11
Yawe Irintsum Garam Gar Nifu-Nan Gan Imingꞌ Babel
Miamun ugu da garam intap santan ini nifu-nan bitsintaꞌ angu. Garam igi santan intsung impai iyung imingꞌ gubuꞌ yaban da iwaꞌ intap bump tsiraꞌ bingan mingꞌa intap Sinar (nida Babilonia gin) da sib angu impruꞌ ruan impa nigi. Da ribarangan ini da ruan, “Ariꞌ! Wauriꞌ da agi nau intap gur da natip brik gin da natai i dzaf i babampafan.” Ribarangan inang ibinigi da iwaꞌ da brik i rafa ungar gin, da iyu kolta i amitsa brik mpruꞌan da ruan. Da itip ini da ruan ini binaꞌ, “Ariꞌ! Wasiri wampruꞌ ruam waba, da agi naraf gampangꞌ tsiraꞌ mangan da narim ungar guntiꞌ bingan angu, gudzun waꞌa gunungun, i nanga runggangꞌ binganggangꞌ muntida piapan da anungꞌ dzarangan da mpada sangꞌa intap bafadan u.”
Da bitsintaꞌ Yawe iruꞌ ba i tsanganda gamp tsiraꞌ da ungar guntiꞌ garam gar rungꞌ rima yaban igi. Da Yawe ini, “Aitsangan! Bida garam ani garam utup bitsintaꞌ da nifu-nan bitsintaꞌ da nanga nam bida ani, da nam mangan wasangꞌ i barabindan da ribarangan u, imaꞌ. Da pas angu da bungꞌ anang nam mara maran i gan maranggan furan. Ariꞌ. Agi ruꞌan da rintsuma ribarangan nifu-nan gan da ribarangan anungꞌ sruꞌa i runifu nan gan u.” Ibinigi da Yawe irintsum ribarangan i nifu-nan bitsintaꞌ nidan, da inang ribarangan idzarang ifan isangꞌ intap da intap da wantsup gamp tsiraꞌ riman ugu sib u. I wain igi da garam ifaringꞌ gamp igi binganggan Babel (ma Babilon), da wainggan ibi rintsuman, i Yawe irintsum garam gar igi nifu-nan gan da ibrang ribarangan imingꞌ nigi da idzarang impa isangꞌ intap santan.
Sem Utupan Nan Gan Ragidan
10 Sem narun rusan binganggan da nan gan ntuangan.
Udzuf iruꞌ aru mingꞌa bampan i mpui tsiraꞌ riꞌan ugu, da Sem udzufan iwaꞌ 100 da irim narunggan Arfaksat. 11 Arfaksat waꞌa sib, da Sem itip impa udzuf 500, da irim narun rusan marub da finam fain. 12 Arfaksat udzufan iwaꞌ 35 da irim narunggan Sela. 13 Sela waꞌa sib, da Arfaksat itip impa udzuf 403, da irim narun rusan marub da finam fain. 14 Sela udzufan iwaꞌ 30 da irim narunggan Eber. 15 Eber waꞌa sib, da Sela itip impa udzuf 403, da irim narun rusan marub da finam fain. 16 Eber udzufan iwaꞌ 34 da irim narunggan Pelek. 17 Pelek waꞌa sib, da Eber itip impa udzuf 430, da irim narun rusan marub da finam fain. 18 Pelek udzufan iwaꞌ 30 da irim narunggan Reu. 19 Reu waꞌa sib, da Pelek itip impa udzuf 209, da irim narun rusan marub da finam fain. 20 Reu udzufan iwaꞌ 32 da irim narunggan Seruk. 21 Seruk waꞌa sib, da Reu itip impa udzuf 207, da irim narun rusan marub da finam fain. 22 Seruk udzufan iwaꞌ 30 da irim narunggan Nahor. 23 Nahor waꞌa sib, da Seruk itip impa udzuf 200, da irim narun rusan marub da finam fain. 24 Nahor udzufan iwaꞌ 29 da irim narunggan Tera. 25 Tera waꞌa sib, da Nahor itip impa udzuf 119, da irim narun rusan marub da finam fain. 26 Tera udzufan iwaꞌ 70 da irim narunggan Abram da Nahor da Haran.
Tera Yanginggan Nan Gan Ragidan
27-29 Nan ani intuang Tera utupan nan gan.
Tera isu Abram da Nahor da Haran ramanggan. Da Haran irim narunggan marub Lot da narun rusan finam iruꞌ, Milka da Iska. Gubuꞌ Tera rungꞌ mpadan da narunggan Haran imamp imingꞌ Ur, gan gampan wain mingꞌa Kaldia ugu. Nahor iyu Haran narunggan finam Milka isu i gan fininggan, da Abram iyu Sarai. 30 Da Sarai igi sagat yami da warim narun u. 31 Tera iyu narunggan Abram da rumpunggan Lot, Haran narunggan, da bunggan Sarai, Abram fininggan, da itangin gamp Ur mingꞌa Kaldia rai da intsungꞌ i fada Kanan. Da bitsintaꞌ gubuꞌ ribarangan yunga fawaꞌa Haran da ribarangan impai nigi. 32 Tera impa udzufan iwaꞌ 205 da arangan imamp imingꞌ Haran.