48
Yakop Irim Bangin Ragun i Ifraim da Manase
1 Gubuꞌ fain fada sib da Yosef iyu sisingꞌ i arangan ramanggan gingꞌa rinin. Ibinigi da arangan iyu narun rusan marub iruꞌ igi, Manase da Ifraim, ifan i tsanganda Yakop.
2 Gubuꞌ Yakop uda sisingꞌ i narun Yosef bada i tsanganda arangan, da arangan rini urun gan pas rumingꞌan da inting ruan i rabiꞌ gan da impa iyab.
3 Yakop ini da Yosef, “Anutu Nampang Wain iwaꞌ da dzi imingꞌ Luts mingꞌa intap Kanan da ifinti dzi imingꞌ nigi
4 da ini ibiani, ‘Dzi bungꞌ arim yangin ampi bingan da agu da u yanginggam bungꞌ autus i ruan nasu garam utup tsiraꞌ bingan. Da dzi bungꞌ arim intap aruani da u yanginggam taptap nasu i nam bunumpan nanting.’
5 Da, Yosef, u narum rusam marub iruꞌ waꞌa gamp Idzip ani mungꞌ da dzi musa badan da isu dzi gangꞌ; Ifraim da Manase bungꞌ asu dzi narungꞌ rusangꞌ nidzun nabi Ruben da Simion.
6 Da bida u narum rusam fain waꞌa bampan i mamaꞌ iruꞌ ani da bungꞌ asu u gam. Da intap nida faba bafadan da ribarangan bungꞌ amaꞌ. Da bungꞌ ampa wasaꞌ i Ifraim da Manase yangin rusan angu.
7 Dzi ni nan igi i gubuꞌ dzi mingꞌa Padan Aram badan ugu da Retsel imamp imingꞌ sanab, uts angu da gamp Efrata imingꞌ intap Kanan da irim nugu barabin tsiraꞌ bingan da dzi i u rinanggam. Da dzi rim arangan i sanampun ringan fada Efrata” (nigi Betlehem).
8 Gubuꞌ Israil raraba Yosef narun rusan marub igi da igutin, “Manga narun rusan igi?”
9 Da Yosef ini, “Ramangꞌ! Mamaꞌ iruꞌ ani dzi narungꞌ rusangꞌ Anutu riman da dzi mingꞌa ani.”
Da Israil ini, “Da wayu mamaꞌ igi waba da dzi nafinti.”
10 Gubuꞌ arigi da Israil maran isap da watip tsanganda nam bini u, i arangan ifufi funub. Ibinigi da Yosef iyu narun rusan igi iba uts angu da ramanggan Yakop, da yari bangin ragun gin da itsutsuf.
11 Yakop ini ibiani da Yosef, “Dzi marangꞌ wafur i tipa tsanganda agu maram u, da bitsintaꞌ Anutu irim dzi sib i dzi tsanganda agu mpruꞌan da narum rusam.”
12 Da Yosef ibibi narun rusan sinungꞌ ramanggan Yakop da yidzaꞌ fagan da itauf maran iruꞌ intap imingꞌ raman maran.
13 Yosef igif Ifraim i bangi bini da yusu ifa Israil bangi yas da igif Manase i bangi yas da yusu ifa Israil bangi bini, i arangan mamaꞌ miamun.
14 Da bitsintaꞌ Israil iraiꞌ i bangin bini da ibarim ifa ragun i mamaꞌ isiꞌ Ifraim gudzun. Da iraiꞌ i bangin yas da ibarim ifa ragun i mamaꞌ miamun Manase gudzun. Ibinigi da Israil anungꞌ yatsungꞌ sanampun rima bangi bini ragun i mamaꞌ miamun da gubuꞌ rima mirimp.
15 Da ifinti Yosef ibiani,
“Anutu aru mungꞌ da dzi rumpunggangꞌ Abraham
da dzi ramanggangꞌ Isak pumuꞌan ugu
da mpada tayangꞌ dzi da gubuꞌ sib angu
badan da bawaꞌan da gubuꞌ aruani,
16 da Angira aru rima dzi sib i barabin mara maran sib angu nafinti mamaꞌ marub iruꞌ ani.
Da bungꞌ afaringꞌ dzi binganggangꞌ da rumpunggangꞌ Abraham da ramanggangꞌ Isak binganggan nayab i ribarangan,
da yanginggan nautus i ruan nasu tsiraꞌ namingꞌ intap.”
17 Gubuꞌ Yosef tsanganda ramanggan rima bangin bini yaba Ifraim gudzun, da wangun i barabin gin, ibinigi da Yosef igif Yakop bangin da inang i raꞌa gin sinungꞌ Ifraim gudzun da barima fada Manase gudzun.
18 Da ini, “A̛a ramangꞌ! Nani mamaꞌ miamun. Da warim bangim bini nayab i arangan gudzun.”
19 Da bitsintaꞌ Israil ibugin da ini, “Dzi sruꞌgin, dzi narungꞌ! Dzi sruꞌgin i arangan yanginggan bungꞌ awaꞌ nasu garam utup tsiraꞌ mangan nabinigi. Da bitsintaꞌ arangan rainggan isiꞌ ani yanginggan bungꞌ awaꞌ nayus arangan gan da nasu garam utup ampi bingan angu.”
20 Ibinigi da Israil ifinti rib iruꞌ igi da gubuꞌ arigi ibiani,
“Garam Israil nifun bungꞌ agamp agu binganggam i nan fintidan da nani,
‘Anutu nafinti agam nabi Ifraim da Manase.’ ”
I sanab igi da itangin Ifraim isu miamun i Manase.
21 Da Israil ini da Yosef, “Dzi su uts i mampan, da Anutu bungꞌ arut agu da nau agu natip nafa u tafam rusam intapan.
22 Mamai fiririꞌ Sikem igi dzi rim isu u nanggam, da dzi warim da u raim rusam u. Imaꞌ. Dzi yis garam Amor i gangꞌ bainatangꞌ da dampa gangꞌ i uda intap igi.”