Lɛl eke wɛl awŋ Ebre eyŋ
Ów ekʼit eke wɛl kʼuw any
Ɛgŋ a eke kok lɛl na a, ɛgŋm ɛwm sos nin. Gbɛkↄ ow el ɛgŋ nyam eke bʼɛbr Grɛk sɛnyn sɛnyn. Ɛtŋ ɛmɛny lʼuw Nyam Lɛl ɛm ecʼów a lele Jwifɛl ecʼol ab ɛm ecʼów ab ab any yɛji sɛnyn sɛnyn. Ow ibn eke wɛl oc Ebre e lɛl na ɛlu Pↄl e silɛl eke nↄn ab ɛm. Kʼaw ke ow él Apolↄs eke kok Ɛs Kↄtↄkↄ e juma Pↄl ab a, kʼel lɛl na e nↄn ɛs (ɛ̀kn Ob Kok 18.24-28, 1 Korɛnt 3.5-9; 4.1-2).
Ɛgŋ a nↄn lɛl na am dad Ebre eyŋ a ekʼitŋn ɛrm ɛm el Krist eci, ke wɛl am ijr gbre a eke kʼinym es kikri ↄmn ɛm. Nʼam dad wɛl eke batŋ wɛl igŋ ↄmn na eke wɛl ↄny Jesu ɛm a ɛlu es, im am us Jwifɛl ecʼol a jam, wɛl kʼow ɛŋnm ob ap kaka, aŋke Jesu Krist ɛm eci sel ɛŋn a eke wɛl ↄb ow e kokoba a anake el sel ɛŋn tasi a.
Lɛl ab ɛm ecʼów a cɛc sakp yony: krɛkrɛ ɛm a (nuŋ 1.4 toŋ nuŋ 10.18) am yɛgm ɛy eke Jesu agb nↄnↄ akm afr ɛrm ɛsɛl. Lʼagb nↄnↄ lʼakm Mois lele sinm sig ab ɛm ecʼegb waw ɛsɛl ɛgbɛl ab ab. Jesu anake el ɛy ecʼegb waw ɛs ligbɛl Nyam ecʼany af a. Nʼanŋ ɛsɛ Mɛlkisedɛk ekʼel ɛb ebu lele egb waw ɛs ab Abraham lɛgŋ ɛm ab af. Jesu ocr in sosi kokr egb waw ɛtŋ eb ɛy e sikpl a fɛŋ. Lɛgŋ sig ab ɛm e segb waw eke wɛl bi kok a, kʼↄtum tɛtŋm ɛy e sikpl ab es.
Yony ɛm a (nuŋ 10.19 toŋ 13.17 ɛm a), nʼam atr Ebre eyŋ a sos es eke kʼↄny ɛrm susu ↄmn ɛm, ɛsɛ elel eke lɛgŋ sig ɛm ecʼↄmn ɛsɛl a ekʼeb any a kok ab af.
Lʼuwar in e lɛl a ↄwrↄ ɛdŋ ɛm lele ɛsŋn ɛm ab.
1
Nyam ɛcr Jim ɛm dad ɛy odad
1 Lɛgŋ sig ɛm a, Nyam ɛcr kokoba ↄb ɛsɛl ɛm dad ɛy lagŋɛl odad, ɛtŋ li dad wɛl odad a sakp nↄnↄ lel akunda ɛrŋ ɛrŋ ɛm ab.
2 Kↄ sica, sɛgŋ na ekʼel sɛgŋ es abal el ab ɛm, Nyam ɛcr Jim ɛm dad ɛy odad. Jim na ɛm lʼɛcr li kok afr lele wus ab, ɛtŋ in cɛ anake Nyam sↄsum ocʼr eke li kʼel ob a fɛŋ ecʼaja ij ɛs a.
3 Iy na bʼɛlu in ecʼanygbɛl e jɛjn a ↄkm, ɛtŋ lʼel ow ecʼes otarir kpɛŋ, ɛtŋ in ecʼodad ebl ecʼabusu a ucu wus lel ob fɛŋ ab ↄny es. Li yↄyↄg agŋ e sikpl ab es, ɛtŋ nʼim li sig es afr Nyam ekʼↄny abusu ob fɛŋ af a e lidr abu af.
Nyam ecʼIy a ↄny any akm afr ɛrm ɛsɛl
4 Iy na ↄny any nↄnↄ akm afr ɛrm ɛsɛl. Ɛɛ, ow ɛru es kpata, aŋke Nyam ↄŋʼn aja nin ekʼↄny any nↄnↄ akm afr ɛrm ɛsɛl ecʼa.
5 Tasi ɛm a, lɛgŋ kaka Nyam dadm afr ɛrm ɛs kaka ɛsmɛ:
Ŋ el ɛm ecʼIy,
yɛfɛnyna, ɛm mʼewʼŋ.
Ɛtŋ ɛmɛny, li dadm afr ɛrm ɛs kaka yɛji lʼɛsmɛ:
Ɛm, mi bʼow mʼel Ɛs,
ɛtŋ in, li bʼow lʼel ɛm ecʼIy.
6 Gbɛkↄ, lɛgŋ a eke nʼↄŋ in e yɛfl Iy a ow wus na af a, li dad ninɛ:
Nyam ecʼafr ɛrm ɛsɛl a pupukpaŋ it eke kʼigŋʼn nuŋ.
7 Kin low yecʼeke li dad afr ɛrm ɛsɛl e lís:
ŋ el ɛgŋ a ekʼↄŋ ke afr ɛrm ɛsɛl itŋn anŋ ɛsɛ lɛf af,
ke ŋ e juma kok ɛsɛl bi kok ŋ e low ɛsɛ al e bʼiri ab af a.
8 Kↄ Nyam dad Jim e lís ninɛ:
ŋ el Nyam ɛtŋ ŋ ecʼɛb ebu ecʼatufu lɛkpn a anŋ sɛgŋ fɛŋ.
Ŋ e kpama ab ab, am nyimn ŋ ecʼagŋ a low nɛnyɛmbri nyam ɛm,
9 bʼerur low nɛnyɛmbri nyam ɛtŋ bʼifn low ŋuŋ.
Na sosiɛm Nyam, ŋ e Nyam sↄsum ocʼŋ awlŋɛl ab ɛm
eke kʼel in eci, ɛtŋ lʼɛtm sos ɛm iŋn e mun lʼokʼŋ nuŋ.
10 Ɛmɛny Nyam dad ninɛ:
Ɛs Kↄtↄkↄ, nuŋ ↄb ɛm a, ŋ anake kok wus a,
ɛtŋ afr el ob eke ŋ e sabu a ol.
11 Ów amua fɛŋ bʼow irm,
kↄ ŋ, bʼow anŋ sɛgŋ fɛŋ.
Afr lele wus ab bʼow ɛni ɛsɛ mob sus ɛm sig af,
12 bʼow ↄny ar ɛl es ɛsɛ gbad af,
ɛɛ, -li bʼow -lʼitŋn any ɛsɛ mob sus ɛm af.
Gbɛkↄ ŋ, bʼanŋ sɛgŋ fɛŋ ŋ ecʼelel a cɛ,
ɛtŋ ŋ ecʼowr anŋ a úwrm.
13 Lɛgŋ kaka Nyam dadm afr ɛrm ɛs kaka ɛsmɛ:
Òw sig es ɛm e lidr abu af,
toŋ bake mʼót ŋ ecʼefnu mʼok ŋ ecʼakr ew a.
14 Tasi ɛm a, afr ɛrm ɛsɛl bla -lʼel ee? -Lʼel abŋ ekʼↄny juma ɛrŋ ɛrŋ, ke Nyam bʼɛrm im ɛlum agŋ a eke kʼij sel ekʼↄnym uwr ecʼaja a abu.