Darío Persia nungkanam apu pujai, Yus ni chichame etsernun Zacaríasan chicharak:

—Yaanchuik wina chichamrun etserin ainau atumi juuntri ainaun chicharinak: Atum pasé nintimtairum inaisaram, nunia atumi tunaarisha mash inaisataram, tinau waininayat atumi juuntri ainau pachischarmiayi. Tura asaramtai wikia nu aints ainaun kajerkamiajai. Antsu yamaikia ami aintsrum ainau chicharkum: Atumi Yusri timiá kakaram aa nuka tawai tita: Atumi tunaari inaisaram wina umirtuktaram. Turakrumningkia wikia atumin pengker awajsatnuitjarme, Yus turamrume, —Zacarías timiayi.

Nunia Yuse awemamuri Zacaríasan wantintukmiayi. Tura chicharak:

—Apu Zorobabelan Yus tawai tusam ujakta: Suntara kakarmarijaingkia tura ami kakarmarmijaisha wina jearka jeartukchatatrume, antsu wina Wakantru kakarmarijai wina jearka jeartuktatrume, Yus timiá kakaram aa nuka turamui, —Yuse awemamuri timiayi.✡

Nunia Zacarías Cristo nukap arus akiinatniun pachis ju chichamnasha aarmiayi:

—Yakat Jerusalénnum pujuinautiram warasrum kantamataram. Tura nu yakat Sión tutainum pujuinautiram warastaram. Jiistaram. Atumi Apuri: Wikia miajuitjai tumamtsuk antsu ni nemase ainaun mash nepetkau asa, burrochinam keemas winitramui. Nuka apua nuniska winitramtsui, antsu burro uchiri warinchu juutainum keemas winitramui.✡

Nunia nu chichamnasha Zacarías aarmiayi:

—Yus chichaak: Davidta weari ainau tura Jerusalénnum pujuinau wait anengkratin arti, tura wina tuke seatiarti tusan, wina Wakantrunka ni nintin tuke engketatnuitjai. Wi turamtai nangkijai ijuarmia nuka niincha wainkartinuitai. Nunia aints ni uchiri eemkauri jakau asamtai, nukap juutuj pujawa nunisarang aints mash juutin artinuitai, Yus tawai tusam ujakta, —Zacarías tu aarmiayi.✡

Nunia nu chichamnasha Criston pachis aarmiayi:

Uwija wainiun maawartinuitai. Turamtai uwija irunu tupikiakiartinuitai.✡