10
Ensel o, mamey ma lok-sarohon paswaw o
Ha sawk makiy-ira, ensel ipey-ar prueyn hiy nonkumey ko se ar-ousne ha aye se. Hyekwe waw non swakuwmay, seyr unameioku hokwe hyo makwey mon ka-ho iawon. Hyo ine-maku hokwe ey se hieyn lo, seyr hyo sune mokwe nop-i ya non me hieyn nak-iarok yar. Mamey ma lok-sarohon paswaw-ney hyo iha mon ma lwak sokukwe po kampi. Hiykwe hyo sune sayar kokwe sour-yawp-ar mon wosakeyn hnuarok, irayh kokwe ki mon lorok, sa seyn liwowr me, wouk-ok aiopey hay non. Wouk-ok sokukwe laion hom ma lanio me me hieyn. Hiy ma liwowr me so meyki mon hokwe sawk nompow iha sirom mu nareysyar hom lonuayk me. Nompow sohom ma me mokwe, hakwe sawk hmo ok me kiysaw-mey e mon liok, sa wouk-ok kamon nonkumey ko hok senkin me se lonuayk, “Nompow sohom mo ok mokwe hunkiaw-aw ouon-aw kwa nak-wak, peie mey o.” *
Ensel, ha senkin ma lorok se ma lira, sune kamon ki mon, sune kamon sour-yawp-ar mon, hiykwe hyo iha sayar ke nonkumey mon ar-nakray nok, * God su ma lwayr peyow peyow, seyr nonkumey o, ki o, sour-yawp-ar o, seyr omeme lowpwarowp serey ma lwak me ma mon-hre o, hyo uru non senkin loiow me, “Enekwei hokwe liy ma-nakruok omponay kok ley.” Sawk ensel iha sirom mu nareysyar hiy hyo hu se lou ankin, God hiykwe mey, hyo uron arian mon ouon-aw ma lwak sue somokwe enekwei sohiy non meio lowpway ey, hiy hyo mey-uwr profet me ma mekow senkin. *
Sa hakwe wouk-ok nonkumey ko, peyr-mon hane ma me, hiy ma-me se lonuayk. Hiykwe senkin me, “Kwa ley onok, mamey ma lok-sarohon, ensel sune kamon sour-yawp-ar mon, sune kamon ki mon, senkin ma lorok so iha mon ma kampi iawon sokwe.”
Hakwe sawk ensel sohiy so owh mon ley nok, hye mesopok, mamey ma lok-sarohon ke hane kow e. Hiy sawk hane senkin me, “Kiy-onok nok, kiy-a, hno swaw hokwe kriykriy lon ey, sawk hno woki kokwe, eirpow-hu wonor se hieyn lwak ey.” * 10 Ha mamey ma lok-sarohon sokwe ma kiy-onok a hokwe, hano woki kokwe eirpow-hu wonor se hieyn nuw-wak, sa ha ma lamkueyn ha hokwe, hano swaw hokwe sawk kriykriy lon. 11 Sa hane senkin kiynak-mekow, “Hunkwe profet-ok me kwa ma-mesor, weynpaweyn omok, kipay lowpwarowp me o, unsaney owh-ohi senkin senkin non me o, uwr-ku wouk-ok senkin senkin non me o, seyr king me o, hmo owh mon lousne ey mokwe.”
* 10:4 Dan 12:4,9 * 10:5 Lo 32:40; Dan 12:7 * 10:7 Amo 3:7 * 10:9 Ese 2:8; 3:1-3