5
1 Ri kajawal raj chakunel pa Rocho Dios chaꞌtal chikixoꞌl rachijabꞌ. Rire kojotalik re kachꞌaw pakiwi ri tikawex chwach ri Dios y re kuya chwach ri Dios ri qasaꞌn y rawaj ekamisam pakikꞌaxel ri tikawex ruma ri kimak.
2 Ekꞌu rire, utz kukꞌut ri kꞌaxnaꞌbꞌal ukꞌuꞌx chike ri ketzaq pa mak tobꞌ na uꞌanikil taj kemakunik, ma rire na kuchꞌij tane uꞌanik janipa ri kubꞌiꞌij Rutzij ri Dios.
3 Ruma kꞌu waꞌ, chirajawaxik che rire kuya chwach ri Dios rawaj ekamisam ruma rumak rire y na xew ta ruma ri kimak ri tinamit.
4 Na jinta kꞌu junoq kuꞌan che ribꞌ kajawal ke raj chakunel pa Rocho Dios we na kojotal ta ruma ri Dios, jelaꞌ pachaꞌ ri xuꞌan rukꞌ ri Aarón.
5 Jekꞌulaꞌ ri Cristo na xutakꞌabꞌaꞌ ta uwach uqꞌij chiribꞌil ribꞌ y na xa ta pa re xuꞌan Qajawal kachꞌaw paqawiꞌ chwach ri Dios, ma e ri Dios jewaꞌ xubꞌiꞌij che:
Riꞌat at Nukꞌajol yey Riꞌin in Aqaw;
waqꞌij kꞌu riꞌ kanqꞌalajisaj waꞌ. Sal. 2:7
6 Yey je tanchi waꞌ xubꞌiꞌij:
Riꞌat na jinta utaqexik katkꞌojiꞌik at waj chak,
ri katchꞌaw pakiwi ri tikawex chinuwach Riꞌin
jelaꞌ pachaꞌ ri Melquisedec Sal. 110:4
xchaꞌ.
7 Ri Cristo echiriꞌ xjeqiꞌ wara che ruwachulew lik xuꞌan orar, rukꞌ oqꞌej y rukꞌ sikꞌ lik xelaj chwach ri Dios, ri kꞌo puqꞌabꞌ kukolobꞌej chwa ri kamik; y ri Dios lik xuta re ruma ri lik uyaꞌom ribꞌ puqꞌabꞌ.
8 Ekꞌu ri Cristo, tobꞌ e Ukꞌajol ri Dios, xumaj ukojik utzij ri Dios ruma ri kꞌaxkꞌobꞌik xrikꞌowibꞌej.
9 Ruma kꞌu xutzꞌaqatisaj uwach ronoje ri xraj ri Dios che, xuꞌana aj yaꞌl kolobꞌetajik na jinta utaqexik chike janipa ri kekojow utzij Rire.
10 Ekꞌu ri Dios xkojow re chaꞌ kuꞌan Qajawal kachꞌaw paqawiꞌ jelaꞌ pachaꞌ ri Melquisedec.
Pixabꞌanik chwi ri qakꞌiyibꞌal chwach ri Dios
11 Lik kꞌo kuaj kambꞌiꞌij puwi waꞌ, pero lik kꞌayew uqꞌalajisaxik che alaq ma kꞌayew che alaq kamaj alaq usukꞌ.
12 Lik kꞌo tan qꞌij lo riꞌ xtzijox ri Utzilaj Tzij che alaq; ekꞌu ri lik ubꞌe e tane e laꞌ alaq chi aj kꞌutunel re waꞌ. Na rukꞌ ta kꞌu riꞌ, lik ne kajawaxik kakꞌut tanchi che alaq ronoje ri nabꞌe xmaj lo alaq puwi ri Utzilaj Tzij re ri Dios. E pachaꞌ kajawax tanchi che alaq katij alaq tzꞌum ma kꞌamajaꞌ kamaj alaq utijik ri kowilaj waꞌim.
13 Ma e junoq kꞌamajaꞌ umajom usukꞌ ri kubꞌiꞌij Rutzij Upixabꞌ ri Dios puwi saꞌ ri usukꞌ y saꞌ ri na usukꞌ taj, riꞌ e pachaꞌ juna neꞌ kꞌa kutij utzꞌum.
14 Ri kowilaj waꞌim xew taqal chike ri e nimaꞌq chik; jekꞌulaꞌ kꞌo kꞌutunik chupa Rutzij Upixabꞌ ri Dios xew kemajaw usukꞌ ri ketaꞌam saꞌ ri utz y saꞌ ri na utz taj chwach ri Dios yey lik kitaqem kꞌu uꞌanik ri utz.