13
Jisus ni jintintaiji aidau nawe nijatkamu
Pascua jegatin tikiju wajasú ai, Jisus ni Apajin wegaku ju nugka ukuktinjin dekau asa, ni jintintaiji aidaun nagkamsa aneejakbaujin iwaintukui, wetatak pujusash imatiksaik aneamujin.
Nunik yujumkan yuwinak pekaamsamunum Judas Iscariote Simogkan uchijiya nuna, Jisus sujutnum iwanch anentaimtijauwai. Tuja Jisusak Apajuijai pujau taamujinak dekau, nunisag dekau ataktú Apajuiyai wakitkitnujin, nuigtú niina Apají senchimtika: Ashí ame diistá, tusa idaitusbauwa nunashkam. Nuniau asa yujumak yuwaku pekagbaunum Jisus wajakí, awantak pataká nugkuagbaujin awimak toalla juki akachuma wajantuí, nunik mantignum yumin yajaa apujus, niina jintintaiji aidau nawe nijattan nagkama nijatuk, toalla akachumamun juki ujugtuk emau.
Dutikak Simón Pedronashkam jegantun, nawe nijatjata tama:
—Apuh, amek ibauwaitkumek mina dawejuk nijatjumaitsume, —tau.
Tutai Jisus ayaak:
—Yamaikik wi juna jutikag juka dekatsme, tujash duwi dekaattame, —tiuwai.
Tusa tama Pedro chichaak:
—Apuh, amek mina dawejuk tuke nijatjugchattame, —tiuwai.
Tutai Jisus ayaak:
—Amina nawemin wi nijagchamtaig, amek wijaig ijunmaitsume, —tau.
Tama Simón Pedro chichaak:
—¡Untsu apuh, imá dawejuk nijatsuk, uwejush nijatjakum, buukeagshakam nijatjugta! —tiuwai.
10 Tutai Jisus ayaak:
—Yamá mainuk pata patakag maak pujumaitsui tsuwatjin ajapau asa, ayatak naweeg nijatam amainai, anmamtuk atumek tsuwatchau ainagme, tujash ashí tsuwatchauk ainatsjume, —tiuwai.
11 “Ashí tsuwatchauk ainatsjume”, tiuwa nunak aents niina sujuktin jutiijai pachitkau asamtai wainu asa, tiuwai.
12 Nuna ti ashí niina jintintaijin nawen nijatuk, Jisus ataktú ni awantak pataká nugkutaijin nugkujá mesanum jegantá ekeemas:
—¿Wi juna jutikajim dusha atumesh shiijak dekajum? 13 Atum mina: Jintinkagtinú, Apú, tujutjum duka dekas iman asamtai tujutjume. 14 Wi Jintinkagtin, Aputnash Apuitkun atumin nawemin nijatjajim antsagmek, atumesh atumin kakagchaujum pempeentunikjum iwaintuniktajum. 15 Junak atumin ditash juna wainkaja jutiksag takastinme tusan iwaintakun aikajime. 16 Dekas tajime: Inakak apujin nagkaesauchui, tuja awemamua dushakam awekagtiuwa nuna nagkaesauchui. 17 Juna wi tajim jujú shiig dekaajum, atumesh umiktasajum takaagtaik, Apajuí shiig aneas pujustinme tusa yaimpaktatjume.
18 “Tujash junak ashí atumin takun tatsujime. Wika shiig dekajime atumnak wi etegjau asan, nunin aigkish duwik Apajuí chichame agagbauwa nui: ‘Wijai ijunag yuwina nuwiyag pempeentugkiag sujutkagtinai’, tibauwa nunash dekajai. 19 Nuniayatkun junak ujajime, nu tsawan jegakui dekas Apajuí Uchijimpapita tujutminjum tau asan. 20 Dekas tajime: Wi awemamun dakittsuk juwauk, mina jujuinawai. Untsu mina jujuina duka, mina awetiuwa nuna juwinawai.”
Jisus Judas sujam atin etsegkamu
(Mt. 26.20-25; Mr. 14.17-21; Lc. 22.21-23)
21 Jisus nuna ti senchi wake besemag dekapeg, ashí antuinamunum paan iwainak:
—Dekas tajime: Atum ainajum juwiyag makichik minak sujutkattawai, —tau.
22 Nuna timatai niina jintintaiji aidaushkam yana takug tawa tusag, mai niinia, mai niinia wajaidau. 23 Nuniai niina jintintaiji aina nuwiya, makichik Jisusa aneetaijiya nunú yujumak yuwamunum Jisusai ayaumas yuwak eketu. 24 Nunittaman Simón Pedro tutaya nu: Ame iniasta, tusa iwijau. 25 Dutikam ni Jisusan:
—¿Apuh, dusha yaita? —tusa iniau.
26 Tama Jisus ayaak:
—Yana wi pagkan uchutuan susattaja nunú atatui.
Tusa pagkan puuk juki uchutua Judas Iscariote Simogkan uchijiya nuna susauwai. 27 Nuna dutika suwaig wamkes Judasan iwanch egkemtujui. Dutikamtai Jisus chichajak:
—Ame dutikata tame duka wamkesam dutikata, —tiuwai.
28 Nuna tutaishkam makichkish anentaimtugchajui, ni sujam atinun takumpap tawa tusajag. 29 Judas kuichkin kuitamin asa, kuichik chimpitain takaku asamtai, tikich anentaimsajag jista atinnum atsumna nu sumakta tusampash tawa, nuniachkush ujunauch aidau susata tusampash tawa, tiaju.
30 Tama Judaschakam pagkan waujus yuwa jinkiuwai. Nunak kashi nunikui.
Yamajam chicham umiktin tibau
31 Judas jiinki wematai Jisus chichaak:
—Apajuí senchigtina nunak, wi Apajuí Uchijiyaitkun Aentsmaga Akiinauwaitag duwi dekaawagtatui, nunak wi nuniktatag nuna wainainak Apajuinak eme anentiagtatui. 32 Wi niinak puyatjusa umigkamu asa, yaunchuk wi aajakbaujua nunak imanuk etittawai. 33 Uchuchig aidauh, atumjai ijunjanuk kuashat tsawantaik pujushtatjai. Judío aidaun: Egatkugmesh waitkashtatjume, timag dutiksanuk atumnashkam tajime. Atumek wi wegamunmag yamaikik minimain ainatsjume. 34 Chicham umiktajum tibaun yamai wishakam tajime. Ashí iikdaisajum makí makichik aneeniamu iwaintuniktajum. Wi atum aneamujun iwaintukjim aikasjumek atumshakam tikichjaish iikdaisajum aneenimain ainagme. 35 Atum aaja pempeentunikjum aneediagtaik, dekas Jisusa jintintaijimpap ainawa tujabiagtin ainawai, —tiuwai.
Jisus Pedron uugtuktatme tusa ujakbau
(Mt. 26.31-35; Mr. 14.27-31; Lc. 22.31-38)
36 Nuna tutai Simón Pedro iniak:
—Apuh, ¿tuwí wetatme? —tau.
Tama:
—Wi wetatag nuwig yamaikik minimain ainatsjume, tujash duwi pujusjum minitin ainagme, —tiu.
37 Tutai Pedro ayaak:
—Apuh, ¿wagka yamaikish minimainchauwaitja? Wishakam amijai jakatasan umintsan wekaejai, —tau.
38 Tutai Jisus ayaak:
—¿Dekaskek wijai mantamnatasam umintsam wekagam? Dekas tajame: Eke atash shinatsaig kampatumá: ‘Wika Jisusnak waintsamjai tujuttatme’, —tiuwai.