Josías Judá nungkanam apu pujai, Yus Sofoníasan ju chicham aarta tusa akupkamiayi:

—Yus tawai tusam aints ainau ujakta: Wikia aints ainaun: Winaka ameketme Yusem turutsuk antsu ni yusrin ningki najanamun seaina nunaka mash amuktatjai. Aints ainau: Nuka ii yusrintai tinau asaramtai, Judá nungkanam pujuinaun tura Jerusalén yaktanam pujuinauncha mash tura tangkurincha mash amuktatjai.

Tura wina umirtutsuk pujuinaun tura wina seattsuk pujuinauncha mash amuktatjai, Yus tawai tusam etserkata, —Sofonías tusa aarmiayi.

Tura ataksha chichaman aak:

—Atum tunau natsaamtsuk takau ainautiram mash iruntrataram. Tura Yus atumin kajertamak atum amukai tusaram, atumi tunaari inaisataram. Antsu jampechu nintintin ainautiram, Yuse chichame umirkuram, tuke Yuse wakeramuri najanataram. Tura jampechu asaram, pengker aa nuke turataram. Turakrumningkia atumin kajerkashtinuitjarme. Wi yaimkamtai, Judá nungkanmaya ampintrau ainautiram, Canaán nungkanam waketkiram atumi uwijari ataksha wainkuram kashi ayamsatnuitrume. Antsu Moab nungkanam pujuinausha tura Amón nungkanam pujuinausha wina aintsur ainaun wishikraru asaramtai nunasha mash amuktinuitjai. Tura ni yaktari Sodoma yaktaya nunisarang, tura Gomorra yaktaya nunisarang itarak artinuitai. Wi Yus asan tura timiá kakaram asan nunasha tajarme,

—Yus tusa Sofoníasan ju chichaman aamtikramiayi.