18
Rutzaqibꞌal ri tinamit Babilonia
1 Kꞌisbꞌal kꞌu re waꞌ, xinwil chi jun chik ángel xqaj lo chikaj rukꞌ unimal uchuqꞌabꞌ; y ruchomalil ruwonibꞌal xutzij uwi ruwachulew.
2 Lik ko xsikꞌin che ubꞌiꞌxikil:
«¡E laꞌ xtzaqik! ¡Xtzaq na ri nimalaj tinamit Babilonia! Y woꞌora uꞌanom kiluwar itzelilaj uxlabꞌixel, kijul chꞌulilaj uxlabꞌixel y kisok chꞌulilaj tzꞌikin qiꞌtzel ketzuꞌnik.
3 Ma konoje taq ri jujun chik tinamit che ruwachulew eqꞌabꞌarinaq ruma wa tinamit, ri xebꞌumin chupa ukꞌiyal mak rukꞌ rayibꞌal. Konoje kꞌu ri taqanelabꞌ che ruwachulew emakuninaq rukꞌ; y konoje taq raj kꞌay che ruwachulew ebꞌeyomarinaq ma ri tinamit Babilonia ruma ri unimal urayibꞌal lik kꞌo xuloqꞌ chike» xchaꞌ.
4 Tekꞌuchiriꞌ xinta jun chik qulaj xchꞌaw lo chikaj, jewaꞌ kubꞌiꞌij:
«Chixelubꞌi chupa ri tinamit Babilonia, riꞌix ix nutinamit, chaꞌ na kiꞌan ta iweꞌix kukꞌ rike y jelaꞌ na katzaq ta piwi riꞌix ri kꞌaxkꞌobꞌik kape puwi rire.
5 Ma na xa ta jubꞌiqꞌ rumak, e taq waꞌ xaqi uleꞌom chi ribꞌ elinaq bꞌi kꞌa chikaj. Yey ri na utz taj uꞌanom, lik kꞌo chukꞌuꞌx ri Dios.
6 Chitzelej ukꞌaxel che e chirij taq ri na utz taj uꞌanom chike ri jujun chik; chikalajij ri kꞌax puwiꞌ ruma rumak uꞌanom; chupa kꞌu ri copa pa xuyijbꞌaꞌ wi ri yaꞌ lik kꞌa chike jujun chik, riꞌix chikalajij rukꞌayul waꞌ y chiyaꞌa che.
7 Rire lik xuꞌan nim che ribꞌ y lik xuya ribꞌ che taq rurayibꞌal; ekꞌu woꞌora lik chiyaꞌa pa kꞌax y pa oqꞌej; ma jewaꞌ ri kubꞌiꞌij pa ranimaꞌ: “Riꞌin in tzꞌulik pachaꞌ in juna reina, yey na in ta malkaꞌn y na kantij tane kꞌana oqꞌej” kachaꞌ.
8 Ruma kꞌu riꞌ, xa pa jun qꞌij kape ri kꞌaxkꞌobꞌik puwiꞌ: waꞌ e kamik, oqꞌej y numik; yey rukꞌ ne aqꞌ kaporoxik, ma ri Dios Qajawxel, ri kuqꞌat tzij puwiꞌ, lik kꞌo uchuqꞌabꞌ» kachaꞌ.
9 Taq ri taqanelabꞌ che ruwachulew emakuninaq rukꞌ rixoq, yey junam rukꞌ rire kiyaꞌom kibꞌ che ruqusil ruwachulew y jekꞌulaꞌ kitzꞌiloꞌm ri kibꞌinik rukꞌ. Ekꞌu rike kebꞌoqꞌik y ketunan puwi rixoq echiriꞌ kakil rusibꞌol rire kakꞌatik.
10 Lik chinimanaj kekꞌojiꞌ pan che utzutzuꞌxik rixoq ruma ruxibꞌrikil ri kꞌaxkꞌobꞌik kꞌo wi y jewaꞌ kakibꞌiꞌij:
«¡Toqꞌoꞌ awach! ¡Toqꞌoꞌ awach at nimalaj tinamit Babilonia, ri lik kꞌo achuqꞌabꞌ, ma xa pa joqꞌotaj xkꞌun ri qꞌatbꞌal tzij pawiꞌ!» kechaꞌ.
11 Konoje taq raj kꞌay che ruwachulew kebꞌoqꞌ na y lik kakibꞌisoj ri nimalaj tinamit ma na jinta chi kꞌo kaloqꞌow re rukꞌiyal kikꞌay.
12 Waꞌ e oro, plata, chomilaj taq abꞌaj y perlas; chom taq kꞌul lino, chom taq kꞌul morato, chom taq kꞌul xela y chom taq kꞌul kaq; ukꞌiyal uwach cheꞌ kiꞌ ruxlabꞌ; taq ri ꞌanatal rukꞌ marfil, rukꞌ chom taq cheꞌ, rukꞌ bronce, rukꞌ chꞌichꞌ y rukꞌ abꞌaj mármol;
13 yey kikꞌay re incienso y kunabꞌal kiꞌ ruxlabꞌ, pachaꞌ canela, mirra y olíbano; vino, aceite, harina y trigo; kikꞌay ke awaj kebꞌeqanik, ke bꞌexex, ke kawayuꞌ y re kareta; yey kikꞌay ne tikawex e aj chak.
14 Jekꞌuwaꞌ kakibꞌiꞌij che ri tinamit: «Ronoje taq ri xarayij uwach na jinta chi awukꞌ; ronoje taq ri bꞌeyomalil lik xeꞌek akꞌuꞌx rukꞌ, xsach uwach y na kariq ta chi kꞌenoq» kechaꞌ.
15 Ekꞌu ri e aj kꞌay re taq waꞌ, ri lik ebꞌeyomarinaq ruma wa tinamit, lik chinimanaj kekꞌojiꞌ pan che utzutzuꞌxik wa tinamit ruma ruxibꞌrikil ri kꞌaxkꞌobꞌik petinaq puwiꞌ. Ewi lik kakoqꞌej loq,
16 jewaꞌ kakibꞌiꞌij:
«¡Toqꞌoꞌ uwach! ¡Toqꞌoꞌ uwach ri nimalaj tinamit, ri pachaꞌ juna ixoq uwiqom ribꞌ rukꞌ chomilaj uqꞌuꞌ ꞌanatal rukꞌ lino, rukꞌ kꞌul morato y kaq; wiqital rukꞌ oro, rukꞌ chomilaj taq abꞌaj y perlas!
17 Ma xa pa joqꞌotaj xsach uwach rukꞌiyal ubꞌeyomalil» kechaꞌ.
Konoje kꞌu ri e kꞌamal uwach barcos, ri kebꞌin pa barcos, ri kechakun pa barcos y taq ri kekꞌayin rukꞌ barcos, chinimanaj kekꞌojiꞌ wi lo che.
18 Ekꞌuchiriꞌ kakil rusibꞌol wa tinamit kakꞌatik, lik ko kesikꞌin che ubꞌiꞌxik: «¿Kꞌo nawi juna chik tinamit kajunimax rukꞌ wa nimalaj tinamit? ¡Na jintaj!» kechaꞌ.
19 Y ri winaq kakipukꞌ ulew chwi kijolom ruma kibꞌis, kebꞌoqꞌik y ko kesikꞌinik, jewaꞌ kakibꞌiꞌij:
«¡Toqꞌoꞌ uwach! ¡Toqꞌoꞌ uwach ri nimalaj tinamit! Ma konoje ri kꞌo barcos kukꞌ lik xebꞌeyomar rukꞌ wa tinamit; yey xa kꞌu pa joqꞌotaj xsach uwach ronoje.
20 Riꞌix ri ix jeqel chilaꞌ chikaj, chixkiꞌkota ruma ri xukꞌulumaj wa tinamit. Chixkiꞌkot iwonoje riꞌix ri iyaꞌom iwibꞌ puqꞌabꞌ ri Dios, ri ix utaqoꞌn y ri ix qꞌalajisanelabꞌ, ma Rire e xqꞌataw tzij puwi wa nimalaj tinamit ruma ri xuꞌan chiwe» kechaꞌ.
21 Tekꞌuchiriꞌ, jun ángel lik kꞌo uchuqꞌabꞌ xuyak jun nimalaj abꞌaj, runimal waꞌ e pachaꞌ juna nimalaj kaꞌ, y xukꞌaq bꞌi chupa ri mar, jewaꞌ kubꞌiꞌij:
«Jelaꞌ ruwulixik bꞌi ri nimalaj tinamit Babilonia y na kilitaj ta chi uwach.
22 »Awukꞌ riꞌat Babilonia, na katataj ta chi uchꞌawibꞌal arpa, uchꞌawibꞌal ke aj música, uchꞌawibꞌal suꞌ yey uchꞌawibꞌal trompeta; na kebꞌilitaj ta chi ne aj chak y na katataj ta chi ne uchꞌawibꞌal ri kaꞌ kaqilowik.
23 Na jinta chi ne kꞌana aqꞌ kawonik, na katataj ta chi ne kꞌana nimaqꞌij re kꞌulanikil. Ma e taq raj kꞌay xekꞌojiꞌ awukꞌ, e más nim ri kitaqanik che ruwachulew. Ruma taq ri itz xaꞌano, xesokotaj konoje taq ri tinamit che ruwachulew.
24 Yey ri winaq re wa tinamit xekikamisaj taq ri qꞌalajisanelabꞌ re ri Dios y rutinamit ri Dios, y xekikamisaj ne ukꞌiyal tikawex che taq ronoje ri tinamit re ruwachulew» kachaꞌ.