6
Anmatoom nok usiꞌ ma ate
1 Anmuiꞌ usif reꞌ sin aten anpirsain neun Usif Yesus. Sin ro he nhormaat sin usin, maut he biak ein kais napenin ranan he naꞌuab namouf Uisneno In kanan, ma nkanaꞌpaar hit noniꞌ.
2a Anmuiꞌ aten reꞌ sin uisn ee npirsai neu Usif Yesus. Aten naan sin kais ankanaꞌpaar sin usif naan, natuin in npirsai neu Usif Yesus. On mee-on mee msaꞌ, sin ro he ntuthae reko nneisi ntein neu sin usin naan, natuin sin arsin pirsait meseꞌ, ma sin ro he nmanekan es nok es.
Noniꞌ reꞌ ansaan, ma upan arekot
2b Tius! Munoniꞌ rasin reꞌ ia ok-okeꞌ, ma muꞌhabaꞌ too srain ein, he sin nmoeꞌ natuin sin ok-okeꞌ.
3 Hit noniꞌ ma taruꞌ reꞌ amneot naan, njari ꞌsukif naꞌko raan aꞌhonis reꞌ nharineb Uisneno In nekan. Mes tuaf reꞌ nanoniꞌ ꞌtetaꞌ naꞌko noniꞌ reꞌ ia, sin reꞌ naan antitar napasib Usif Yesus Kristus In noniꞌ reꞌ amneot.
4 Tuaf on reꞌ naan, naꞌnaeb in tuan, mes in ka maroneꞌ fa! Sin meens ii, es reꞌ nromin he namin rais matoes nok ahaa rais ruum-ruum. Rasin ia, anneek-menab tuaf bian, anmatoebaꞌ tuaf, nareuꞌ atoniꞌ bian sin kaank ein, ma anmaktiun ein ruum-ruum aah.
5 Tuaf human on reꞌ naan, anmoeꞌ rais taisibu piut-piut. Sin teenb ein namreꞌun. Sin ka nahini nteinꞌ ein fa, mee es reꞌ amneot ma amnonot. Sin natenab nak karu sin nmakoen nbin rais pirsait, sin bisa njarin atoin amuꞌit.
6 Batuur, rais pirsait ii bisa nmoeꞌ mansian ii napeni mnisat koꞌu. Fin ꞌmonit reꞌ anharineb Uisneno In nekan, maseroꞌ nok rais tenab manokab anmatoom nok saaꞌ reꞌ sin nmuꞌi, naan ro rais pirsait batuur aa!
7 Mimnau mirek-rekoꞌ! Oras nahoniꞌ kit, hit ka teik fa saaꞌ es attaam teu pah-pinan ia. Ma oras hit tmate msaꞌ, hit ka teik fa saaꞌ-saaꞌ tpoi taꞌko pah-pinan ia.
8 Onaim asar mnahat, mninut, ma pake-nohas nanokab ate, taꞌtenaꞌ hit teenb ii nai!
9 Mes tuaf reꞌ anroim he njair atoin amuꞌit, maan aa fa te, in of napein rais furit humaꞌ-humaꞌ, ma nmoufu nbi kreot aꞌrii-ꞌneꞌu, natuin sin nateenb ahaa ꞌmuꞌif. Areꞌ kanan rasin naan of neik siraak ma nareuꞌ sin aꞌmoink ein.
10 Atneek tanesib roit ii te, naan anjair uuf neu rais maufinu humaꞌ-humaꞌ. Anmuiꞌ tuaf bian reꞌ sin naimn ahaa roit, tar antea sin ntanhai sin rais pirsait amneot. Nok ranan naan, sin neikn ok, nareuꞌ sin aꞌmoink ein.
Amnaaꞌ muher-heran noniꞌ reꞌ ho mtoupu mrair je
11 Timotius! Ho mjair Uisneno Iin ja ko. Onaim amtet-koit muꞌroo-ꞌroo muꞌko rais amreuꞌt ein ok-okeꞌ. Ammoin mok neek akninuꞌ. Ammoni mbi rasi reꞌ amharineb Uisneno In nekan anbi areꞌ kanan rasi. Ampirsai piut meu Yesus Kristus. Amneek sekau-sekau goah. Ho ro he mtahan ambi susat. Ammoin mok sekau-sekau goah amsaꞌ, ro he nok neek maꞌnuraꞌ.
12 Ammeup batuur-batuur, he munaob areꞌ noinꞌ ein reꞌ hit tpirsai sin. Uisneno noꞌen nataam ko meu rasi ꞌhonis abar-barat. Onaim amnaaꞌ ma mhoo muher-heran rasi ꞌhonis naan, kais mufetin. Ma ho mutoon amrair ho rais pirsait meu Usif Yesus anbi too mfaun ein sin humak ma sin matak.
13-14 Onaim oras ia, au ꞌtoit ko he muhakeꞌ rais manbaꞌan on nai: ammoeꞌ mutuin Usif Yesus In apreent ein ok-okeꞌ. Kais amtanhai prenat meseꞌ msaꞌ, maut he biak ein kais nitan ma napenin sanat naꞌko ko. Ammoeꞌ mutuin sin ok-okeꞌ nok batuur, tar antea hit Usiꞌ, Yesus Kristus, ankoen On anfain neem. Au ꞌtoit ko he muhakeꞌ rais manbaꞌan on naan anbi Uisneno In human ma In matan. In es reꞌ anfee snasaf neu areꞌ kanan amonit. Au ꞌtoit ko he ho muhakeꞌ rais manbaꞌan on reꞌ naan anbi Yesus Kristus In human ma In matan. In es reꞌ neikn On natoon nanon-noon anmatoom nok In tuan ee, nbi gubernur Pontius Pilatus in human ma in matan.
15 Usif Yesus reꞌ maꞌtain reꞌuf naan, In es reꞌ annaaꞌ kuasat!
In reꞌ naan, Uis Koꞌu nneis naꞌko areꞌ uisf ein.
Ma In reꞌ naan, Aꞌnaak Koꞌu nneis naꞌko areꞌ kanan aꞌnaakf ein.
Antea in oors ate,
Uisneno of nakriraꞌ areꞌ kanan rasin ia.
16 Suma In kuun, es reꞌ ka nmaet fa ma nmoin nabar-baar.
In nmoni nbi meꞌu reꞌ mansian ii ka nabeiꞌ fa he nkius ma nꞌere.
Ka tiit tain fa tuaf es, reꞌ nabeiꞌ he nkius Goe.
Areꞌ kanan rais hormaat nasaeb ok neu Ne!
Areꞌ kanan kuasa et In aꞌniman tar antea nabar-baar!
On reꞌ naan, tua! Amin!
Anmatoom nok amuꞌit ein
17 Tius! Mutoon meu amuiꞌt ein pah-pinan ia, he sin kais nabeꞌon, ma kais naꞌpanen sin aꞌmoink ein neu ꞌmuꞌif pah-pinan. Fin aꞌmuiꞌf ein naan of oekꞌ ein. Reko nneis sin naꞌpaen ok anbin Uisneno ꞌHonis. Fin In es reꞌ nathoeb kit saaꞌ-saaꞌ reꞌ hit tperluu sin, he hit bisa tnaben tiit ꞌmoint ii in mainonin.
18 Mutoon meu sin he sin npaek sin aꞌmuiꞌk ein he nmoꞌen rais reko. Sin ro he nmakoen nbin nmoeꞌ reko. Sin ro he nnonaꞌ sin aꞌniimk ein he nfiit ma nbaab tuaf, ma nroim he nfee athoen naꞌko Uisneno neu sin.
19 Nok ranan naan, sin nkikin ma nakbuaꞌ aꞌmuꞌif he njari ꞌsukif maꞌtaniꞌ neu sin aꞌmoink ein nokaꞌ-nmeu. Nok ranan naan amsaꞌ, sin nafenaꞌ rasi ꞌmonit reꞌ maꞌupaꞌ ma maꞌosaꞌ.
Naiꞌ Paulus natuꞌub in surat
20 Tius! Ampanat murek-rekoꞌ areꞌ kanan rasi reꞌ Uisneno nanaꞌat ko sin. Kais amseit-seitn om meu rais poi ruum-ruum. Kais amtuut mok ambi uab reuꞌf ein, reꞌ ka neik fa rais hormaat neu Uisneno. Mumnau, goo! Anmuiꞌ tuaf anpaas in aꞌbasan nak, in atoin ahinit. Te kaah, sin ‘hinit’ naan, ka nmuiꞌ fa ꞌsukif. Kais amnao he mmatuut-feef mok sin.
21 Anmuiꞌ tuaf bian reꞌ npirsai rais puta-kriu ngguin, tar antea sin ntebin naꞌkon sin rais pirsait reꞌ amneot ma amnonot neu Uisneno.
Au ꞌtoit he Uisneno nakriraꞌ In neek arekot neu ki ok-okeꞌ.
Saloom,
Au naiꞌ Paulus kau, tua.