2
Ri saqil kꞌutunik
1 Noꞌj riꞌat Tito, lik chirajawaxik e ronoje ri kakꞌutu xaqi junam rukꞌ ri saqil kꞌutunik re ri Dios.
2 Chebꞌapixabꞌaj rachijabꞌ e nimaq winaq chik chaꞌ kakichꞌobꞌ chi utz janipa ri kakiꞌano, kakichajij chi utz ri kibꞌinik kisilabꞌik chikiwach ri jujun chik, kakichajij kibꞌ chaꞌ na ketzaq ta pa mak, yey e saqil ri kubꞌulibꞌal kikꞌuꞌx, ri rutzil kikꞌuꞌx y ri unimal kikꞌuꞌx.
3 Yey chabꞌiꞌij chike rixoqibꞌ e nimaq winaq chik: Kꞌola xiꞌin ibꞌ kukꞌ chwach ri Dios chwi ri kibꞌinik kisilabꞌik, mebꞌuꞌan e aj molot, makiya kibꞌ che qꞌabꞌarik, e cheqꞌilon chwi ri utz.
4 Kikꞌutu kꞌu chike ri e kꞌakꞌal ixoqibꞌ chaꞌ kꞌax kekinaꞌ ri kachijil y ri kalkꞌoꞌal,
5 kakichajij kibꞌ chaꞌ na ketzaq ta pa mak y jelaꞌ chom ri kibꞌinik kisilabꞌik, kechakun chi utz pa ja, kakikꞌut ri rutzil kikꞌuꞌx y kakitaqej ri kachijil. Kakiꞌan kꞌu ronoje waꞌ chaꞌ jelaꞌ na jinta junoq tzel kachꞌaꞌt chirij Rutzij Upixabꞌ ri Dios.
6 Chabꞌiꞌij kꞌu chike ralabꞌo kakichajij kibꞌ chaꞌ na ketzaq ta pa mak.
7 Yey riꞌat Tito, e chakꞌutu ri utz chikiwach rukꞌ ri saqil abꞌinik asilabꞌik chwi ronoje ri kaꞌano. Chatkꞌutun chi jusukꞌ rukꞌ saqil naꞌoj
8 y rukꞌ utzilaj chꞌaꞌtem chaꞌ jelaꞌ we kꞌo junoq kachꞌaꞌt chawij, utukel kuya ukꞌix ma na jinta mak kariqitaj chawij.
9 Yey chebꞌapixabꞌaj raj chakibꞌ chaꞌ kakinimaj kitzij ri kajaw, kakiꞌan chi utz ronoje chaꞌ ri kajaw kekiꞌkot kukꞌ y na kekꞌulilaꞌn taj.
10 Makiꞌan ne kiꞌke che rubꞌitaq re ri kajaw; e kiꞌana ronoje chi jusukꞌ chaꞌ jelaꞌ kaqꞌalajinik lik chom ri kꞌutunik re ri Dios Qakolobꞌenel.
11 Ma ri Dios uqꞌalajisam chi ri unimal rutzil ukꞌuꞌx chaꞌ konoje ri tikawex kekolobꞌetajik.
12 Ekꞌu riꞌ ri unimal rutzil ukꞌuꞌx ri Dios kꞌutuyum chiqe saꞌ uꞌanik kaqaya kan ronoje mak y ronoje ri rayibꞌal na utz ta uwach, yey e kꞌutuyum chiqe chirajawaxik kaqachꞌobꞌ chi utz ri kaqaꞌano chaꞌ waqꞌij ora kojbꞌin jusukꞌ rukꞌ jun saqil bꞌinik silabꞌik chwach ri Dios.
13 Lik chirajawaxik kaqaꞌan waꞌ y kaqakubꞌaꞌ pana qakꞌuꞌx che ri chomilaj qꞌij re kiꞌkotemal echiriꞌ kakꞌun tanchi ri Dios Qajawxel, ri Qakolobꞌenel Jesucristo.
14 Rire xuya ribꞌ pa kamik quma riꞌoj, xojuloqꞌo chaꞌ kojresaj che ronoje ri na utz taj, kuchomaj ri qabꞌinik qasilabꞌik y jelaꞌ kojuꞌan oj utinamit lik qayaꞌom qibꞌ che uꞌanik chomilaj taq chak.
15 E chakꞌutuꞌ janipa taq wa ximbꞌiꞌij chawe; chatpixabꞌan chi utz y chachꞌaꞌbꞌej kipa taq ri kakiꞌan ri na utz taj. Chaꞌana kꞌu waꞌ ma paqꞌabꞌ riꞌat yaꞌtal wi kaꞌano; maya kꞌu luwar che junoq kukꞌaq bꞌi aqꞌij.