Jan e lɛl nyahan ɛm ekʼawŋ
Ów ekʼit eke wɛl kʼuw any
Jan ekʼel Jesu ecʼɛrm ɛs a anake kok lɛl na awŋ igŋ nyam eke itŋn ɛrm ɛm el Ɛs Kↄtↄkↄ eci, ke wɛl bʼɛsŋ Gayus a. Sʼuwm in e lís lele in e Nyamel a eke li bʼim ɛm ab ab e lís e low kaka any. Gbɛkↄ lɛl ab ɛm, sʼam ɛkn eke Jan ecʼagŋ a eke bʼɛrm im am ↄb Nyam e kokoba ɛl ogŋ yogŋ a, li bʼeb wɛl etu sɛnyn sɛnyn. Sica ɛl e Nyamel ab ɛm, ɛgŋ nyam eke wɛl bʼɛsŋ Diotrɛf ke el idr ɛsɛl ab ɛm e nyam a, in, ɛ́gŋm ebm agŋ a eke Jan bʼɛrm a ɛtŋ li bi dad ów eŋuŋ Jan e lís.
Jan kok lɛl na am awŋ Gayus, lʼáw ow ke li dád ow eke ow ki wewram Diotrɛf ów. Nʼam ibrm eke Gayus kʼeb Demetrius ekʼam oc lɛl a im ↄŋʼn a etu sɛnyn sɛnyn, aŋke in yɛji lʼel ɛgŋ ekʼam kok juma Ɛs Kↄtↄkↄ eci.
Lɛl a am yɛgm ɛy eke si kʼeb erur ɛm, agŋ a fɛŋ eke am kok juma ↄŋ Ɛs Kↄtↄkↄ a.
1
Ɛsŋn
1 Ɛm Nyamel ecʼƐgŋ Likpekp, ɛm lawl Gayus eke mʼerur nawrɛ ɛm, mʼam awŋ lɛl.
2 Erur ɛm e lawl mamn, mʼam erur eke ów fɛŋ kʼakpalʼŋ, ke sos írmʼŋ es, ɛsɛ elel eke abŋ ɛm yɛji ↄny lɛc ab af.
3 Sos ɛm am iŋnʼm nↄnↄ, lɛgŋ a ekʼagŋ lisijimɛl ow, ke ij daŋku eke ŋ bi kok cɛcɛ Nyam e low fɛŋ ɛm a.
4 Eke mʼiri eke ɛm ecʼey am an es low nawrɛ ɛm a, sos ɛm am iŋnʼm ligbɛl akm low ɛjeci fɛŋ.
5 Erur ɛm e lawl mamn, bi kok ów amamn ↄmn ɛm ↄŋ agŋ lisijimɛl ekʼel etu a yɛji.
6 -Nʼam ij ŋ ecʼɛrm mamn e daŋku Nyamel ecʼany af. Mʼam ŋↄŋnʼŋ, kòk ɛl ecʼejagb us e low ɛsɛ elel eke Nyam erur ab af,
7 aŋke Jesu Krist e nin a sosiɛm anake -nʼimn, ke -lʼebm ob kaka Nyam e low any uwm ɛsɛl ecʼabu ɛm a.
8 Sʼↄtu eke si kʼɛlum agŋ amua abu, yecʼɛtŋ ke ɛl ɛrŋ ɛm sʼókr af sʼel low nawrɛ e juma kok ɛsɛl.
Diotrɛf e dedeku eke nʼↄŋ
9 Mi nↄn ów bɛb mʼↄŋ Nyamel; kↄ Diotrɛf eke bʼerur e kʼel ɛl ɛm e krɛkrɛ a ebm ɛy ecʼodad a.
10 Na sosiɛm, eke mʼam ow mʼɛkn ↄny a, mʼow mi dad ↄny ów eke nʼam kok a. Nʼam dad ów eŋuŋ lʼok ɛy af. Na yɛji ow ɛ́yrmʼn ɛrm es, lʼébm agŋ lisijimɛl, ɛtŋ agŋ eke bʼerur eke kʼeb ɛl a yɛji, li bʼɛdŋn wɛl, ɛtŋ li bʼogŋ wɛl Nyamel ɛm.
11 Erur ɛm e lawl mamn Gayus, kì wewrm ów eŋuŋ kok ɛsɛl ów, kↄ kòk ów amamn. Ɛgŋ eke bi kok low mamn a, el Nyam eci; ɛgŋ eke bi kok low ŋuŋ a, lʼɛ́knm Nyam.
Demetrius ecʼaw lele ɛsŋn ab
12 Demetrius ecʼa gbɛ, agŋ a fɛŋ am ij in e daŋku, in ecʼes an mamn a sosiɛm. Ɛy obi yɛji sʼam ij in e daŋku. Ɛtŋ ŋ obi yɛji uw any eke ɛy e daŋku ij a el nawrɛ.
13 Mʼↄny ów nↄnↄ eke mi ki nↄn mʼawŋʼŋ, kↄ mʼerurm eke mi kʼoc lɛl mij lele lɛl likŋ ab mi nↄn.
14 Mʼam tutr eke mi kʼow mʼɛknʼŋ lɛgŋ tɛl ɛm, ke si dád ów sʼokarir.
15 Ke ɛrm es ɛy ánŋ ŋ ab! Awlŋɛl a fɛŋ am ibrmʼŋ. Sʼam ɛkn ɛy lawlɛl a fɛŋ ecʼɛgŋ nyam nyam.