11
Yus Aintsu Chichamen Akantramuri
1 Yaanchuikkia aints ainau kichik chichamnak chichau armiayi.
2 Tura tsaa winitinmanini jiinkiar, paka nungkanam Sinar tutainum jear nuni pujusarmiayi.
3 Tura asar chichainak: —Watska, nuwe najanar jiinum inarkarmi —tiarmiayi. Tura jean jeaminak kayanka takatsuk ladrillojai ni jeen jeamin armiayi, tura kantsejai kantserarmiayi.
4 Tura ataksha chichainak: —Watska, yamaikia kichik yaktanam mash pujusar, jea nekas nayaimp antitiak jeamkarmi. Turakrikia mash iruntrar pujusar, ataksha chikich nungkanam pujustasrikia kanakchatatji. Tura asakrin chikich aints ainauka ii yaktarin jiisar: Atumi yaktari nekas jiijamnawaitai turamiartin ainawai, meemasar —miajuitji —tusar tunainiarmiayi.
5-6 Tu nintiminamtai Apu Yus ni yaktarin tura nekas juun jean jeamkatasar nangkamawarmia nunasha jiis nintimias: —Ju aints ainauka untsuri ainayat, mash kichik chichamnak chichainau asar, miajuitji tumamsar ju takatan nangkamawaru asar, ni wakeramurin najantan pengké inaisachartatui.
7 Tura asaramtai mai nuamtak anturnaichau arti tusan, ni chichamen pachimratatjai —timiayi.
8-9 Tura asa nu aints ainau chichamen pachimramiayi. Turamtai anturnainachak pujusar, juun jean jeamtan inaisar, atu atu shiakar, kanakar chikich nungkanam wearmiayi. Tura Yus mash aints ainau chichamen pachimramu asamtai, nu yakta naaringkia Babel ayayi. (Nuka pachimramu taku tawai.)
Sema Weari Ainau
10 Sema weari ju armiayi: Nujang kuyuamu jimiar musach nangkamaru ai, Sem cien musachrintin pujamtai, uchiri Arfaxad naartin akiinamiayi.
11 Tura quinientos musach pujus uchiri ainaun yajutmar, nawantrincha nawantrumramiayi.
12 Tura Arfaxad treinte y cinco musach pujamtai, uchiri Sala akiinamiayi.
13 Nunia cuatro cientos tres musach pujus, chikich uchi ainaun yajutmar, nawantri ainauncha nawantrumramiayi.
14 Tura Sala treinta musach pujamtai, uchiri Héber naartin akiinamiayi.
15 Nunia Sala cuatro cientos tres musach pujus, chikich uchi ainaun yajutmar, nawantri ainauncha nawantrumramiayi.
16 Tura Héberka treinta y cuatro musach pujamtai, uchiri Peleg akiinamiayi.
17 Nunia Héberka cuatrocientos treinta musach pujus, chikich uchi ainaun yajutmar, nawantri ainauncha nawantrumramiayi.
18 Tura Pelegka treinta musach pujamtai, uchiri Reu naartin akiinamiayi.
19 Nunia Pelegka doscientos nueve musach pujus, chikich uchi ainaun yajutmar, nawantri ainauncha nawantrumramiayi.
20 Tura Reu treinta y dos musach pujamtai, uchiri Serug akiinamiayi.
21 Nunia Reuka doscientos siete musach pujus, chikich uchi ainaun yajutmar, nawantri ainauncha nawantrumramiayi.
22 Tura Serugka treinta musach pujamtai, uchiri Nacor naartin akiinamiayi.
23 Nunia Serugka doscientos musach pujus, chikich uchi ainaun yajutmar, nawantri ainauncha nawantrumramiayi.
24 Tura Nacor veintinueve musach pujamtai, uchiri Taré akiinamiayi.
25 Nunia Nacor ciento diecinueve musach pujus, chikich uchiri ainaun yajutmar, nawantri ainauncha nawantrumramiayi.
26 Tura Taréka setenta musach pujamtai, ni uchiri Abram, tura Nacor, tura Harán naartin akiinawarmiayi.
Taré Weari Ainau
27 Taré weari ainauka ju armiayi: Abram, tura Nacor, Tura Harán Taré uchiri armiayi. Tura Harán ni uchiri Lotan yajutmarmiayi.
28 Tura ni apari Taré iwiaaku pujai, Haránka Caldea nungkanam akiinamia nuni yakat Ur tutainum jakamiayi.
29 Tura Abram ni kana umajin Sarai naartinun nuwatkamaiyi. Tura Nacorka nuwan Milca naartinun nuwatkamiayi. Milcaka Haránka nawantriyayi. Tura Isca umajiyayi.
30 Saraika kaa asa uchin jurechuyayi.
31 Taréka yakat Urnum caldeo nungkanam pujus, nunia jiinki, Canaán nungkanam weak, uchiri Abraman, tura tirangki Lotan, tura najati Sarainasha ayamiayi. Antsu Canaánnumka jeatsuk, yakat Haránnum jear, nuni pujusarmiayi.
32 Tura nuni pujuinai, Taréka Haránnum pujus doscientos cinco musachrintin jakamiayi.