12
Ri kuya ri Ruxlabꞌixel ri Dios chiqe re ꞌanabꞌal ruchak
1 Hermanos, riꞌin lik kuaj ketaꞌmaj alaq chi utz puwi taq ri sipanik uyaꞌom ri Ruxlabꞌixel ri Dios chiqe chaꞌ rukꞌ waꞌ kaqaꞌan ruchak ri Qaqaw.
2 Ma etaꞌam alaq rojertan echiriꞌ kꞌamajaꞌ kꞌo alaq pa ri Qꞌijsaq, xsokotaj alaq y xya kꞌu ibꞌ alaq che kiloqꞌnimaxik tiox tobꞌ waꞌ na kechꞌaw taj.
3 Pero woꞌora lik kuaj ketaꞌmaj alaq waꞌ: We kꞌo junoq tzel kachꞌaꞌt chirij ri Jesús, riꞌ lik qꞌalaj na e ta ruma ri Ruxlabꞌixel ri Dios kubꞌiꞌij waꞌ. Noꞌj we kꞌo junoq kutzijoj: «Ri Jesús e Qanimajawal,» riꞌ e ruma ri Santowilaj Ruxlabꞌixel kubꞌiꞌij waꞌ, ma xew ri Ruxlabꞌixel ri Dios kaqꞌalajisan re waꞌ che junoq.
4 Tape alaq, kꞌi taq uwach ri sipanik yaꞌtal chiqe chaꞌ kaqaꞌan ruchak ri Dios; pero xa Jun ri kayaꞌw re, waꞌ e ri Ruxlabꞌixel ri Dios.
5 Lik kꞌi taq uwach ri chak; pero xa Jun kꞌu ri rajaw, waꞌ e ri Qanimajawal Jesucristo.
6 Yey ruꞌanik waꞌ wa chak kꞌi taq uwach; pero xa Jun ri kayaꞌw chiqe kaqaꞌan waꞌ, xew ri Dios.
7 Ri Dios uyaꞌom chiqajujunal riꞌoj kꞌutubꞌal re ri Ruxlabꞌixel Rire chupa ri qabꞌinik qasilabꞌik, waꞌ e re toꞌbꞌal ke rutinamit ri Dios.
8 Ma e kꞌo jujun yaꞌtal chike ruma ri Ruxlabꞌixel ri Dios kechꞌaꞌt rukꞌ saqil naꞌoj.
Jekꞌulaꞌ ruma ri Ruxlabꞌixel ri Dios, yaꞌtal chike jujun chik kakitzijoj saꞌ ri uqꞌalajisam ri Dios chike.
9 E kꞌo kꞌu jujun chik yaꞌtal chike ruma ri Ruxlabꞌixel ri Dios lik kakikojo ri Dios kꞌo uchuqꞌabꞌ re kuꞌan ronoje tobꞌ lik kꞌayew.
E kꞌo jujun chik yaꞌtal chike ruma ri Ruxlabꞌixel ri Dios kakiꞌan orar pakiwi ri yewaꞌibꞌ yey waꞌ kekunutajik.
10 Jekꞌulaꞌ e kꞌo jujun chik yaꞌtal chike kakiꞌan milagros rukꞌ ruchuqꞌabꞌ ri Qaqaw,
y e kꞌo jujun chik yaꞌtal chike kakiqꞌalajisaj runaꞌoj ri Dios.
E kꞌo jujun chik yaꞌtal chike kaketaꞌmaj we juna tzij petinaq rukꞌ ri Ruxlabꞌixel ri Dios.
Jekꞌulaꞌ e kꞌo jujun chik yaꞌtal chike kechꞌaꞌt pa jujun chik chꞌaꞌtem na kimajom taj;
yey e kꞌo kꞌu jujun chik yaꞌtal chike kakiqꞌalajisaj ri xbꞌiꞌx ruma junoq tobꞌ na kakiriq ta waꞌ wa chꞌaꞌtem.
11 Pero ronoje waꞌ yaꞌtal chiqe, e ruma ri Ruxlabꞌixel ri Dios, ri kaꞌanaw re ronoje. Yey e Rire kajachaw chiqajujunal saꞌ ri karaj kuya chiqe.
12 E pachaꞌ juna tikawex, tobꞌ kꞌi uwach ri chapayom re rucuerpo, waꞌ xa jun uꞌanom. Jekꞌulaꞌ uꞌanom ri Cristo qukꞌ qonoje riꞌoj.
13 Ma ri Ruxlabꞌixel ri Dios xuꞌan xa jun chiqe echiriꞌ xqakꞌul ri bautismo pa rubꞌiꞌ ri Cristo. Qonoje kꞌu riꞌ xa jun qawach, tobꞌ e kꞌo jujun chiqe e aj judiꞌabꞌ y jujun chik na e ta aj judiꞌabꞌ, tobꞌ ne jujun chik e aj chakibꞌ eloqꞌotal ruma kajaw yey jujun chik kechakun pa ke rike; pero qonoje junam qakꞌulum ri Uxlabꞌixel re ri Dios.
14 E juna cuerpo na xa ta jun uwach ri chapayom re, ma lik kꞌi uwach.
15 Ma we ta kachꞌaw ri aqanaj y kubꞌiꞌij kꞌu riꞌ: «Riꞌin na in ta re ri cuerpo ma na in ta qꞌabꞌaj.» Tobꞌ ne jelaꞌ riꞌ kubꞌiꞌij, lik rewi che ri cuerpo kꞌo wi.
16 Jekꞌulaꞌ we ta ri xikinaj kubꞌiꞌij: «Riꞌin na in ta re ri cuerpo ma na in ta wachaj.» Tobꞌ ne jelaꞌ riꞌ kubꞌiꞌij, lik rewi che ri cuerpo kꞌo wi.
17 We ta ronoje ri qacuerpo xa jun chi wachaj uꞌanom, ¿saꞌ kꞌu uꞌanik riꞌ kojtanik? Yey we ta ronoje ri qacuerpo xa jun chi xikinaj uꞌanom, ¿saꞌ kꞌu uꞌanik riꞌ kojuxlabꞌik?
18 Pero ri Dios uyaꞌom kan saꞌ taq ri kajawax che ri qacuerpo e chirij ri xraj Rire.
19 Ma we ta xa jun uwach ronoje ri chapayom re ri qacuerpo, lik na e ta kꞌana riꞌ.
20 Lik kꞌi uwach kꞌu riꞌ ri chapayom re ri qacuerpo, yey waꞌ xa jun uꞌanom.
21 E uwariꞌche ri wachaj na utz taj we kubꞌiꞌij che ri qꞌabꞌaj: «Riꞌat na katajawax ta chwe.» Jekꞌulaꞌ na utz ta nenareꞌ we ri jolomaj kubꞌiꞌij che raqanaj: «Riꞌat na katajawax ta chwe.»
22 Yey e janipa ri pachaꞌ na jinta ukowil che ri qacuerpo, e ne lik kebꞌajawax riꞌ chiqe.
23 Jekꞌulaꞌ e janipa ri pachaꞌ lik na il ta uwach che ri qacuerpo, e ne ri lik kaqachꞌuq chi utz; yey e janipa ri na utz taj kilitajik, e ne lik kojok il riꞌ che uchꞌuqik.
24 Noꞌj taq ri utz kilitaj chiqe, na jinta uchak kaqachꞌuqu. Ekꞌu ri Dios xyijbꞌan chi utz ri qacuerpo chaꞌ ri na il ta uwach chiqe, kojok más il che.
25 Ri Dios xuꞌan waꞌ chaꞌ janipa ri kꞌo che ri qacuerpo kujunimaj ribꞌ; jekꞌuriꞌlaꞌ janipa ri kꞌo che ri qacuerpo junam kakichajij kibꞌ.
26 Ruma kꞌu laꞌ we kꞌo juna kꞌax che ri qacuerpo, riꞌ ronoje ri qacuerpo kunaꞌ ukꞌaxkꞌolil. Jenelaꞌ we kꞌo ri lik kojok il che, riꞌ ronoje ri qacuerpo kakiꞌkotik.
27 Ralaq e alaq rucuerpo ri Cristo y chijujunal alaq kꞌo jun chak taqal che alaq kaꞌan alaq.
28 Ruma kꞌu laꞌ ri Dios ebꞌukojom e raj chak piglesia:
nabꞌe, e ri e taqoꞌn re ri Jesús,
ukaꞌm, e ri keqꞌalajisan re runaꞌoj ri Dios,
urox, e ri e kꞌutunel re taq rukꞌutunik ri Dios,
yey e kꞌo ri kakiꞌan milagros rukꞌ ruchuqꞌabꞌ ri Dios,
ri kekunan rukꞌ ruchuqꞌabꞌ ri Dios,
ri kiyaꞌom kibꞌ che kekitoꞌ jujun chik,
ri yaꞌtal chike kakichap utzaꞌm ri chak piglesia
y ri yaꞌtal chike kechꞌaꞌt pa jujun chik chꞌaꞌtem na kimajom taj.
29 Junwi taq ri chak. Ma ¿qonoje nebꞌa oj taqoꞌn? ¿Qonoje nebꞌa oj qꞌalajisanel re runaꞌoj ri Dios? ¿Qonoje nebꞌa oj kꞌutunel? ¿Qonoje nebꞌa oj ꞌanal milagros?
30 ¿Qonoje nebꞌa yaꞌtal chiqe oj kunanel? ¿Qonoje nebꞌa kojchꞌaꞌt pa jujun chik chꞌaꞌtem yaꞌtal ruma ri Ruxlabꞌixel ri Dios? ¿Qonoje nebꞌa oj qꞌalajisanel re ri xbꞌiꞌx ruma junoq pa jun chik chꞌaꞌtem yaꞌtal ruma ri Ruxlabꞌixel ri Dios? Na qonoje taj.
31 Rayij kꞌu alaq uriqik ri chak lik chirajawaxik che riglesia. Yey riꞌin kankꞌut chi jun bꞌe che alaq, ri más chirajawaxik wi chwa ronoje waꞌ, e ri rutzil kꞌuꞌxaj.