8
1 Ri Saulo e jun chike ri xuya uchꞌaꞌtem chaꞌ kakamisax ri Esteban.
Ri Saulo kebꞌuternabꞌej rukꞌ kꞌax ri kikojom rubꞌiꞌ ri Cristo
Chupa kꞌu riꞌ laꞌ la jun qꞌij, lik xjeqer kiternabꞌexik rukꞌ kꞌax janipa ri kikojom rubꞌiꞌ ri Cristo chilaꞌ Jerusalem. Ruma kꞌu riꞌ, konoje xekich bꞌi chupa taq ri luwar re Judea y re Samaria. Xew chi rutaqoꞌn ri Jesús xekanaj kan Jerusalem.
2 E kꞌo kꞌu jujun achijabꞌ lik kiyaꞌom kibꞌ puqꞌabꞌ ri Dios; rike xkimuq ri Esteban y lik xkoqꞌej rukamik.
3 Noꞌj ri Saulo ebꞌuternabꞌem rukꞌ kꞌax ri kikojom rubꞌiꞌ ri Cristo. Xok kꞌu chiꞌ taq ja re kebꞌuꞌcharej lo rachijabꞌ y rixoqibꞌ yey kebꞌuꞌyaꞌa pa cárcel.
Katzijox ri Utzilaj Tzij chupa taq ri tinamit re Samaria
4 E taq kꞌu ri ekichom bꞌi kakitzijoj ri Utzilaj Tzij chupa ronoje luwar pa kebꞌopon wi.
5 Ri Felipe e jun chike. Rire xopon chupa jun tinamit re Samaria y xujeq katzijon puwi ri Cristo chikiwach ri winaq.
6 Waꞌ wa winaq xa jun kiꞌanom che utayik janipa ri kukꞌut ri Felipe, yey kakitzutzaꞌ taq ri kꞌutubꞌal re ruchuqꞌabꞌ ri Dios kuꞌan chikiwach.
7 Ma lik e kꞌi ri e kꞌo pakiqꞌabꞌ itzelilaj uxlabꞌixel, yey waꞌ wa itzelilaj uxlabꞌixel kesikꞌinik kebꞌel bꞌi chike ri winaq. Y e kꞌo ukꞌiyal jetzꞌ y sik xekunutajik.
8 Ruma kꞌu riꞌ waꞌ, taq ri winaq re ri tinamit lik kekiꞌkotik.
Jun achi kubꞌiꞌtisij puaq chaꞌ kakꞌojiꞌ ruchuqꞌabꞌ ri Dios rukꞌ
9 Kꞌo kꞌu jun achi aj chiriꞌ Simón rubꞌiꞌ. E ri petinaq loq rire aj qꞌij chupa la tinamit; lik kebꞌusok ri winaq e aj Samaria ma kuꞌan che ribꞌ pachaꞌ lik kꞌo uwach.
10 Konoje kꞌu ri winaq chinimaꞌq chichꞌutiꞌq, lik kakita ri kubꞌiꞌij ri Simón y jewaꞌ kakibꞌiꞌij: «E unimal uchuqꞌabꞌ ri Dios ri kꞌo rukꞌ waꞌchi» kechaꞌ.
11 Lik kakikoj ri kubꞌiꞌij, ma lik xex wi ebꞌusokom rukꞌ ri qꞌijonik kuꞌano.
12 Pero echiriꞌ xkita ri Utzilaj Tzij kutzijoj ri Felipe chwi rutaqanik ri Dios y chwi ri Qanimajawal Jesucristo, xkikojo y jekꞌuriꞌlaꞌ achijabꞌ yey ixoqibꞌ xkikꞌul ri bautismo.
13 Ekꞌu riꞌ waꞌchi Simón xukoj rubꞌiꞌ ri Cristo y xukꞌul ne ri bautismo. Xujeq kꞌu riꞌ karachbꞌilaj ri Felipe y lik kakam ranimaꞌ che taq ri kꞌutubꞌal re ruchuqꞌabꞌ ri Dios karilo kuꞌan ri Felipe.
14 Yey ri e taqoꞌn re ri Cristo e kꞌo Jerusalem, echiriꞌ xkito ri e aj Samaria xkikoj ri ubꞌiꞌim lo ri Dios puwi ri Cristo, xekitaq bꞌi ri Pedro y ri Juan chilaꞌ Samaria.
15 Ekꞌuchiriꞌ rike xebꞌoponik, xkijeq kakiꞌan orar pakiwi ri aj Samaria ri kikojom chi rubꞌiꞌ ri Cristo chaꞌ rike kakikꞌul ri Santowilaj Ruxlabꞌixel ri Dios.
16 Ma ri Ruxlabꞌixel ri Dios kꞌamajaꞌ kaqaj puwi junoq chike, xew kikꞌulum ri bautismo pa rubꞌiꞌ ri Qanimajawal Jesucristo.
17 Yey echiriꞌ ri Pedro y ri Juan xkiya ri kiqꞌabꞌ pakiwiꞌ, xkikꞌul ri Santowilaj Ruxlabꞌixel ri Dios.
18 Ekꞌu ri Simón xrilo suꞌanik ri tikawex kakikꞌul ri Ruxlabꞌixel ri Dios echiriꞌ ri taqoꞌn kakiya ri kiqꞌabꞌ pakiwiꞌ. Xubꞌiꞌtisij kꞌu puaq chike,
19 jewaꞌ xubꞌiꞌij:
—Yaꞌa alaq chwe riꞌin laꞌ la jun chuqꞌabꞌ, chaꞌ jelaꞌ xa tobꞌ china puwiꞌ kanya wi ri nuqꞌabꞌ, kukꞌul ri Santowilaj Ruxlabꞌixel ri Dios —xchaꞌ.
20 Ekꞌuchiriꞌ, ri Pedro jewaꞌ xubꞌiꞌij che:
—Sach na uwach rapuaq junam awukꞌ riꞌat, ma e chawach riꞌat, xa rukꞌ puaq kaloqꞌ rusipanik ri Dios.
21 Yey riꞌat na jinta kꞌana awe che wa chak kaqaꞌano ma rawanimaꞌ na jusukꞌ ta chwach ri Dios.
22 E uwariꞌche, chatzelej atzij chwach ri Dios che waꞌ wa amak y chatzꞌonoj che Rire kukuy amak. Laj kukuy amak che la na utz taj xachꞌobꞌo.
23 Ma e kanwil riꞌin, lik uꞌanom kꞌax akꞌuꞌx chiqij y lik at yutum ruma ri mak —xcha ri Pedro che.
24 Ri Simón xukꞌul uwach:
—Lik chꞌaw ko alaq panuwiꞌ chwach ri Qanimajawal chaꞌ na kankꞌulumaj ta kꞌana wa xbꞌiꞌij alaq chwe —xchaꞌ.
25 Ekꞌuchiriꞌ ri Pedro y ri Juan kitzijom chi taq ri xkilo y xkita che ri Jesús y kiqꞌalajisam chi ri Utzilaj Tzij re ri Qanimajawal, xetzelej Jerusalem. Yey xaloqꞌ kꞌu xebꞌikꞌow chupa taq ukꞌiyal aldeas ke raj Samaria, xkitzijoj ri Utzilaj Tzij.
Ri Felipe y rachi aj Etiopía
26 Kꞌo jun ángel re ri Qanimajawal xchꞌaꞌt rukꞌ ri Felipe, jewaꞌ xubꞌiꞌij che: «Chayijbꞌaꞌ awibꞌ y jat jewaꞌ pa sur. Chamaja bꞌi ri bꞌe kel Jerusalem, ri kaqaj pa ri tinamit Gaza» xchaꞌ. (Wa bꞌe kikꞌow pa taq luwar katzꞌintzꞌotik.)
27 Xyaktaj kꞌu ri Felipe y xumaj bꞌi ubꞌe yey pa ri bꞌe xuꞌriqa bꞌi jun achi “eunuco”. Waꞌ waꞌchi lik kꞌo uwach ma puqꞌabꞌ rire kꞌo wi ronoje rubꞌeyomal ri Candace. Ekꞌu waꞌchi xopon Jerusalem chaꞌ kuloqꞌnimaj uqꞌij ri Dios,
28 yey e riꞌ katzelej pa rutinamit. Tzꞌul kꞌu chupa jun kareta y karajilaj Ruchꞌaꞌtem ri Dios tzꞌibꞌital kan ruma ri qꞌalajisanel Isaías.
29 Ekꞌu ri Ruxlabꞌixel ri Dios xubꞌiꞌij che ri Felipe: «Chatqibꞌ pana che la jun kareta y chatbꞌin putzal» xchaꞌ.
30 Echiriꞌ ri Felipe xqibꞌ apanoq, xuto rachi e karajilaj ri tzꞌibꞌam kan ruma ri qꞌalajisanel Isaías y jekꞌuwaꞌ xutzꞌonoj che:
—¿Kamaj la usukꞌ la katajin la che rajilaxik? —xcha che.
31 Rachi xukꞌul uwach:
—¿Suꞌanik kanmaj usukꞌ we na jinta junoq kaqꞌalajisan chwe? —xcha che. Y xelaj kꞌu che ri Felipe chaꞌ kaqꞌan pa ri kareta y katzꞌuyiꞌ rukꞌ.
32 Ekꞌu ri karajilaj che Ruchꞌaꞌtem ri Dios e waꞌ:
Xkꞌam bꞌi e pachaꞌ juna bꞌexex re kakamisaxik;
e pachaꞌ juna qꞌapoj bꞌexex
na kachꞌaw ta kꞌenoq
echiriꞌ kasokax ri rismal;
jekꞌuriꞌlaꞌ rire na jinta kꞌana xubꞌiꞌij.
33 Xꞌaniꞌ che pachaꞌ lik na jinta uwach;
y echiriꞌ xqꞌat tzij puwiꞌ,
xꞌan ri lik na e ta usukꞌ che.
¿China taq kꞌu ri tikawex kakipetebꞌej lo che rire?
Na e jintaj,
ma xqꞌat uqꞌij che ruwachulew. Is. 53:7-8
E waꞌ ri katajin che rajilaxik.
34 Ekꞌu waꞌchi aj Etiopía xutzꞌonoj che ri Felipe:
—Maꞌan ko la riꞌ bꞌiꞌij la chwe, ¿china puwi kachꞌaꞌt wi ri qꞌalajisanel echiriꞌ kubꞌiꞌij waꞌ? ¿Chiribꞌil ribꞌ nawi kubꞌiꞌij wi o kachꞌaꞌt puwi junoq chik? —xchaꞌ.
35 Ekꞌu ri Felipe xchꞌaꞌt rukꞌ rachi puwi waꞌ. Xujeq lo rukꞌ ri katajin che rajilaxik che Ruchꞌaꞌtem ri Dios y xutzijoj kꞌu che puwi ri Utzilaj Tzij re ri Jesús.
36 E kꞌo chi bꞌe echiriꞌ xebꞌopon pa jun luwar pa kꞌo wi yaꞌ.
Ekꞌu riꞌ rachi aj Etiopía xubꞌiꞌij che ri Felipe:
—Wara kꞌo yaꞌ. ¿Utz nawi riꞌin kankꞌul ri bautismo? —xcha che.
37 Ri Felipe xubꞌiꞌij che:
—We kakoj la rubꞌiꞌ ri Qanimajawal Jesucristo rukꞌ ronoje animaꞌ la, lik utz riꞌ —xcha che.
Rachi xukꞌul uwach:
—Riꞌin kankojo ri Qanimajawal Jesucristo e Rukꞌajol ri Dios —xchaꞌ.
38 Y xutaq kꞌu utakꞌabꞌaxik riꞌ ri kareta.
Ekꞌu ri Felipe junam rukꞌ rachi xeqaj chupa ri yaꞌ. Tekꞌuchiriꞌ, ri Felipe xuya ri bautismo che.
39 Echiriꞌ xebꞌel lo chupa ri yaꞌ, xaqikꞌateꞌt ri Ruxlabꞌixel ri Dios Qajawxel xukꞌam bꞌi ri Felipe. Rachi aj Etiopía na xril ta chi uwach, pero lik kakiꞌkotik xumaj tanchi ubꞌi rubꞌe.
40 Ekꞌu ri Felipe xeꞌyoꞌq chupa jun tinamit Azoto rubꞌiꞌ. Echiriꞌ xel bꞌi chiriꞌ, xikꞌow pa taq tinamit yey chujujunal tinamit pa xikꞌow wi, xutzijoj ri Utzilaj Tzij. Ekꞌu riꞌ xopon kꞌa chupa ri tinamit Cesarea.