1-2 Na sosiɛm, eke si kʼↄtum sʼekum ij a, si bɛbm eke si kʼanŋ Atɛn † ɛy sↄny, ɛtŋ sʼɛrm ɛy lisijim Timote eke bi kok Nyam juma ɛy ab, ke bi dad Krist ecʼAmani Mamn ecʼodad a. Sʼɛrmʼn eke li kʼow lʼusur ↄny ɛrm ke lʼátr ↄny sos es ↄny ecʼↄmn ab ɛm, 3 yecʼɛtŋ ke ↄny ɛm ecʼɛgŋ kaka kʼɛ́ym wus gbre ijr na ekʼanŋ ↄny ecʼaraŋn ab ɛm, aŋke ↄny obi yɛji uwr any eke gbre ijr na, el low ekʼↄn ɛy es. 4 Ow a eke sʼanŋ ↄny ogŋ a, sʼikŋ anym si dad ↄny eke wɛl bʼow ijr ɛy gbre. Ca ow anake ow ɛy a, ↄny uwr any. 5 Na sosiɛm, eke mi kʼↄtum mʼekum a, mʼɛrm Timote eke kʼow otar ↄny ecʼↄmn a e low akr ókʼm, aŋke mʼam ebr ɛrmij, ekʼoglog ɛgŋ ɛju Ɛs a ɛju ↄny okr wus, ke juma eke si kok a el low ↄfr ↄfr ŋ̂.

6 Sica Timote anŋ ↄny ogŋ a ow † ɛtŋ ↄb ɛy ↄny ecʼↄmn lel erur ab ecʼamani, eke bʼↄkan ɛy e low sɛgŋ fɛŋ sɛnyn sɛnyn ɛtŋ am erurir eke kʼɛkan ɛy, ɛsɛ elel eke ɛy yɛji sʼam erur eke si kʼɛkn ↄny ab af. 7 Ow sosiɛm a, lisijimɛl, ↄny ecʼↄmn ecʼamani e sʼiri ɛy e sos es ↄw na ɛm lel ɛy e gbre ijr na ɛm ab a, ɛyr ɛy ɛrm es, atr ɛy sos es. 8 Sica sel ow ɛy ŋ̂, aŋke inymn es kikri Ɛs Kↄtↄkↄ ab ecʼaf okr ab ɛm. 9 Kↄ ayaf tasi si kʼↄŋn Nyam bia sos ɛm iŋn na eke sʼↄny, ↄny sosiɛm Nyam ecʼany af ab ecʼee? 10 Ncok lele lɛgŋ owr ab si bʼat lebl es si ŋↄŋn Nyam eke li kʼↄŋ ɛy abusu bake ɛmɛny blel sʼɛ́kanin, ke si yíbr low yecʼekʼanm ↄny ecʼↄmn ab ɛm a.

11 Ke blel ɛy Ɛs Nyam in obi lele ɛy Ɛs Kↄtↄkↄ Jesu ab kók ɛy ejagb bake sʼow sʼɛkn ↄny. 12 Ke blel Ɛs Kↄtↄkↄ ↄ́ŋ erur ekʼↄnyn ↄny ↄfr ɛm lel agŋ ecʼɛjeci e lís ab a, ágb bubu af ɛsɛ elel ekʼↄny ecʼerur eke sʼↄny a agb ab af. 13 Ke blel lʼúsur ↄny e mɛrm a, eel lala ke abr ɛnym kaka kʼánm ↄny ɛm Nyam ɛy Ɛs ecʼany af, lɛgŋ ekʼɛy Ɛs Kↄtↄkↄ Jesu bʼow ow lele in eci afr ɛrm ɛsɛl lala † a fɛŋ ab a.