŋ woo ɗa. »
3 Yunus gooñukka, kaɗta Niniw findi Nikiɗi woyoha. Niniw nikee kur yakoh na yakoh, a neeh kaahay onan ɓo' a tiinda ɓak po ɓak.
4 Wa a kaɗ po a aassa Niniw, a hooɓukka wil nga. A huflukka ɓi Niniw na hoosoocii : « Tasiɗ neeh ndaŋkiyaah-nikiis (40), Niniw ɗumbu ! »
5 Wa ɓi Niniw kerah woo keem, ɓa kossa Kooh ; ɓa katohha or, ɓa ɓekukka ɓi daah, ambohha ŋ ya uup yak po ŋ ya uup ƴin.
6 Wa woo ka ree ŋ nofaŋ buuraŋ Niniw, a kurukka ngaŋ ɓoofohaanaŋ ɗe, a wolukka lipkohaaɗaŋ ɗe, a ɓekukka daah, a baffa ŋ wet,
7 a woosohha ŋ ɗooƴ kur ka jen ne : « Buur na yakak ci sangohiɗ ɓooɓi na ɗoopaat ci, yakak na ƴin, ne ɓa kanaat ñam, ɓa kanaat an masuɓ, yaa nu nga ɗah, ɓekkaat daah.
8 Ɓi hooso roofiɗ koolɗu, po ngaŋ Kooh, te yaa nu nik suungɗuk tiindohaaɗiŋ ɗe sepƴiɗi, na tumohaaɗ ci otiɗ ciŋ yaah ciŋ ɗe.
9 Yaa inah andi Kooh ɓoƴsanɗi liiɓohaaɗ, andi inwaaso ambanɗi ɗe, andi a heyɗi dokne paa finho dohɗiŋ aay-keeñiŋ ɗe, po ɓoo sooƴuu ? »
10 Ndeem, Kooh inhisohha in ca ɓa haɓɗe ne ɓa pul ngaŋ tiindohaaɗ ca moɗaaɗiicaŋ ɓa. Taambohha nga inwaaso ammba Kooh ŋ in ca a kooɗkiɗee ɓa, te a mirndohɗi ca raakiɗ.
Neɓsaaɗiinaŋ Yunus na lofaŋ Kooh na ɗe
4
1 Wa Kooh ɗaas ɓi Niniw, wa neɓaaɗiisa Yunus lool, a ayrukka.
2 A woosa Nikiɗi : « Eey Nikiɗi, ina ŋ woyee wa ŋ nikoh ŋ kur ɓoo weɗi wii haa e ? E ineem tahee po ŋ ɗeɓgohha saandoh Tarsis ; ŋ inhangangeen ne, fu Koohi na baahohe, yi na yirmohe, yi yooɓɗi ayruk, yi riif na waaɗohaaɗ te inwaaso na ambee ɗa amb ŋ tum miskiɗ.
3 Teemb ndii, Nikiɗi, ɓaya kiñin kiŋ ngo, laam nga so, ŋ kaan ngisoh ŋ pes. »
4 Nikiɗi loffa : « Wi fu ayruk wii, fu nik ŋ kiyooh e ? »
5 Yunus pulla kur ka, a ɓooffa ŋ ɓak pulohaaɗ-noh ; a ɗiippa nga, a saangnukka nga a sekeeɗa ini haang raake na kur ka.
6 A nikka nga po, Nikiɗi Kooh paariɗta kidig, wa njopukka Yunus ne wa saangin hafiŋ ɗe, tee ɗah wa naaf ɗe ŋ miskiɗiŋ ɗe. Keeñaŋ Yunus soosootta ngaŋ kidga.
7 Hondohɗi, ngaŋ wiisaaɗiina, Kooh tummba cangin aassa kidga wa suyya.
8 Ɓaatta nga, wa noh pul, Kooh kurkiɗta mbooyo ; noha dammba hafaŋ Yunus po a minisɗi. A kiimmba kaan, a woosa ne : « Ŋ kaan ngisoh ŋ pes. »
9 Kooh meekissa Yunus : « Fu yii ŋ keeh weem oo, na ayruki ŋ ini na kidgii ? » A loffa : « Ee di' ! Ñam ɓur, ŋ ayruk po ŋ hee kaane. »
10 Nikiɗi dokkissa ŋ woo ka : « Fu, kidgii miskiɗ ɗa. Nikɗi haa ne ya fu taambkoha, te ya fu hooɗiɗa haa. Wa paar na wek yino, wa leeɓpa na wek yino.
11 Fu waaɗta ne mi, ŋ heeɗi miskasse ŋ ini hee rahse Niniw, kur ki yakki fu inah ne ɓo' junni teemet na alfun ndaŋkiyaah kanak (120.000) ɓii nga ɓi inhisohɗi yaah-ñaahum na yaah-sing, ɓaatta nga ɗoopaat ci minɗi reeh ! »