3
Katzijon ri Juan Aj Yaꞌl Bautismo
(Mr. 1:1-8; Lc. 3:1-9, 15-17; Jn. 1:19-28)
Xopon ruqꞌijol echiriꞌ ri Juan Aj Yaꞌl Bautismo katzijon pa taq ri luwar katzꞌintzꞌotik re Judea. Jekꞌuwaꞌ kubꞌiꞌij: «Tzelej tzij alaq chwach ri Dios, ma rutaqanik ri Dios petinaq chilaꞌ chikaj lik xa naqaj chi kꞌo wuloq» kachaꞌ.
Ri qꞌalajisanel Isaías xutzꞌibꞌaj kan puwi waꞌ wa Juan echiriꞌ xubꞌiꞌij:
Katataj uqul jun tzijonel kasikꞌin chupa ri luwar katzꞌintzꞌotik, jewaꞌ kubꞌiꞌij:
“Yijbꞌaꞌ pana alaq ri bꞌe re ri Qanimajawal;
sukꞌupij alaq rubꞌe Rire” Is. 40:3
xchaꞌ.
Ruqꞌuꞌ ri Juan ukojom ꞌanom rukꞌ rismal camello y rupas ximil che rupa e jun tzꞌuꞌum; ri kutijo e taq ri sakꞌ y uwaꞌal kabꞌ re upa taq juyubꞌ.
Ri ejeqel pa ri tinamit Jerusalem kukꞌ konoje ri e kꞌo pa ri luwar re Judea y ri ejeqel chuchiꞌ ri nimayaꞌ Jordán, xebꞌel lo che utayik ri Juan. Kakitzꞌonoj kꞌu kuybꞌal kimak chwach ri Dios, y ri Juan kuya ri bautismo chike pa ri nimayaꞌ Jordán.
Ekꞌu ri Juan echiriꞌ xrilo lik e kꞌi chike ri fariseos y ri saduceos xekꞌun ruma ri bautismo kuyaꞌo, xubꞌiꞌij chike:
«¡Ralaq pachaꞌ alaq jupuq chi kumatz! ¿China xbꞌiꞌn re we utz kesaj ibꞌ alaq chwach ri unimal kꞌaxkꞌobꞌik kutaq lo ri Dios pawiꞌ alaq? Bꞌina alaq jusukꞌ chaꞌ jelaꞌ kaqꞌalajinik jalkꞌatim chi ri bꞌinik silabꞌik alaq, jelaꞌ pachaꞌ ri taqal chike ri kitzelem chi kitzij.
»Y machꞌobꞌ ne alaq chi ibꞌil ibꞌ alaq waꞌ: “Riꞌoj utz qaꞌanom, ma oj ralkꞌoꞌal kan ri Abraham.” Ma riꞌin kambꞌiꞌij che alaq: We xraj ri Dios, utz kuꞌan ralkꞌoꞌal ri Abraham tobꞌ ne che taq waꞌbꞌaj. 10 Yey jikil chi ne uwach ruqꞌatbꞌal tzij ri Dios pawiꞌ alaq, e pachaꞌ juna achi uyakom chi ri ikaj chwi ri ratzꞌayaq ri cheꞌ; ekꞌu taq ri cheꞌ na kuya ta chomilaj jiqꞌobꞌal, kapoqꞌix bꞌi y kakꞌaq pa aqꞌ.
11 »Riꞌin paqatzij wi kanya ri bautismo che alaq rukꞌ yaꞌ, kꞌutubꞌal re tzelem chi tzij alaq chwach ri Dios. Noꞌj kꞌu ri Jun katajin lo chwij riꞌin, kꞌo puqꞌabꞌ kuya ri bautismo che alaq rukꞌ ri Santowilaj Ruxlabꞌixel ri Dios y rukꞌ aqꞌ. Rire más kꞌo uchuqꞌabꞌ chinuwach riꞌin; na taqal tane chwe tobꞌ xa kanmolej ruxajabꞌ. 12 Ekꞌu Rire koluꞌqꞌata tzij pakiwi ri tikawex chaꞌ jelaꞌ kuya ri tojbꞌal taqal chike chikijujunal. E pachaꞌ juna achi rukꞌaꞌam chi ri puꞌbꞌal uwach ri trigo puqꞌabꞌ chaꞌ naꞌl kujosqꞌij waꞌ y karesaj rupukꞌ chupa. Tekꞌuchiriꞌ, kujok ri trigo y kukꞌol chupa rukꞌolibꞌal. Ekꞌu rupukꞌ kuporoj pa ri jun aqꞌ na jinta utaqexik katenowik» xcha ri Juan.
Ri bautismo re ri Jesús
(Mr. 1:9-11; Lc. 3:21-22)
13 Ekꞌuchiriꞌ ri Jesús petinaq Galilea, xopon chuchiꞌ ri nimayaꞌ Jordán chaꞌ ri Juan kuya ri bautismo che. 14 Pero ri Juan na xraj taj kuya ri bautismo che ri Jesús, jekꞌuwaꞌ xubꞌiꞌij che:
—Ri lik usukꞌ e rilal ri kayaꞌw la ri bautismo chwe riꞌin. ¿Yey e kami kaꞌaj la riꞌ kanya riꞌin ri bautismo cheꞌla? —xchaꞌ.
15 Ekꞌu ri Jesús xukꞌul uwach:
—E chaꞌana woꞌora saꞌ ri kambꞌiꞌij riꞌin chawe, ma lik chirajawaxik e kaqaꞌan janipa ri lik usukꞌ chwach ri Dios —xchaꞌ. Jekꞌulaꞌ ri Juan xuya ri bautismo che.
16 Tekꞌuchiriꞌ ri Jesús xukꞌul ri bautismo, xel lo pa ri yaꞌ. Y na jampatana kꞌu riꞌ xjaqataj ruwa kaj y xrilo echiriꞌ ri Ruxlabꞌixel ri Dios xqaj lo puwiꞌ pachaꞌ juna palomax. 17 Ekꞌuchiriꞌ, xchꞌaw lo Jun chilaꞌ chikaj, jewaꞌ xubꞌiꞌij:
«E Nukꞌajol waꞌ ri lik kꞌax kannaꞌo
y lik kinkiꞌkot che»
xcha ri Dios.