3
Gu yaakutaknan du Jon dé kudi wakwek
1-2 Taibirias Romba némaan ban wupmalemu (14) kwaaré radéka aniké kwaaré Got dé Jonét kudi wakwek. Wani tulé Taibirias wekna Romba némaan ban radéka Pontias Pailat dé Judiana némaan ban dé rak. Wani tulé Yerot Galiliba rakwa du taakwaké némaan ban radéka, déku némaadu Pilip Ituriaba rakwa du taakwaké, Trakonaitisba rakwa du taakwaké wawo némaan ban radéka Laisenias Abiliniba rakwa du taakwaké dé némaan ban rak. Yadaka Anas bét Kaiapas akwi nyédé duna némaan du bét rak. Wani tulé Sekaraiana nyaan Jon du ramarék taaléba radéka Got dé dérét kudi wakwek.
3 Wakwedéka Jon déku kudi véknwute dé Jodan kaabélé yékwaba yeyé yeyak. Yeyé yeyate dé du taakwat kéga wakwek, “Guné yagunén kapéredi mu kulaknyénygunu wuné Gotna yéba gunat gu yaakutaknaké wunék. Guné waga kulaknyénytakne Gotna yéba gu yaakugunu dé guna kapéredi mawulé yatnyéputiké dé yo.” Naate dé Jon wakwek.
4 Jon waga yadénké déknyényba Gotna yéba kudi wakwen du déku yé Aisaia Gotna nyégaba kéga dé kavik:
Du nak dé wao du ramarék taaléba.
Waate dé kéga wo, “Némaan Banna yaabu kutké guné yo.
Kutgunu yaabu miték kwaaké dé yo déké.
5 Akwi kérém sérémké guné yo, yaabu dawulimarék yaduké.
Akwi némaa nébu akwi makwal nébu wawo miték vaaké guné yo, yaabu waarémarék yaduké.
Anygwa yan yaabu kutgunu yaabu kedéng yéké dé yo.
Matu rakwa yaabu matu kéraasolagunu yaabu miték kwaaké dé yo.
6 Waga yagunu akwi du taakwa véké de yo derét kutkalé yaduké Got wadén banét.”
Wani aja kudi déknyényba Aisaia dé kavik. Du taakwana mawulé miték tédu, de Jisas yaadéranké miték sanévéknwudaranké, dé wani kudi kavik.
7 Du taakwana mawulé miték téduké Jon dé derét kudi wakwek. Wupmalemu du taakwa Jon derét gu yaakutaknaduké yaadaka dé derét kudi wakwek. Kéga dé wak, “Guné kapéredi mawulé yakwa du taakwa guné. Got apakélé kot véknwute némaan ban raran nyaa kéni dé yao. Wani nyaa Got du taakwa yadan kapéredi muké rékaréka yaké dé yo. Wani nyaaké sanévéknwute guné, du yaawi tudaka yaage yékwa kaabe pulak, guné wunéké yaage yao.
8 Wunéké yaamarék. Taale guné yagunén kapéredi mu kulaknyénytakne yéknwun mu male yaké guné yo. Yagunu nak du taakwa véte waké de yo, ‘De kapéredi mu kulaknyénytakne bulaa yéknwun mu de yo.’ Naate waké de yo. Guné guna mawuléba guné wo, ‘Naané Ebrayamna képmawaara naané ro. Dé Gotna méniba yéknwun mu yakwa du radék naané wawo Gotna méniba yéknwun mu yakwa du taakwa naané ro.’ Naate wate guné yénaa guné yo. Guné yéknwun mu kaapuk yagunékwa. Got mawulé yadéran dé wadu kéni matu du ye de Ebrayamna képmawaara pulak raké de yo. Ebrayamna képmawaara ragunékwaké Got kaapuk sanévéknwudékwa. Yagunékwa muké dé sanévéknwu.
9 “Aja kudi nak wakweké wunék. Du sék akumarék yakwa miké sanévéknwute kwajélek kérae wani mi véléké dé yo. Véle yaaba tuké dé yo. Bulaa wani aja kudiké mé sanévéknwu. Bulaa Got déku kudi véknwumarék yaran du taakwat yadan kapéredi mu yakataké dé yo. Yakatadu de yaa yaansaakukwa taalat yéké de yo.”
10 Jon waga wadéka de déku kudi véknwute wup yate de dérét waatak, “Naané samu yaké naané yo?”
11 Naate wadaka dé derét wak, “Guné baapmu wut vétik yagunéran, guné baapmu wut las yamarék du taakwaké kwayéké guné yo. Guné kadému taknagunéran, guné kadému yamarék du taakwaké kwayéké guné yo.”
12 Wani kudi wadéka de takis nyégélkwa du las de déké yaak, dé derét gu yaakutaknaduké. Yae de dérét wak, “Némaan du, méné Gotké méné naanat yakwatnyu. Naané samu yaké naané yo?”
13 Naate wadaka dé derét wak, “Guné Romna gapman gunat wakwen pulak male takis nyégélké guné yo. Yate yéwaa las wawo nyégélmarék yaké guné yo.”
14 Wani kudi wadéka de waariyakwa du las dérét waatak, “Naané yaga pulak? Naané samu yaké naané yo?” Naate wadaka dé derét wak, “Guné du taakwaké apa yate deku yéwaa bakna kéraamarék yaké guné yo. Guné du taakwaké yénaa kudi wakwete deku yéwaa kéraamarék yaké guné yo. Guné jébaa ye nyégélgunéran yéwaaké yéknwun mawulé yaké guné yo.”
15 Jon waga yate waga wadéka akwi du taakwa sanévéknwu wanévéknwute deku mawuléba de wak, “Jon wan naanat kutkalé yaduké Got wadén ban Krais dé, kapu yaga pulak du dé?”
16 Naate sanévéknwudaka dé Jon derét wak, “Wuné gunat Gotna yéba gu wuné yaakutakno. Wuna kukba yaaran du wan némaan du. Wuné bakna du wuné ro. Déku apa wuna apat dé talaknak. Yaga pulak déku jébaa yaké wuné yo, wuné bakna du rawurékwa bege? Dé némaan du radéka wuné déké jébaa yaké wuné yapatiyu, wuné bakna du rawurékwa bege. Wuna kukba yaaran du Gotna Yaamabi gunéké kwayéké dé yo. Guna kapéredi mu kérae yaaba tuké dé yo.
17 Du wit kérae yéknwun wit sék kéraaké de gériyu. Géritakne de yéknwun wit sék gaba takne de apa yatjado. Yadakwa pulak wuna kukba yaaran du waga yaké dé yo. Dé déku du taakwat kérae kure ye déku gayéba takne, kapéredi mu yan du taakwat kérae yaansaakukwa yaaba yatjadaké dé yo.”
18 Jon wani kudi du taakwat wakwete dé Gotna kudi las wawo dé wakwek, deku mawulé miték téduké.
Yerot wadéka de Jonét raamény gaba taknak
19 Galiliba rakwa du taakwana némaan ban Yerot dé déku némaadu wekna radéka dé déku taakwa kéraak. Léku yé Yerodias. Wupmalemu kapéredi mu las wawo dé yak.
20 Yadéka Jon dérét waatidéka Yerot dé kéni kapéredi mu wawo dé yak. Dé wadéka déku du de Jonét raamény gaba taknak.
Jon Jisasnyét dé Gotna yéba gu yaakutaknak
21-22 Déknyényba Yerot Jonét raamény gaba taknadoké wamarék yadén tulé Jon déké yaan akwi du taakwat dé Gotna yéba gu yaakutaknak. Yaakutakne dé Jisasnyét wawo Gotna yéba gu yaakutaknak. Yaakutaknadéka téte Got wale kudi buldéka nyét kepukadéka dé Gotna Yaamabi nyaamiyo pulak ye dé Jisaské giyaak. Giyaadéka kudi nak Gotna gayéba dé wak, “Méné wuna nyaan. Ménéké wuné mawulat kapére yo. Ménéké wuna mawulé yéknwun dé yo.”
Jisasna képmawaarana yé
23 Jisas déku kwaaré wupmalemu (30) yadéka dé déku jébaa batnyé yak. Du taakwa de déké wak, “Wan Josepna nyaan.” Naate de wak.
Josep wan Yilaina nyaan.
24 Yilai wan Matatna nyaan.
Matat wan Livaina nyaan.
Livai wan Melkaina nyaan.
Melkai wan Janaina nyaan.
Janai wan Josepna nyaan.
25 Josep wan Matataiasna nyaan.
Matataias wan Emosna nyaan.
Emos wan Neamna nyaan.
Neam wan Eslaina nyaan.
Eslai wan Nagaina nyaan.
26 Nagai wan Meatna nyaan.
Meat wan Matataiasna nyaan.
Matataias wan Semenna nyaan.
Semen wan Josekna nyaan.
Josek wan Jodana nyaan.
27 Joda wan Joananna nyaan.
Joanan wan Resana nyaan.
Resa wan Serababelna nyaan.
Serababel wan Sialtielna nyaan.
Sialtiel wan Neraina nyaan.
28 Nerai wan Melkaina nyaan.
Melkai wan Edaina nyaan.
Edai wan Kosamna nyaan.
Kosam wan Elmadamna nyaan.
Elmadam wan Erna nyaan.
29 Er wan Josuana nyaan.
Josua wan Eliesana nyaan.
Eliesa wan Jorimna nyaan.
Jorim wan Matatna nyaan.
Matat wan Livaina nyaan.
30 Livai wan Simionna nyaan.
Simion wan Judana nyaan.
Juda wan Josepna nyaan.
Josep wan Jonamna nyaan.
Jonam wan Elaiakimna nyaan.
31 Elaiakim wan Meliana nyaan.
Melia wan Menana nyaan.
Mena wan Matatana nyaan.
Matata wan Netanna nyaan.
Netan wan Devitna nyaan.
32 Devit wan Jesina nyaan.
Jesi wan Obetna nyaan.
Obet wan Boasna nyaan.
Boas wan Salmonna nyaan.
Salmon wan Nasonna nyaan.
33 Nason wan Aminadapna nyaan.
Aminadap wan Atminna nyaan.
Atmin wan Anaina nyaan.
Anai wan Yesronna nyaan.
Yesron wan Peresna nyaan.
Peres wan Judana nyaan.
34 Juda wan Jekopna nyaan.
Jekop wan Aisakna nyaan.
Aisak wan Ebrayamna nyaan.
Ebrayam wan Tirana nyaan.
Tira wan Neyona nyaan.
35 Neyo wan Serakna nyaan.
Serak wan Reuna nyaan.
Reu wan Pelekna nyaan.
Pelek wan Ebena nyaan.
Ebe wan Selana nyaan.
36 Sela wan Kenanna nyaan.
Kenan wan Apaksatna nyaan.
Apaksat wan Siemna nyaan.
Siem wan Noana nyaan.
Noa wan Lamekna nyaan.
37 Lamek wan Metusalana nyaan.
Metusala wan Inokna nyaan.
Inok wan Jaretna nyaan.
Jaret wan Mayalalelna nyaan.
Mayalalel wan Kenanna nyaan.
38 Kenan wan Inosna nyaan.
Inos wan Setna nyaan.
Set wan Adamna nyaan.
Adam wan Gotna nyaan.