12
Kaun naga nmakeen anraban bifee nok in anah
1 Rarit nok askeken, au ꞌiit tanar maꞌtain es anboor anbi neon goe tnanan, reꞌ mansian ii ka niit niit ee fa feꞌ: anmuiꞌ naan bifee jes reꞌ in aon ee maputiꞌ npaek manas. In aras in haen ee nbi funan. In npake ꞌsoeb usif reꞌ nmuiꞌ kfuun boꞌes am nua.
2 In naꞌapuꞌ, ankae, fin in he nahoin een.
3 Nok askeken ate, au ꞌiit aꞌteniꞌ tanar maꞌtain es anboor anbi neon goe tnanan. Anmuiꞌ naan kaun naga meeꞌ jes kouꞌ reꞌuf. In maꞌnakaꞌ hiut, ma in suunk ein boꞌes. In npaek ꞌsoeb usif hiut anbi in aꞌnaak ein.
4 In npaek in iukn ee ma nsaup nain kfuu baits es anbi neon goe tnanan. Anneis suma batis nua goah. Rarit in nporin nain kfuun ein naan nꞌain pah-pinan. Rarit in nbaniꞌ neu bifee naan, he npa-pao oras bifee naan nahoniꞌ. Fin in he nꞌoor naan riꞌanaꞌ naan.
5 Rarit bifee naan nahoniꞌ naan Riꞌaan moen jes. Mes Uisneno In ameput tuaf es neem ma nasiik naan Riꞌanaꞌ naan, ma neik Je neu Uisneno, he Riꞌanaꞌ naan naprenat buꞌ-buaꞌ nok Uisneno nbi sonaf neno tunan. Fin Riꞌanaꞌ naan of naprenat areꞌ kanan uuf ma pah nbi pah-pinan npaek kuasat maꞌtaniꞌ.
6 Mes bifee naan naen neu baer fui ruumn es, reꞌ Uisneno nabarab nain je neu ne. Sin of anꞌurus bifee naan anbi bare naan tar antea neno niufn es natun nua mboꞌ nee (es reꞌ toon teun ma stenaꞌ).
Naiꞌ Mikael anmakeen anraban kaun naga nbi sonaf neno tunan
7 Rarit anmuiꞌ makenat koꞌu anbi sonaf neno tunan. Uisneno In soraurs ein sin meo-paꞌe, es reꞌ naiꞌ Mikael, anmakenan anraban kaun naga nok in ameupt ein.
8 Naiꞌ Mikael sin niis naan kaun naga sin. Rarit sin antaar sin he kais natuan nbin sonaf neno tunan antein.
9 Es naan ate, sin nait inporin sin naꞌkon sonaf neno tunan neun pah-pinan. Kaun naga naan, es reꞌ niutn ee sin usin, reꞌ sin nteek ee nak, ‘Iblis’. Naꞌko un-unuꞌ in es reꞌ anputa-kriu mansian he nmoꞌen sanat ma penu.
10 Rarit au ꞌneen aꞌteniꞌ hanaf maꞌtain es naꞌko sonaf neno tunan nak,
“Afi unuꞌ, kaun naga naan anhaek piut anbi Uisneno In human ma In matan.
In reꞌ naan, atuꞌiran sanat neu hit aok-bian apirsait ein.
In nakuu sin fai-manas.
Mes oras ia, anporin nasaitn ee naꞌko sonaf neno tunan.
Onaim oras ia, areꞌ saaꞌ-saaꞌ ii namtiis jen.
Fin oras ia, in oors aa goen he Uisneno nsoi nafetin mansian.
Oras ia Uisneno annaaꞌ aprenat neik In kuasat maꞌtaniꞌ.
Ma In nasaeb anrair Kristus,
es reꞌ Tuaf reꞌ In npiir ma nbeit Je njair Usif neu areꞌ kanan uuf ma pah.
11 Hit aok-bian apirsait ein niis nain kaun naga naan, reꞌ afi unuꞌ te nakuu sin,
natuin ꞌBib-kaes Anaꞌ naan In naaꞌ ee natꞌoop he nnoes nain sin saant am penu sin.
Sin niis ee msaꞌ,
natuin sin nabrain he nꞌetun ma natonan neu tuaf anmatoom nok ꞌBib-kaes Anaꞌ In nekan arekot neu sin.
Maski tuaf natooꞌ he nroor niis sin imsaꞌ,
sin ka ntet-kotin fa.
12 Onaim areꞌ kanan amonit et sonaf neno tunan, ro he nmarinan!
Mes areꞌ kanan amonit et pah-pinan ro he mpanat,
natuin siraak ii he nsaen ki jen.
Nitu ꞌnaakf ee, nsaun neitin ki.
In natooꞌ koꞌu,
natuin in nahiin nak, in oras he nmoeꞌ rais maufinu naan, he namsoup goen!”
Kaun naga naim bifee naan anbi pah-pinan
13 Oras kaun naga naan nahiin nak, nait inpoirn ee jen nbi pah-pinan on naan ate, in nnao naim bifee reꞌ nahoniꞌ Riꞌanaꞌ naan he nasusab.
14 Mes sin nfeen bifee naan ninif nua, nahuum on reꞌ kor-garuda in ninin. Nok ranan naan, in napein mainuan he natpeen ma naim baer fui ruman reꞌ naꞌroo naꞌko kaun naga naan. Anbi bare naan, sin nꞌuurs ee tar antea toon teun ma stenaꞌ.
15 Ankius niit on naan ate, kaun naga naan anpuran oe nahuum on reꞌ noe mahenuꞌ, he nroi neik bifee naan.
16 Mes pah piin ii anturun bifee naan neik ꞌmoꞌet es. ꞌMoꞌet naan es reꞌ, auf gui natfeꞌi rarit anꞌoor naan noe mahenuꞌ reꞌ anpuran anpoi naꞌko kaun naga naan. Nok ranan naan, noe mahenuꞌ naan ka ntean fa bifee naan.
17 Rarit kaun naga naan natooꞌ maꞌtaniꞌ neu bifee naan. Onaim in npoi naꞌko in baran ma annao nmakeen anraban bifee naan in anah bian sin, es reꞌ tuaf-tuaf reꞌ anmonin natuin Uisneno In Kabin ma Prenat, ma nmanauk ein nak sin reꞌ naan, Naiꞌ Yesus Iin na.
18 Rarit kaun naga naan annao nhake nbi tais je ninin, ma nek-neuk nisin.