ssx
Yesuta꞉ Pailedi pa꞉ta꞉ hatuku pemekeeki
23
(Ma꞉tiu 27꞉1-2,11-14, Maka 15꞉1-5, Dioni 18꞉28-38)
1 Mo hande tapake paeyao tiao Yesuta꞉ mo Pailedi pa꞉ta꞉ hatuku puaata꞉ 2 ipiki ma̱leke litolo alota꞉ Nikana꞉ma꞉ta꞉ do halita꞉ nika꞉ wanda꞉hali hatuku pu hoeyaaso hata꞉ mo wanda꞉hali pa꞉ta꞉ mo Sisana꞉ dakisi mani na hala꞉pa꞉pe laata꞉ ipikita꞉ ipika꞉ kone Ketiso laa Kini hali halome la ala꞉me lemekeme. 3 Mo Pailedima꞉ Yesu pa꞉ta꞉ alota꞉ Neketa꞉ Diu wanda꞉halina꞉ kini hali halepe leekeme. Yesuma꞉ Pailedina꞉ pi hombo peaaso alota꞉ Koto aletaa leekeme.
4 Kutupa Pailedima꞉ mo yeni peao haemeke teke haliweki pa꞉ta꞉ make mo mombelemeke wanda꞉hali pa꞉ta꞉ make alota꞉ I̱ma꞉ta꞉ do hali hoeyaapeke pota꞉ ma꞉nda꞉ na handa꞉ witolome leekeme. 5 Koto leekepate mo wanda꞉halima꞉ta꞉ ota꞉ honkopu hao hata꞉ alota꞉ Ta hali ipika꞉ wala꞉la꞉ pima꞉ta꞉ mo Diudia da yu paeyao pa꞉ta꞉ hala꞉ wanda꞉hali hoke hone mea wiatia pomina꞉la꞉me. Ipikana꞉ma꞉ta꞉ mo Ka꞉lili nane kini pea a꞉paata꞉ ameta꞉ do opolo a꞉pa꞉la꞉ handa꞉e lemekeme.
Yesuta꞉ Hetodi pa꞉ta꞉ tapaeyekeeki
6 Pailedima꞉ koto lemekeeki opua mo wanda꞉hali pa꞉ta꞉ lota꞉ pitolo alota꞉ Do halita꞉ Ka꞉lili hali ya꞉ka꞉ta꞉pe leekeme. 7 Koto laata꞉ Pailedima꞉ Yesuta꞉ Hetodima꞉ handeteke hayeke da yu nane yama꞉ a꞉pa pia꞉ka꞉ta꞉me laa handa꞉ wiaata꞉ Yesuta꞉ Hetodi pa꞉ta꞉ tapaeyekeme. Ekipeke koto natena꞉ta꞉ Hetodita꞉ Diutuseleme da nane a꞉pa hayeke handa piekeme. 8 Hetodima꞉ta꞉ Yesu hando haota꞉ ta꞉na꞉ tiekema꞉ homeekeme. Pa ekipeke. Hetodima꞉ta꞉ mo Yesuma꞉ pieke ekimanu opu haota꞉ Yesu handulueke laa nate hokuluna꞉ yu wia hatia peekeme. Ipikana꞉ma꞉ta꞉ Yesuma꞉ na handeke hau ma꞉nda꞉ pina꞉e hone wia hayekeme.
9 Koto ekina꞉ Hetodima꞉ Yesu pa꞉ta꞉ anemone lota꞉ pita꞉la꞉ ekimanu wotu lota꞉ piekepate Yesuma꞉ hombo peaasa꞉eki ma꞉nda꞉ ota꞉ na piekeme. 10 Kutupa mo yeni peao haemeke you haliweki make mo Lo Pi walo haemeke haliweki paeyao teke pa꞉ta꞉ leke a꞉pa honkopu tieke haaso hata꞉ Yesu pa꞉ta꞉ ma̱leke limikime. 11 Kutupa Hetodi make ipika꞉ a꞉ndeli minimiki haliweki ame̱le̱ Yesu eto eto lao pa ale au laemekeme. Kutupa ota꞉ epeke au leke dau hokulu mea yamao paa Pailedi pa꞉ta꞉ tapaa moneayekeme. 12 Amba꞉ta꞉ Hetodi pita꞉ Pailedi yaapota꞉ a꞉nda꞉ tunkula alu pea haepekepate koto natena꞉ta꞉ ta꞉ma꞉ni pipikime.
Pailedima꞉ Yesu lina꞉ leekeeki
(Ma꞉tiu 27꞉15-26, Maka 15꞉6-15, Dioni 18꞉39—19꞉16)
13 Pailedima꞉ mo yeni peao haemeke you haliwekima꞉ make tondiki haliwekima꞉ make mo wanda꞉hali 14 paeyao pa꞉ta꞉ alota꞉ Ikana꞉ma꞉ I̱ pa꞉ta꞉ do hali hatuku ipuluta꞉ ipikana꞉ma꞉ wanda꞉hali hatuku pu hoeyaasa꞉me lemepate ameta꞉ I̱ma꞉ ipikita꞉ ika꞉ leke popelekena꞉ teke weitolopate ipikana꞉ma꞉ mo mandane pimanu yamba꞉la꞉me laa ma̱leke limipate homeke a꞉nda꞉ yamba꞉la꞉la꞉eki na handolome. 15 Kutupa Hetodima꞉ make do halima꞉ pu hoeyaala꞉ hau homeke a꞉nda꞉ na handolo hata꞉ niki teke pa꞉ta꞉ pa do tapaala꞉ handa꞉e. Ipiki lia homamonota꞉ hoke hau ma꞉nda꞉ na pa꞉la꞉me. 16 Koto ekina꞉ta꞉ I̱ma꞉ ipikita꞉ dopitama꞉ yombina꞉ laa pao pena꞉ lolueke leekeme. 17 []
18 Mo mombelemeke wanda꞉halima꞉ e̱ wi tieke alo hata꞉ alota꞉ Yesuta꞉ homena꞉ liae. Mo Batabasita꞉ pena꞉ tapawae lemekeme. 19 Koto Batabasita꞉ dipula pitieke ekita꞉ ipikana꞉ma꞉ mo daoni pa꞉ta꞉ kapomani ame̱le̱ a꞉nda꞉ lia make mandane wanda꞉hali lieke ekina꞉ piekeme. 20 Pailedina꞉ honema꞉ta꞉ Yesu tapaaluekema꞉ yeke mo wanda꞉hali pa꞉ta꞉ paa opolo peekeme. 21 Kutu piekepate mo wanda꞉halima꞉ paa pi tanda pu alualu pitolo alota꞉ A꞉ka꞉tei wape piki tina꞉ homena꞉e. A꞉ka꞉tei wape piki tina꞉ homena꞉e lemekeme.
22 Pailedima꞉ paa hoto tepo peao alo alota꞉ Koto pa꞉la꞉pate ipikana꞉ma꞉ ekipiki pi ata꞉ka꞉ peala꞉pe. I̱ma꞉ta꞉ ipikana꞉ma꞉ homa꞉peke hau ma꞉nda꞉ na pa꞉la꞉ ekina꞉ ipikita꞉ pa dopitama꞉ yombina꞉ laa paa tapalueke leekeme. 23 Koto leekepate mo wanda꞉halima꞉ta꞉ poya꞉ tieke wotu alo hata꞉ Yesuta꞉ ota꞉ a꞉ka꞉tei wape piki tina꞉ endina꞉ laa lemeke e̱ wi ota꞉ yaeyekeme. 24 Koto ekina꞉ Pailedima꞉ Yesu homena꞉e lemekeeki telia piekeme.
25 Ipikana꞉ma꞉ mo wanda꞉halima꞉ pena꞉e lemeke halita꞉ pena꞉ tapaeyekeme. Mo hande kapomani pa꞉ta꞉ a꞉nda꞉ lia make mandane wanda꞉hali lieke some kone pena꞉ tapaeyekeme. Kutupa Yesuta꞉ mo wanda꞉halima꞉ ika꞉ hone pa꞉la꞉eki pina꞉yeke hala꞉ moneayekeme.
Yesuta꞉ a꞉ka꞉tei wape piki tina꞉ ta mea endiao limikieki
(Ma꞉tiu 27꞉32-44, Maka 15꞉21-32, Dioni 19꞉17-27)
26 Mo hande dolo miniki haemeke haliwekima꞉ta꞉ Yesu hatuku pulu haena꞉ta꞉ Saitini da hali ma꞉nda꞉ Saimono manda꞉hande pimikime. Ipikita꞉ mo kenke honiki nane hao oni daoni tieke aneke pa꞉ta꞉ opolo ipulu haena꞉ pimikime. Mo dolo miniki haemeke haliwekima꞉ta꞉ Saimono yola꞉ meata꞉ mo Yesuna꞉ a꞉ka꞉tei wape piki ti mea tiawao Yesuna꞉ hoki nane telia꞉ mea epena꞉ lemekeme.
27 Wanda꞉hali tiekema꞉ Yesu telia꞉ mea pemekeme. Koto wanda꞉hali ame̱le̱ta꞉ mandane wanda꞉ sunuta꞉ puki yoka hata꞉ Yesuna꞉ e̱ wopu lemekeme. 28 Koto ekina꞉ Yesuma꞉ la꞉ka꞉la꞉ moneaaso hata꞉ alota꞉ Diutuseleme da wanda꞉sunuo. I̱na꞉ e̱ na leketa꞉ ika꞉ kone make ika꞉ wekiwandikina꞉ e̱ lapa꞉peke. 29 Pa ekipeke mo wetepena꞉ ipula꞉ nate ma꞉nda꞉ nina꞉ta꞉ ikana꞉ma꞉ dupiki pi lelimikie. Mo kenohali wanda꞉weki make hololuku hake piki wanda꞉weki make andu liki na sinkipa꞉la꞉ wanda꞉weki pa꞉ta꞉ta꞉ ta꞉na꞉ma꞉ homelememe lelimikie. 30 Koto natena꞉ta꞉ wanda꞉halima꞉ oli potemanu pa꞉ta꞉ta꞉ Niki manda lopa꞉e laata꞉ mo yu elimanu pa꞉ta꞉ta꞉ Niki mea a꞉mbae lelimikie. 31 Pa ekipeke dupiki haumanu a꞉nda꞉ pilia꞉ta꞉ mo hande ti a꞉nda꞉ taniso̱ kiki pina꞉ pia꞉ka꞉na꞉ta꞉ kota꞉ hapina꞉ta꞉ eki pilia꞉pe leekeme.
32 Hali yaapo ma꞉nda꞉ ipilikita꞉ hoke hau pipiki some yaapo make Yesu ame̱le̱ mandakena꞉ lu endialuekema꞉ yeke hatuku pemekeme. 33 Kutupa mo hande haliwekita꞉ mo yueli ma꞉nda꞉ wiekeeki ipika꞉ bikita꞉ Hali You Holiki lemeke alena꞉ a꞉pa ikana꞉ma꞉ Yesu a꞉ka꞉tei wape piki tina꞉ lu endiaemekeme. Kutupa mo hande hoke hau pipiki some yaapo make homeke tupa꞉ lu endiaemekeme. Ma꞉nda꞉ta꞉ Yesuna꞉ popeke nane kikina꞉ endiao ma꞉nda꞉ta꞉ hoe nane kikina꞉ endiaemekeme. 34 Yesuma꞉ alota꞉ Apa꞉o. Do wanda꞉halima꞉ piteleme hauta꞉ iki hone na witolo pitelemema꞉ nakana꞉ma꞉ pa paeyawapeke leekeme.
Kutupa mo dolo miniki haliwekima꞉ta꞉ Yesuna꞉ daumanu telipaaluekema꞉ kase tupa꞉ telepo laemekeme. 35 Mo wanda꞉halima꞉ handolo haena꞉ mo Diu wanda꞉halina꞉ you haliwekima꞉ Yesu kitaaso hata꞉ dupa lemekeme. Mandane wanda꞉halita꞉ pa꞉ta꞉la꞉tiki piekepate ipikita꞉ hande Koda꞉ma꞉ ma̱leke lila꞉ Ketiso haya꞉ka꞉na꞉ta꞉ kota꞉ ipika꞉ kone petelena꞉e lemekeme. 36 Mo a꞉ndeli dolo miniki haemeke haliwekima꞉ make Yesu makeaaso hata꞉ ipiki pa꞉ta꞉ a꞉pa hoke waini ikali halolo hata꞉ 37 alota꞉ Neketa꞉ hande Diu wanda꞉halina꞉ Kini hali ya꞉ka꞉na꞉ta꞉ kota꞉ naka꞉ kone pa꞉ta꞉la꞉e lemekeme. 38 Kutupa Yesuna꞉ amboke mandata꞉ dupa laemekeme. Dota꞉ Diu Wanda꞉halina꞉ Kinie Halie laa wape pea endiaemekeme.
39 Mo hande pi yambeleeke some ma꞉nda꞉ma꞉ tetopiki pimanu la꞉ moneaso alota꞉ Neketa꞉ hande Ketiso dia꞉ya꞉ka꞉ta꞉pe. Neke make diki make pa꞉ta꞉la꞉taa leekeme. 40 Koto leekepate mo hande pi yambeleeke some ma꞉nda꞉ma꞉ mo some kake nalo hata꞉ alota꞉ Kutupiki pi na lapee laata꞉ Neketa꞉ Koda꞉ paala꞉ na pa꞉la꞉pe. Neke make ipikana꞉ma꞉ mina꞉la꞉ tanda kone mineleme. 41 Dikita꞉ dika꞉ pupa꞉ ekina꞉ yenki ana꞉na꞉ minolopa꞉pate ipiki homeke hau ma꞉nda꞉ na pa꞉la꞉me laa 42 mo halima꞉ Yesu pa꞉ta꞉ alota꞉ Yesuo. Neke Kini hali ipilipi dina꞉ta꞉ I̱ hone wia꞉peke leekeme. 43 Kutupa Yesuma꞉ ipiki pa꞉ta꞉ alota꞉ I̱ma꞉ neke pa꞉ta꞉ ota꞉ pi la꞉ witolome. Ame do natena꞉ kone I̱ yaapo oli Pa꞉ta꞉daisi nane mandakena꞉ halupeke leekeme.
Yesu ota꞉ homeekeeki
(Ma꞉tiu 27꞉45-56, Maka 15꞉33-41, Dioni 19꞉28-30)
44 Nate you tikeke nate nina꞉ta꞉ hande nate tala꞉eki a꞉mbaota꞉ timba꞉ tiekema꞉ da yu honiki paeyao tumbaota꞉ nate leke tepo nina꞉ta꞉ mo pa̱a̱ paa piekeme. 45 Kutupa mo hande tembolo da pa꞉ta꞉ endiaemeke dauta꞉ tekilipualu pea yaapo wiekeme.
46 Yesuma꞉ anekema꞉ e̱ wi alo alota꞉ Apa꞉o. Yaka temokota꞉ naka꞉ kikina꞉ koto witolo handa꞉e laata꞉ ota꞉ homeekeme. 47 Mo hande ami haliwekina꞉ you halima꞉ mo piekeeki hando haota꞉ Koda꞉na꞉ biki mea miniliaaso hata꞉ alota꞉ Ipikita꞉ ota꞉ epeke hali yekeme leekeme.
48 Kutupa mo hande hau handuluekema꞉ mombelemeke wanda꞉hali paeyaoma꞉ta꞉ mo piekeeki hando haota꞉ a꞉ta꞉ma꞉ homolo hata꞉ ika꞉ hakoko lutia pulu hata꞉ pao da la꞉ka꞉la pemekeme.
49 Yesu ota꞉ handaa hone wimiki wanda꞉hali make ipiki Ka꞉lili nane kini pea telia꞉ mea epemeke wanda꞉ sunuma꞉ make mo pate leke hata꞉ do hau paeyao handemekeme.
Yesu toko mea hoimikieki
(Ma꞉tiu 27꞉57-61, Maka 15꞉42-47, Dioni 19꞉38-42)
50-51 Mo Diudia nane wieke daoni ma꞉nda꞉ A꞉ta꞉matia da hali Diosepe hayekeme. Ipikita꞉ ota꞉ epeke tiki tiki hau pu hake hali hao hata꞉ Koda꞉na꞉ Kilu Tombuao Hala꞉eki ipula꞉eki yu wia hao hayekeme. Ipikita꞉ mo Ka̱le̱sete haliweki ma꞉nda꞉ hondo hayekepate kone ipikana꞉ma꞉ mo haliweki ame̱le̱ apa꞉tao pimanu make hau ma꞉nda꞉ make na piekeme. 52 Ipikana꞉ma꞉ mo Pailedina꞉ leke popelekena꞉ pua Yesuna꞉ toko honke leekeme. 53 Kutupa ipikana꞉ma꞉ Yesuna꞉ toko hondaata꞉ hakepiki dauma꞉ tonkao mea tia puaata꞉ toopi anekema꞉ peiyekeeki awa wimiki tikene dama꞉ handeke ale pa꞉ta꞉ lapa꞉ piekeme. Mo koto lapa꞉ pa꞉ta꞉ta꞉ ota꞉ ma꞉nda꞉ make na hoimikieki yekeme. 54 Mo nateta꞉ Palaide yaalo mo hande Hoto Pila꞉ Nate amba꞉ kini puluekema꞉ pitiekeme.
55 Kutupa mo hande Ka꞉lili kini pea Yesu telia꞉ mea epemeke wanda꞉ sunuma꞉ta꞉ Diosepe ame̱le̱ pua mo Yesu lapa꞉ piekeeki handemekeme. 56 Kutupa paa la꞉ka꞉la da puaata꞉ mo Yesuna꞉ lokena꞉ holo pimiki totopo piki honkumanu amu pimikime. Kutupata꞉ mo Lo Pima꞉ leeke tupa꞉ hande hoto pila꞉ natena꞉ yaalo hoto pitimikime.
Yesu paa tiaeyekeeki
24
(Ma꞉tiu 28꞉1-10, Maka 16꞉1-8, Dioni 20꞉1-10)
1 Sande da panake ka꞉la꞉ polo nate epolo haena꞉ta꞉ mo wanda꞉ sunuma꞉ Yesuna꞉ lapa꞉ nane mo hande tiki tiki yaemeke totopo wopu piki honkumanu miniki pemekeme. 2 Mo alena꞉ opolo pemekepate mo hande pota꞉ pokeeke toopi tieketa꞉ pete pete yao wiekeeki handaata꞉ 3 honda꞉ pambemekepate mo Tekehali Yesuna꞉ loketa꞉ na wiekeme. 4 Mo wanda꞉ sunuta꞉ koto pa꞉ta꞉ hata꞉ hone ti yokolo haena꞉ koto kone hake pupapeke leke yala꞉ yala꞉ piki aka꞉ yama꞉ mea hali yaapo a꞉pa haepekeme. 5 Koto ekina꞉ ota꞉ paala꞉ tiekema꞉ homolo hata꞉ mo wanda꞉ sunuta꞉ kenke nane you mina꞉niao haena꞉ mo hali yaapoma꞉ alota꞉ Ekipeke mo amba꞉ da꞉ta hala꞉ halita꞉ mo hali toko u hala꞉ alena꞉ weitelemepe. 6 Ipikita꞉ do pa꞉ta꞉ na ula꞉me. Ipikita꞉ amba꞉ tiao pa꞉la꞉me. Mo hande ipiki Ka꞉lili hata꞉ lea꞉eki manuta꞉ niminaasemepe. 7 Dupa lea꞉me. Mo Wanda꞉halina꞉ Eiyeketa꞉ mo hoke hau pu haleme haliwekina꞉ kikina꞉ hala꞉ moneaota꞉ a꞉ka꞉tei wape piki tina꞉ tame mea endiao liaata꞉ kutupa hoto tepo peao natena꞉ta꞉ paa tialieke laa lea꞉me lepekeme.
8 Kutupa mo wanda꞉wekima꞉ Yesuna꞉ pi leekeeki niminaota꞉ 9 mo lapa꞉ mina꞉pa꞉lao puaata꞉ hande handemekeeki paeyao mo 11 disaipolo haliweki make mandane disaipolo wanda꞉hali paeyao pa꞉ta꞉ lemekeme. 10 Koto wanda꞉ sunuta꞉ Meti Ma꞉kadala make Dioa꞉na make Dia꞉mesina꞉ inkiki Meti make iki ame̱le̱ haemeke mandane wanda꞉ sunuma꞉ mo pieke haumanu mo aposolo haliweki pa꞉ta꞉ la halemekeme. 11 Kutu lemekepate mo aposolo haliwekima꞉ta꞉ mo wanda꞉ sunuma꞉ lemeke pita꞉ apa꞉ta apa꞉ta piki pi alememe laa hone na wimikime. 12 Kutu piekepate Pidama꞉ta꞉ mo lapa꞉ handulueke alo pototo laa mo toopi ka꞉ka꞉na꞉ pa꞉ta꞉ pua panda꞉ puniao ala꞉ta꞉ ma꞉nda꞉ na handeekepate mo tonkaeyeke aka꞉ hake piki homeke handeekeme. Kutupa moeki handolo hata꞉ penkilipa꞉tia pominolo hata꞉ paa la꞉ka꞉la da peekeme.
Yesuta꞉ mo Emeiase pota꞉na꞉ handepekeeki
(Maka 16꞉12-13)
13 Koto homeke natena꞉ kone Yesu telia꞉ mea pomu haepeke hali yaapo ma꞉nda꞉ta꞉ oni Emeiase leeke da siki ma꞉nda꞉ pa꞉ta꞉ polueke alo pepekeme. Mo da sikita꞉ mo Diutuseleme daoni mina꞉pa꞉lao 3 aowa tupa꞉ opolo pula꞉ da yekeme. 14 Kutupa mo hali yaapoma꞉ta꞉ hande piekeeki manuna꞉ ipilika꞉ ipilika꞉ kone pi hotipipikime. 15 Ipilikana꞉ma꞉ pi laa hotitia pulu haena꞉ta꞉ Yesuta꞉ ipiliki teke pa꞉ta꞉ leke pua mandakena꞉ pemekeme. 16 Ipilikana꞉ma꞉ ipikita꞉ handepepekepate Yesue laa na handa꞉ wipikime.
17 Yesuma꞉ mo hali yaapo pa꞉ta꞉ alota꞉ Koto pulu hata꞉ta꞉ ipilikana꞉ma꞉ta꞉ aleke pi hotia꞉lepepe leekeme. Mo hali yaapota꞉ a꞉ta꞉ piki leke popeleke hata꞉ poneke ale haepekeme. 18 Ma꞉nda꞉ hondo Keliopasi leeke halima꞉ ipiki pa꞉ta꞉ lota꞉ pitolo alota꞉ Mo Diutuseleme daoni pa꞉ta꞉ a꞉pa haleme kimisu wanda꞉hali ame̱le̱ta꞉ hande ambaneke numaneke pia꞉ hau manuta꞉ neke homeke na opelepe leekeme. 19 Yesuma꞉ alota꞉ Eki hau manupe leekeme.
Kutupa mo hali yaapoma꞉ alota꞉ Mo hande Na꞉sa꞉tete hali Yesu pa꞉ta꞉ pia꞉ hau manuna꞉ lopa꞉me. Do halita꞉ potopede yaalo hata꞉ Koda꞉ma꞉ make wanda꞉hali paeyaoma꞉ make ipika꞉ pia꞉ hau manuma꞉ make leeke pimanu make honkopu wele pa꞉la꞉ halie lememe. 20 Kutupa nika꞉ yeni peao haleme you haliwekima꞉ make handeteke haleme haliwekima꞉ make ipikita꞉ a꞉ka꞉tei wape piki tina꞉ tame mea endiao lu homaena꞉ yeke hala꞉ moneaemekeme. 21 Kutupa nika꞉ honema꞉ta꞉ ipikana꞉ma꞉ta꞉ mo Isulai wanda꞉hali lombo tapaalo pa꞉la꞉ halie hone uma꞉me. Koto haumanu pa꞉la꞉ ekita꞉ ameta꞉ tepo peao natee. 22 Kutupata꞉ mandane nika꞉ tapake wanda꞉ sunuma꞉ niki penkilipaememe. Ikita꞉ da ka꞉la꞉paaso siki mo lapa꞉na꞉ pemekepate 23 ipika꞉ loke na handa꞉ wimikime. Mo wanda꞉weki paa la꞉ka꞉la a꞉pa alota꞉ U̱ leme leme leke enisolo manuma꞉ Yesuta꞉ tiao da꞉ta hala꞉me laa lemekeeki niki a꞉pa la kimime. 24 Koto lemeke nika꞉ mandane tapake pua mo lapa꞉ pemekepate pa mo hande wanda꞉wekima꞉ lemeke tupa꞉ kone pua handa alota꞉ Yesuta꞉ na handoma꞉me lememe lepekeme.
25 Kutupa Yesuma꞉ mo hali yaapo pa꞉ta꞉ alota꞉ Meimei liake some yaapoo. Mo hande potopede halima꞉ leeke pimanu homeke a꞉nda꞉ hone a̱i̱ na tulao pipika꞉ta꞉me. 26 Mo Ketisoma꞉ta꞉ titina꞉ amba꞉la tanda meaata꞉ wetepena꞉ oli ipika꞉ pa̱a̱ peaasa꞉eki pa꞉ta꞉ honda꞉ pambolota꞉ ana꞉ na pa꞉la꞉pe laa leekeme. 27 Kutupa Yesuma꞉ iki pa꞉ta꞉ mo Baibolo paeyaona꞉ ipika꞉ pi lao ula꞉eki paeyao la haleekeme. Ipikana꞉ma꞉ mo Mosesina꞉ buka manuna꞉ kini pea a꞉pa mo potopede manuma꞉ lao wieke ekimanu lo paeyaeyekeme.
28 Kutupata꞉ iki paeyao mo polo pimiki da siki teke pa꞉ta꞉ yeketa꞉ Yesuta꞉ mo pateleke peke nono piekeme. 29 Pate mo hali yaapoma꞉ sa꞉sa꞉ pitolo hata꞉ alota꞉ Timba꞉ amba꞉ ala꞉me. Diki ame̱le̱ hae lepekeme. Koto lepeke Yesuta꞉ mo hali yaapo ame̱le̱ haluekema꞉ da peekeme. 30 Kutupa mo hali yaapo ame̱le̱ ne nolueke alo pitiniaota꞉ Yesuma꞉ mo betedi mea keiyae laata꞉ pindipa mo hali yaapo haleekeme. 31 Kutu pitolo pitina꞉ mo hali yaapoma꞉ ipilika꞉ hone lombolo Yesu ya꞉ka꞉ta꞉me laa handa꞉ wipiki dina꞉ kone Yesuta꞉ koto pa꞉ta꞉ pitiki nono pea alu paeyekeme. 32 Mo hali yaapoma꞉ ipilika꞉ kone alota꞉ Mo hande pota꞉na꞉ hande Baibolona꞉ la꞉la꞉ ekimanu laa kieketa꞉ dika꞉ tukiki naneta꞉ ti uleke leke na teekea lepekeme.
33 Kutupa koto kone mo hali yaapota꞉ tiao paa Diutuseleme nane pua mo 11 disaipolo haliweki make mandane disaipolo haliweki ame̱le̱ momba꞉la pita꞉ 34 hande Tekehalita꞉ ota꞉ da꞉ta hata꞉ Saimono pa꞉ta꞉ ipiki peneme yaala꞉me laa hotiolo pitimiki ale pa꞉ta꞉ opolo pepekeme. 35 Kutupa ipilikana꞉ma꞉ mo hande pota꞉na꞉ pieke ekimanu make Yesuma꞉ betedi pindipina꞉ handa꞉peke ekimanu make mo wanda꞉hali pa꞉ta꞉ la halepekeme.
Disaipolo haliweki paeyaoma꞉ Yesu handemekeeki
(Ma꞉tiu 28꞉16-20, Maka 16꞉14-18, Dioni 20꞉19-23, Aposolo 1꞉6-8)
36 Mo hande hali yaapoma꞉ moeki alo haena꞉ta꞉ koto kone mo Tekehali ipika꞉ kone iki ame̱le̱ mandakena꞉ peneme yao hata꞉ alota꞉ Puki lopaasa꞉eki iki pa꞉ta꞉ wina꞉e leekeme. 37 Mo wanda꞉hali paeyao pututu tiekema꞉ homolo hata꞉ ika꞉ honema꞉ta꞉ temoko handoloma꞉me hone wimikime. 38 Pate Yesuma꞉ iki pa꞉ta꞉ alota꞉ Ekipeke paala꞉ma꞉ homelemepe. Ika꞉ hone pa꞉ta꞉ta꞉ hone yaapo yaapo ekipeke witelemepe. 39 Yaka kiki anke handolota꞉ ota꞉ I̱ ya꞉ka꞉ta꞉me lapa꞉peke. I̱ wataemeka꞉na꞉ta꞉ ota꞉ I̱e hone wilimikie. Watae. I̱ta꞉ temoko yoluta꞉ loke make holiki make na halo pua꞉pate ikana꞉ma꞉ta꞉ I̱ta꞉ holiki hao loke haloeki handa꞉pe laa leekeme. 40 Yesuma꞉ doeki laata꞉ ipika꞉ kiki anke waleekeme. 41 Kutu piekepate ikana꞉ma꞉ ta꞉na꞉ tiekema꞉ tumbitolo hata꞉ hone ti yokolo hata꞉ hone na tulaemeke handaa Yesuma꞉ iki pa꞉ta꞉ alota꞉ Napeke ale ma꞉nda꞉ wia pilimipe leekeme. 42 Koto leeke ikana꞉ma꞉ ta꞉peli teekeeki siki halemeke handaa 43 mea ika꞉ leke popelekena꞉ neekeme.
44 Kutupa Yesuma꞉ iki pa꞉ta꞉ alota꞉ Do hau manuta꞉ hande I̱ ame̱le̱ haeme dina꞉ la kua꞉ ekimanue. Mo hande Mosesina꞉ Lo Pi wape pea ula꞉ ekina꞉ make hande potopede haliwekima꞉ wape pea ula꞉ ekina꞉ make hande Emeli bukana꞉ wape pea ula꞉ ekina꞉ make I̱na꞉ lao ula꞉eki manuta꞉ ota꞉ yaapeke ya꞉la꞉me leekeme. 45 Kutupa Yesuma꞉ mo wanda꞉halina꞉ honemanu lumbao mo Baiboloma꞉ leeke ekimanu opina꞉ laa 46 iki pa꞉ta꞉ alota꞉ Dupa wape pea ula꞉me. Hande Ketisota꞉ tanda amba꞉la ota꞉ mea homaata꞉ hoto tepo peaasota꞉ ota꞉ paa tialieke laa wape pa꞉la꞉me. Kutupa make 47 ipika꞉ bikina꞉ mo hoke hauna꞉ hone la꞉ka꞉la꞉la꞉eki make pa paeyaasa꞉eki make mo Diutuseleme da pa꞉ta꞉ kini pea pua mo kenke honiki paeyao pa꞉ta꞉ haleme wanda꞉hali pa꞉ta꞉ ota꞉ walotia pua꞉pa꞉peke ya꞉la꞉me. 48 Ikita꞉ do hau manuna꞉ wekitisie. 49 Kutupa I̱ma꞉ta꞉ yaka Apa꞉ma꞉ amba꞉ kone la꞉ ula꞉ ale iki pa꞉ta꞉ tapalueke. Pate ikana꞉ma꞉ta꞉ do daoni tieke pa꞉ta꞉ mo hande wele pa꞉la꞉eki tieke oli ya nane iki pa꞉ta꞉ epena꞉ yu wia pita꞉pa꞉peke ya꞉la꞉me leekeme.
Yesu oli ya nane mea peekeeki
(Maka 16꞉19-20, Aposolo 1꞉9-11)
50 Kutupa Yesuma꞉ mo wanda꞉hali hatuku mo daoni tieke mina꞉pa꞉lao mo Bedani puaata꞉ ipika꞉ kiki mina꞉liao mo wanda꞉hali epeaeyekeme. 51 Kutu pitolo haena꞉ta꞉ Yesuta꞉ iki mina꞉pa꞉lao oli hepeni nane hatuku peekeme. 52 Mo wanda꞉halima꞉ Yesuna꞉ biki miniliaaso hata꞉ ta꞉na꞉ tiekema꞉ tumbitolo hata꞉ mo Diutuseleme da nane la꞉ka꞉la paa pemekeme. 53 Kutupa ikana꞉ma꞉ mo tembolo da pa꞉ta꞉ Koda꞉ pa꞉ta꞉ keiyae alo hata꞉ ika꞉ nate lekemanu paeyaemekeme.
Dionima꞉ wape pieke Pi Seliapoe
Deto hala꞉ Pi
1
1 Amba꞉ titina꞉ do kenke ya yaapo a̱i̱ na wepia wina꞉ leeke pita꞉ta꞉ mo hande Pita꞉ hao hayekeme. Ipikita꞉ Koda꞉ yaapo hao hayekepate Koda꞉ hayeke tupa꞉ kone ipiki make hayekeme. 2 Ipikita꞉ mo kini pieke pa꞉ta꞉ kone Koda꞉ yaapo mandakena꞉ hao hayekeme. 3 Koda꞉ma꞉ leeke handaata꞉ mo hande Pima꞉ta꞉ ala꞉ta꞉ ala꞉ta꞉ paeyao wepia wina꞉ leekepate aleta꞉ ma꞉nda꞉siki kone Koda꞉ma꞉ ipika꞉ honumake hata꞉ na wepia wina꞉ leekeme. 4 Mo hande Pi pa꞉ta꞉ta꞉ da꞉ta꞉la꞉eki pitiekeme. Kutupa mo da꞉ta꞉la꞉ ekita꞉ kenke wanda꞉halina꞉ pa̱a̱ peaasa꞉eki pitiekeme. 5 Mo hande pa̱a̱ peaasa꞉ ekima꞉ta꞉ mo timba꞉ la꞉pa pula꞉ pa꞉ta꞉ pa̱a̱ peaasa꞉pate kone mo hande timba꞉ la꞉la꞉ ekima꞉ta꞉ pa̱a̱ pa꞉la꞉eki na honiao hala꞉me.
6 Koda꞉ma꞉ ipika꞉ pi mea epena꞉ tapaeyeke halita꞉ Dioni tapaeyekeme. 7 Kutupa Dionima꞉ta꞉ mo hande pa̱a̱ pa꞉la꞉ ekita꞉ wanda꞉hali waluekema꞉ epeekeme. Kutupa wanda꞉hali paeyaoma꞉ ipikana꞉ma꞉ mea epeeke pi opua pi mina꞉yeke handa loluekema꞉ epeekeme. 8 Dionima꞉ta꞉ mo hande pa̱a̱ na peaeyekepate ipikana꞉ma꞉ta꞉ mo hande pa̱a̱ pa꞉la꞉ ekita꞉ wanda꞉hali pa꞉ta꞉ waluekema꞉ epeekeme. 9 Mo hande pa̱a̱ pa꞉la꞉ ekita꞉ ota꞉eki yaalo hata꞉ kenke paeyao pa꞉ta꞉ a꞉paata꞉ wanda꞉hali paeyaona꞉ pa̱a̱ peao hala꞉me.
10 Kutupa mo hande Pita꞉ kenkena꞉ a꞉pa hayekeme. Koda꞉ma꞉ leeke handa ala꞉ta꞉ ala꞉ta꞉ paeyao ipikana꞉ma꞉ wepia wina꞉ leekepate kenke wanda꞉halima꞉ta꞉ ipiki hone na wimikime. 11 Ipikita꞉ ipika꞉ kenke teke nane epeekepate kone ipika꞉ wanda꞉halima꞉ ipiki na handa꞉ mimikime. 12 Kutu pimikipate mandane wanda꞉halima꞉ta꞉ ipiki handa꞉ meata꞉ ipiki pa꞉ta꞉ hone tulao hatiki pimikime. Kutu pimiki handaata꞉ koto wanda꞉halita꞉ Koda꞉na꞉ weki wandiki haena꞉ leekeme. 13 Koto ekina꞉ Koda꞉ma꞉ mo wanda꞉halita꞉ ipika꞉ weki wandiki haena꞉ leekepate kenke halima꞉ mendiaasa꞉ tupa꞉ na mendiaeyekeme. Koda꞉ kone ika꞉ apa꞉ hayekeme.
14 Mo hande Pita꞉ hali au la a꞉pa niki ame̱le̱ haya꞉me. Ipika꞉ pa̱a̱ pu hala꞉eki pa a꞉ta꞉ma꞉ homa꞉la꞉eki make ota꞉ hau pita꞉la꞉eki make tumba pitia꞉eki nikana꞉ma꞉ handoma꞉me. Koto hande pa̱a̱ pu hala꞉ ekita꞉ ipikita꞉ Atekena꞉ Eiyeke homeke kone hata꞉ miekeme.
15 Dionima꞉ Yesu hala꞉eki niki pa꞉ta꞉ la kuluekema꞉ wi la alota꞉ I̱ma꞉ amba꞉ hande lo haowa꞉ ekita꞉ dupae. Ya hoki nane ipilie halita꞉ I̱ na mendiki haena꞉ kone ipiki amba꞉la hao hayeke ekima꞉ I̱ ankulala꞉me. Kutupa hande lo haowa꞉ ekita꞉ ameta꞉ do hali pa꞉ta꞉ loa꞉me.
16 Ipika꞉ pa a꞉ta꞉ma꞉ homa꞉la꞉eki tumba hala꞉eki mea niki kia꞉tiki kia꞉tiki peaata꞉ niki paeyao amba꞉ epeaala꞉me. 17 Koda꞉ma꞉ta꞉ mo hande Lo Pimanu niki pa꞉ta꞉ la kina꞉yeke Mosesi pa꞉ta꞉ la haleekeme. Kutu piekepate pa a꞉ta꞉ma꞉ homa꞉la꞉eki make ota꞉ hau pita꞉la꞉eki make Yesu Ketisoma꞉ mea a꞉paeyekeme. 18 Hali homeke ma꞉nda꞉ma꞉ Koda꞉ ota꞉ na handeekeme. Kutu piekepate Eiyeke homekema꞉ homeke Koda꞉ tupa꞉ hata꞉ Atekena꞉ popeke nane kikina꞉ pila꞉ halima꞉ kone ipikana꞉ma꞉ niki la ka꞉la꞉me.
Bapitaisi peao hayeke hali Dionina꞉ pi
(Ma꞉tiu 3꞉1-12, Maka 1꞉1-18, Luku 3꞉1-18)
19 Dionima꞉ koto leeke ekina꞉ mo Diutuseleme nane haemeke Diu haliwekima꞉ta꞉ yeni peao haemeke haliwekima꞉ make Lipae tapake haliwekima꞉ make Dioni pa꞉ta꞉ Neketa꞉ epika꞉ta꞉pe laa lota꞉ pulu pena꞉ tapaemekeme. 20 Dionima꞉ta꞉ Ika꞉ pi I̱ma꞉ na hombo peaalueke pi na leke ipikana꞉ma꞉ ota꞉ ka꞉la꞉pa꞉ bao alota꞉ I̱ta꞉ Ketiso dia꞉me la leekeme. 21 Koto leeke mo haliwekima꞉ ipiki lota꞉ pitolo alota꞉ Kota꞉ neketa꞉ epi ya꞉ka꞉ta꞉pe. Neketa꞉ Elaidiape lemekeme. Dionima꞉ ika꞉ pi hombo peaaso alota꞉ I̱ta꞉ koto hali dia꞉me leekeme. Mo haliwekima꞉ paa lota꞉ pitolo alota꞉ Neketa꞉ mo hande Potopede halipe lemekeme. Dionima꞉ ika꞉ pi hombo peaaso alota꞉ Dia꞉me. I̱ta꞉ koto hali dia꞉me leekeme. 22 Mo haliwekima꞉ alota꞉ Neke haleeki niki pa꞉ta꞉ la kie laata꞉ Nikana꞉ma꞉ opua niki tapaeme haliweki pa꞉ta꞉ lolo pomonoyeke neke haleeki kone nakana꞉ma꞉ eki pi lelipikipe lemekeme. 23 Dionima꞉ ika꞉ pi hombo peaaso alota꞉ I̱ halo ekita꞉ dupae. Hali homekema꞉ mo hapu hala꞉ alena꞉ hata꞉ wi ala꞉ ekita꞉ dupae. Tekehali epena꞉yeke pota꞉ tikitikina꞉ pilaapa꞉peke. Koto leeke pita꞉ mo potopede hali Aisayama꞉ wape pieke pi kone leekeme.
24 Mo lota꞉ pulu pena꞉ tapaemeke haliwekita꞉ mo Pa꞉tisi haliwekima꞉ tapaemekeme. 25 Mo haliwekima꞉ Dioni lota꞉ pitolo alota꞉ Neketa꞉ Ketiso make Elaidia make mo hande Potopede hali make na hata꞉ kone ekipeke wanda꞉hali bapitaisi peao halepe lemekeme. 26 Dionima꞉ ika꞉ pi hombo peaaso alota꞉ I̱ma꞉ta꞉ wanda꞉hali ikalima꞉ bapitaisi peaaso halopate iki tukiki pa꞉ta꞉ hala꞉ hali ma꞉nda꞉ ikana꞉ma꞉ na handelememe. 27 Koto halita꞉ ya hoki nane ipula꞉pate ipika꞉ anke dake limbiti pa꞉la꞉ pu I̱ma꞉ ka꞉la꞉papeke ana꞉ na pa꞉la꞉me leekeme.
28 Koto hau pimiki ekita꞉ mo Bedani da pa꞉ta꞉ mo Diodani ikali mone tea꞉na꞉ Dionima꞉ bapitaisi peaeyeke alena꞉ hata꞉ pimikime.
Koda꞉na꞉ Sipisipi Ma꞉na꞉na꞉ Ikiki
29 Da kelepeeketa꞉ Dionima꞉ ipiki pa꞉ta꞉ Yesu epeekeeki handolo hata꞉ alota꞉ Koda꞉ ipika꞉ Sipisipi Ma꞉na꞉siki koto ipula꞉ma꞉ handa꞉pe laa ipikana꞉ma꞉ kenke wanda꞉hali paeyaona꞉ hoke hau peleme ekimanu mea pula꞉me. 30 Hande loa꞉ ale hali ma꞉nda꞉ yaka hoki nane ipiliepate I̱ na mendiki haena꞉ kone ipikita꞉ amba꞉ hao hayeke ekima꞉ I̱ ankulala꞉me loa꞉me laata꞉ 31 Hande halita꞉ epipe laa hone na ua꞉pate I̱ma꞉ Isulai wanda꞉hali paeyao pa꞉ta꞉ waluekema꞉ ikalima꞉ wanda꞉hali bapitaisi peaalo epoa꞉me leekeme.
32 Dionima꞉ta꞉ pi la halolo hata꞉ dupiki pi leekeme. Hande melipuma꞉ handeke ba a̱i̱ya hola꞉pa꞉niaasa꞉ tupa꞉ mo Sipitidita꞉ hepeni nane hao hola꞉pa꞉niao a꞉pa ipiki pa꞉ta꞉ pitia꞉eki I̱ma꞉ handoa꞉me laa 33 Koto pita꞉ kone I̱ma꞉ mo hali epipe hone na ua꞉pate hande ikalima꞉ wanda꞉hali bapitaisi peaalo pono I̱ tapaeya꞉ Koda꞉ma꞉ I̱ pa꞉ta꞉ alota꞉ Mo hande Holi Sipitidita꞉ hola꞉pa꞉niao a꞉pa hali ma꞉nda꞉ pa꞉ta꞉ pila꞉eki handilipikie laa koto halima꞉ta꞉ Holi Sipitidima꞉ wanda꞉hali bapitaisi peao hala꞉me lea꞉me laa leekeme. 34 Dionima꞉ alota꞉ Koto ekita꞉ I̱ma꞉ handoa꞉me. Koto ekina꞉ ipikita꞉ Koda꞉na꞉ Eiyeke hala꞉eki iki pa꞉ta꞉ la kitolome leekeme.
Amba꞉ titina꞉ Yesuna꞉ hoki nane telimiki haliweki
35 Da kelepeeketa꞉ Dioni make ipika꞉ disaipolo hali yaapo make koto pa꞉ta꞉ paa a꞉pa hata꞉ta꞉ 36 Yesu yapeekeeki handaata꞉ ipikana꞉ma꞉ alota꞉ Dota꞉ Koda꞉ ipika꞉ Sipisipi Ma꞉na꞉sikie leekeme. 37 Mo hande disaipolo hali yaapoma꞉ koto leeke pi opuaata꞉ Yesu ame̱le̱ mandakena꞉ pemekeme. 38 Yesuma꞉ la꞉ka꞉la꞉ mina ipiki telia꞉ mea epepekeeki handaa ipiliki lota꞉ pitolo alota꞉ Aleke weitelepepe leekeme. Ipilikana꞉ma꞉ ipika꞉ pi hombo peaaso alota꞉ La꞉baio. Neketa꞉ hando pa꞉ta꞉ hao halepe lepekeme. Do La꞉bai ala꞉ ekita꞉ Disa la kone ala꞉ekie. 39 Yesuma꞉ ipilika꞉ pi hombo peaaso alota꞉ A꞉pa handa꞉pe la leeke handaa ipika꞉ hayeke alena꞉ handolo puaata꞉ koto pita꞉ ipilikita꞉ ipiki ame̱le̱ hao haemekeme. Koto hau pimiki hauta꞉ welealo nane 4 okoloko pimikime.
40 Mo hande hali yaapota꞉ Dionima꞉ leeke pi opua Yesu ame̱le̱ halo pepeke hali yaapo ma꞉nda꞉ta꞉ A꞉ndutue. Saimono Pida ipika꞉ hamekee. 41 Koto kone A꞉ndutuma꞉ ipika꞉ hameke Saimono handa꞉ wia ipiki pa꞉ta꞉ alota꞉ Hande Mesayata꞉ dikana꞉ma꞉ handa꞉ ulupa꞉me leekeme. Do Mesaya ala꞉ ekita꞉ Ketisoe laa ala꞉ekie. 42 Koto pi laata꞉ ipikana꞉ma꞉ Yesu pa꞉ta꞉ Saimono hatuku peekeme. Yesuma꞉ Saimono handolo alota꞉ Neketa꞉ Dionina꞉ eiyeke Saimonoe. Wetepena꞉ta꞉ naka꞉ biki Sipasi lelimikie. Koto bikita꞉ Pida kone homeke niki Toopi la kone leekeme.
Yesuma꞉ Pilipi Nada꞉niele yaapo wi leekeeki
43 Da kelepeeketa꞉ Yesuta꞉ Ka꞉lili nane polueke hone wiekeme. Ipikana꞉ma꞉ Pilipi handa꞉ wia ipiki pa꞉ta꞉ alota꞉ Dika꞉ pana꞉ epoe leekeme. 44 Pilipita꞉ Betesaida halie. Hande A꞉ndutu Pida yaapo haepeke da konee. 45 Koto ekina꞉ Pilipima꞉ Nada꞉niele handa꞉ wia ipiki pa꞉ta꞉ alota꞉ Hande Mosesima꞉ Lo Pimanu wape pitolo hata꞉ wape pa꞉la꞉ halita꞉ mo Koda꞉na꞉ potopede haliwekima꞉ wape pa꞉la꞉ hali kone handa꞉ uluma꞉me. Ipikita꞉ Na꞉sa꞉tete hali Diosepena꞉ eiyeke Yesue laa leekeme. 46 Na꞉sa꞉tete nanema꞉ epekeeki ma꞉nda꞉ ipula꞉eki handa꞉peke ya꞉la꞉pe laa lota꞉ pitolo haena꞉ta꞉ Pilipima꞉ ipiki pa꞉ta꞉ alota꞉ A꞉pa handa꞉taa leekeme.
47 Nada꞉niele Yesu pa꞉ta꞉ ipulu haena꞉ kone Yesuma꞉ handa Nada꞉nielena꞉ pita꞉la꞉ ekita꞉ dupae laa ma꞉nda꞉ pa꞉ta꞉ la halolo alota꞉ Do halita꞉ ota꞉ Isulai halie laa ipiki pa꞉ta꞉ yayapiki hau ma꞉nda꞉ na ula꞉me leekeme. 48 Nada꞉nielema꞉ Yesu pa꞉ta꞉ opolo a꞉pa lota꞉ pitolo alota꞉ Nakana꞉ma꞉ I̱ta꞉ ekipa handa alepe leekeme. Yesuma꞉ ipika꞉ pi hombo peaaso alota꞉ Pilipima꞉ neke wi a̱i̱ na leeke dina꞉ kone neketa꞉ mo hande nose ti teke pa꞉ta꞉ pitieki I̱ma꞉ amba꞉ handoa꞉me leekeme. 49 Nada꞉nielema꞉ ipika꞉ pi hombo peaaso alota꞉ Disao. Neketa꞉ Koda꞉na꞉ Eiyekee. Neketa꞉ Isulai wanda꞉halina꞉ Kini halie leekeme. 50 Yesuma꞉ alota꞉ I̱ma꞉ neketa꞉ nose ti teke pa꞉ta꞉ pitieki handoa꞉me loa꞉ ekina꞉ hone tulaaso alepe laa kutupiki hausunu ankulalo peleme hau tieke tiekemanu pulu pa꞉la꞉eki handilipikie leekeme. 51 Yesuma꞉ iki pa꞉ta꞉ alota꞉ I̱ma꞉ iki pa꞉ta꞉ ota꞉ pi alome. Ikita꞉ hepeni nane lomba꞉pa ula꞉ alena꞉ Koda꞉ ipika꞉ enisolo haliweki mo Wanda꞉halina꞉ Eiyeke pa꞉ta꞉ a꞉pa hata꞉ hola꞉pa꞉niatiki a꞉meiyatiki pilimieki handilimikie leekeme.
Keina da pa꞉ta꞉ wanda꞉ miekeeki
2
1 Nate yaapo paeyeketa꞉ mo Ka꞉lili nane hayeke da Keina da pa꞉ta꞉ta꞉ hali homekema꞉ wanda꞉ miekeme. Kutupa Yesuna꞉ inkiki make koto pa꞉ta꞉ hayekeme. 2 Yesu ipika꞉ disaipolo haliweki ame̱le̱ tonka꞉na꞉ mo wanda꞉ hapieke alena꞉ ipupe laa wi leekeme. 3 Mo hande waini ikali no paeyao ma꞉nda꞉ na pitieketa꞉ Yesuna꞉ inkikima꞉ ipika꞉ weki Yesu pa꞉ta꞉ alota꞉ Hande waini ikali no paeyao ma꞉nda꞉ na pila꞉me leekeme. 4 Kutupa Yesuma꞉ ipika꞉ ama꞉ pa꞉ta꞉ alota꞉ Wanda꞉o. Ya pulu poloeki nakana꞉ma꞉ dupi dupi laa I̱ pa꞉ta꞉ na lelipikie laata꞉ Ya nateta꞉ a̱i̱ na ipula꞉me leekeme. 5 Pate ipika꞉ ama꞉ma꞉ta꞉ mo e pokaemeke haliweki pa꞉ta꞉ alota꞉ Ipikana꞉ma꞉ la꞉lie pi opua pea꞉pa꞉peke leekeme.
6 Mo Diu wanda꞉halima꞉ ika꞉ hande ikalima꞉ tandepa꞉la꞉ hau pu haemeke ekina꞉ toopima꞉ wepia ikali kanake yunki mindiki hata꞉ mo pa꞉ta꞉ wiekeme. Kanake homeke pa꞉ta꞉ ikalita꞉ 80 lida o 90 lida tupa꞉ pitaapeke yeekeme. 7 Yesuma꞉ mo e pokaemeke haliweki pa꞉ta꞉ alota꞉ Mo toopi ikali kanake manuna꞉ ikalima꞉ tumba tumba pipe leekeme. Koto leeke mo haliwekima꞉ mo ipi kanakemanu tumba tumba pimikime. 8 Kutu pu paeyeke Yesuma꞉ alota꞉ Mandane ekita꞉ kanake mandane ekina꞉ yupu tia mo ne handeteke hala꞉ hali pa꞉ta꞉ mea pua hala꞉pe leekeme. Koto leeke mo ikali mandaneeki yupa mea pua halemekeme. 9 Kutupa mo halima꞉ mea naa handeekepate ota꞉ waini ikalima꞉ kone handeekeme. Mo halima꞉ta꞉ koto waini ikali yupimikieki pa꞉ta꞉ hone na wiekepate hande ikali yupimiki e pokaemeke haliwekima꞉ hone wimikime. Koto ekina꞉ ipikana꞉ma꞉ mo wanda꞉ tekehali wi la꞉ mea 10 ipiki pa꞉ta꞉ alota꞉ Haliweki paeyaoma꞉ waini ikali ota꞉ epekeeki amba꞉la hale hale pea kutupa mo ne nolo epo laa epemeke wanda꞉halima꞉ waini ikali wopu nemeke hoki naneta꞉ mo hosiki metoko piki waini ikali hale hale pilieke. Pate nakana꞉ma꞉ mo ota꞉ epeke waini ikalita꞉ hosiki sa꞉sa꞉ pea wia hao ame kone hale hale pina꞉ aleme leekeme.
11 Yesuma꞉ta꞉ mo Ka꞉lili nane hayeke da Keina da pa꞉ta꞉ hata꞉ ipika꞉ wele piekeeki koto pa꞉ta꞉ amba꞉la piekeme. Koto pa꞉ta꞉ hata꞉ ipikana꞉ma꞉ ipika꞉ kapu tieke hala꞉eki peneme yao waleeke handaa ipika꞉ disaipolo haliwekima꞉ ipiki pa꞉ta꞉ hone tulaemekeme.
12 Kutu pieke hoki naneta꞉ Yesu make ipika꞉ inkiki make ipika꞉ hameketiti make ipika꞉ disaipolo haliweki tonka꞉na꞉ paeyao Kapeneami da pa꞉ta꞉ pua hoto mandane ekimanu koto pa꞉ta꞉ haemekeme.
Yesu mo tembolo da nane peekeeki
(Ma꞉tiu 21꞉12-13, Maka 11꞉15-17, Luku 19꞉45-46)
13 Mo Diu wanda꞉halima꞉ ika꞉ Lombei Pupa Yapeeke natena꞉ ne pambuluekema꞉ haemeke handaata꞉ Yesuta꞉ mo Diutuseleme da nane peekeme. 14 Yesuma꞉ mo tembolo da tukiki pa꞉ta꞉ pua handeekepate mandane haliwekima꞉ kao make sipisipi ma꞉na꞉manu make melipuma꞉ handeke bamanu make mandane haliwekima꞉ hambena꞉yeke wia pitimikieki make mandane haliwekima꞉ ika꞉ teipolo pa꞉ta꞉ pita꞉ mani topo pimikieki make handeekeme. 15 Ipikana꞉ma꞉ pu tunkulikimanu meaata꞉ ponka꞉ pilimepi pea depita wepiaata꞉ paeyao hama pena꞉ mo kao sipisipi ma꞉na꞉manu tonka꞉na꞉ tolu liekeme. Mo mani topo pu pitimiki haliwekina꞉ teipolomanu londolo ba ba pea ika꞉ manimanu tonka꞉na꞉ hoelo ba ba piekeme. 16 Kutupa mo melipuma꞉ handeke bamanu wia pitimiki haliweki pa꞉ta꞉ alota꞉ Do alemanu mu tia hama pupe. Yaka Apa꞉na꞉ data꞉ makedi da au na lapa꞉peke leekeme. 17 Ipika꞉ disaipolo haliwekima꞉ mo Baibolo bukana꞉ wape pa꞉la꞉eki hone wimikime dupae. Koda꞉o. Naka꞉ da epeaalo polo hone witolo ekita꞉ I̱ta꞉ titipu wopu polome wape pa꞉la꞉me.
18 Mo Diu haliwekima꞉ ipika꞉ pi hombo peaaluekema꞉ lota꞉ pitolo alota꞉ Do pitele hauta꞉ naka꞉ biki ula꞉eki niki pa꞉ta꞉ta꞉ waluekema꞉ eki wele piteleeki pilipiki lemekeme. 19 Yesuma꞉ ika꞉ pi hombo peaaso alota꞉ Do hande Koda꞉na꞉ da leisimika꞉na꞉ta꞉ I̱ma꞉ hoto tepona꞉ pa mea a꞉meiyao haena꞉ lolueke leekeme. 20 Mo haliwekima꞉ alota꞉ Do hande tembolo da a꞉etolo haena꞉ 46 bapimanu amba꞉ paeya꞉pate nakana꞉ma꞉ta꞉ hoto tepona꞉ kone paa mea a꞉meiyao haena꞉ loluekema꞉ alepe lemekeme. 21 Koto lemekepate Yesuma꞉ mo hande tembolo da leeke ekita꞉ ipika꞉ loke pa꞉ta꞉ kone leekeme. 22 Koto ekina꞉ Yesu homeeke Koda꞉ma꞉ pa mea tiaeyeke natena꞉ ipika꞉ disaipolo haliwekima꞉ do leeke pi hone wimikime. Kutupa mo Baibolo bukana꞉ wape pa꞉la꞉eki make Yesuma꞉ leeke pimanu make hone tulaemekeme.
Yesuma꞉ haliweki paeyaona꞉ honeta꞉ handeekeeki
23 Mo hande Lombei Pupa Yapeeke ne pambemeke dina꞉ta꞉ Yesuma꞉ mo Diutuseleme da pa꞉ta꞉ hata꞉ ipikana꞉ma꞉ wele wotu pieke ekimanu wanda꞉hali wopuma꞉ handaata꞉ ipiki pa꞉ta꞉ hone tulaemekepate 24 Yesuma꞉ta꞉ wanda꞉hali paeyao ika꞉ piteleme ekimanu wotu handa꞉ wiaata꞉ mo wanda꞉hali pa꞉ta꞉ hone na tulaaso hata꞉ na taleekeme. 25 Wanda꞉halina꞉ puki pa꞉ta꞉ ula꞉ ekimanu Yesuma꞉ wotu handeeke ekina꞉ hali ma꞉nda꞉ma꞉ ipiki pa꞉ta꞉ la hala꞉peke na yeekeme.
Text info
ssx