59
David: Iin waitmaktinka ii Apurintai timiauri
1 Yusru wina nemasur ainamunmaya angkanmamtikruata.
Tura wina nepetukartas wakerutina nunia uwemtikrurta.
2-3 Aints kakaram ainau wina mantuwartas nakarinawai.
Tura asamtai pasé turina nunia angkanmamtikruata.
Turasha mangkartin ainamunmaya uwemtikrurta.
4 Apuru wikia ami chichamminka umirtanka nakitchau ayajai.
Tura tunaanasha takachu ayajai.
Turai waitinayat wina nepetukartas wakerutinawai.
Apuru wajakim wina ingkiunkam jiirsata.
5 Apuru ameka timiá kakaram asam,
tura ii Yusri asam,
amin umirtamchau ainau ni wait wajakartintri susarta.
Nu pasé aints ainau chikich ainaun anangkawar surukartas wakerina nuka wait anentsuk asarta.
6 Kashi yawaa ainminawa nunisarang yaktan tentakar wekajinawai.
7 Turasha kuchi kajeak sauran apawa nunisarang ainawai.
Turasha wishiinak:
“¿Yaachik iincha anturtamkataij?” tinawai.
8 Tura wainiatum Apuru ameka nu amin umirtamchau ainauka wishiku pujame.
9 Yusru ameka wina kiakatratnuitme,
turasha wina ayamrutkatnuitme.
Tura asakmin wikia amin ejamkatnuitjai.
10 Yusru wina anentu asam,
wijai ingkiuniktinuitme.
Turasha wina nemasur ainaun nepetkatin inaktursatnuitme.
11 Wina aintsur ainau kajinmakiarai tusam,
wina nemasur ainau maatka maawaip.
Antsu niish niish tupikiakiarti tusam,
ami kakarmarmijai akupkarta,
turasha inatsaarta.
Ii Apuri asam,
iin ayamrutmaktinmeka ametme.
12 Nu pasé aints ainauka tuke tunau chichaman chichainak:
Wikia miajuitjai tumamsar wait chichaman chichainau asar,
achikmawa nunisarang arti.
13 Yusru ame kajekmaurumjai nu aints ainauka wári amukarta.
Ame turakmin Jacobo Yusringkia ni nungkari Apurintai tusar nekaawarti.
Tura mash nungka ainau Apuringkia Yusketai tusar nekaawarti.
14-15 Nu pasé aints ainauka kashi yaktanam taar,
yawaa ainminawa nunisarang yaktanam yutain eainaksha wainkachar juutiartin ainawai.
16 Apuru ameka wina yamrutin ayame.
Tura shamakun pujamtaisha,
wina waitin ayame.
Tura asakmin wikia kashik aminka kantan kantamruatjame.
Tura kakaran chichaakun ami anengkratairumin pachisan,
tura ami kakarmarmincha pachisan chichastatjai.
17 Yusru wina kakamtikrurtinmeka ametme.
Tura ametme ejarkatnumka.
¡Yusru ameka winaka tuke anentin asakmin,
kantan kantamruatjame!