3
I Pagparapasamwak-na
si Juan Paragbunyag
Mateo 3:1-12; Markos 1:3-5,7-8
1-2 Ngan panakka-na si kakinsi ta'on si pagtinagal-na si Tiberio pagka'emperador, sapili'-na si Diyos si Juan nga dadi'-na si Sacarias pagpahalling si allingun-na ari si disyirto. Si Poncio Pilato, iya i gubirnador siray si Judea, si Herodes may i sari'i si Galilea, i sirari-na may nag'arunan Felipe i sari'i si Iturea pati' Trakonite, ngan si Lisanias may i sari'i si Abilinia. Iyay nan i panahon nga kas Anas pati' si Caifas i mga gilalabawi paraghalad.
3 Agpada'iray-na si Juan i dimu'an mga lugar magpalibot si Suba' Jordan, pagwali si mga a'a nga kinahanglan mga iya agbasol huwang si pagbag'o ngan agpabunyag, basi' apasaylo i mga sala'-na.
4 Tungod sinan atuman i mga allingon maka'anna' si Libru-na si paragsumat Isaias:
Aniya' addangan ari si disyirto nga agparapasamwak,
“Hawani-bi i aragihan-na si Paragdalom;
tadungu-bi i lalan ralangnganan-na.
5 Arabunuhan i dimu'an kapatagan nga nagpalibutan si mga kabubukiran,
ngan paratagon i dimu'an mga buntay pati' mga tagudturon.
Taradungon i mga baliko' lalan,
ngan haramison i mga garu'-gadu'on.
6 Papakulawun-na si Diyos i dimu'an mga a'a si titalwas si mga iya.”
7 Agpinugad-na si Juan i magpanggubok nga tipabunyag si iya, “Mga alisto kam gayod pagpamakunu-kuno! Say i magsumat si ka'am nga agpakalikay kam si titakka kastigu-na si Diyos kon agpamabunyag kam?
8 Agpakulawa kam dahulo pina'agi si mga buhat-bi nga agpamasol kam huwang si pagbag'o. Ma'in nga agpanarig na kam hamok si mga kalugaringun-bi pagpinugad, ‘Tatay kami' may si Abraham.’ Kay sumatan-ta kam, bisan tikang sito mga kababatuhan akahimo i Diyos mga dadi' para si Abraham.
9 Kay i kastigu-na akapariho si hatsa nga agpabantay-na andang si pu'un-na si mga kakayuhan, ngan bisan ay kayuha nga ga'i agbuwa' mahalap, tinabbong ngan pinabar'og.”
10 “Kon sugad, ay may i angay buhat kami'?” lingun-na si mga a'a.
11 Anaruman si Juan, “Angay gayod si ka'am nga mga aniya' nan duwa badu'-na pagbuwan si gana', ngan si mga aniya' nan pagkakan-na, pagbuwan si gana'.”
12 Aniya' liwat magpamadugok mga paragsukot buhis pagpabunyag. Agpamatilaw mga iya, “Ma'istro, ay may i angay buhat kami'?”
13 Agpinugad-na mga iya, “Dakam agsukot subra si angay surukutun-bi.”
14 Mangno aniya' mga sundalo mamatilaw si iya, “Ay may liwat i angay buhat kami'?”
Anaruman may si Juan, “Dakam agparapangwarta si mga a'a ngan dakam agparapamasumbong mga binurubullo' sala' si mga iya. Akuntintuha kam si swildo nagparapangarawat-bi.”
15 Mahaya gayod i mga pagla'um-na si mga a'a ngan aka'anna' si mga inisipan-na nga tingali si Juan na i Tinu'inan Mannanalwas.
16 Agsarumanan-na si Juan i mga inisipan-na mga iya dimu'an, “Parti hamok si buwahi' i pagbunyag-ko si ka'am, pero aniya' barantugon nga mas labaw pa i gahum-na. Ma'in ngani' ako angay bisan pagbak'ad si sintas-na si sapatus-na. Burunyagan-na i ditangnga' si mga a'a pagpa'ayop si Espirito Santo, pero burunyagan-na i ditangnga' paghusgar nga akapan'api.
17 Aniya' andang nag'antanan-na tapan basi' sahimaliran-na i mga gini'ok ngan salalin-na ari si kamalig-na, pero papabar'ugun-na i mga babang si gana' kapaparungun-na api.”
18 Aggamit pa liwat si Juan mga pala'in-la'in allingon pag'aghat si mga a'a pati' pagpasamwak si mahalap sumat si mga iya.
19 Ag'isugan-na si Juan si gubirnador Herodes kay agtig'uban-na i bayaw-na Herodias, huwang i dimu'an mga pala'in-la'in pa mga mara'at binuhatan-na.
20 Ngan tungod sinan, akatambahan pa liwat i mga sala'-na si gubirnador kay agpaprisu-na si Juan.
I Pagbunyag si Jesus
Mateo 3:13-17; Markos 1:9-11
21 Antis si pakaprisu-na si Juan, sigi parabunyagay i mga a'a ngan agpabunyag liwat si Jesus. Dungan si pagpangadyi'-na, kahuman si pagbunyag si iya, angabri i langit
22 ngan i Espirito Santo pan hawod pada'iray si iya nga kinakulawan gayod i puhu'-na pariho si adda sarampati. Aniya' liwat kinabati'an busis tikang si langit nga agpinugad, “Ka'aw i Dadi'-ko nga hinigugma'-ko. Alipay gayod ako si ka'aw.”
I Ginikanan-na si Jesus
Mateo 1:1-17
23 Siray uras, mga traynta anyos na si Jesus si pagtikang-na si trabahu-na para si Diyos. I pagkagasi-na si dimu'an, nga si Jesus, iya i dadi'-na si Jose.
Si Jose, iya i dadi'-na si Eli.
24 Si Eli, iya i dadi'-na si Matat,
nga dadi'-na si Levi.
Si Levi, iya i dadi'-na si Melqui,
nga dadi'-na si Jana.
Si Jana, iya i dadi'-na si Jose,
25 nga dadi'-na si Matatias.
Si Matatias, iya i dadi'-na si Amos,
nga dadi'-na si Nahum.
Si Nahum, iya i dadi'-na si Esli,
nga dadi'-na si Nagai.
26 Si Nagai, iya i dadi'-na si Maat,
nga dadi'-na si Matatias.
Si Matatias, iya i dadi'-na si Semein,
nga dadi'-na si Jose.
Si Jose, iya i dadi'-na si Juda,
27 nga dadi'-na si Joan.
Si Joan, iya i dadi'-na si Resa,
nga dadi'-na si Sorobabel.
Si Sorobabel, iya i dadi'-na si Salatiel,
nga dadi'-na si Neri.
28 Si Neri, iya i dadi'-na si Melqui,
nga dadi'-na si Adi.
Si Adi, iya i dadi'-na si Cosam,
nga dadi'-na si Elmodam.
Si Elmodam, iya i dadi'-na si Er,
29 nga dadi'-na si Josue.
Si Josue, iya i dadi'-na si Elieser,
nga dadi'-na si Jorim.
Si Jorim, iya i dadi'-na si Matat,
nga dadi'-na si Levi.
30 Si Levi, iya i dadi'-na si Simeon,
nga dadi'-na si Juda.
Si Juda, iya i dadi'-na si Jose,
nga dadi'-na si Jonan.
Si Jonan, iya i dadi'-na si Eliakim,
31 nga dadi'-na si Melea.
Si Melea, iya i dadi'-na si Mainan,
nga dadi'-na si Matata.
Si Matata, iya i dadi'-na si Natan,
nga dadi'-na si David.
32 Si David, iya i dadi'-na si Jesse,
nga dadi'-na si Obed.
Si Obed, iya i dadi'-na si Boas,
nga dadi'-na si Salmon.
Si Salmon, iya i dadi'-na si Naason,
33 nga dadi'-na si Aminadab.
Si Aminadab, iya i dadi'-na si Admin,
nga dadi'-na si Arni.
Si Arni, iya i dadi'-na si Esrom,
nga dadi'-na si Fares.
34 Si Fares, iya i dadi'-na si Juda,
nga dadi'-na si Jacob.
Si Jacob, iya i dadi'-na si Isaac,
nga dadi'-na si Abraham.
Si Abraham, iya i dadi'-na si Tare,
35 nga dadi'-na si Nahor.
Si Nahor, iya i dadi'-na si Serug,
nga dadi'-na si Reo.
Si Reo, iya i dadi'-na si Peleg,
nga dadi'-na si Eber.
36 Si Eber, iya i dadi'-na si Sela,
nga dadi'-na si Cainan.
Si Cainan, iya i dadi'-na si Arfaxad,
nga dadi'-na si Sem.
Si Sem, iya i dadi'-na si Noe,
37 nga dadi'-na si Lamec.
Si Lamec, iya i dadi'-na si Metusela,
nga dadi'-na si Enoc.
Si Enoc, iya i dadi'-na si Jared,
nga dadi'-na si Mahalalel.
38 Si Mahalalel, iya i dadi'-na si Cainan,
nga dadi'-na si Enos.
Si Enos, iya i dadi'-na si Set,
nga dadi'-na si Adan,
ngan si Adan i dadi'-na si Diyos.