2
Ri xtzꞌibꞌax pan che riglesia kꞌo Éfeso
»Chatzꞌibꞌaj pan waꞌ che ri aj kꞌamal wach* re riglesia kꞌo Éfeso:
E ri Jun kꞌo wuqubꞌ chꞌumil puwikiqꞌabꞌ, ri kabꞌin chikinikꞌajal ri wuqubꞌ utzukꞌulibꞌal aqꞌ re oro, jewaꞌ kubꞌiꞌij chiwe:
Riꞌin lik wetaꞌam ronoje ri kiꞌano, ri kꞌayewlaj chak iꞌanom y runimal ikꞌuꞌx chwach taq ri kꞌax. Wetaꞌam na kebꞌikꞌul ta iwukꞌ ri winaq itzel kikꞌuꞌx. Ma lik ikꞌamom kipa ri kakibꞌiꞌij e taqoꞌn re ri Cristo tobꞌ na e taj; yey xqꞌalajin kꞌu riꞌ xa e aj raqꞌubꞌal. Lik itijom kꞌu ri kꞌax y na kixkos ta kꞌana che ri nuchak. Iyaꞌom ikꞌuꞌx che utzijoxik ri nubꞌiꞌ y na paxinaq ta ikꞌuꞌx che. Pero Riꞌin kꞌo taq ri na kukꞌul ta nukꞌuꞌx che ri kiꞌano: E ri rutzil ikꞌuꞌx wukꞌ na e ta chi pachaꞌ ri xijeqebꞌej loq. E uwariꞌche kꞌuna chikꞌuꞌx pachawi ix jaljobꞌinaq wi. Chitzelej kꞌu itzij chwach ri Dios y chiꞌana tanchi ri chak jelaꞌ pachaꞌ ri xiꞌan lo che ri jeqebꞌal loq. Ma we na kitzelej ta itzij, Riꞌin kinkꞌun lo iwukꞌ y kanwesaj kꞌu puluwar ri tzukꞌulibꞌal aqꞌ re oro iweꞌix. Noꞌj kꞌu ri utz kꞌa kixtajin che uꞌanik, e ri tzel kiwil taq ri na utz taj kakiꞌan ri nicolaítas, ma jenelaꞌ Riꞌin lik tzel kanwil taq ri kakiꞌano. China kꞌu ri kꞌo utanibꞌal, e chuta ri kubꞌiꞌij ri Ruxlabꞌixel ri Dios chike taq riglesias. China kꞌu ri kachꞌijow uchuqꞌabꞌ taq ri na utz taj, kanya che kutij re rujiqꞌobꞌalil ri cheꞌ re kꞌaslemal, ri kꞌo chunikꞌajal ri werta re ri Dios, kachaꞌ.
Ri xtzꞌibꞌax pan che riglesia kꞌo Esmirna
»Chatzꞌibꞌaj pan waꞌ che ri aj kꞌamal wach re riglesia kꞌo Esmirna:
E ri Jun kabꞌiꞌn re: “Riꞌin in ri nabꞌe yey in ri kꞌisbꞌal re, ri xkamik y xkꞌastaj tanchik”, jewaꞌ kubꞌiꞌij chiwe:
Riꞌin lik wetaꞌam ronoje ri kiꞌano, ri kꞌaxkꞌobꞌik ix kꞌo wi y ri nibꞌaꞌil kiwikꞌowibꞌej, tobꞌ paqatzij wi riꞌix lik kꞌo ibꞌeyomal chwach ri Dios. Lik wetaꞌam ronoje ri tzel itzijobꞌexik kakiꞌan jujun e aj judiꞌabꞌ, ri kakibꞌiꞌij e utinamit ri Dios tobꞌ na e ta kukꞌil, ma e kukꞌil ri e kꞌo puqꞌabꞌ ri Satanás. 10 Mixiꞌij kꞌu iwibꞌ che ronoje taq ri kiwikꞌowibꞌej. Chitapeꞌ: Kakꞌam ipa, ma ritzel winaq kebꞌuya jujun chiwe pa cárcel y kixkꞌojiꞌ pa kꞌaxkꞌobꞌik lajuj qꞌij. Chitikibꞌaꞌ kꞌu ri kubꞌulibꞌal ikꞌuꞌx, tobꞌ kixkamisaxik; ma Riꞌin kanya jun corona chiwe, waꞌ e ri kꞌaslemal na jinta utaqexik. 11 China kꞌu ri kꞌo utanibꞌal, e chuta ri kubꞌiꞌij ri Ruxlabꞌixel ri Dios chike taq riglesias. China kꞌu ri kachꞌijow uchuqꞌabꞌ taq ri na utz taj, riꞌ na kikꞌow ta chupa rukaꞌm kamik, kachaꞌ.*
Ri xtzꞌibꞌax pan che riglesia kꞌo Pérgamo
12 »Chatzꞌibꞌaj pan waꞌ che ri aj kꞌamal wach re riglesia kꞌo Pérgamo:
E ri Jun rukꞌaꞌam ri espada lik tꞌisiꞌs utzaꞌm yey kaꞌibꞌ ruwi reꞌ, jewaꞌ kubꞌiꞌij chiwe:
13 Riꞌin lik wetaꞌam ronoje ri kiꞌano; yey wetaꞌam e pa ri tinamit pa ix kꞌo wi, kataqan ri Satanás. Na rukꞌ ta kꞌu riꞌ, kꞌa ikojom ri nubꞌiꞌ y na iwesam ta iwibꞌ chwij ma lik kubꞌul ikꞌuꞌx wukꞌ, tobꞌ ne echiriꞌ chupa laꞌ la tinamit xkamisax ri Antipas, ri lik jusukꞌ tzijonel we. 14 Pero Riꞌin kꞌo taq ri na kukꞌul ta nukꞌuꞌx che ri kiꞌano: E ri ebꞌikꞌulum chiriꞌ ri kitaqem rukꞌutunik ri jun aj qꞌij re ojertan Balaam rubꞌiꞌ. Ma ri Balaam xukꞌut che ri Balac suꞌanik kukoj tzaqibꞌal pa kibꞌe raj Israel chaꞌ kakitij ri ikꞌowisam chi chikiwach ri tiox y kaketzꞌabꞌej uwa kiqꞌij kukꞌ jujun chik na kikꞌulel taj.* 15 Yey riꞌix ebꞌikꞌulum chiriꞌ ri kitaqem ri kikꞌutunik ri nicolaítas, waꞌ wa kꞌutunik lik tzel kanwil Riꞌin. 16 E uwariꞌche chitzelej itzij chwach ri Dios; ma we na kiꞌan taj, Riꞌin kinopon tan iwukꞌ y kinchꞌoꞌjin kꞌu riꞌ kukꞌ ri nicolaítas rukꞌ ri nu espada kel lo pa nuchiꞌ. 17 China kꞌu ri kꞌo utanibꞌal, e chuta ri kubꞌiꞌij ri Ruxlabꞌixel ri Dios chike taq riglesias. China kꞌu ri kachꞌijow uchuqꞌabꞌ taq ri na utz taj, Riꞌin kanya che kutij re ri waꞌim ewatalik, waꞌ e ri maná* y kanya kꞌu jun ralko abꞌaj lik saq che y chwach ri ralko abꞌaj tzꞌibꞌital jun kꞌakꞌ bꞌiꞌaj na jinta junoq etaꞌmayom re, xew ketaꞌman ri kakꞌuluw re, kachaꞌ.
Ri xtzꞌibꞌax pan che riglesia kꞌo Tiatira
18 »Chatzꞌibꞌaj pan waꞌ che ri aj kꞌamal wach re riglesia kꞌo Tiatira:
Rukꞌajol ri Dios, ri Jun kꞌo taq uwach pachaꞌ aqꞌ kareprotik y ri raqan lik kawolqꞌinik pachaꞌ ri chꞌichꞌ bronce echiriꞌ kesax lo pa ri orna, jewaꞌ kubꞌiꞌij chiwe:
19 Riꞌin lik wetaꞌam ronoje ri kiꞌano. Wetaꞌam ri rutzil ikꞌuꞌx, ri kubꞌulibꞌal ikꞌuꞌx, ri nimanik kiꞌano y runimal ikꞌuꞌx. Yey lik wetaꞌam e taq ri chak kixtajin che uꞌanik waqꞌij ora, más kꞌi chwach taq ri iꞌanom lo nabꞌe. 20 Pero Riꞌin kꞌo taq ri na kukꞌul ta nukꞌuꞌx che ri kiꞌano: E ri ikꞌulum chixoꞌlibꞌal riꞌix ri jun ixoq Jezabel rubꞌiꞌ.§ Waꞌ wiꞌxoq uꞌanom qꞌalajisanel che ribꞌ; pero rukꞌ taq rukꞌutunik, e kebꞌusok ri waj chakibꞌ chaꞌ kaketzꞌabꞌej uwa kiqꞌij kukꞌ jujun chik na kikꞌulel taj y kakitij ri ikꞌowisam chi chikiwach ri tiox. 21 Ekꞌu Riꞌin lik naj woyeꞌem chaꞌ kutzelej utzij chinuwach, pero na karaj taj karoqꞌotaj kan ri na utz taj, waꞌ e ri makunik kukꞌ rachijabꞌ. 22 Chitapeꞌ: Riꞌin kanya wiꞌxoq pa yabꞌil chaꞌ katzaq chwa uwarabꞌal, y jekꞌulaꞌ kebꞌenuya pa unimal kꞌaxkꞌobꞌik konoje ri kemakun rukꞌ we e laꞌ na kakitzelej ta kitzij che taq ri na utz taj kiꞌanom rukꞌ. 23 Kebꞌenukamisaj na konoje ri ralkꞌoꞌal wiꞌxoq, chaꞌ jelaꞌ konoje riglesia kaketaꞌmaj e Riꞌin kanwilo saꞌ ri kꞌo chupa ri kinaꞌoj ri winaq y ri kꞌo chupa ri kanimaꞌ, we utz o na utz taj. E Riꞌin kanya chijujunal riꞌix ri taqal chiwe e chirij taq ri iꞌanom. 24 Noꞌj kambꞌiꞌij kꞌu chiwe riꞌix ri nikꞌaj chik re riglesia kꞌo Tiatira, ri na itaqem ta wa kꞌutunik* yey na iyaꞌom tane iwibꞌ che uꞌanik ri kakibꞌiꞌij rike “e xew ke ri lik kꞌo kimajom puwi ri ewatalik chikiwach ri jujun chik” yey waꞌ rukꞌ ri Satanás petinaq wi, kambꞌiꞌij kꞌu chiwe: Na jinta jun chik eqaꞌn kanya chiqul. 25 Xew e lik miwesaj iwibꞌ che ronoje ri uyaꞌom ri Dios chiwe kꞌa echiriꞌ kinopon tanchi iwukꞌ. 26 Ma e chike ri kechꞌijow uchuqꞌabꞌ ronoje taq ri na utz taj y kakiꞌan woꞌora saꞌ ri kuaj Riꞌin y jelaꞌ ketajin che uꞌanik kꞌa echiriꞌ kinopon tanchi iwukꞌ, riꞌ kanya pakiqꞌabꞌ ketaqan pakiwi taq ri tinamit che ruwachulew, 27 jelaꞌ pachaꞌ ri uyaꞌom ri Nuqaw chwe Riꞌin. Y jekꞌulaꞌ ketaqan pakiwi taq ri tinamit rukꞌ jun vara chꞌichꞌ pakiqꞌabꞌ y kakiꞌan kꞌu chike pachaꞌ echiriꞌ kaꞌan ukꞌaj che juna xun re ulew. 28 Jekꞌulaꞌ chike ri ketaqanik, kanꞌan chike kewonik pachaꞌ ruchomal ri nimalaj chꞌumil re ri saqribꞌal. 29 China kꞌu ri kꞌo utanibꞌal, e chuta ri kubꞌiꞌij ri Ruxlabꞌixel ri Dios chike taq riglesias, kachaꞌ.
* 2:1 “Aj kꞌamal wach”: Pa ri chꞌaꞌtem griego kubꞌiꞌij “ángel”. Pa capítulo 2 y 3, waꞌ keꞌelawi jun ángel re ri Dios o jun tikawex kuqꞌalajisaj Ruchꞌaꞌtem ri Dios chike jujun chik. 2:6 “Nicolaítas”: Waꞌ e taq utijoꞌn jun achi Nicolás rubꞌiꞌ. Rukꞌutunik rire xa sokosoꞌnik. * 2:11 Ap. 20:6, 14; 21:8 * 2:14 Nm. 25:1-3; 31:16 2:16 Wa espada keꞌelawi e Ruchꞌaꞌtem ri Cristo yey waꞌ lik kꞌo uchuqꞌabꞌ ma ronoje ri kubꞌiꞌij e kuꞌanaꞌ. Heb. 4:12 * 2:17 Éx. 16:31-33 § 2:20 Pa wa iglesia xkꞌojiꞌ jun ixoq aj wach yey rire xebꞌumin jujun chupa ri na utz taj pachaꞌ xuꞌan ri reina Jezabel re ojertan. 1 R. 16:31; 2 R. 9:22,30 * 2:24 Ap. 2:20