Ɛrm ɛsɛl ecʼob kok e lɛl
Ów ekʼit eke wɛl kʼuw any
Ob Kok e lɛl na el Luk eci lɛl yony ɛm eke nↄn ↄŋ in iwl Teofil. Luk in obi a sɛkp kok ɛs, gbɛkↄ li bʼim Pↄl ab -lʼↄb Amani Mamn e kokoba. Jesu Krist ecʼAmani Mamn a eke Luk nↄn ab ɛm a, lʼotar “fɛŋ eke Jesu kok, ke yɛgm nuŋ ↄb ɛm ɛtŋ toŋ igŋ lɛgŋ a eke Nyam oc imʼn afr a” e low akr (Ob Kok 1.1-2). Ob Kok e lɛl ab ɛm, Luk am dad jam ɛsɛl a eci juma eke kok lele elel eke -lʼocr Amani Mamn -nʼimn -lʼokr wus na e nuŋ a ecʼodad ab (Ob Kok 1.8). Wɛl bʼɛkn Jesu eci juma kok a Luk ecʼAmani Mamn a eke nↄn ab ɛm, ɛtŋ wɛl bʼɛkn Abŋ Lala eci juma kok a Ob Kok e lɛl ab ɛm.
Ob Kok e lɛl ab ɛm, Amani Owr a fafŋ ereb fɛŋ es. Ɛrm ɛsɛl a ↄb in ecʼamani Jwifɛl a ecʼaraŋn, ɛb ɛgbɛl ɛm a eke wɛl bʼigŋ sɛkp nuŋ ab ɛm, Grɛkɛl e nuŋ ɛm ↄny ɛsɛl a ecʼaraŋn, -lʼↄb -lʼok Etiopi iy a, toŋ -lʼok Rom bↄbↄ yɛji ekʼel ɛb gbɛl ekʼɛw wus na nimum es ab ɛm. Wɛl ↄb Amani Mamn a e kokoba ok egŋ lele ↄyↄw ab, wɛl ↄb sob êl ɛm, jɛj ok usu, an ↄl usu, ɛb ɛm ecʼów bɛbm usu. Usu a fɛŋ eke Amani Mamn a ɛc a, agŋ bɛb ɛgŋ ow e low eb, kↄ likpr ɛgŋm ebm; sakp nↄnↄ agŋ a eke ɛ́gŋm ebm a bʼijr ɛrm ɛsɛl a gbre.
Ob Kok e lɛl ab ɛm, agŋ nↄnↄ ↄb ɛrm ɛsɛl a low, ɛtŋ ɛrm ɛsɛl a dad ɛl ów nↄnↄ ɛl eci ↄmn a e dogŋn eci. Eke -li bi dad Jwifɛl odad a, -li bʼɛlu ↄkm -li yɛgm eke Jesu el ol a lele kokoba ↄb owi ab ab eci nɛny eke iy, ɛtŋ lʼel Mesi a. Agŋ a eke am igŋ sɛkp nuŋ a, -li bi dad wɛl eke Nyam el ɛgŋ a eke -nʼam ↄl es sɛgŋ a fɛŋ ke -li kʼɛŋnm a. -Nʼam dad ↄ́lu a eke Nyam ↄny abusu eke kʼewlm ke ↄny ɛgŋ oc es agn ecʼabu ɛm.
Kin low ligbɛl a eke wɛl ayal ow e low Ob Kok e lɛl ɛm a: ke él kretiɛn a, ow it ke ɛ́lum Jwifɛl ecʼol ab ee? Nuŋ ↄb ɛm a, ɛrm ɛsɛl a ↄny tutr na, kↄ Abŋ Lala ayal ↄŋ ɛl eke Amani Mamn a agŋ a fɛŋ eci, ɛb ir ɛrŋ ɛrŋ a fɛŋ eci. Eke -nʼↄnyn ów a -lʼɛkan a, ɛrm ɛsɛl a ɛgŋ eb eke agŋ a ekʼelm Jwifɛl ke ub Jesu nawrɛ a eci likr es ubr a elm lɛc ɛm, ow itm eke -li kʼɛlum Jwifɛl eci sol a fɛŋ.
Ɛrm es Pↄl ecʼɛrm a e liy a tasi el: ke lʼↄ́b Amani Mamn e kokoba lʼok agŋ ekʼelm Jwifɛl a. Lɛl na am dad in eci sakp nyahan a ecʼusu im owi a ekʼow ɛm li sigm Nyamel es Azi wus af lele Grɛs wus af ab a e low.
1
Ɛrm ɛsɛl ecʼAbŋ Lala e wɛl ɛwar
1 Ɛgŋ gbɛl Teofil, ɛm eci lɛl krɛkrɛ ab ɛm, mi dad ów a fɛŋ eke Jesu kok, ke yɛgm nuŋ ↄb ɛm ɛtŋ
2 toŋ igŋ lɛgŋ a eke Nyam oc imʼn afr a. Gbuŋ ke lʼúyu afr a, agŋ a eke li sↄsum lʼot ɛsɛ ɛrm ɛsɛl af a, nʼↄŋ wɛl sol Abŋ Lala ecʼabusu ɛm.
3 Tasi ɛm a, in e luw a e jam a, lʼɛlu sos ↄkm li yɛgm in ecʼɛrm ɛsɛl a sakp ɛrŋ ɛrŋ ɛm eke nʼanŋ owr. Sɛgŋ ekŋ yony ɛtŋ eke lʼɛlu sos ↄkm li yɛgm wɛl, ke li dad wɛl Nyam e gbreŋgbi usu a ecʼodad.
4 Lɛgŋ nyam, eke nʼam ij ob wɛl ab a, lʼijl wɛl nɛny ninɛ: «Kì kpabr es Jerusalɛm e lís, kↄ ànŋn low a ekʼɛm Ɛs ɛwar ↄny a, ob ap a eke mi dad ↄny ow e low a ecʼeku ɛm:
5 Jan ok agŋ mij nuŋ mij ɛm, kↄ ↄny, lɛgŋ tɛl ɛm, wɛl bʼow ok ↄny mij nuŋ Abŋ Lala ɛm.»
Jesu am uyu afr
6 Ɛrm ɛsɛl a ekʼɛlul Jesu ɛm a ibrmʼn ninɛ: «Ɛs Kↄtↄkↄ, kↄ lɛgŋ na ɛm anake bʼow ɛwl sigm Israɛl ecʼes ɛw ab es ab ee?»
7 Jesu dad ɛl ninɛ: «Ow elm ↄny itmn eke kʼuwr sɛgŋ a lele wanci ab ab e low any, kↄ ɛm Ɛs bɛbm ɛw es in obi ecʼabusu ɛm.
8 Gbɛkↄ ↄny bʼow ɛŋan lɛc nyam lɛgŋ a ekʼAbŋ Lala bʼow us ↄny es nuŋ af a. Ɛtŋ ↄny bʼow eel ɛm ecʼadaŋku, dadr ɛm ecʼodad Jerusalɛm, Jude e wus a nimum af lele Samari ab, toŋ okr wus e nuŋ.»
9 Eke li dad ów amua uwr ke -nʼam lɛr ow a, Jesu am uyu afr, ɛtŋ jru ow ɛdŋn ɛl any.
10 Eke ɛrm ɛsɛl a ecʼany a kↄkŋ afr cɛ ke -nʼam lɛr yogŋ a eke Jesu am uyu im a, kpɛkŋ agŋ yony eke sus mob efu anŋ ɛl any af
11 ɛtŋ dad ɛl ninɛ: «Galile ecʼagŋ, bla sosiɛm ɛtŋ iymn es aŋa am lɛɛr afr ee? Jesu na eke ŋgboŋ ↄny ecʼaraŋn aam afr a, bʼow ɛwl mɛny ow elel a cɛ eke ɛkan in nʼaam a.»
Matias usr Judas usu
12 Sica ɛrm ɛsɛl a anŋ lafɛny eke wɛl bʼɛsŋ Olivie lafɛny a ogŋ, ɛtŋ ɛwl mɛny ow Jerusalɛm. Lafɛny a, baŋn a e saw cɛ ow anŋ: yogŋ lele baŋn ab ab kilo nyam cɛ.
13 Eke -lʼowr -lʼokr Jerusalɛm a, -lʼuyu -nʼim êl afr a eke -li bʼanŋ sɛgŋ fɛŋ a. Kin ɛrm ɛsɛl a ekʼanŋ yogŋ a ecʼen: Piɛr, Jan, Jak lele Andre ab, Filip lele Toma ab, Bartelemi lele Matie ab, Jak ekʼel Alfe jim, Simↄ ɛb dogŋn ɛs lele Jud ekʼel Jak jim ab.
14 Ɛl lele ↄyↄw a lele Jesu lis Mari lele Jesu lisijimɛl ab ab sɛgŋ fɛŋ -li bʼas luku usu nyam -ni ŋↄŋn Nyam.
15 Sɛgŋ ab ɛm e nyam ɛm, ↄmn ɛsɛl ekʼↄtu eke kʼij agŋ ekŋ nↄhↄn as luku. Piɛr igb ɛl ecʼaraŋn ɛtŋ dad ɛl ninɛ:
16 «Agŋ lisijimɛl, ow it eke yecʼa ekʼAbŋ Lala dad Nyam e Lɛl ɛm a kʼiy nɛny. Lʼikŋ anym lʼɛcr David ɛm, lʼɛwar Judas eke nyimn agŋ a ekʼɛdŋn Jesu a e lís e low.
17 Ke Judas yɛji, ɛy ɛrm ɛsɛl ab ɛm e nyam ekʼin yɛji ↄny in eci juma.
18 Ɛtŋ in eci low ŋuŋ e li kok a eci labm eke wɛl sↄgʼr ab ɛm, lʼↄl ↄgm nyam, ɛtŋ yogŋ nʼanŋ afr lʼɛy wus nuŋ nuŋ lʼↄb lok es ɛtŋ in e sugŋ a fɛŋ ok ↄkm.
19 Jerusalɛm ecʼagŋ a fɛŋ iri low na, ow sosiɛm ɛl ecʼɛbr ab ɛm -lʼɛsŋ ↄgm a “Akɛldama”, ekʼel nyandrɛ ɛm “Mebl ecʼↄgm”.
20 Ɛtŋ Selu e lɛl ab ɛm kin yecʼeke wɛl nↄn: Ke in ecʼêl a ɛ́ru es ↄfr, ke ɛgŋ kaka kʼírm ɛm. Ɛtŋ ɛmɛny wɛl nↄn: Ke ɛgŋ ɛjeci úsrʼr usu in eci juma ab ɛm.
21-22 Ow sosiɛm, ow akpl ekʼɛgŋ nyam kʼow akr ɛy af ij Ɛs Kↄtↄkↄ Jesu e luw ɛm anŋ igb a e daŋku. Ke ɛgŋ a él agŋ a eke bʼanŋ ɛy ab sɛgŋ fɛŋ, usu a fɛŋ eke sʼɛc Ɛs Kↄtↄkↄ Jesu ab a ecʼɛgŋ nyam, lɛgŋ a ɛtŋ eke Jan okʼr mij nuŋ a toŋ ke igŋ lɛgŋ a eke nʼŋgboŋ ɛy ecʼaraŋn nʼim afr a.»
23 Wɛl ok agŋ yony ↄkm ɛl ecʼaraŋn: Josɛf eke wɛl bʼɛsŋ Barsabas ke wɛl bʼok en es Justus, lele Matias ab.
24 Ɛtŋ dedeku a nimum ŋↄŋn Nyam dad ninɛ: «Ɛs Kↄtↄkↄ, ŋ eke uw agŋ fɛŋ ecʼɛrm ab any a, yɛ̀gm ɛy ɛl yony na ɛm ecʼɛgŋ eke sↄsum oc
25 eke kʼel ɛrm ɛs, ke ídr juma a eke Judas igŋ ɛlu es im usu a ekʼel in ecʼa.»
26 -Li kok sↄsum oc ɛtŋ ow ɛy Matias af; ɛtŋ lʼɛy ɛrm ɛsɛl lɛw nyam a ecʼeb ab ɛm.