42
Yosef Rain Rusan Iba Idzip
Gubuꞌ Yakop ringanta i nan bida wit mingꞌa Idzip, da ini da narun rusan ibiani, “Amaꞌ! Agam ibumpa irarab rumaram ibinigi? Dzi ringant i nan i wit imingꞌ Idzip. Agam waruꞌ da wayu agi gangꞌ fain, i agi mamamp i mangits i.”
Ibinigi da Yosef rain rusan 10 iruꞌ i uda wit mingꞌa Idzip. Da bitsintaꞌ Yakop watangin Benyamin, Yosef rainggan isiꞌ igi, warut rain ruas fain igi ifan u. Irat i Benyamin mawaꞌ da barabin. Ibinigi da Israil narun rusan irut ampan fain ruꞌa Idzip i uda wit impruꞌ ruan ifan, i gubuꞌ tsiraꞌ nam gadan maꞌan iwaꞌ intap Kanan ibinigi.
Gubuꞌ Yosef suda garam gudzun tsiraꞌ mingꞌa Idzip da isu wain i rima wit da ampan santan barima nam ntsuman gin. Da rain rusan ibawaꞌ da yidzaꞌ fagan da itauf maran iruꞌ intap imingꞌ arangan maran. Gubuꞌ aru Yosef tsanganda rain rusan da ifaringꞌ ribarangan sib, da bitsintaꞌ irib inang runggan ibi garam mangan da ini nan nampang da ribarangan da igutin ini binaꞌ, “Agam imingꞌ anungꞌ iba?”
Da ribarangan ini, “Aga mingꞌ intap Kanan iba i uda nam gadan.”
Yosef ifaringꞌ rain rusan sib, da rain rusan wafaringꞌ arangan u. Da Yosef maran ifur gan nanggan puafuban mungꞌ tsanganda rain rusan idzaꞌa fagan rutin ugu, da ini binaꞌ, “Agam garam bada i rima ipiap i agai igi da tsanganda aga gampangꞌ da sruꞌagin i ba-isa agai.”
10 Da ribarangan ini binaꞌ, “Garam tsiraꞌ, imaꞌ. U garam gumam agai iba i suba nam i nam gadan. 11 Aga santan ani ramanggangꞌ bitsintaꞌ angu. U garam gumam agai ani garam nan nidzun; aga anungꞌ garam rima ipiap u.”
12 Da Yosef ini, “Imaꞌ. Agam iba i tsanganda aga gampangꞌ i bida anungꞌ da agam ba-isa agai.”
13 Da ribarangan ini, “O garam tsiraꞌ, imaꞌ. Aga 12, aga ramanggangꞌ bitsintaꞌ, da aga 10 angu iba i uda nam gadan da aga ramanggangꞌ irut aga rainggangꞌ isiꞌ impa mungꞌ, da aga rainggangꞌ mangan itangin aga rai.”
14 Yosef rurim udzungꞌ da ini, “Imaꞌ. Nan ibi aru dzi nidan da agam. Agam garam rima ipiap i agai. 15 Da dzi bungꞌ aintsaꞌ agam nan gam nabiani: dzi ni nan nidzun da agam i Farau nampanggan, agam wasangꞌ i fadan bida agam rainggam isiꞌ igi mamida i badan. 16 Agam watangin agamam bits nafan da nau agam rainggam isiꞌ igi naba. Da agam santan bungꞌ ampa karabus. Da aga natsangan agam nan gam nidan igi bida nan nidzun ma imaꞌ. Bida maꞌan da dzi ni nan nidzun da agam i King Farau nampanggan, agam garam rima ipiap i agai.” 17 Da irim ribarangan i karabus isangꞌ gubuꞌ iruꞌ da bits.
18 Waꞌa gubuꞌ iruꞌ da bits, da Yosef ini da ribarangan ibiani, “Dzi garam rata i Anutu, ibinigi da dzi wasangꞌ isa agam funub bida agam nanga nam bida dzi nidan. 19 Bida agam garam nan nidzun da watangin rainggam bits nampa karabus namingꞌ ani da agam santan wayu wit nafa i gam ribam mpada mangits. 20 Da agam wau rainggam isiꞌ igi naba da dzi i dzi sruꞌagin bida agam ini nan nidzun. Agam nanga bida nigi da agam wasangꞌ mampan u.” Da ribarangan itaga ruan i Yosef nan gan.
21 Da ribarangan ini nan da runggan ibiani, “Nan nidzun bingan! Agi nanggangꞌ nanga yaba i rainggangꞌ Yosef ugu mungaꞌ gan ani. Agi tsanga rainggangꞌ wangu barabin gan da gubuꞌ maragab ranga gampunda ruan da agi ugu, da agi wagaib arangan u. Ibinigi da barabin ani iwaꞌ da agi.”
22 Da Ruben ini, “Dzi ni wai da agam? Dzi ni agam anungꞌ nanga nam asub mangan yaba i mamaꞌ igi. Da bitsintaꞌ agam anungꞌ iringant i nan u. Aruani da agi yu barabin mungaꞌ i arangan nanggan mampan.” 23 Ribarangan wasruꞌgin ibi Yosef isruꞌ i nan ribarangan nidan da ruan igi u, i wain ibi garam itama i nan imunti wasaꞌ i Yosef da rain rusan. 24 Da itiri ribarangan rai da ifa mangan da irang. Ntsupa sib da arangan itip iba da ini nan da ribarangan. Arangan ini da garam gum impung Simion da idzur arangan imingꞌ i rain rusan maran.
25 Yosef ini da gan garam guman i farangꞌa wit ruꞌa ribarangan bekan da tipa farangꞌa ribarangan silva gan ragun gin ruꞌa bek ruga rugan sangꞌa santan, da rima nam gadan i rima ribarangan sib i sanaban tipa fadan. Da mamaꞌ gum inang isangꞌ Yosef nidan. 26 Ntsupa sib da ribarangan idzur bek wit iyab dongki gan da ifan. 27 Gubuꞌ ribarangan yunga fawaꞌa mumai wasaꞌ manga gingꞌa gin da ribarangan mangan ikiraꞌ bekan i rima nam gadan da dongki gan da itsangan silva gan mingꞌa bek nifun angu. 28 Da inuꞌ rain rusan ini binaꞌ, “Aitsangan! Rib aga tip ifarangꞌ dzi silva gangꞌ iruꞌ dzi bekangꞌ.”
Ribarangan nugun isantan ruan da irat da irarab ru maran da ini da ruan, “Nam idzuwai gan ani da Anutu inang ibiani da agi?” 29 Gubuꞌ ribarangan bawaꞌa sib da raman Yakop i intap Kanan, da ifis i nam santan waꞌan da ribarangan ugu. Da ini binaꞌ, 30 “Garam gudzun tsiraꞌ mpada tayangꞌ Idzip ini nan tsiraꞌ angu iyab i agai da idzur nan i agai ini aga garam rima ipiap i ribarangan gampan. 31 Da bitsintaꞌ aga ni da arangan, ‘Aga garam nan nidzun; aga anungꞌ garam rima ipiap u. 32 Aga 12, aga ramanggangꞌ bitsintaꞌ. Da aga rainggangꞌ mangan itangin aga rai, da aga rainggangꞌ isiꞌ rurut aga ramanggangꞌ impa Kanan.’ 33 Da garam gudzun tsiraꞌ mpada tayangꞌ intap igi ini da agai ibiani, ‘Sanab dzi tsanganda agam bida garam nan nidzun bungꞌ abiani: Agam watangin agamam bits narut dzi nampai. Da agam wayu nam gadan wafa i gam utupam nam gadan maꞌa gin aga. 34 Da bitsintaꞌ agam wau rainggam isiꞌ igi naba da dzi da dzi bungꞌ asruꞌgin nabi agam anungꞌ garam rima ipiap u, agam garam nan nidzun. Da dzi bungꞌ atangin agam rainggam nabiaꞌ da agam. Da agam isangꞌ yunga aga gampangꞌ da nanga gumam da suba nam in sangꞌa maranggam furan.’ ”
35 Da ribarangan iyats gan bek witan da itsanga silva gan mingꞌa sangꞌa gan bek witan ruga rugan. Gubuꞌ ribarangan ruta ramanggan tsanganda silva igi da ribarangan irat. 36 Ribarangan ramanggan Yakop ini da ribarangan ibiani, “Agam angu inang da dzi narungꞌ rusangꞌ iruꞌrun maran imaꞌ. Yosef maran imaꞌ, da Simion maran imaꞌ. Da aruani da agam ini tipa uda Benyamin fada sinungꞌ dzi. Agam nanggam nangan bida nigi da dzi buaringꞌ barabin gin!”
37 Da Ruben ini da raman ibiani, “Ramangꞌ. Watangin arangan ba dzi banginggangꞌ. Dzi bungꞌ ampa tayangꞌ arangan nasangꞌ dzi tipa uda arangan badan da agu. Da bida dzi mamida tipa uda Benyamin badan da agu ida wais dzi narungꞌ rusangꞌ marub iruꞌ aga funub.”
38 Da bitsintaꞌ Yakop ini ibiani, “Dzi narunggangꞌ wasangꞌ i ruta agam ruꞌan u, i arangan rainggan imamp sib da arangan runtaꞌ angu rungꞌ impai. Da bida barabin waꞌa da arangan i sanab da barabin igi bungꞌ ais dzi funub, i dzi fufi sib.”