102
Aints wait wajak Yusen seatin
1 Apuru wi seamur anturtukta.
Tura wi untsummataisha,
wait aneasam anturtukta.
2 Wi shamakun pujamtaisha,
winaka anturtutskeka pujusaip.
Antsu wait aneasam anturtukta.
Tura wi seamsha wári airkata.
3 Wina iwiaakmauruka mukuntinua nunisang mengkaawai.
Tura ukunchrusha kaii keenawa nunisarang kuntur awajtinawai.
4 Tura wina nintirsha nupaa jaawa nunisang kakarchamin nekapeawai.
Tura asan yutancha nintimtsujai.
5 Wi timiá juutuj pujau asamtai,
wina nuwaprusha ukunchrun nujatinawa nunisnak nekapmamjai.
6 Tura asan ampush jea itarkanam pujawa nunisketjai.
Ampush jea yumpunkamunam pujus shinawa nunisnak nekapmamjai.
7 Wikia kanutnasha kanatsjai.
Antsu suwich ningki jea tuntupen keemas pujawa nunisketjai.
8 Wina nemasur ainauka tuke jiyatinawai.
Tura wina naarun pachisar pasé chichartinawai.
9-10 Ame wina kajertuku asam,
yakí wakata turutiatum,
nungka ajuarmawa nunisnak nekapmamjai.
Tura asan wikia pangkan yuwayatun,
yukuun yuwawa nunisnak nekapmamjai.
Tura umutirun umaknasha,
neaikirjai pachimran umajai.
11 Wina kintarka mukuntiua nunisang nangkaaminawai.
Tura asaramtai nupaa jajatua nunisnak nekapmamjai.
12 Antsu Apuru ameka aints ainauka nekasam tuke inawaitme.
Tura asakmin amin naarminka tuke kajinmakchartin ainawai.
13 Apuru ame tsangkukratkatin kintaka yanchuk jeau asamtai,
wári ami aintsrum ainau wait anentrarta.
14 Ami inatiram ainauka ami jeem yumpunkaun nintimsar aneenawai.
Tura ami jeem yumpunkaun jiisar wake mesekar pujuinawai.
15-17 Ii Apuri ataksha mura Sión tutainum wina jear jeartuktaram tusa,
ni paaniurijai nuni wantintuk,
ayamrumichu ainau seamurin antuk pachistinuitai.
Turatin asamtai mash nungkanmaya aints ainau ii Apuri naari nekas pengker aa nuna pachisar:
Ameketme juuntam tiartinuitai.
Tura mash nungkanmaya apu ainausha ii Apuri pengkerin wainkar:
Ameketme pengkeram tiartinuitai.
18 Ukunam akiinawartin ainausha ii Apurin warartusarti tusar ju chichamka aarmau atinuitai.
19-20 Ii Apuri kársernum achikmau pujuinau juutinamurin antuktas,
tura maawartin ainauncha angkanmamtikiatas,
nayaimpinmayang nungkan jiismayi.
21-22 Mash nungkanmaya aints ainau ii Apurin warartusartas iruntrarti,
tura Jerusalén yaktanam mura Sión tutainum ni naarin pachisar chichasarti tusa,
ii Apuri nayaimpinmayang nungkan jiismayi.
23 Wikia aints jinta wekaa wekaaka japening pimpirua nunisketjai.
Tura musaachrisha jumchik ati tusa Yus pujutrun jurutkinua nunisketjai.
24 Tura asan Yusrun chicharkun:
“Jumchik musaach pujusu asan,
wina pujutruka jurutkiip”, tajai.
¡Ameka tuke pujuwitme!
25 Apuru nu nangkamtaik nungkasha tura nayaimpisha najanamiame.
26 Nuka mai mengkaakartin ainawai.
Antsu ameka tuke pujustinuitme.
Nungkasha tura nayaimpisha tarach arut mamuawa nunisarang mengkaakartinuitai.
Aints wejmakan aik chikichan entsawa nunismek nayaimpisha tura nungkasha yapajiatnuitme.
27 Antsu ameka yapaijmiamashtinuitme.
Tura asam ami pujutrumka pengké nangkankashtinuitai.
28 Ami inatirmi weari ainausha shamtsuk pujusarti tusam,
ameka pengker awaasatnuitme.