13
Ritzel chikop kel lo chupa ri mar
Riꞌin xintakꞌiꞌ chwi ri sanyebꞌ chuchiꞌ ri mar y xinwilo echiriꞌ chupa ri mar xel lo jun nimalaj itzel chikop wuqubꞌ rujolom y lajuj ri rukꞌaꞌ. Chujujunal rujolom kojom jun diadema che y chujujunal ri wuqubꞌ ujolom tzꞌibꞌital jun bꞌiꞌaj re kꞌaqibꞌal bꞌi uqꞌij ri Dios. Wa nimalaj itzel chikop jelaꞌ katzuꞌnik pachaꞌ juna bꞌalam, yey taq ri raqan e pachaꞌ raqan oso y ruwa reꞌ e pachaꞌ uwa reꞌ koj. Ekꞌu ri dragón* xuya uchuqꞌabꞌ ri nimalaj itzel chikop, xuya rutzꞌulibꞌal re taqanik che y lik xuya uwach. Xinwil kꞌut, lik ꞌanom kꞌax che jun chike taq rujolom ri nimalaj itzel chikop, yey lik kajekꞌow rukꞌ. Pero waꞌ wa kꞌax xkunutajik y ruma kꞌu riꞌ konoje ri winaq che ruwachulew lik xkam kanimaꞌ che y e xkitaqej ri nimalaj itzel chikop. Lik xkiloqꞌnimaj kꞌu uqꞌij ri dragón ri xyaꞌw uchuqꞌabꞌ ri nimalaj itzel chikop. Y jenelaꞌ xkiloqꞌnimaj uqꞌij ri nimalaj itzel chikop, jewaꞌ kakibꞌiꞌij: «¿China chi junoq jewaꞌ pachaꞌ wa jun nimalaj itzel chikop? ¿Kꞌo nawi junoq kachꞌijow uchuqꞌabꞌ? ¡Na jintaj!» kechaꞌ.
Xyaꞌtaj che ri nimalaj itzel chikop kutakꞌabꞌaꞌ uqꞌij y lik tzel kachꞌaꞌt chirij ri Dios. Y xyaꞌ kꞌu uchuqꞌabꞌ re kataqan che ruwachulew oxibꞌ junabꞌ rukꞌ nikꞌaj.* Xujeq kꞌu lik tzel kachꞌaꞌt chirij ri Dios, chirij rubꞌiꞌ ri Dios, chirij ri Rocho Dios y chikij taq ri e kꞌo chilaꞌ chikaj. Y xyaꞌ kꞌu puqꞌabꞌ kachꞌoꞌjin chikij rutinamit ri Dios y kuchꞌij kichuqꞌabꞌ. Jenelaꞌ xyaꞌ puqꞌabꞌ kataqan pakiwi konoje taq ri tinamit, konoje rukꞌiyal kiwach taq ri tikawex che ronoje rukꞌiyal uwach chꞌaꞌtemal. Xkiloqꞌnimaj kꞌu uqꞌij ri nimalaj itzel chikop konoje ri winaq che ruwachulew, ri na jinta kibꞌiꞌ chupa ri libro re kꞌaslemal re ri Qꞌapoj Bꞌexex, ri Jun chwi lo ri jeqebꞌal re ruwachulew chaꞌom chi loq re kakamisaxik.*
China kꞌu ri kꞌo utanibꞌal che utayik, ¡chuta kꞌu riꞌ!
10 China ri yaꞌtal che kakꞌam bꞌi chi presoyil,
riꞌ kakꞌam na ubꞌi;
y china ri yaꞌtal che kakam rukꞌ espada,
riꞌ rukꞌ espada kakamisaxik.
E uwariꞌche chirajawaxik wi rutinamit ri Dios kakichuqꞌubꞌej kibꞌ chwach ri kꞌaxkꞌobꞌik y kakitikibꞌaꞌ ri kubꞌulibꞌal kikꞌuꞌx rukꞌ ri Dios.
Ritzel chikop kel lo chupa ri juyubꞌ taqꞌaj
11 Tekꞌuchiriꞌ, xinwilo echiriꞌ jun chik nimalaj itzel chikop xel lo chupa ri juyubꞌ taqꞌaj, kꞌo kꞌu kaꞌibꞌ rukꞌaꞌ pachaꞌ rukꞌaꞌ juna qꞌapoj bꞌexex pero kachꞌaꞌt pachaꞌ juna dragón. 12 Yey wa ukaꞌm nimalaj itzel chikop xyaꞌ puqꞌabꞌ kataqan pachaꞌ ri nabꞌe nimalaj itzel chikop y kuꞌan kꞌu rutaqanik chwach. Xebꞌutaq kꞌu konoje ri winaq che ruwachulew chaꞌ lik kakiloqꞌnimaj uqꞌij ri nabꞌe nimalaj itzel chikop, ri xkunutaj che ri jun kꞌax xjekꞌow rukꞌ. 13 Lik kuꞌan nimaq taq kꞌutubꞌal chikiwach ri winaq, ma kuꞌano katzaq ne lo aqꞌ chwi ruwachulew. 14 Kebꞌusok kꞌu konoje ri winaq rukꞌ taq ri kꞌutubꞌal yaꞌtal che kuꞌan chwach ri nabꞌe nimalaj itzel chikop. Y kebꞌutaq ri winaq chaꞌ kakiꞌan jun ukꞌaxwach ri nabꞌe nimalaj itzel chikop, ri lik xꞌan kꞌax che rukꞌ espada yey na xkam taj. 15 Y xyaꞌtaj kꞌu che kuya ukꞌaslem rukꞌaxwach ri nabꞌe nimalaj itzel chikop, chaꞌ jelaꞌ utz kachꞌawik y kutaq kikamisaxik konoje ri winaq na kakiloqꞌnimaj ta uqꞌij. 16 Yey wa ukaꞌm nimalaj itzel chikop xtaqan che kakoj jun retalil chike konoje ri winaq, waꞌ e taq ri lik kꞌo kiwach y ri na jinta kiwach, ri bꞌeyomabꞌ y ri e nibꞌaꞌibꞌ, ri eloqꞌotal ruma kajaw y ri na e jinta puqꞌabꞌ juna kajaw; chike kꞌu konoje xkoj wa jun retalil che ri kiqꞌabꞌ uwikiqꞌabꞌ o che rukurusil ri kipalaj. 17 Jekꞌulaꞌ, na jinta junoq yaꞌtal che kaloqꞌowik o kakꞌayinik we na kojom ta che rire ri jun retalil, waꞌ e rubꞌiꞌ ri nimalaj itzel chikop o ri rajlibꞌal rubꞌiꞌ. 18 Waꞌ lik karaj naꞌoj chaꞌ kamajtaj usukꞌ. China kꞌu ri lik kumaj usukꞌ, e churajilaj ri rajlibꞌal ri nimalaj itzel chikop, ma ri rajlibꞌal e re jun tikawex; yey ri rajlibꞌal e waꞌ: 666.
* 13:2 Ap. 12:3 * 13:5 Pa ri chꞌaꞌtem griego kubꞌiꞌij “cuarenta y dos ikꞌ”. * 13:8 1 P. 1:19-20