16
Ri wuqubꞌ copas re kꞌaxkꞌobꞌik
1 Chupa ri Rocho Dios chilaꞌ chikaj xinta jun lik ko kachꞌawik, jewaꞌ kubꞌiꞌij pan chike ri wuqubꞌ ángeles: «Jix y jiꞌqꞌeja che ruwachulew ri royowal ri Dios, ri kꞌo chupa ri wuqubꞌ copas» kachaꞌ.
Ri nabꞌe copa
2 Xeꞌek kꞌu ri nabꞌe ángel y xuꞌqꞌeja chwi ruwachulew ri kꞌo chupa rucopa, y ruma waꞌ xwinaqir jun kꞌaxlaj yabꞌil re chꞌaꞌk chikij taq ri winaq y xujeq kꞌu riꞌ kaqꞌolol kij konoje, waꞌ e ri xekꞌuluw ri retalil ri nimalaj itzel chikop y xkiloqꞌnimaj uqꞌij ri jun ukꞌaxwach ꞌanom.
Rukaꞌm copa
3 Rukaꞌm ángel xuꞌqꞌeja chwi ri mar ri kꞌo chupa rucopa, y ruma waꞌ xuꞌan kikꞌ uwach ri mar pachaꞌ rukikꞌel juna tikawex kamisam; y xekam kꞌu konoje taq rawaj e kꞌo chupa ri mar.
Rurox copa
4 Rurox ángel xuꞌqꞌeja ri kꞌo chupa rucopa chwi taq ri nimayaꞌ y chwi taq rakꞌal pa kalax wi taq lo ri yaꞌ; y ruma waꞌ ronoje ri yaꞌ xuꞌan kikꞌ uwach.
5 Tekꞌuchiriꞌ xinta ri ángel ri yaꞌtal taq ri yaꞌ puqꞌabꞌ, jewaꞌ kubꞌiꞌij:
«Lal Dios Qajawxel ri kꞌo waqꞌij ora y ri xex chi kꞌo lo wi, xew Rilal lik Lal Santo, ma lik Lal jusukꞌ che ri qꞌatbꞌal tzij ꞌanom la
6 pakiwi ri xekamisan ke ri tinamit la y taq ri qꞌalajisanelabꞌ e la. Xkiꞌan kꞌu chike xturuw ri kikikꞌel. E uwariꞌche lik Lal jusukꞌ ma xꞌan la chike wa e kamisanel kakiqum kikꞌ. ¡Ekꞌu lik taqal waꞌ chike!» kachaꞌ.
7 Ewi xinta jun chik xchꞌaw lo chwa raltar, jewaꞌ kubꞌiꞌij:
«Paqatzij wi, lal Dios Qajawxel, Rilal kꞌo ronoje unimal chuqꞌabꞌ paqꞌabꞌ la, ma ri qꞌatbꞌal tzij kaꞌan la lik e usukꞌ y lik jusukꞌ» kachaꞌ.
Rukaj copa
8 Rukaj ángel xuꞌqꞌeja chwi ri qꞌij ri kꞌo chupa rucopa, jelaꞌ kꞌu riꞌ xyaꞌtaj che ri qꞌij kebꞌukꞌatisaj konoje ri winaq rukꞌ rukꞌatibꞌal.
9 Y lik xekꞌat kꞌu ri winaq ruma rukꞌatibꞌal ri qꞌij. Ruma kꞌu waꞌ, xeyajan rukꞌ itzel taq chꞌaꞌtem chirij ri Dios, ri kꞌo puqꞌabꞌ kutaq lo wa kꞌaxkꞌobꞌik pakiwiꞌ. Yey na xkitzelej tane kitzij, ma e na xkaj taj kakiyak uqꞌij ri Dios.
Ruroꞌ copa
10 Ruroꞌ ángel xuꞌqꞌeja ri kꞌo chupa rucopa chwi ri tzꞌulibꞌal pa kataqan wi ri nimalaj itzel chikop, y ruma waꞌ xuꞌan qꞌequꞌm upa taq ri tinamit kꞌo puqꞌabꞌ ri nimalaj itzel chikop. Konoje taq kꞌu ri winaq lik kakikachꞌakaꞌ upa ri kaqꞌ ruma ri kꞌax.
11 Lik kꞌut tzel xechꞌaꞌt chirij ri Dios kꞌo chilaꞌ chikaj ruma taq ri kꞌaxkꞌobꞌik y taq ri chꞌaꞌk chikij; y na xkitzelej ta kitzij chwach ri Dios che taq ri na utz taj kiꞌanom.
Ruwaqaq copa
12 Ruwaqaq ángel xuꞌqꞌeja pa ri nimayaꞌ Eufrates ri kꞌo chupa rucopa; y ruma waꞌ, xchaqij ri yaꞌ pa ri nimalaj raqanaꞌ, chaꞌ jelaꞌ utz kebꞌikꞌow lo ri taqanelabꞌ e petinaq pa relebꞌal lo ri qꞌij.
13 Y xinwil kꞌu oxibꞌ itzelilaj uxlabꞌixel jelaꞌ ketzuꞌnik pachaꞌ tutzꞌ; jun kel lo puchiꞌ ri dragón, jun chik kel lo puchiꞌ ri nimalaj itzel chikop y jun chik kel lo puchiꞌ ri jun qꞌalajisanel sokosoꞌnel.
14 Waꞌ e itzel uxlabꞌixel kakiꞌan taq kꞌutubꞌal y kebꞌek kukꞌ konoje ri taqanelabꞌ che ronoje ruwachulew chaꞌ kakimol kichiꞌ re kakiꞌan chꞌaꞌoj chupa ri unimal qꞌij re ruqꞌatbꞌal tzij ri Dios, ri kꞌo ronoje unimal chuqꞌabꞌ puqꞌabꞌ.
15 Jewaꞌ kubꞌiꞌij ri Qanimajawal:
«Chitapeꞌ, Riꞌin kinopon iwukꞌ jelaꞌ pachaꞌ ri okibꞌal re juna eleqꞌom pa juna ja, ma ri eleqꞌom na kubꞌiꞌij ta apanoq jampalaꞌ koponik. Lik kꞌu nim uqꞌij ralaxik china ri na kawar taj yey ukojom chi ruqꞌuꞌ chaꞌ we xinkꞌunik, na kuya ta ukꞌix» xchaꞌ.
16 Y xkimol kꞌu kichiꞌ ri taqanelabꞌ chupa ri jun luwar rubꞌiꞌ pa ri chꞌaꞌtem hebreo “Armagedón”.
Ruwuq copa
17 Ruwuq ángel xuꞌqꞌeja pa ri tew ri kꞌo chupa rucopa; y lik ko xchꞌaw lo jun qulaj pa ri tzꞌulibꞌal re taqanik kꞌo chupa ri Rocho Dios chilaꞌ chikaj, jewaꞌ kubꞌiꞌij:
—Xkꞌis kꞌu wa qꞌatbꞌal tzij —kachaꞌ.
18 Tekꞌuchiriꞌ lik xyokꞌ kaꞌn ruxeꞌ kaj, xetataj uchꞌawibꞌal jabꞌ karaqlajik y kajininik; yey xpe jun nimalaj kabꞌraqan che ruwachulew, waꞌ e kabꞌraqan más nim uꞌanom chwi lo ri kikꞌojiꞌik ri tikawex che ruwachulew.
19 Ruma kꞌu waꞌ, ri nimalaj tinamit xjaqataj upa, oxibꞌ xuꞌano; y konoje taq ri jujun chik tinamit e kꞌo che ruwachulew xewuluwubꞌik. Ekꞌu ri Dios na xikꞌow ta chukꞌuꞌx taq ri mak uꞌanom ri nimalaj tinamit Babilonia; xuya kꞌu pa kꞌaxkꞌobꞌik ruma ri unimal royowal Rire chirij.
20 Yey ruma kꞌu wa kabꞌraqan konoje taq ri islas y taq ri juyubꞌ xesachik.
21 Y xtzaq lo chikaj nimaq taq saqbꞌach pakiwi ri tikawex. Ri raꞌlal waꞌ laj jun quintal chujujunal. Ruma kꞌu ri kꞌaxkꞌobꞌik re ri nimaq taq saqbꞌach, ri winaq lik tzel xechꞌaꞌt chirij ri Dios, ma ri kꞌaxkꞌobꞌik xuꞌano lik xibꞌibꞌal uwach.