☰ Miamun 32
32
Yakop Itip Runggan i Waꞌan da Isau
1 Yakop ibinigi irut utupan yuriꞌ da imingꞌ sanaban ifan da Anutu angira gan utup mangan iwaꞌ da arangan imingꞌ sanab igi. 2 Yakop itsanga da ini, “Mumai aruani isu Anutu gampan singaari.” Ibinigi da Yakop ifaringꞌ i binganggan Mahanaim, wainggan ibiani gamp singaari iruꞌrun. 3 Gubuꞌ arigi da Yakop rainggan Isau impa imingꞌ intap Seir, bingan mangan Idom. Yakop itangin garaman uda sisingꞌ imungꞌ ifan da arangan rainggan Isau. 4 Yakop ini da garam uda sisingꞌ i uda arangan nifunggan fadan da nidan da Isau bida ani, “Garam tsiraꞌ Isau, gam garam gumam Yakop itangin nan bida ani, ‘Dzi rut gayangꞌ Laban impai iba isangꞌ bawaꞌan da aruani. 5 Dzi sangꞌ i makau, dongki, dumpa da nuning, garam gum da sagat gum. Aruani da dzi tangin nan ibiaꞌ da dzi garam tsiraꞌ gangꞌ agu da dzi gaib runggangꞌ da agu i u maram arida i dzi.’ ”
6 Da gubuꞌ garam rima sisingꞌ tipa bawaꞌan da Yakop da ini binaꞌ, “Aga yu sisingꞌ ifan da u rainggam Isau da aruani da arangan imingꞌ sanab iba i tsanganda agu, da garam 400 irut arangan iba.”
7 Yakop iringant i nan igi da irat nidzun angu da wangun ibarabin da maran ifur nan iyus. Ibinigi da arangan itsaf gan garaman santan ruta arangan badan ugu isu utup iruꞌrun da itsaf dumpa da nuning, makau da kamir isangꞌ utup iruꞌrun ibinigi. 8 Arangan maran ifur ibiani, “Bida Isau badan da ruta utup mangan isa ruan da wangidan da utup mangan isangꞌ runtan.”
9 Da Yakop yugin ibiani, “O dzi rumpunggangꞌ Abraham da ramanggangꞌ Isak Anutu gan. O Yawe, agu ni da dzi ibiani, ‘Watip wafa gampam wain da gam utupam, da dzi bungꞌ ampa tayangꞌ agu da nanang u nanggam mpadan nawaꞌ ngarubini angu.’ 10 U garam gumam dzi ani wadaum i u nanggam maram aridan da mpada tayangꞌ dzi da gubuꞌ santan. Gubuꞌ aru dzi isa mpui Yordan ani udziꞌ ugu da dzi ba bangi sasaꞌ— dzi gif itipangꞌ angu. Da bitsintaꞌ aruani dzi tip iba impruꞌ da utupangꞌ iruꞌrun. 11 O Yawe, warim dzi sib i dzi rat i dzi rainggangꞌ Isau bungꞌ aba da nais dzi nampruꞌ da sagat da mamaꞌ narun santan. 12 Da bitsintaꞌ u ni da dzi sib ibiani, ‘Dzi bungꞌ ampa tayangꞌ agu da nanang u nanggam mpadan nawaꞌ ngarubini angu, da nautus u yangin rusam nayus nasangꞌ sasanuai mingꞌa uruts ringan, da garam gar mangan wasangꞌ i farisan fantsupa sib u.’ ”
13 Gingꞌa arigi da idziang, da pisan da arangan irants nam riman da rainggan Isau: 14 nuning rinan 200 da nuning arapuꞌ 20, dumpa rinan 200 da dumpa arapuꞌ 20, 15 kamir rinan 30 ruta narun ruas, makau rinan 40 da makau arapuꞌ 10, dongki rinan 20 da dongki arapuꞌ 10. 16 Arangan itangin garam guman imunti isangꞌ apu gan utup utup igi santan i mungꞌa gin da ini binaꞌ, “Agam wayu apu ani da wamungꞌ wafa i dzi da wayung da watangin taptap i ruam.” 17 Yakop isantingꞌ nan da garam guman mungꞌa miamun ibiani, “Gubuꞌ dzi rainggangꞌ Isau bawaꞌan da agu da guta i agu, ‘Manga garam guman agu, da agu fa anungꞌ, da manga apu gan ani?’ 18 Da wani wabiani, ‘Yakop, u garam gumam, apu gan sib ani. Da itangin iba da agu, dzi garamangꞌ tsiraꞌ Isau, i suda u nanggam. Da arangan rungꞌ iyung imingꞌ bampan i agai.’ ” 19 Da rungꞌ ini nan ibinigi da garam gum atsungꞌa ba da mingꞌa wasaꞌ ibinigi angu ifan isangꞌ garam gum santan, “Agam wani nan bitsintaꞌ aru dzi nidan da agam igi da gubuꞌ agam waꞌan da arangan. 20 Da wani nan wasi rutin nabiani, ‘U garam gumam Yakop rungꞌ imingꞌ bampan iba i agai.’ ” I arangan maran ifur ibiani, “Bida dzi tanginda nam ani mungꞌan da dzi bungꞌ arasu arangan wangu tsakia gan mungꞌ ugu. Da gubuꞌ arangan bawaꞌan da dzi da maran bungꞌ asamu wangu tsakia gan igi, da nugun bungꞌ anuf i dzi da nau dzi nayab.” 21 Ibinigi da Yakop itangin apu rima suda Isau gan ugu imungꞌ ifan. Da idziang arigi da arangan rungꞌ igingꞌ mumai igi.
Yakop da Anutu Idabir i Ruan
22 Idziang arigi da Yakop yuriꞌ da iyu finin rusan iruꞌ da sagat guman iruꞌ igi impruꞌ da narun rusan marub 11 da yis mpui Dzabok udziꞌ ifa marafain. 23 Arangan itangin rib igi ifa sib marafain da itip iba da ini da garam gum i uda nam bunump santan fada marafain mpruꞌan. 24 Yakop runtaꞌ rungꞌ impai nigi da garam mangan iwaꞌ rutin, da irut impung ruan da idabir i ruan i ruaꞌa ruꞌan isangꞌ gubuꞌ pisan. 25 Garam igi itsangan i arangan wasangꞌ i dabira i Yakop da yis Yakop ngump marafain da igruꞌ ruan. 26 Da garam igi ini da Yakop, “Watangin dzi da dzi nafan. Gubuꞌ inang i pisan.”
Da bitsintaꞌ Yakop idudunting i arangan da irim udzungꞌ da arangan ini binaꞌ, “Wasangꞌ u! Bida u fintida dzi sib da dzi bungꞌ atangin bangingꞌ rai i agu da wafan.”
27 Ibinigi da garam igi igut i arangan ini binaꞌ, “U binganggam wai?”
Da arangan ini binaꞌ, “Dzi binganggangꞌ Yakop.”
28 Da garam igi ini binaꞌ, “Wasangꞌ i rung faringꞌa u binganggam Yakop u. I u su gudzu uris da Anutu da garam gar impruꞌ. Da u yus. Ibinigi da aruani da bungꞌ afaringꞌ agu binganggam nabi Israil (wainggan ibiani isu gudzu uris da Anutu).”
29 Da Yakop igutin, “Da isangꞌ i u nida binganggam wasi da dzi?”
Da bitsintaꞌ garam igi ini binaꞌ, “Wain idzuwai da u gut i dzi i dzi binganggangꞌ?” Da ifinti Yakop i nigi.
30 Ibinigi da Yakop ifaringꞌ gamp arigi binganggan Penuel (wainggan ibiani Anutu maranggan) da ini, “Dzi tsangan Anutu maran i mara nidzunggangꞌ rururungan, da dzi rungꞌ impa marataꞌ.” 31 Gubuꞌ iyab iba da Yakop itangin Penuel rai da intsungꞌ i fagan ifan, i wain iruꞌ arangan ngump marafain igruꞌ ruan. 32 Ibinigi da gubuꞌ aruani da garam Israil anungꞌ iga apu far mingꞌa ngump u, i wain iruꞌ arangan yis Yakop far mingꞌa ngump ugruꞌ.
☰