5
Hakamay so ma-le enekwei se naruok ira huon e
1 Wayh-om, hakwe hme kokwe sankaw liy ma-lohruw-a kow ley, yor somokwe enekwei pohiy sok lousne ane, eypok penkin non lousne ane.
2 Payhokuaw, homkwe po nuw-nonkway popriy, enekwei Hakamay hiy ma-le ey hokwe, homkwe yokun-uwr hiy arawh ma le nayr se hieyn senkin lira kowkyay huon ey.
3 Sawk uwrsa hom senkin me non, “Enekwei ohokwe aymarowh-aw lwak, seyr yaprue lwak ihey,” sawk enekwei piap-araw sohokwe, uwrsa senkin me saw-mon piapay ey. Enekwei piap-araw sohokwe, sa, ney sumow ma swaun, aw aiopey hay ma lok ke hieyn saw-ousne ey. Uwrsa senkin somokwe liy hakan sakan ley.
4 Wayh-om, sawk hom eym-nawp mon ma nakrok lopa me hokuaw kokwe, enekwei piap sohokwe hme liy mon preiryay ley, yokun-uwr hiy uwrsa me ma mon preiryay se hieyn.
5 Ama, hom lowpwarowp mokwe ey-yar so ney, seyr eypok ko. Sa hromkwe arawh o, eym-nawp o, hoho ouon mon non-wak pey.
6 Suw senkin, hromkwe uwrsa har me hieyn anwaw peie lok sowkway o. Sawk hromo nene mokwe inaw lok sowkway ira e, seyr hromo uron mokwe nan say iarok-kay popriy e.
7 Payhokuaw, anwaw liawon yor o, hu lowswa lawk-lawk yor o, hohkwe arawh ko.
8 Hromkwe hromo uron arian me lanok anok e, payhokuaw, hromkwe eypok so uwrku-saku. Suw senkin, hromkwe nan kiykiy-ay yor o, wayh-wayh me uron-pi ko-ar lwak yor o, somokwe hromo uron-kowp mon kokwe kwor ke hieyn kwa nak-ok-sama-peykyay. Seyr hromo uron God se hyohyo ma lon hiy hreme huonokyaw prosue ey hokwe, hromkwe aw-mawk-owk ke hieyn kwa nak-swaseyn kawk sous.
9 God hiykwe hrom hyo aw-mar ouon mon lwak e me-iaup pa. Hiykwe hreme kokwe Hakamay Jisas Krais so kueir non me-iaup, hrom hyo huonokyaw-prosue-yerki se lonok e.
10 Jisas hiykwe hreme hokuaw sehe lokrue, mo hrom inaw lwayr hi, hreme lokrue ha hi, hrom hye nion non-wayr peyow peyow e, enekwei hiy ma-le non.
11 Hakwe hme senkin seme me, homkwe homkiaw-ayay-aw ok yaprue ihey-ar me hiy-nuw-mesor kraipakrai e, seyr hmo wayh-wayh mo uron me hiy-me wowr-a-wowr iwak sir ihey e, hom enekwei enkin sok ma kiy-meio senkin.
Hiy-anok anok-ok pariawey-ar hok non
12 Hromo wayh-om ama, hromkwe hme kokwe senkin ma-kiynuw-me kraipakrai, homkwe uwr, hmo ompok mon ma meio kraipakrai, seyr Hakamay so meyki ley yor ke ma hiy-anok anok ihey, seyr hme ma hiynak-mon-sorasor seme kwa nan ihey.
13 Homkwe uwr, mey senkin ma meio seme uron yaprue kwa nuw-nan popriy ihey nok, hme uron-pi ko-ar nak-wak. Payhokuaw, mey, hom ma meio sokukwe yaprue ihey-ar. Homkwe homkiaw-ayay kokwe uron kamon-awaw nuw-wak liyay e.
14 Hano wayh-om, hromkwe hme senkin me-kraipakrai, homkwe uwr akiaup ma lwak somokwe kwa hiy-mesor kupaku. Seyr uwrsa kopowrie ma lwak o, nompow ma lwak o, seme kwa hiy-me woro-woro kraiay popriy. Homkwe uwrsa lowpwarowp me nion kokwe meinkiowp-aw kwa nakrok naruok wayr.
15 Homkwe uwrsa me kokwe senkin kwa hiy-me-kupaku kraiay, homkwe sawk weynpaweyn piap-araw eysawk eysawk ma-mon ame. Sawk homkwe hmo kristen-wayh o, uwrsa har lowpwarowp sohom o, hme kokwe yor yaprue non-aw non-anio sayok me-sair kow popriy e, enekwei enekwei.
16 Homkwe enekwei lowpwarowp mokwe kar ley nonaw lwak e.
17 Seyr God se kwa nuw-mesopok wayr-wayr.
18 Mo hme yor penkin hom lousne e, homkwe God se me-ihey nonaw kwa lwak. Payhokuaw, God so uron ipey-ar hokwe uwrsa Jisas Krais so mon ma lwak hom senkin lon e nanpanan.
19 God so Niohney so mey ke peie mon pros huon o.
20 Homkwe profet-ok me peie lourde o.
21 Sawk homkwe ok lowpwarowp me kwa leykawn ir, ok har okrei lwak ame. Sa ok-ar lwak ankin, kwa nakruok.
22 Homkwe yor piap-araw lowpwarowp mokwe kwa lokriy ha.
23 Hmekwe liwak marowhway God hiykiaw ka mon mnow-a-mnow ihey. Seyr hiykwe hmo niohney o, wa o, owh o, seme ka hiymon kraiay, hom heyn lopa lwak e, hromo Hakamay Jisas Krais so ma-le enekwei hokwe.
24 God, hme ma me-huonokyaw-uwr hiykwe hiymon-kraiay-wayr-yor non, seyr hiykwe hyo ok me liy mon ousne.
25 Hromo wayh-om ama, homkwe hreme kwa hiy-mesopok, God se.
26 Homkwe hmo wayh lowpwarowp me kokwe, uron pekney-weys non kwa way neyr-a-neyr.
27 Hakwe hmekwe ok ipey-ar sokukwe Hakamay so uru non nuw-me kraiay ha, hom mamey sokwe God so uwrsa lowpwarowp mo inour mon lira mesor owndiy kow e.
28 Hromo Hakamay Jisas Krais so maym-kow-yor hokwe hme nion ka nuw-wak wayr.