2
Ri Pablo kupixabꞌaj ri Timoteo chaꞌ kuchuqꞌubꞌej ribꞌ chwach taq ri kꞌaxkꞌobꞌik
1 Timoteo, ri at pachaꞌ nukꞌajol chupa rubꞌiꞌ ri Cristo. Kambꞌiꞌij kꞌu chawe lik chachuqꞌubꞌej awibꞌ che uꞌanik ronoje ri yaꞌom chawe ruma ri unimal rutzil ukꞌuꞌx ri Qanimajawal Jesucristo.
2 Janipa kꞌu ratom chwe chwi ri kꞌutunik nuꞌanom chikiwach rukꞌiyal winaq, e chaqꞌatisaj riꞌ pakiqꞌabꞌ rachijabꞌ kubꞌul akꞌuꞌx kukꞌ ruma kakiriq ukꞌutik waꞌ chikiwach ri jujun chik.
3 Ekꞌu riꞌat, chakuyu ronoje ri kꞌaxkꞌobꞌik kape pawiꞌ pachaꞌ kuꞌan juna saqil soldado re ri Qanimajawal Jesucristo.
4 Ma juna saqil soldado na karoqꞌotaj ta kan ri taqom che chaꞌ e keꞌek che uꞌanik ri karaj rire; ri kuꞌano e xew lik kok il che ri chak yaꞌtal puqꞌabꞌ ruma rutaqanel.
5 Jekꞌulaꞌ, junoq kakꞌalalik na kuchꞌak ta riꞌ ri premio we na kakꞌalal ta e chirij rusukꞌ pachaꞌ ri kutzꞌonoj wa etzꞌanem.
6 Jekꞌuriꞌlaꞌ, juna aj chak xew kuꞌan molonik we nabꞌe na kuchakuj rulew.
7 Timoteo, lik chachꞌobꞌo raqan wa kambꞌiꞌij chawe; we kaꞌan waꞌ, ri Qanimajawal kuya anaꞌoj chaꞌ kamaj usukꞌ ronoje.
8 E kꞌuna chakꞌuꞌx ronoje ri xrikꞌowibꞌej ri Qanimajawal Jesucristo, ri xupetebꞌej lo che ri rey David y ri xkꞌastaj lo chikixoꞌl taq ri ekaminaq jelaꞌ pachaꞌ ri kubꞌiꞌij ri Utzilaj Tzij kantzijoj riꞌin.
9 Yey e ruma kantzijoj wa Utzilaj Tzij, in kꞌo pa kꞌaxkꞌobꞌik yey inyaꞌom pa cárcel pachaꞌ in jun achi lik in aj palajiy tzij. Tobꞌ kꞌu riꞌin inyaꞌom pa karena, ri Utzilaj Tzij re ri Dios na yututal taj, ma xaqi keꞌek utzijoxik.
10 Kanchꞌij kꞌu uchuqꞌabꞌ ronoje ri kꞌaxkꞌobꞌik kape panuwiꞌ xa ruma kꞌax kebꞌenunaꞌ taq ri ebꞌuchaꞌom ri Dios, chaꞌ rike kakiriq ri kolobꞌetajik na jinta utaqexik, ri kayaꞌiꞌ chike ri kakubꞌiꞌ kikꞌuꞌx rukꞌ ri Qanimajawal Jesucristo.
11 Waꞌ wa chꞌaꞌtem lik qatzij:
We xojkam rukꞌ ri Cristo,
kojkꞌasiꞌ na riꞌ rukꞌ Rire.
12 We kaqachꞌij uchuqꞌabꞌ ri kꞌaxkꞌobꞌik ruma Rire,
chiqawach apanoq kojtaqan rukꞌ Rire chilaꞌ chikaj.
Noꞌj we riꞌoj kaqabꞌiꞌij na oj ta re Rire,
jelaꞌ kuꞌan Rire qukꞌ chiqawach apanoq,
kubꞌiꞌij kꞌu riꞌ na retaꞌam ta qawach.
13 We riꞌoj na kakubꞌiꞌ ta qakꞌuꞌx rukꞌ;
na rukꞌ ta kꞌu riꞌ, Rire lik e kuꞌan janipa ri ubꞌiꞌim kanoq,
ma Rire na kuꞌan ta kꞌana raqꞌubꞌal.
Ri jusukꞌ kibꞌinik kisilabꞌik ri kikojom rubꞌiꞌ ri Cristo
14 Chakuxtaj waꞌ chike ri e raj chak ri Dios y lik chebꞌapixabꞌaj pa rubꞌiꞌ Rire, chaꞌ mechꞌoꞌjin chwi taq chꞌaꞌtem na jinta utz kukꞌam loq, ma xew kukꞌam lo sachibꞌal naꞌoj chike ri ketaw re.
15 Riꞌat lik chachuqꞌubꞌej awibꞌ chaꞌ lik jusukꞌ rabꞌinik asilabꞌik chwach ri Dios y jelaꞌ at jun aj chak na jinta kꞌo katkꞌix che, e xaqi katzijoj chi jusukꞌ ri Tzij re ri Qꞌijsaq.
16 Maꞌan aweꞌat kukꞌ ri kechꞌaꞌt chwi taq ri na re ta ri Dios y na jinta uchak. Ma ri keꞌanaw re waꞌ, e ketajin che resaxik kibꞌ chirij ri Dios.
17 Yey ri kichꞌaꞌtem kusachisaj ri kinaꞌoj taq ri ketaw re, e pachaꞌ juna yabꞌil kaqꞌayisanik. Y e xkiꞌan waꞌ ri Himeneo y ri Fileto.
18 Rike xkiya kan ri Qꞌijsaq ma kakibꞌiꞌij ri kꞌastajibꞌal ke ri e re ri Cristo, ya xuꞌano. Ruma kꞌu ri kakikꞌut rike, e kꞌo jujun katajin usachik kinaꞌoj puwi ri Qꞌijsaq.
19 Na rukꞌ ta kꞌu riꞌ, rutinamit ri Dios lik tikil chi utz pa ri Qꞌijsaq, ma rike e pachaꞌ juna kowilaj utikibꞌal juna ja pa tzꞌibꞌital wi: «Ri Dios lik retaꞌam china ri e re Rire» y «Konoje kꞌu ri kakibꞌiꞌij e re ri Cristo, chirajawaxik kakesaj kibꞌ che taq ri na jusukꞌ taj.»
20 Chupa juna nimalaj ja kꞌo taq ri chapabꞌal re oro y re plata, ri lik xa qꞌalaj pa kachapabꞌex wi; yey kꞌo ne taq chapabꞌal re cheꞌ y ulew na lik ta chom, ri xa tobꞌ pa kachapabꞌex wi.
21 Jekꞌuriꞌlaꞌ e junoq karesaj ribꞌ che taq ri mak, chom ruchapabꞌexik kaꞌan ruma ri Dios, chom uꞌanom rubꞌinik usilabꞌik y lik kꞌo uchak che ri Qanimajawal, ma kuriq uꞌanik ukꞌiyal chomilaj chak.
22 Timoteo, chatanimaj kꞌu chwach ronoje taq ri rayibꞌal re tzaqibꞌal ke ralabꞌo. Yey junam kukꞌ konoje ri kakiloqꞌnimaj rubꞌiꞌ ri Qanimajawal Jesucristo rukꞌ ronoje kikꞌuꞌx, e chatijoj awibꞌ che uꞌanik ri lik jusukꞌ chwach ri Dios, kubꞌula akꞌuꞌx rukꞌ, chakꞌutu ri rutzil kꞌuꞌxaj y chatkꞌola chi utzil chomal kukꞌ konoje.
23 Maya axikin chike ri kakichapalaꞌ kibꞌ pa chꞌaꞌtem na jinta uchak, ma awetaꞌam chik laꞌ xa kukꞌam lo chꞌaꞌoj.
24 Ma e juna aj chak re ri Qanimajawal Jesucristo chirajawaxik che na aj ta chꞌaꞌoj, xaqi utz ukꞌuꞌx kukꞌ konoje, lik kakꞌutun chi utz y lik nim ukꞌuꞌx kukꞌ konoje.
25 Rukꞌ chomilaj chꞌaꞌtem kebꞌuqꞌil taq ri kakiyak kibꞌ chirij ri Qꞌijsaq; ma kꞌaxtaj rukꞌ waꞌ, ri Dios kuya chike kakitzelej kitzij chwach y kaketaꞌmaj ri Qꞌijsaq,
26 y jekꞌulaꞌ kebꞌel puqꞌabꞌ ritzel winaq y na kakiꞌan ta chik saꞌ ri karaj rire.