15
Sʼébr Krist e sɛwl a
1 Sica, ɛy a eke sʼij lɛc ↄmn ɛm a, ow it eke si kʼɛgŋ ɛl a ekʼↄnym lɛc na a ecʼelel eke bʼɛkan ów a sʼéb, ke si kʼↄ́lmn ɛy e low eke si bʼerur a cɛ es.
2 Ow it eke ɛy ɛm ecʼɛgŋ fɛŋ ki kok low eke bʼakpl lawl sos ɛm in e low nimamn eci, ke ow ɛ́lum ɛy abu sʼokr af sʼimn anym eci ↄmn ɛm.
3 Krist ↄlm low eke lʼerur ab es. Kↄ ɛsɛ elel eke wɛl nↄn Nyam Lɛl ɛm a: Wɛwr a eke wɛl wɛwrʼŋ a ɛwl mɛny okʼm af.
4 Tasi ɛm a, lɛgŋ sig ɛm e Nyam e Silɛl a fɛŋ eke wɛl nↄn a, el ɛy e low yɛgm eci. -Lʼit eke -li kʼↄŋ ɛy ɛrm susu lele sos es atr ab, yecʼɛtŋ ke sʼↄ́ny low ↄmn.
5 Ke Nyam ekʼin ɛm ɛrm susu lele sos es atr ab anŋ a, ↄ́ŋ ↄny ↄtur ↄny ↄfr ɛm a iir ɛb nɛny af okr ɛm, ɛsɛ elel eke Jesu Krist yɛgm ↄny sɛwl ab af.
6 Ɛtŋ ɛrm nyam ɛm lele lebl nyam ɛm ab, bʼow ↄtur kↄklmn Nyam ɛy Ɛs Kↄtↄkↄ Jesu Krist ecʼƐs ecʼanygbɛl a.
7 Ow sosiɛm a, ɛ̀gŋn ebarir ↄny ↄfr, ɛsɛ elel eke Krist eb ↄny Nyam ecʼanygbɛl a ecʼab af.
8 Mʼam dad ↄny, Nyam ij nɛny nyam. Ow sosiɛm Krist ow el Jwifɛl e juma kok ɛs, yecʼɛtŋ ke ów a eke Nyam ɛwar ɛy lagŋɛl a, li kók ow iy nɛny.
9 Ɛtŋ agŋ a ekʼelm Jwifɛl a am kↄklm Nyam ecʼanygbɛl a, in e sↄrŋ ikŋ a sosiɛm. Tasi ɛm a, Nyam e Silɛl ab ɛm wɛl nↄn:
Na sosiɛm, mi bʼow mi kↄklmʼŋ ɛbr ɛbr fɛŋ ecʼaraŋn
ɛtŋ mi bʼow mʼɛgŋ ŋ e nin a ecʼɛj.
10 Ɛtŋ ɛmɛny Nyam e Silɛl a dad ninɛ:
Ɛb ɛb ecʼagŋ, kòkr sos ɛm iŋn Nyam ecʼagŋ ab ab.
11 Ɛb ɛb a fɛŋ ecʼagŋ, kↄklmn Ɛs Kↄtↄkↄ!
Ke agŋ a fɛŋ kↄ́klmʼn!
12 Ɛtŋ Esayi yɛji dad ninɛ:
Jese eci bosu ɛm ecʼɛgŋ nyam bʼow ow.
Li bʼow lʼigb lʼɛw ɛbr ɛbr ab es,
ɛtŋ ɛbr ɛbr a bʼow oc ɛl eci low ↄmn a ɛwʼr af.
13 Ke Nyam eke bʼↄŋ agŋ low ↄmn a yíbr ↄny ɛrm es ɛy lele sos ɛm iŋn ab, ↄny ecʼↄmn a sosiɛm. Ɛbɛn ke ow ↄ́ŋ low ↄmn iy ↄny ɛm Abŋ Lala e lɛc ab ɛm.
Low nuŋ af eke Pↄl am awŋ lɛl a
14 Agŋ lisijimɛl, ɛm obi ɛm a, mʼuw any tasi eke ↄny, ↄnyn low erur tasi ↄny obi ɛm, uwr ów nↄnↄ any ɛtŋ ↄtur eke kʼↄmnin ów ↄny ↄfr ɛm.
15 Gbɛkↄ lɛl na e susu bɛb ɛm a, mʼↄtu mi dad ɛrm susu ɛm ów bɛb ekʼit eke mi ki kↄkn ↄny a. Mi kok ɛbɛn, aŋke Nyam, in ecʼɛrm mamn ab ɛm
16 ɛwʼm Jesu Krist e juma kok ɛs, agŋ a ekʼelm Jwifɛl a eci. Lʼoc lʼɛwʼm saw eke mi kʼↄb Nyam ecʼAmani Mamn a e kokoba, yecʼɛtŋ ke agŋ a ekʼelm Jwifɛl a él egb waw ekʼapkl Nyam sos ɛm, ɛtŋ Abŋ Lala anake bi kok ke ob ap na bʼel Nyam ecʼa.
17 Na sosiɛm, eke mʼokr af Jesu Krist ab a, ntotŋ ↄtu eke kʼokʼm, juma a eke mi kok mʼↄŋ Nyam a eci.
18 Tasi ɛm a, eke ɛrm susu ɛm mʼↄtu mi dad low nyam, ke ow el yecʼa cɛ eke Krist ɛcr ɛm ɛm kok a. Lʼɛcr ɛm ɛm, nʼↄŋ agŋ a fɛŋ ekʼelm Jwifɛl a ↄny Nyam ecʼɛlum. Li kok low na sodad ebl ɛm lele ów kok ɛm ab,
19 li yɛgm in e lɛc a simɛny ɛwr ɛm lele ów any iti owi ɛm ab, Nyam ecʼAbŋ a e lɛc ab ab. Ɛtŋ ow igŋ Jerusalɛm im toŋ ok Iliri e wus ab af, mi cɛcr Krist ecʼAmani Mamn ab es nimum.
20 Gbɛkↄ mʼerur eke mi ki cɛcr Amani Mamn ab es susu a cɛ eke agŋ kʼuwm Krist any a. Mi kok ɛbɛn eke mi kʼúsm êl ɛgŋ ɛjeci ecʼêl lebn eke ɛlu nↄmu ɛm ab af.
21 Mi kok ɛsɛ elel eke wɛl nↄn Nyam Lɛl ɛm ab af:
Agŋ a eke wɛl ↄbm in ecʼamani a okm a bʼow ɛknʼn,
ɛtŋ agŋ ekʼirim in e lís owi kaka a bʼow iri.
Pↄl erur eke kʼim ɛkn Rom e Nyamel a
22 Sica susu nↄnↄ eke mʼim mʼↄb Nyam e kokoba a, el low a eke sɛgŋ fɛŋ ↄ́ↄm im abusu eke mi kʼow ↄny ogŋ a.
23 Caca ɛm a, mʼuwar ɛm e juma ogog aŋa. Ɛtŋ eke akpo nↄnↄ ɛm mʼerur eke mi kʼow ↄny ogŋ a,
24 ɛm eci Ɛspany wus af eci ɛc im ɛm a, mi bʼow mʼow yogŋ. Ɛɛ, mʼↄny ↄmn eke mi kʼɛkn ↄny, ɛm e yogŋ eci ɛc im ɛm a, ɛtŋ mʼam ↄmn ↄny ecʼabu eke kʼɛlumnʼm ke mʼim a. Kaka fɛŋ yɛji, mʼerur eke mi kʼanŋ ↄny ab sɛgŋ bɛb.
25 Gbɛkↄ caca ɛm a, mʼaam Jerusalɛm, Nyam ecʼagŋ a ekʼanŋ yogŋ a ecʼabu ɛlum eci.
26 Tasi ɛm a, Maseduan lel Akayi ab eci ↄmn ɛsɛl a bɛbm eke kʼↄkl os ↄ́ŋ Jerusalɛm e Nyamel ab ɛm ecʼↄgbↄru ekʼanŋ a.
27 -Li bɛbm eke -li kʼɛlum wɛl abu, gbɛkↄ nawrɛ ɛm a, ow el labm ekʼanŋ ɛl af. Maseduan lel Akayi ab eci ↄmn ɛsɛl a elm Jwifɛl, gbɛkↄ, -nʼɛŋn Jerusalɛm e Jwifɛl eke bʼus Krist jam a ecʼabu ɛm, ob ↄny a ekʼel Nyam ecʼa. Sica ɛl yɛji, ow akpl eke ɛl e wus af aŋa ecʼob eke -nʼↄnyn a, -li ki cɛc wɛl ab.
28 Mi bʼoc os a eke -lʼↄkal a mʼɛlu Jerusalɛm e Nyamel ecʼagŋ a abu ɛm a, sica ow e jam a, mi bʼow mʼim Ɛspany a, mi bʼow mʼɛcr ↄny ogŋ a.
29 Ɛtŋ mʼuw any eke lɛgŋ a eke mi bʼow mʼow ↄny ogŋ a, mi bʼow mʼow lele Krist ecʼↄwrↄ a nimum ab.
30 Gbɛkↄ agŋ lisijimɛl, kin yecʼeke mʼam ibrm ↄny a, ɛy Ɛs Kↄtↄkↄ Jesu Krist sosiɛm lele Abŋ Lala ecʼerur a eke bʼↄŋ ɛy ab ab sosiɛm: dògŋnin ɛm ab Nyam eke bʼow ŋↄŋan ↄŋnʼm ab ɛm.
31 Ŋↄŋan, yecʼɛtŋ ke mi kʼɛ́ym Jude wus ab af ecʼagŋ a eke úbm Krist nawrɛ a ecʼabu ɛm. Ŋↄŋan, yecʼɛtŋ ke Nyam ecʼagŋ a ɛ́gŋ abu ɛlum a eke mʼam oc mʼim Jerusalɛm a eb,
32 ow ↄ́ŋ ke mʼↄ́tu mʼow ↄny ogŋ yogŋ sos ɛm iŋn ɛm, ɛtŋ eke Nyam erur, ke mʼↄ́tu mʼeb sel bɛb ↄny ab.
33 Ke ɛrm es ɛy e Nyam a ánŋ ↄny fɛŋ ab! Amɛn!