21
Ri Jesús kukꞌut uwach chikiwach wuqubꞌ chike rutijoꞌn
Tekꞌuchiriꞌ ri Jesús xukꞌut tanchi ribꞌ chikiwach rutijoꞌn chuchiꞌ ri mar re Tiberias. Jewaꞌ xuꞌano: Junam e kꞌo ri Simón Pedro, ri Tomás ri kakibꞌiꞌij “Yoꞌx” che, ri Natanael ri aj Caná re Galilea, ri kebꞌ ukꞌajol ri Zebedeo y kaꞌibꞌ chik chike rutijoꞌn ri Jesús. Ekꞌu ri Simón Pedro xubꞌiꞌij chike:
—Kinꞌek pa chapoj kar —xchaꞌ.
Rike xkibꞌiꞌij che:
—Kojꞌek riꞌ awukꞌ —xechaꞌ.
Xebꞌek kꞌut y xebꞌok bꞌi chupa jun barco, pero laꞌ laꞌqꞌabꞌ wi na jinta kꞌana kar xkichapo.
Echiriꞌ katajin usaqirik, rutijoꞌn xkil jun achi takꞌal chuchiꞌ ri mar, pero na xketaꞌmaj taj we e ri Jesús. Xubꞌiꞌij kꞌu ri Jesús chike:
—Ix walkꞌoꞌal, ¿na jinta kar ichapom? —xchaꞌ.
Rike xkikꞌul pan uwach:
—Na jintaj —xechaꞌ.
Xubꞌiꞌij kꞌu ri Jesús chike:
—Chilikꞌij liꞌatarraya puwikiqꞌabꞌ ri barco y chiwilapeꞌ ma kebꞌiwesaj lo kar —xchaꞌ.
Rike e xkiꞌano yey na kakichꞌij ta chi kꞌu lo resaxik riꞌ ri ki atarraya pa ri yaꞌ ruma rukꞌiyal kar e kꞌo chupa.
Ekꞌu ri jun tijoꞌn lik kꞌax kanaꞌ ruma ri Jesús, xubꞌiꞌij che ri Pedro:
—¡E Qanimajawal! —xchaꞌ.
Ri Simón Pedro xew xuto e ri Jesús, xukojolaꞌ ruqꞌuꞌ resam y xukꞌaq bꞌi ribꞌ pa ri yaꞌ. Yey ri jujun chik tijoꞌn xekꞌun rukꞌ ri barco chuchiꞌ ri mar, kicharem ri ki atarraya nojinaq che kar, ma laj xa cien metros e kꞌo wi che ruchiꞌ ri yaꞌ.
Echiriꞌ xeqaj lo chuꞌlew, kꞌate xkilo nukꞌutal jun aqꞌ, y puwi ri rachaqꞌaꞌl kꞌo jun kar y kꞌo pam chiriꞌ.
10 Xubꞌiꞌij kꞌu ri Jesús chike:
—Chikꞌama lo jujun chike ri kar, ri kꞌa e laꞌ xebꞌichap loq —xchaꞌ.
11 Ri Simón Pedro xok pa ri barco y xucharej bꞌi kꞌa chuchiꞌ ri mar ri atarraya nojinaq che nimaq taq kar, ma e ciento cincuenta y tres ri kar e kꞌo chupa. Tobꞌ lik e kꞌi ri kar, na xraqaroꞌbꞌ ta ri atarraya.
12 Ekꞌuchiriꞌ, xubꞌiꞌij ri Jesús:
—Chixpetoq, chixwoꞌqoq —xcha chike.
Na jinta kꞌu junoq chike rutijoꞌn xraj kutzꞌonoj che china Rire, ma ketaꞌam e ri Qanimajawal.
13 Ekꞌuchiriꞌ, ri Jesús xukꞌam ri pam y xuya chike, y jelaꞌ xuꞌan rukꞌ ri kar.
14 E urox laj waꞌ xukꞌut uwach ri Jesús chikiwach rutijoꞌn chwi lo rukꞌastajibꞌal chikixoꞌl ri ekaminaq.
Ri Jesús kachꞌaꞌt rukꞌ ri Simón Pedro
15 Echiriꞌ xkikꞌis utijik ri kiwa, ri Jesús xutzꞌonoj che ri Simón Pedro:
—Simón, at ukꞌajol ri Jonás, ¿más nawi kꞌax kinanaꞌ riꞌat chwa ri kꞌaxnaꞌbꞌal we kakiꞌan wa jujun chik? —xchaꞌ.
Ri Pedro xukꞌul uwach:
—Wajawal, rilal etaꞌam la kꞌo rutzil nukꞌuꞌx cheꞌla —xchaꞌ.
Ri Jesús xubꞌiꞌij che:
—Chebꞌatzuqu kꞌu riꞌ ri raltaq ko nubꞌexex —xchaꞌ.
16 Xutzꞌonoj chukalaj:
—Simón, at ukꞌajol ri Jonás, ¿lik kꞌax kinanaꞌ rukꞌ ronoje akꞌuꞌx? —xchaꞌ.
Ri Pedro xukꞌul uwach:
—Wajawal, rilal etaꞌam la kꞌo rutzil nukꞌuꞌx cheꞌla —xchaꞌ.
Xubꞌiꞌij tanchi kꞌu ri Jesús che:
—Chebꞌachajij kꞌu riꞌ ri nubꞌexex —xchaꞌ.
17 Xutzꞌonoj churox laj:
—Simón, at ukꞌajol ri Jonás, ¿qatzij kꞌo rutzil akꞌuꞌx chwe? —xchaꞌ.
Ri Pedro lik xuchap bꞌis ruma e urox laj riꞌ xtzꞌonox che. Xubꞌiꞌij kꞌu riꞌ:
—Wajawal, rilal etaꞌam la ronoje, etaꞌam kꞌu la riꞌin kꞌo rutzil nukꞌuꞌx cheꞌla —xcha che.
Xubꞌiꞌij kꞌu ri Jesús che:
—Chebꞌatzuqu kꞌu riꞌ ri nubꞌexex. 18 Paqatzij wi kambꞌiꞌij chawe: Echiriꞌ at ala, riꞌat atukel kaxim rapas y kateꞌek pa kawaj wi kateꞌek. Noꞌj echiriꞌ katuꞌana nimalaj winaq, kayak laꞌqꞌabꞌ y jun chik kaximow rapas y katukꞌam bꞌi pa na kawaj ta wi kateꞌek —xchaꞌ.
19 Ri Jesús xubꞌiꞌij waꞌ chaꞌ kuqꞌalajisaj saꞌ rukamik ri Pedro kaꞌanik re yakbꞌal uqꞌij ri Dios. Tekꞌuchiriꞌ, xubꞌiꞌij che:
—¡Chat-tereja lo chwij! —xchaꞌ.
20 Echiriꞌ xtzuꞌn ri Pedro chirij, xrilo chikij teran lo ri jun tijoꞌn lik kꞌax kanaꞌ ruma ri Jesús, waꞌ e ri xjaꞌiꞌ putzal ri Jesús pa ri jun waꞌim echiriꞌ xutzꞌonoj che: «Wajawal, ¿China ri kakꞌayin e la?»* 21 Ekꞌu ri Pedro echiriꞌ xril ri jun chik tijoꞌn, xutzꞌonoj che ri Jesús:
—Wajawal, yey rire, ¿saꞌ ri kukꞌulumaj? —xchaꞌ.
22 Ri Jesús xukꞌul uwach:
—¿Suꞌchak katzꞌonoj? We kuaj riꞌin kꞌa kꞌas rire echiriꞌ kinkꞌun tanchik, na jinta awe che. Riꞌat chat-tereja lo chwij —xchaꞌ.
23 Ruma kꞌu wa xubꞌiꞌij ri Jesús, xeꞌek utzijoxik chikixoꞌl ri kikojom rubꞌiꞌ ri Cristo: «Laꞌ la jun utijoꞌn na kakam taj.» Pero ri Jesús na xubꞌiꞌij ta che we na kakam taj, ma xew xubꞌiꞌij waꞌ: «¿Suꞌchak katzꞌonoj? We kuaj riꞌin kꞌa kꞌas rire echiriꞌ kinkꞌun tanchik, na jinta awe che.»
24 Ekꞌu waꞌ wa jun tijoꞌn e ri kajikibꞌan uwach taq waꞌ y e xtzꞌibꞌan waꞌ. Yey riꞌoj qetaꞌam kꞌut lik qatzij ronoje wa tzꞌibꞌitalik.
25 Lik kꞌo ukꞌiyal chak xuꞌan ri Jesús tobꞌ na ronoje ta waꞌ tzꞌibꞌital kan chupa wa libro. Yey we ta e laꞌ katzꞌibꞌax ronoje taq ri xuꞌano, riꞌin kanchꞌobꞌ raqan na kok tane che ruwachulew taq ri wuj pa katzꞌibꞌax wi. Amén.
* 21:20 Jn. 13:25