14
1 Nuwa pengker nintimtikiartin ni weari ainaun kiakartinuitai.
Antsu nuwa nintinchauka ni wearinka kiakaatsuk aya mesertinuitai.
2 Aints tunaun nakitakka Apu Yusen pengker awajui. Antsu aints
tunau jintan amak wekaa nuka Yusnasha pengkerka awajtsui.
3 Aints netse: Miajuitjai tumamui. Tura paan nintimtikiartin ainauka
ni chichamejaingkia chikich ainaun ayamrumakartin ainawai.
4 Jacha atsamtaikia, yurumak atsutnuitai. Antsu jacha amatikia, yurumak nukap awai.
5 Aints waitrichuka nekas aa nunak chichaawai. Antsu waitrinka aya tuke waitan etserniayi.
6 Wishiikiartinka: Wikia nekau aints ataj tayat, nekau aints wajastatkama tujintawai.
Antsu nintipka: Wikia nekau aints ataj ta nuka kakarmachu nekau aints wajastinuitai.
7 Aints nintimchau nekatiri atsau asamtai, nijai tsaningkiam pujakmeka,
nekau aintska wajaschatnuitme. Tura asamtai nijai tsaningkaip.
8 Aints paan nintimnuka: ¿Wikia itiur pujaja? tusa paan nintimratnuitai.
Antsu aints nintimchauka nintimchau ayat: Wikia nintipitjai tusa anangmamui.
9 Netse ainauka ni tunaarin pachisar wishikinawai. Tura anangmichu ainauka
mai nuamtak pengker nintimtunisar pujuinawai.
10 Aints napchau nintimias pujakka, ningki ¿waruka tu pujaja? tusa nekamawai.
Kame, ni waraakka aints wainchati ¿waruka timiá waraawa? tusangka nekaachminuitai.
11 Pase aintsu jee wári mesertinuitai. Tura anangmichu kuikiari jumchik ayat,
anangtsuk irumramu asamtai, yaitas ekemkatnuitai.
12 Yusen umirkacharu ainau ningki nintimsar: Ju jintan wekaaknaka nekasan tupnik jeatatjai tu nintiminayat,
nu jintaka jakatniunam jeakui tusarka nintiminatsui.
13 Aintsu ninti najaimiayat, nangkami wishirtinuitai. Turasha aints ainau yamai warainayat, ukunam juutiartinuitai.
14 Netse aints ainauka ni turamurijai metek wait wajakartinuitai.
Tura pengke aints ainauka ni turamurijai metek warasartinuitai.
15 Aints uchia nunisang nintimuka ni antukma nunaka mash nekasaintai tawai.
Antsu nintipka: ¿Wikia tuning wekasataj? tusa nintimias wekasatnuitai.
16 Aints paan nintimtin: Wikia tunaunaka nakitajai tusa, Yusen umirak pujawai. Antsu netseka:
Wi wakeramurnaka pachitsuk turamnawaitjai tu nintimtumas, chikich ainaunka pengké pachiatsui.
17 Aints wári kajeakka paanka nintimtsuk pujuwitai. Turasha pase aints ainaunka nakitrartin ainawai.
18 Aints nintimchau ainauka netse aints ainau turina nunasha turinawai. Tura nintip ainauka ni nekaina nuna nangkamasarang nukap nekaatasar wakerinawai.
19 Yusen nintimtichu ainauka ukunam pengke aints wajainamunam tsuntsumruawartinuitai. Tura pase ainau Yusen umirkaru jeen jear, waitinam tsuntsumruawartinuitai.
20 Aints kuikiartichun ni irutkamuri ainau jiitnaka nakitinawai. Antsu kuikiartinu amikri untsuri ainawai.
21 Aints ni irutkamurin nakitakka tunaun turawai.
Antsu kuikiartichu ainaun wait anenta nunaka Yus waramtiksatnuitai.
22 Aints: Wi paseen turatjai, tu nintiminauka nekasar mengkakartin ainawai. Antsu:
Wi pengkeran turatjai, tu nintiminaunka wait anentrartin tura pengker awajsartin ainawai.
23 Kakaram takakmin ainauka pengkeran wainkartin ainawai.
Aya chichaa pujuinauka kuikiartichu wajasartin ainawai.
24 Aints paan nintimsar pujuinauka tawaaspan tsengkrakina nunisarang wajainawai.
Antsu nintimchau ainauka tuke nintimchau asar, tu jakartin ainawai.
25 Aints waitrichuka chikich aints ainaun angkanmamtikratnuitai.
Antsu aints anangkartinka tuke wait chichaman etserniayi.
26 Apu Yusen umirkaru ainauka niin pengker awajsartin asaramtai, ni uchiri ainausha
nuna wainkau asar, nu nintimaurijai tuke sapijmiatsuk matsamsartin ainawai.
27 Apu Yusen umirkaru ainauka tuke pujusartin ainawai. Kame, aints ainau tuke sapijmiakar
jingkiamua nunisarang jakatniunam weenawa nuka tuuka pujutsuk, angkanmawaru ainawai.
28 Apu inamurin aints untsuri pujuinamtaikia, apuka pengker nintimias pujustinuitai.
Antsu aints jumchik iruninamtaikia, ni inamuri mengkakatnuitai.
29 Aints wári kajechunka wainkar, chikich aints ainau: Nuka nekas nekau aintsuitai tinawai.
Antsu aints tewari kajeuka ni netse nintaimtairin paan inakmawai.
30 Angkan pengker nintimias nekapratniuka aintsu namangken pengkermamtikui. Antsu aints chikichnaun waring achat wakerak puja nuka ni namangken, tura ukunchincha pasemamtikratnuitai.
31 Aints kuikiartichun wait anentsuk puja nuka mash aintstin najatmamia nuna pengkerka awajtsui.
Antsu aints kuikiartichun wait anentak pengker awajuka Yusnasha pengker awajui.
32 Pase aints ainaun ni tunaari mesratnuitai. Tura Yusen umirkaru ainau jakatin kintiari jeamtai,
Nekasan Yusnumapi pujustinuitjai tusar pengker nintimsar jakartinuitai.
33 Aints paan nintimias puja nuna nintin nekati pujurui.
Tura nintimchau ainau nintinka nekati pengké atsawai.
34 Aints pengker nintintin ainauka nekasar ni nungkarin eemtikiatin ainawai.
Antsu aints ainau tunaun turina nuka natsanpiaku ainawai.
35 Apu inatiri pengker umiuka ni apurin pengker nintimtikui.
Tura inatiri natsanpiaku turamtaikia, apuri niin kajerkatnuitai.