12
Mari ok Jesu mijey akr
Matie 26.6-13; Mark 14.3-9
Sica ow anŋ sɛgŋ nↄhↄn ke Pak ɛ́y, ɛtŋ Jesu im Betani, yogŋ a eke Lasar eke lʼigbm luw ɛm a anŋ a. Yogŋ, Mart kok ob ij ↄŋʼn. Agŋ a ekʼanŋ ob ij lↄfu lís Jesu ab a, Lasar yɛji anŋ ɛm. Mari oc mijey litr ikpr ekʼil an ke wɛl kok nar tasi ɛm ok Jesu akr; ɛtŋ lʼoc in e sin nuŋ a li tɛtŋ ow akr es. Akŋ a nimum el mijey sↄsŋ ↄfr. Ɛtŋ Judas Iskariↄt, Jesu e jam ɛsɛl ab ɛm ecʼɛgŋ nyam, in a tasi eke bʼow ↄl ijʼr a dad ninɛ: «Wɛl ↄtu eke kʼↄl mijey na ij os ekŋ yen yen sakp nyahan, óc ow ecʼos a ↄŋ ↄgbↄru.» Nʼam dad odad na ow elm ↄgbↄru e sↄrŋ ikŋ eke li kʼↄny eci, kↄ eke lʼel ulu a sosiɛm eci, aŋke os ekpr a eke li bʼↄnym ab a, li bʼot os a eke wɛl bʼok ɛm a. Ɛtŋ Jesu dad ninɛ: «Ɛ̀gbʼr es tiŋ! Li kok low na lɛgŋ a eke wɛl bʼow ɛluʼm uwↄmu ɛm a eci. Ɔgbↄru anŋ ↄny ab sɛgŋ fɛŋ, kↄ ɛm ecʼa, mi kʼow mʼanm ↄny ab sɛgŋ fɛŋ.»
Jwifɛl a ecʼagŋ nↄnↄ iri eke Jesu anŋ Betani. -Nʼim yogŋ ow elm Jesu sosiɛm eci cɛ, kↄ Lasar yɛji eke Jesu igbm luw ɛm a sosiɛm eci. 10  Egb waw ɛsɛl ɛgbɛl a ɛgŋ eb eke kʼibi Lasar yɛji, 11 aŋke Jwifɛl nↄnↄ am ŋgboŋ ɛl ɛm Lasar sosiɛm ɛtŋ am ub Jesu nawrɛ.
Jesu aam ɛy Jerusalɛm
Matie 21.1-11; Mark 11.1-11; Luk 19.28-40
12 Eke lɛgŋ ɛny akr af a, agŋ nↄnↄ a eke ow Pak ecʼes gbɛgbl ab ɛm a iri eke Jesu am ow Jerusalɛm. 13 Agŋ a fɛŋ ot sarikŋ ay ɛtŋ ok ↄkm baŋn a aam ↄbrʼr, -nʼam ↄg -li dad -lʼɛsɛ: «Hosana! Ke Nyam ɛ́dŋ ɛgŋ a ekʼam ow Ɛs Kↄtↄkↄ e nin ɛm a ↄwrↄ! Ke Nyam ɛ́dŋ Israɛl ecʼɛb ebu a ↄwrↄ!» 14 Jesu ɛŋn gbaŋkↄ kpɛtɛŋni nyam ɛtŋ sig es af ɛsɛ elel eke Nyam Lɛl dadr ab af: 15  Siↄn eci dedyↄwli, erŋn kʼↄ́nyʼŋ! Ìs any lɛr, ŋ ecʼɛb ebu a am ow, li sig gbaŋkↄ kpɛtɛŋni e liy af. 16 Ke ów amua kʼokm in e jam ɛsɛl a es sos ɛm; gbɛkↄ eke Jesu ɛy in ecʼanygbɛl ɛm bake ow uwr a, -lʼↄkn eke Nyam Lɛl ikŋ anym dad in e lís e low na, ɛtŋ ow anake ow ɛy a.
17 Bieku ab ɛm ecʼagŋ a eke ɛkn Jesu igbm Lasar luw ɛm a, am dad low a eke -lʼɛkan a ecʼodad. 18 Bieku a iri mɛny ɛwr a e li kok a ecʼodad: na sosiɛm anake -lʼowr -nʼam ↄbr ow a. 19 Ca Farisiɛl a am dad ɛl ↄfr ɛm ɛsɛ: «Am ɛkan, si kʼↄtumn low kaka fɛŋ ecʼij! Agŋ a fɛŋ am usʼr jam!»
Jesu am dad in ecʼanygbɛl lele in e luw ab ecʼodad
20 Es gbɛgbl a e lɛgŋ a, agŋ a ekʼuyu im Jerusalɛm eke kʼigŋ Nyam nuŋ a, Grɛkɛl a e bɛb anŋ ɛl ɛm. 21 Ɛl, -nʼim -nʼɛŋn Filip ekʼel Bɛtsayida baŋn Galile wus af ecʼɛgŋ a, ɛtŋ -li dad ow ninɛ: «Ɛgŋ gbɛl, sʼam erur eke si kʼɛkn Jesu.» 22 Filip im dad ok Andre ɛtŋ ɛl yony mum -nʼim -li dad -lʼok ow. 23 Jesu dad ɛl ninɛ: «Wanci ow eke ɛgŋ ecʼIy bʼow ɛy in anygbɛl ɛm. 24 Low nawrɛ mʼam dad ↄny: likŋ e liy nyam eke wɛl ɛlu nↄmu ɛm ke anŋ tiŋ ugŋm es a bʼanŋ in ecʼelel a cɛ. Gbɛkↄ eke sel a ugŋ es, li bʼↄsu ey nↄnↄ. 25 Ɛgŋ eke bʼerur in e sel a, li bʼow lʼirmn ow; kↄ ɛgŋ eke wus af aŋa kʼow ebrm in e sel a e low ɛrm mij a, bʼow ɛŋn sel ekʼↄnym uwr. 26 Ɛgŋ eke am erur e ki kok ɛm e lís e low a, ow it ke lʼúsʼm jam; ow ɛm a, li bʼow nʼanŋ yogŋ a eke mʼow mʼanŋ a. Ɛgŋ a eke bʼow kok ɛm e lís e low a, ɛm Ɛs bʼow usrʼr sos. 27 Wanci na af ɛrmni ɛdŋʼm es. Ɛtŋ ayaf mi ki dadr ee? Mi dád mʼɛsɛ: ɛm Ɛs, ↄny ocʼm es gbre e wanci na af ee? Ke tasi ɛm a, wanci na ecʼanake mʼow a. 28 Ɛm Ɛs, ↄŋ ŋ e nin a anygbɛl!» Ɛtŋ kpɛkŋ lebl nyam anŋ afr dad ninɛ: «Mʼↄŋʼn anygbɛl lɛgŋ ɛtŋ, ɛtŋ ɛmɛny mʼow mʼↄŋʼn anygbɛl sakp yony ɛm.»
29 Bieku a eke anŋ yogŋ ke iri lebl a am dad ɛsɛ: «Na nyamgbrany!» Ɛtŋ agŋ bɛb am dad ɛsɛ: «Afr ɛrm ɛs nyam dadʼr odad!» 30 Ɛtŋ Jesu dad ɛl ninɛ: «Lebl na ikŋm ɛm sosiɛm, kↄ ↄny sosiɛm. 31 Catŋ anake wus na e jɛj ok e wanci a ow a; sicaca ɛm a, wɛl bʼow ogŋ wus na ecʼes ɛw ɛs a. 32 Ɛtŋ ɛm ecʼa, lɛgŋ eke wɛl bʼow igblʼm ogŋ afr a, mʼow mʼↄdu agŋ a fɛŋ mʼeb.» 33 Sodad amua ɛm, Jesu am yɛgm in e luw a ecʼelel eke bʼow ɛcr.
34 Agŋ a dadʼr ninɛ: «Ɛy e sol a e silɛl ab ɛm sʼiri eke Mesi a bʼow anŋ owr sɛgŋ fɛŋ. Ayaf ↄtu eke ki dad eke ow it eke wɛl kʼigbl ɛgŋ ecʼIy ogŋ afr ee? Ɛgŋ ecʼIy a, ke bwo ecʼɛgŋ ana ee?» 35 Jesu am dad ɛl ɛsɛ: «Ɛmɛny usuayl anŋ ↄny ecʼaraŋn lɛgŋ tɛl eci cɛ. Eke ↄnyn usuayl a, àan es usuayl ɛm, yecʼɛtŋ ke ncebn kʼókrm ↄny es. Ɛgŋ eke am an es ncebn ɛm a úwm usu eke nʼaam ab any. 36 Eke ↄnyn ɛgŋ a eke el usuayl a, ↄnyn ↄmn in ɛm yecʼɛtŋ ke éel usuayl ecʼey.» Eke li dad sodad amua uwr a, Jesu ocr sos es agŋ a sosiɛm im kpekpe lↄl es.
Jwifɛl a ubm Jesu nawrɛ
37 Mɛny ɛwr nↄnↄ na eke li kok bieku a ecʼany af a yɛji ↄↄm ɛl -lʼubm ow nawrɛ. 38 Ow ɛm kokoba ↄb ɛs Esayi ecʼodad eke dad a iy nɛny: Ɛs Kↄtↄkↄ, kↄ bwo ecʼɛgŋ iri ɛy eci odad ab ee? Kↄ bwo ecʼɛgŋ Ɛs Kↄtↄkↄ okm sos ↄkm yɛgm ee? 39 Ɛtŋ ɛmɛny Esayi in cɛ li dad low a sosiɛm eke agŋ amua kʼↄtum ubm nawrɛ a:
40 Nyam efal ɛl any,
lʼirmn wɛl e nuŋ ɛm ↄny a
yecʼɛtŋ ke ɛl eci anyamn a kʼɛ́knm es,
ke -li kʼuwmn low any.
Ɛtŋ kin low a sosiɛm eke -li kʼɛwlmn -lʼowmn Nyam ogŋ
bake lʼéwlm wɛl a.
41 Esayi dad odad na aŋke lʼɛkn Jesu ecʼanygbɛl a, ɛtŋ ow el ow ecʼodad anake nʼam dad a. 42 Gbɛkↄ, Jwifɛl ecʼes ɛwɛl a, ɛl ɛm a yɛji agŋ nↄnↄ ub Jesu nawrɛ. Gbɛkↄ Farisiɛl a sosiɛm, -lʼokamn sos ↄkm bake wɛl ogŋ ɛl Nyam nuŋ igŋ usu a. 43 -Li bʼerur sos usr a eke bʼanŋ agŋ ɛm ow a -lʼakm Nyam ɛm ecʼa.
Jesu Krist eci odad ab ɛm e jɛj ok
44 Jesu igbl lebl ogŋ dad ninɛ: «Ɛgŋ eke ↄny ↄmn ɛm ɛm a, ow elm ɛm ɛm sↄny cɛ nʼↄnym ↄmn, kↄ ɛgŋ a ekʼɛrmʼm ab ɛm yɛji. 45 Ɛgŋ eke am ɛknʼm a, am ɛkn ɛgŋ a eke ɛrmʼm a. 46 Ɛm, mʼel usuayl, mʼow wus af aŋa yecʼɛtŋ ke ɛgŋ kaka fɛŋ eke ↄny ↄmn ɛm ɛm a, kʼánm ncebn ɛm. 47 Eke batŋ ɛgŋ am iri ɛm e sodad a, ɛtŋ lʼↄ́sum a, ke ow elm ɛm mʼↄbmʼn low ij, aŋke tasi ɛm a, mʼow eke mi ki sↄg wus ecʼagŋ a, kↄ ow elm ɛl e low ↄb eci. 48 Ɛgŋ eke am igŋʼm, ke ébm ɛm e sodad a, bʼɛŋn in e low ↄb a ow ɛm; lɛgŋ es abal el ɛm a, ɛm e low yɛgm a anake bʼow ↄbʼr low a. 49 Tasi ɛm a, ow elm ɛm obi ɛm mi dadm, kↄ ɛm Ɛs eke ɛrmʼm a in obi, nʼↄŋʼm yecʼa eke mi ki dad ke mi yɛgm agŋ a ecʼabusu. 50 Ɛtŋ mʼuw any eke yecʼa eke li bi dad a bʼↄŋ ɛgŋ sel ekʼↄnym uwr. Yecʼa eke mʼam dad a, mʼam dad ɛsɛ elel eke ɛm Ɛs ↄŋʼm ow ecʼabusu ab af.»
12:3 Ɛ̀kn Mark 14.3 ecʼakr otar a. 12:7 Ɛ̀kn Matie 26.12 ecʼakr otar a. 12:8 Ɛ̀kn Ol Ɔkn 15.11. 12:13 Selu 118.25-26. Ɛ̀kn Matie 21.9 ecʼakr otar a. 12:15 Zakari 9.9. Ɛ̀kn Matie 21.5 eci akr otar a. 12:34 Ɛ̀kn Selu 89.36-37; Esayi 9.6; Daniɛl 7.14. 12:38 Esayi 53.1. 12:40 Esayi 6.9-10.