7
Jesu lisijimɛl úbm Jesu nawrɛ
Ów amua e jam a, Jesu am ɛc ɛlul Galile ɛm; lʼerurm eke li kʼim Jude aŋke Jwifɛl ecʼes ɛw ɛsɛl a am ↄl eke kʼↄŋ wɛl ibiʼr. Jwifɛl eci Mɛf ecʼes gbɛgbl e lɛgŋ ow titm, ɛtŋ Jesu lisijimɛl am dadʼr ɛsɛ: «Ìgb im Jude yecʼɛtŋ ke ŋ e jam ɛsɛl a yɛji ɛ́kn ów a eke am kok a. Ɛgŋ ekʼam erur eke kʼil nin a, ↄ́tum kokm low es lↄl ɛm. Ɛsɛ elel eke am kok ów amua ab af a, ɛ̀lu sos ↄkm yecʼɛtŋ ke agŋ ɛ́knʼŋ.» Tasi ɛm a, lisijimɛl bↄbↄ yɛji ↄ́nym ↄmn in ɛm. Jesu dad ɛl ninɛ: «Ɛm ecʼes gbɛgbl ɛm a eke mi kʼim a e lɛgŋ tasi ki bɛbmnm ab. Ɔny ecʼa, sɛgŋ a fɛŋ akpl. Ɔny, wus ecʼagŋ kʼↄtum ↄnym ↄny e sifn; gbɛkↄ ɛm, -nʼↄny ɛm e sifn aŋke mi bi dad ɛl eci ów eŋuŋ a eke -li bi kok a ecʼodad. Ɔny, ìmn es gbɛgbl ab ɛm. Ɛm mi kʼowm yɛ aŋke ɛm ecʼa, ow ki bɛbmnm ab.» Eke li dad odad na bake ow uwr a, in gbɛ nʼanŋ Galile.
Jesu im Mɛf ecʼes gbɛgbl ab ɛm
10 Eke lisijimɛl a im es gbɛgbl ab ɛm a, Jesu yɛji im, gbɛkↄ lʼɛlum sos ↄkm ekʼagŋ kʼɛknʼn: ow ɛw es lↄl ɛm. 11 Jwifɛl ecʼes ɛw ɛsɛl a am ↄlʼl es gbɛgbl ab ɛm ɛtŋ am ibrm agŋ ɛsɛ: «Kↄ bogŋ nʼanŋ ee?» 12 Bieku ab ɛm, wɛl am sɛsl ów nↄnↄ in e nuŋ af. Bɛb am dad ɛsɛ: «Lʼel nimamn kok ɛs.» Ɛtŋ likpr am dad ɛsɛ: «Njaŋ, li bʼirmn agŋ.» 13 Gbɛkↄ ɛgŋ kaka ɛ́lum sos ↄkm dadm in ecʼodad aŋke ɛl fɛŋ -nʼam uru Jwifɛl ecʼes ɛw ɛsɛl a.
14 Es gbɛgbl a ok araŋn, ɛtŋ ca Jesu ow ɛy Nyamel gbɛl a e gbugŋ a ɛtŋ am yɛgm agŋ low. 15 Jwifɛl a low iti any ɛtŋ am dad ɛsɛ: «Ɛgŋ na eke wewrm low yɛjʼa, ayaf li bʼↄtu lʼuw ów amua any ee?» 16 Jesu dad ɛl ninɛ: «Low a eke mi bi yɛgm agŋ a ánm ɛm ɛm owm, kↄ Nyam ekʼɛrmʼm a ogŋ ow bʼanŋ ow. 17 Eke ɛgŋ am erur eke ki kok Nyam ecʼerur a, li bʼow lʼuw any eke ɛm e low yɛgm a bʼanŋ Nyam ɛm ow, oglog ɛm obi ɛm. 18 Ɛgŋ eke bi dad in obi e nin ɛm ecʼodad a, bʼↄl in obi ecʼany gbɛl es. Gbɛkↄ ɛgŋ eke am kok juma ↄl ɛgŋ a ekʼɛrmʼn a ecʼany gbɛl es a am dad low nɛnyɛmbri nyam; yadŋ owi kaka anm in ɛm. 19 Kↄ bla ɛtŋ am ↄↄl eke kʼibirʼm ee? Mois ↄↄm ↄny ol a ee? Gbɛkↄ ↄny ɛm ecʼɛgŋ kaka ánm es ol ab af.» 20 Agŋ a dadʼr ninɛ: «Abŋ ŋuŋ anŋʼŋ ɛm tasi, kↄ bwo am ↄl eke kʼibiʼŋ ee?» 21 Jesu dad ɛl ninɛ: «Mɛny ɛwr nyam cɛ mi kok, ɛtŋ kin eke ↄny fɛŋ low a am iti ↄny any! 22 Mois ↄŋ abusu eke wɛl kʼubr agŋ likr es, ɛtŋ ɛgŋn ow e kok e low ebr nɛnɛgŋ e lɛgŋ yɛji. (Ke tasi ɛm a, low na anm Mois ɛm owm, kↄ lagŋɛl krɛkrɛ ab ɛm ow anŋ ow.) 23 Eke wɛl bʼubr ɛgŋ likr es nɛnɛgŋ e lɛgŋ ɛtŋ ow ↄ́nym Mois ecʼol a ocm es, ke sica bla sosiɛm ɛtŋ am ebal ɛrm okrʼm af, ɛgŋ nimum eke mʼewlm nɛnɛgŋ e lɛgŋ ab ee? 24 Ɛ̀wr ↄny e sos af e jɛj ok ab es, kↄ jɛ̀jr okr low nɛnyɛmbri nyam ɛm.»
Kↄ Jesu Mesi ee?
25 Agŋ a ekʼir Jerusalɛm a eci bɛb am dad ɛsɛ: «Kↄ ow elm ɛgŋ a eke wɛl am ↄl eke kʼibi ab ana ee? 26 Ɛ̀kan, nʼam dad odad dedeku ecʼany af ɛtŋ wɛl ↄbm kpu yɛji ↄↄmʼn! Kↄ ɛy ecʼes ɛwɛl a kʼuw any ɛgŋ eb tasi eke lʼel Mesi ab ee? 27 Gbɛkↄ lɛgŋ a eke Mesi a bʼow ow a, ɛgŋ kaka kʼow uwm yogŋ eke li bʼow nʼanŋ lʼow ab any, kↄ ɛgŋ na ecʼa, sʼuw yogŋ eke nʼanŋ lʼow ab any.» 28 Jesu ekʼanŋ Nyamel gbɛl a e gbugŋ a am yɛgm agŋ low a, igbl lebl ogŋ dad ninɛ: «Uwr ɛgŋ a tasi eke mʼel ab any, ɛtŋ uwr yogŋ eke mʼanŋ mʼow ab any ee? Ow elm ɛm obi ɛm mʼowm, kↄ ɛgŋ a ekʼɛrmʼm a el nɛnyɛmbri nyam ɛs, kↄ uwmn in any. 29 Ɛm, mʼuwʼr any aŋke in ogŋ mʼanŋ mʼow ɛtŋ in lʼɛrmʼm yɛji.» 30 Ow sosiɛm, -nʼam ↄl eke -li kʼↄny Jesu, kↄ ɛgŋ ↄtum ↄnymʼn, aŋke in e wanci a ki bɛbmnm ab. 31 Gbɛkↄ dedeku ab ɛm, agŋ nↄnↄ ubʼr nawrɛ ɛtŋ am dad ɛsɛ: «Lɛgŋ a eke Mesi a bʼow ow a, kↄ li bʼow li kok mɛny ɛwr lʼakm ɛgŋ na ecʼab ee?»
Wɛl ɛrm usu ↄsu ɛsɛl ow Jesu ecʼↄny ɛm
32  Farisiɛl a iri Jesu e lís ecʼów eke bieku ab ɛm wɛl am dad ów sɛsl ɛm. Ow sosiɛm, egb waw ɛsɛl ɛgbɛl a lele Farisiɛl ab ab ɛrm usu ↄsu ɛsɛl eke kʼim ↄnyʼn. 33 Jesu dad ninɛ: «Ɛmɛny mʼanŋ ↄny ab lɛgŋ tɛl eci gbuŋ ke mʼɛ́wl mʼim ɛgŋ a ekʼɛrmʼm a ogŋ. 34 Bʼow ↄↄlʼm ɛtŋ kʼow ɛŋnmnʼm, aŋke kʼow ↄtumn iimn yogŋ a eke mʼow mʼanŋ a.» 35 Jwifɛl a am ibrmn ɛl sosi ɛsɛ: «Kↄ bogŋ li bʼow nʼim ɛtŋ si kʼow sʼↄtum sʼɛŋnmʼn ee? Kↄ tutr nʼↄny eke li kʼim Jwifɛl a eke mↄmun es agŋ a ekʼelm Jwifɛl a ogŋ ee? Lʼerur eke li kʼim li yɛgm agŋ ekʼelm Jwifɛl a low ee? 36 Sodad amua eke li dad: “Bʼow ↄↄlʼm ɛtŋ kʼow ɛŋnmnʼm, kʼow ↄtumn iimn yogŋ a eke mʼow mʼanŋ a” e nyandrɛ el bogŋ ecʼee?»
Mij ewl mij
37 Es gbɛgbl a e lɛgŋ es abal el a, el es gbɛgbl a eci lɛgŋ ligbɛl. Ow e lɛgŋ a, Jesu igb inym es ɛtŋ igbl lebl ogŋ dad ninɛ: «Eke ɛgŋ mij amn am ↄny, lʼów ɛm ogŋ ke lʼɛ́gŋ mij. 38 Ɛgŋ eke bʼow ubʼm nawrɛ a, mij ewl mij bʼow ewlʼl ɛrm ɛm ok ↄkm ɛsɛ elel eke Nyam Lɛl dad ab af.» 39 Jesu am dad ɛbɛn yɛgm Abŋ Lala a eke agŋ a ekʼↄny ↄmn in ɛm a kʼɛŋn a ecʼodad. Tasi ɛm a, lɛgŋ ab ɛm, wɛl kʼɛ́ŋnm Abŋ Lala aŋke Jesu kʼɛym anygbɛl ɛm.
Dedeku a ubr ɛm Jesu sosiɛm
40 Sica eke dedeku ab ɛm ecʼagŋ iri sodad amua a, nyam nyam am dad ɛsɛ: «Ɛgŋ na Kokoba ↄb ɛs a tasi ana!» 41 Bɛb am dad ɛsɛ: «Mesi ab ana!» Ɛtŋ likpr am dad ɛsɛ: «Kↄ Mesi a gbɛ ↄtu eke kʼanŋ Galile ow ee? 42 Kↄ Nyam Lɛl dadm eke Mesi a bʼow el David e bosu ɛm ecʼɛgŋ eke bʼow anŋ Bɛtlehɛm, David e baŋn a ow ee?» 43 Jesu sosiɛm dedeku a ubr ɛm. 44 Agŋ nyam nyam erur eke wɛl kʼↄnyʼn, gbɛkↄ ɛgŋ kaka ɛwmʼn abu af.
Jwifɛl eci nawrɛ ubm
45 Usu ↄsu ɛsɛl a ɛwl mɛny im egb waw ɛsɛl ɛgbɛl a lele Farisiɛl ab ab ogŋ, ɛtŋ wɛl am ibrm ɛl ɛsɛ: «Kↄ bla sosiɛm ɛtŋ ocmn Jesu ab owmn ee?» 46 Usu ↄsu ɛsɛl a dad ninɛ: «Lɛgŋ kaka ɛgŋ dadm odad ɛsɛ in ecʼab af!» 47 Farisiɛl a am ibrm ɛl ɛsɛ: «Ɔny yɛji, yɛbr lʼɛju ↄny ee? 48 Kↄ es ɛw ɛsɛl ab ɛm ecʼɛgŋ nyam oglog Farisiɛl ɛm ecʼɛgŋ nyam ubʼr nawrɛ ee? 49 Dedeku a ekʼubʼr nawrɛ a uwm ol ab any, -lʼel agŋ eke wɛl ofn!» 50 Nikodɛm eke lɛgŋ ekʼɛc ab ɛm im ɛkn Jesu a, el Farisiɛl ab ɛm ecʼɛgŋ ekʼanŋ low ab ɛm. Nʼam dad wɛl lʼɛsɛ: 51 «Kↄ ɛy ecʼol a bʼↄb ɛgŋ low eke wɛl irimʼn nɛnym oglog wɛl uwm low a eke li kok ab any ee?» 52 -Li dad ow ninɛ: «Ŋ yɛji, kↄ Galile iy el ee? Àpl Nyam e Silɛl ab ɛm bʼow ɛkn eke lɛgŋ kaka kokoba ↄb ɛs ánm Galile owm.» [ 53 Ɛtŋ ɛgŋ ɛgŋ eb ejagb im gbugŋ.]
7:2 Es gbɛgbl na ɛm, wɛl bʼɛlu Nyam bia egb eke wɛl ub a eci lele Nyam ecʼɛrm mamn a ekʼↄnyn Israɛl eke -nʼanŋn loj a (Ob Ap 23.33-43; Ol Ɔkn 16.13-15; Zakari 14.16-19). Low na ecʼↄkn ɛm a, sɛgŋ lↄbŋ eke es gbɛgbl a bʼow ij a, agŋ bʼanŋ mɛf ew ɛsɛ elel eke ɛl ɛsɛl kok loj ab af. 7:7 Bɛ̀bmn Jan 15.19. 7:8 Mi kʼowm yɛ:Jan eci silɛl esig oglog ɛm a mi kʼow mʼowm. 7:15 Jwifɛl ecʼa, low yɛgm ɛs bʼɛŋn in ecʼabusu low yɛgm agŋ ɛs a eke yɛgmʼn low a ogŋ; ɛgŋ eke lɛgŋ kaka wɛl yɛgam low a, ↄnym abusu eke ki yɛgm agŋ ɛjeci low. 7:21 Jan 5.1-8. 7:22 Jesu am yɛgm ɛl eke nɛnɛgŋ e lɛgŋ a, ɛl yɛji -li bi kok ewlm owi. Ol a ibrm eke iy eke wɛl ew ow ij sɛgŋ niwn a, wɛl úbrʼr likr es. Ɛtŋ ɛmɛny ol a ibrm eke nɛnɛgŋ e lɛgŋ a, wɛl ki kokm juma. Eke likr es ubr eci sɛgŋ niwn a ɛy nɛnɛgŋ e lɛgŋ af a, wɛl kʼↄtum ɛluam sol a yony mum ij! Bla lowi wɛl ↄtu eke ki kok ee? Jwifɛl ogŋ a, ol yecʼeke wɛl bʼikŋ anym ɛw a bʼↄny any. Eke likr es ubr owi ↄb nuŋ Abraham ɛm ɛtŋ a (Nuŋ Ɔb 17.10-13), nʼↄny any lʼakm Mois ecʼol a ekʼam ɛdŋn nɛnɛgŋ e juma kok a (Ɔkm Ok 20.8-10). Ow it ke wɛl úbr etuey eke wɛl ew ow kok sɛgŋ niwn a likr es (Ob Ap 12.3), eke ow ɛy nɛnɛgŋ bↄbↄ yɛji. 7:23 Jwifɛl ogŋ a, eke iy ubr likr es, ke ow el ewlm mum; Nyam ecʼany af lʼuw es inym ŋ̂. 7:27 Jwifɛl bɛb bi tutr eke Mesi a bʼow ɛy ↄkm kpru ɛm eke ɛgŋ kʼow ↄtum uwm yogŋ eke li bʼow nʼanŋ lʼow ab any. 7:37 Mɛf ecʼes gbɛgbl e lɛgŋ a, ów ɛgbɛl anŋ eke wɛl bi kok mij ab. Ow ↄny nyandrɛ nyahan: krɛkrɛ ɛm a, ow bʼↄkn loj ɛm eci mij eke Nyam ↄŋ ɛl (Ɔkm Ok 17.1-7; Awl 20.8-13); yony ɛm a, ow bʼibrm Nyam eke kʼan (Zakari 14.16-17); ɛtŋ nyahan ɛm a, ow bʼↄkn Abŋ Lala eke kʼow Mesi a e lɛgŋ a (Zakari 13.1; Esayi 44.3). Eke agŋ a fɛŋ am ɛkn mij ecʼob mamn ekʼel a, Jesu am dad eke in el mij ewl mij tasi, ɛtŋ in anŋ kokoba ↄb ɛsɛl ecʼɛwar owi a fɛŋ ɛm. 7:49 Farisiɛl bʼifn dedeku a aŋke -li wewrmn ol. -Li bi tutr eke ɛgŋ ekʼuwm ol e low any a kʼↄtum kokm low kaka fɛŋ, ɛtŋ wɛʼn kʼↄtum in ɛŋnm Nyam ecʼↄwrↄ. -Li bʼɛsŋ wɛl sikpl ɛsɛl. 7:52 Tasi ɛm a, kokoba ↄb ɛsɛl ɛsɛ Jonas af, ɛsɛ Nahum af el Galile ecʼagŋ. Jwifɛl ecʼes ɛwɛl a am dad ɛbɛn aŋke -li bʼifn Galile ecʼagŋ a. 7:53 Jan eci silɛl esig tasi ab ɛm a, wɛl ɛ́ŋnm Jan 7.53–8.11a.