27
Isaac uchiji Jacopan Esaújai yumigjamu
1 Isaakak shiig muumpakiu asa wainmatnash wainmamainchau wajas pujujakui. Nunik pujau makichik tsawantai niina uchiji iwain untsuka chichajak:
“¡Uchuchih!” tau. Tusa untsuam nii ayaak:
“Juwi pujajai apawah, waji tame, tujutta”, tiuwai.
2 Tama nii ayaak:
“Nijah, wika yamaik shiig muumpakjai, pachiachbaunum jamainaitjai.
3 ¡Nuadui kuntin mautaijum jukim ikam weme kuntin maam,
4 shiig pachimjam, mina yutaijuama nunú yutai pegkeg inagkam itagtuata, yuwatjai! Nuna yuwakun wi eke jatsug duwik amina pegkegnum yumigsatjame”, tiuwai.
5 Nuna aatus Isaac tabaun Rebeca antukui. Nunik Esaú apaji yuwatnun kuntinun egak wematai,
6 uchiji ekeu Jacopan chichajak:
“Antukta nijah, amina apa yamai amina yatsumjai chichaak:
7 ‘Kuntin maata, dutikam yutai pegkeg pachimja inagkam itagtuata, nuna yuwan, eke jatsuk Tuke Pujuush antai amina pegkegnum yumigsatjame’ taun antukmajai.
8 Nuadui uchuchi wi titatjam nunú shiig antukta:
9 Wamak tagku batsamtain weme, jimag chivo tsakat pegkeg jukim itagtuata, wi wamak maan amina apa yaitaijiyama nuna pachimjan inagtuktajai.
10 Dutikamtai ame jukim ejetuata nuna yuwati, nuna yuwa nii dekas iwaaka awik, amina pegkegnum yumigtamsati”, tiuwai.
11 Tusa tama Jacob dukujin ayaak:
“Tujash mina yatsug Esaún iyashig uje wajasuwe, wika aannuchuitjai.
12 Namputkama mina apag achigkama dekapjug, dushiktakpap jutijawa tusa, pegkegnum yumigtutsuk pegkegchaunum yumigtujai tajai”, tiuwai.
13 Tusa tutai dukuji ayaak:
“¡Uchuchi amina pegkegchaunum yumigtamjamtaish duka minai juwakti! ¡Amek ayatak wi tajam duke umikta, nuniakum wamkesam weme, jimag chivo tsakat jukim itagtuata!” tau.
14 Tusa tima ayu tusa weji, jimag chivo tsakatan juki dukujin itajuauwai. Dutika itajuam nuna maa Isaakan yaitaijin imatiksag pachimag yutai pegkejan inagtukui.
15 Dutika umika, Esaú nugkutaiji jáanch dekas shiig pegkeg jegaa atatman juki, niina uchiji ekeun Jacopan anugjauwai.
16 Dutika nuigtushkam chivo duwapen juki, niina kuntujin pempenjauwai, dutikak, kuntujenchakam uje atsuju asamtai, nuwishkam anugjauwai.
17 Dutika nii yutai pachimja pegkeg inagkamun pagjai juki apajin susati tusa susauwai.
18 Dutikam nuna juki niina apaji pujamunum waya, chichajak:
“¡Apawah!” tiuwai.
Tama: “Juwi pujajai, ¿yaa uchijuitpa amesh?” tusa Isaac iniasui.
19 Tusa iniam Jacob ayaak:
“Wika amina uchijum iwai Esaúwaitjai. Ame mina segatmaum nunak umikjai. ¡Wait aneasam nantakim juwi ekemsam yuwata wi kuntin maamua nunú, núnikam pegkegnum yumigtugta!” tiuwai.
20 Tusa tama, Isaac uchijin iniak:
“¿Uchuchi itugsamea kuntinush wamkesmesh wakemkaume?” tau.
Tama Jacob ayaak:
“¡Tuke Pujuu Apajuí ame emematnum nunú minak yainkamtai, wamak igkugmajai!” tiuwai.
21 Tujash Isaac niina chichajak:
“Ayu, ame dekas mina uchig Esaúwaitkumek adijtukta achikan dekapsatjame”, tiuwai.
22 Tusa tama Jacob apajin jegaantauwai, achijuk dekapjusti tusa. Nuna achika dekapes, Isaac chichajak: “Chichamjumek Jacopan chichamejai betekai, tujash untsu kuntujum Esaún kuntujiyai”, tiuwai.
23 Niina kuntujinig niina yachi Esaún kuntujijai betek uje wajakin asamtai, dekapjachui. Tujash pegkegnum yumigjattak,
24 ataktu awena iniak:
“¿Dekas amesh mina uchig Esaúkaitam?” tau. Tama nii ayaak:
“Ehe witjai, Esaúwaitjai”, tiuwai.
25 Tusa timatai niina apaji chichajak:
“¡Ayu uchuchih, ame kuntin maa inagkamu sujusta yuwatjai, nuna yuwan pegkegnum yumigsatjame!” tiuwai.
Tama Jacob ayu tusa yutai umikbaun juki apajin susauwai. Dutikak nuigtushkam umutai vino uva najanamun ejetuauwai. Dutikam Isaac nuna yuwa umutainashkam uwajui.
26 Nunik chichaak:
“¡Uchuchih, juwi tantam kugkuntsata!” tiuwai.
27 Tama Jacob niina apajin kugkuastatus jegaantam, Isaac niina uchiji Esaún jáanchji kugkuntin dekapjujui. Nuna dekapjug pegkegnum yumigkiak:
“Juju juni kugkua juka mina uchig emkaun
kugkuntiyai. Ikaman kugkuntijai betekai,
Tuke Pujuu aan yumigjamu asa.
28 ¡Uchuchi aminak Apajuí yumi
nayaimpinmayan amastí,
dutijamamtai amek nugkanum ajakmamesh
trigo shiig kuashat juutnaitme,
tuja vinoshkam umumain kuashat ajutjamtinai!
29 ¡Kuashat aents aidau aminak takagtamiagtinai,
nuigtushkam nugka muunnumia aidaush
ima aminak antugtamainak umigtamiagtinai!
¡Ame apu wajasamin, yatsumshakam amina umigtamtinai!
¡Amina pegkegchaunum yumigtamaidauk,
ditashkam dutiksaik pegkegchaunum yumigkiam agtinai!
¡Untsu amina pegkegnum yumigtamaidauk,
ditashkam dutiksaik pegkegnum yumigkiam agtinai!” tuu yumigjauwai.
30 Tusa pegkegnum yumigjam Jacob apajin pujau jiinki wegaig, Esaúshkam kuntinun maatatus weu tauwai.
31 Nunik niishkam apaji yaitaijin, yutai pegkejan pachimag inajuk, juki jegan apajin chichajak:
“¡Apawah, nantakim, wi kuntinun maa inagtukjam nunú yuwata, núnikam pegkegnum yumigtusta!” tiuwai.
32 Tusa tama Isaac iniak:
“¿Yaitpa amesh?” Tama:
“Wika amina uchijum iwai Esaúwaitjai”, tiuwai.
33 Tutai, Isaac anentai jegagchauwai, nunik kujakjatun chichaak:
“Tujash ¿ya minash kuntinun maa yutain umikash itagtuame? Nuna wika ame eke tatsminig ashí yuwamjai. Dutikan niina ashí pegkegnum yumigjamjai. Nuadui nii yamaik pegkegnum yumigjamu juwake”, tiuwai.
34 Tusa apaji tutai Esaú antuk, kajeka buutak:
“¡Apawah, minash wait aneasam pegkegnum yumigtujiah!” tau.
35 Tusa tama Isaac ayaak:
“Amina yatsum tajutua, tsanujug aminu pegkeg yumig atinuwe nunak ashí jujutjamkine”, tiu.
36 Tutai Esaú chichaak:
“¡Awis niina daajinak Jacob adaikau ainatai! ¡Aniau asa jimajá tsanumag midau amainun atanjukne! Nagkamchakush wi iwai asa jumainun atanjukmae, tuja yamaish wi pegkegnum yumignamainjun nigki atanjukne. ¿Tujash mina yumigtumainuk makichkish ukugtuschaumek?” tau.
37 Tama Isaac Esaún ayaak:
“Antukta nijah, wi Jacopan amina apujum ati tusan tijai, dutikakun ashí niina patayi aidaushkam niina umijin atinme, timajai. Nuigtushkam trigo aidaush, umutai vino aina nujai kuashat ajiti, timajai. ¿Tujash uchuchi yamaish aminash, itugkatjamki?” tau.
38 Tusa tama Esaú atak awagki segaak:
“¿Apawah, makichkiuchikesh mina yumigtumainuk shiig atsugtamuak? ¡Minash apawah, pegkegnum yumigtujiah!” tusa senchi buutu.
39 Imattai Isaac niina chichajak:
“¡Antukta nijah, amek atushat weme,
juju nugka pegkeja juka ukuakum,
nugka pegkegchaunum yumish
yutachbaunum pujustinaitme!
40 Amek amina puyaajumjai
depetmasam pujakum amina
yatsum umigtinaitme, tujash ame senchijinkum
nii umiju pujaum agkanmagatnaitme”, tiuwai.
Esaú maatag tama Jacob tupikakbau
41 Jacob kasagkamu asa, Esaú niina senchi kajegkauwai, wagki nii yumignamainun, apaji Jacopan susau asamtai. Nunik anentaimas: “Mina apajuk jatanak namput wajaschae, nii jakamtai agkan wajasan mina yatsug Jacobnak maatjai”, tiuwai.
42 Tusa chichaman umiamun Rebeca dekaa, Jacopan untsuka itan chichajak:
“Antukta nijah, amina yatsum Esaú mantamatag tawai, ame nii yumignamainji atankiu asamin.
43 Nuadui uchuchi yamai antugtukta: Amek yamaik yaakat Harágnum tupikakta, núnikam mina ubag Labágka jeen jegata.
44 Nunikam amina yatsum kajegtamka nuna sakapai, nuwi niijai pujusta.
45 Ame atankim kajegtamka nuna tsagkugmatai, duwi wi chichaman akuptuktatjame, dutikamtai nunú dekaam wakitkim taamnum. ¡Dakitajai mina uchig maaninak mai jaka megkaekai! tusan”, tau.
46 Nuna tii idayak, Rebeca Isaakan chichajak:
“Hitita nuwa, Esaún nuwe aina nuna pegkegchaujin shiig aneasan pujumainchau, jamain dekapeajai. Tuja juju hitita nuwa aidau Canaágnum pujuina juninjai Jacob nuwenkuig, wika jakatjastai”, tiuwai.