46
Yakop Irut Utupan Iruꞌ Intap Idzip
Ibinigi da Israil iyu nanggan santan da irut utupan ifa i waꞌa Idzip, da gubuꞌ arangan fawaꞌa Birsiba da itsara nam isu dangki ifan da ramanggan Isak Anutu gan. Da Anutu ini nan da arangan imingꞌ nam puafuban da idziang ibiani, “Yakop! Yakop!”
Da Yakop ini, “Dzi aruani!”
Da Anutu ini binaꞌ, “Dzi Anutu, u ramanggam Anutu gan. Agu anungꞌ ratan i ruꞌa Idzip u, i dzi bungꞌ anang u yanginggam nawaꞌ nasu garam utup tsiraꞌ mangan namingꞌ nigi. Dzi bungꞌ arut agu nampruꞌ ruangꞌ naruꞌ Idzip, da bampan naga da dzi bungꞌ atip nau agu natip naba. Da u bungꞌ amamp nayab Yosef banginggan.”
Da Yakop tanginda Birsiba rai, da narun rusan itangin arangan impruꞌ da ribarangan finin rusan da narun rusan santan iyab karis King Farau tangindan bada i uda ribarangan fadan ugu. 6-7 Da Yakop irut narun rusan da rumpun rusan finam da marub santan ifa Idzip. Da ribarangan iyu apu gan mpada tayangꞌ gin da nam bunumpan santan udan mingꞌa Kanan ugu impruꞌ ibinigi.
Israil yangin rusan aru ruta fada gamp Idzip ugu binganggan ibiani:
 
Ruben, Yakop narunggan miamun.
Da Ruben narun rusan marub binganggan ibiani,
Hanok, Palu, Hetsron da Karmi.
10 Simion narun rusan marub binganggan ibiani,
Dzemuel, Dzamin, Ohat, Dzakin, Tsohar da Siaul. Siaul rinanggan sagat Kanan.
11 Liwai narun rusan marub binganggan ibiani,
Gerson, Kohat da Merari.
12 Yuda narun rusan marub binganggan ibiani,
Er, Onan, Sela, Perets da Tsera. (Da bitsintaꞌ Er da Onan imamp da gubuꞌ ribarangan rungꞌ mpada mingꞌa intap Kanan ugu.)
Da Perets narun rusan marub binganggan ibiani, Hetsron da Hamul.
13 Isakar narun rusan marub binganggan ibiani,
Tola, Pua, Dzasup da Simron.
14 Tsebulun narun rusan marub binganggan ibiani,
Seret, Elon da Dzalil.
15 Nigi Lia narun rusan gabunggan Yakop riman da arangan da gubuꞌ mpada mingꞌa Padan-Aram (Mesopotemia). Lia irim narun finam mangan impruꞌ binganggan Daina. Mpruꞌa Yakop narun rusan rima da Lia da rumpun rusan isangꞌ 33.
 
16 Gat narun rusan marub binganggan ibiani,
Tsefon, Hagi, Suni, Esbon, Eri, Arodi da Areli.
17 Aser narun rusan marub binganggan ibiani,
Imna, Iswa, Iswi da Beraia.
Ribarangan nafunggan Sera.
Da Beraia narun rusan marub binganggan ibiani, Heber da Malkiel.
18 Nigi Yakop yangin rusan riman da Tsilpa, sagat gum Laban riman da Lia ugu. Mpruꞌa utup igi santan isangꞌ 16.
 
19 Retsel narun rusan Yakop riman da arangan binganggan ibiani:
Yosef da Benyamin.
20 Gubuꞌ Yosef mpada gamp tsiraꞌ Idzip da irim narun rusan Manase da Ifraim da fininggan Asenat, Potifera garam pumuꞌan mingꞌa gamp On narunggan finam.
21 Benyamin narun rusan marub binganggan ibiani:
Bela, Beker, Asbel, Gera, Neman, Ehi, Ros, Mupim, Hupim da Art.
22 Nigi Yakop narun rusan riman da fininggan Retsel mpruꞌan da rumpun rusan isangꞌ 14.
 
23 Dan narunggan marub bitsintaꞌ angu binganggan Husim.
24 Naftali narun rusan marub ibiani:
Dzatsiel, Guniꞌ, Dzetser da Silem.
25 Nigi Yakop yangin rusan riman da Bilha, sagat gum Laban riman da Retsel ugu. Mpruꞌa utup igi santan isangꞌ 7.
26 Yakop narun rusan da rumpun rusan ruta arangan ruꞌa gamp Idzip ugu isangꞌ 66. Da wafaris arangan narun rusan finin rusan impruꞌ u. 27 Yosef narun rusan marub iruꞌ waꞌa mingꞌa Idzip ugu bampruꞌan da utup 66 igi da Yakop utupan fada Idzip igi isangꞌ 70.*
Yakop Irut Utupan Impa Intap Isiꞌ Gosen
28 Yakop itangin Yuda imungꞌ i nida sisingꞌ da Yosef i bawaꞌan da ribarangan mingꞌa Gosen. Da gubuꞌ ribarangan bawaꞌan mingꞌa intap Gosen sib, 29 da Yosef iyu karisan da ifa Gosen i waꞌa da ramanggan Israil. Gubuꞌ Yosef bawaꞌan da tsanganda ramanggan da impung arangan da irang guntiꞌ bingan angu.
30 Da Israil ini da Yosef ibiani, “Aruani da dzi runggangꞌ maranggangꞌ itsangan agu ibi agu rungꞌ impai marataꞌ, da dzi bungꞌ amamp ruta nugungꞌ nufan.”
31 Da Yosef ini da rain rusan da ramanggan utupan ibiani, “Dzi bungꞌ afani da King Farau nabiani, ‘Dzi raingꞌ rusangꞌ da dzi ramanggangꞌ da utupan santan mpada Kanan ugu ibawaꞌ sib. 32 Ribarangan garam mpada tayangꞌ dumpa da makau da iyu apu gan santan angu iba impruꞌ da nam bunumpan santan suda wain gin ibinigi.’ 33 Da gubuꞌ Farau nuꞌa agam atangꞌa fadan da guta i agam bida ani, ‘Agam inang gumam ibi anungꞌ?’ 34 da agam wani arangan nan gan mungaꞌ nabiani, ‘U garam gumam agai ani gumangꞌ nangan da ibiani, aga garam mpada tayangꞌ dumpa da makau, yatsungꞌ aga ramangꞌ rusan sanaban musa nangan. Aga atsungꞌ gin da aga isi isiꞌ isangꞌ aga yingꞌa rutin.’ Da nigi sangꞌ i rima agam sib i mpada intap Gosen, i garam Idzip ibugin i suda uts da garam mpada tayangꞌ dumpa.”
* 46:27 46:27 Yakop utupan fada Idzip igi isangꞌ 70: Yosef da ramanggan Yakop imingꞌ wasaꞌ i 70 igi impruꞌ.