8
Ri waꞌim ikꞌowisam chikiwach ri tiox
Woꞌora kuaj kinchꞌaꞌt puwiꞌ we utz o na utz taj katij ri ikꞌowisam chikiwach ri tiox. Qꞌalaj kꞌut chiqajujunal riꞌoj kꞌo chi qanaꞌoj chwi waꞌ. Pero e kꞌo jujun kakichꞌobꞌo kimajom chi usukꞌ ronoje; y ruma laꞌ, kakiꞌan nim che kibꞌ. Noꞌj we paqatzij wi kꞌo rutzil kꞌuꞌxaj pa qanimaꞌ, lik kaqatoꞌ kꞌu qibꞌ riꞌ chaꞌ kꞌo qakꞌiyibꞌal chwach ri Dios. We kꞌo kꞌu junoq kuchꞌobꞌo lik kꞌo retaꞌam, riꞌ kꞌamajaꞌ kumaj usukꞌ ronoje ri lik chirajawaxik wi karetaꞌmaj.* Noꞌj ri paqatzij wi kꞌax kanaꞌw re ri Dios, riꞌ ralkꞌoꞌal ri Dios yey etaꞌmatal kꞌu uwach ruma ri Dios.
Chwi taq kꞌu ri waꞌim ikꞌowisam chikiwach ri tiox, riꞌoj qetaꞌam na jinta juna tiox che ruwachulew kꞌo ukꞌaslem, ma xa jun ri Dios kꞌolik, na jinta jun chik. Tobꞌ kꞌo ri kakibꞌiꞌij e kꞌo taq dios che ruwa kaj y che ruwachulew; yey chikiwach kꞌu ri kekojow waꞌ, lik e kꞌi ri kidios y ri kajawal; noꞌj riꞌoj qetaꞌam xa jun ri Dios kꞌolik, e ri Qaqaw, ri ꞌanayom re ronoje ri kꞌolik. Yey riꞌoj oj kꞌo puqꞌabꞌ Rire. Y xa jun ri Qanimajawal, e Jesucristo. Ruma Rire ꞌanom ronoje ri kꞌolik y ruma ne Rire oj kꞌas riꞌoj.
Na konoje ta kꞌut kakimaj usukꞌ puwi wa jun Dios kꞌaslik; ma e kꞌo hermanos ojertan xekitaqej taq tiox, yey kꞌa kꞌo pa kijolom waꞌ e kꞌaslik. Ekꞌu woꞌora we rike kakitij ri ikꞌowisam chwach juna tiox, e kakinaꞌ rike mak ri kakiꞌano. E kakichꞌobꞌ waꞌ ruma na jinta ukowil ri kinaꞌoj. Rike na kakimaj ta usukꞌ waꞌ: Na ruma ta ri kaqatijo kojilitaj chi utz ruma ri Dios. Na ruma ta ri kaqatijo o ri na kaqatij taj kꞌo qawach o na jinta qawach chwach ri Dios.
Paqꞌabꞌ alaq kꞌo wi saꞌ ri kaꞌan alaq. Na rukꞌ ta kꞌu riꞌ, chajij ibꞌ alaq che ri kaꞌan alaq, tobꞌ etaꞌam alaq na mak taj. Ma na utz taj we xa uma ralaq ketzaq pa mak ri na jinta ukowil ri kinaꞌoj. 10 Ma kꞌaxtaj kꞌo juna hermano na jinta ukowil runaꞌoj y karil kꞌu la tzꞌul la chwa ri mexa pa kakꞌayix wi ri waꞌim ikꞌowisam chwach juna tiox. Rilal etaꞌam la na mak ta waꞌ, noꞌj ri jun chik na kumaj ta usukꞌ waꞌ yey xa ruma xril la katij rilal waꞌ, kuꞌan kꞌu re pachaꞌ ri kaꞌan rilal y kutijo. 11 Tobꞌ rilal kꞌo naꞌoj la chwi waꞌ, pero ruma ri kaꞌan la, ri hermano na jinta ukowil runaꞌoj, karesaj ribꞌ chirij ri Cristo. ¡Waꞌ lik na ubꞌe taj, ma ruma ne rire xkam ri Cristo! 12 Jekꞌulaꞌ we kasachisaj alaq kinaꞌoj ri na e tikil ta chi utz, riꞌ kamakun alaq chikij rike y rukꞌ kꞌu waꞌ, e kamakun alaq chirij ri Cristo. 13 E uwariꞌche we ri kantij riꞌin kuꞌana tzaqibꞌal che juna hermano, xa jumul riꞌ na kantij ta chi tiꞌoꞌn chaꞌ jelaꞌ na katzaq ta ri jun hermano wuma riꞌin.
* 8:2 Ri qamajom usukꞌ na tzꞌaqat taj we na jinta ri rutzil ukꞌuꞌx ri Dios qukꞌ. 8:5 “Kajawal”: E kꞌo ri kakichꞌobꞌo kꞌo rajawal ri yaꞌ, kꞌo rajawal ri juyubꞌ o kꞌo rajawal ri tikoꞌn; yey chikiwach rike, waꞌ wa rajawal na winaq taj, e jun uxlabꞌixel kꞌo pa tew.