50
1 Yosef impai iruꞌ da igingꞌ ragun i raman da irang da itsutsuf arangan.
2 Da irang sib da ini da garam tipa garam mampan riniuriatsan i mingꞌa gubuꞌ guntiꞌ i tipa arangan ramanggan riniuriatsan.
3 Sanab tipa Yakop riniuriatsan igi iyu gubuꞌ 40, yatsungꞌ gum igi gubuꞌ gan rururungan. Garam Idzip irang i arangan isangꞌ gubuꞌ 70.
4 Gubuꞌ ranga i Yakop ntsupa sib da Yosef igaib runggan da King Farau garam gudzun gan ibiani, “Isangꞌ agam uda dzi nifunggangꞌ fadan da king da nidan da arangan bida ani,
5 ‘Gubuꞌ dzi ramanggangꞌ nanga i mampan, da arangan ini da dzi taga ruangꞌ da arangan, i dzi tipa uda arangan riniuriatsan fada intap Kanan, da rima mingꞌa tauf bampun arangan runggan rafan. Da isangꞌ u tusa maram i dzi da dzi farima ramanggangꞌ sib, da dzi musa tipa badan?’ ”
6 Da king iringant i Yosef nan gan da ini ibiani, “Wayab da warim ramanggam nasangꞌ u nan gam tagada ruam rutin.”
7 Ibinigi da Yosef iyu ramanggan iyab i riman. King garam gudzun gan ampi bingan irut Yosef impruꞌ ruan fadan — garam mpada tayangꞌ king ungaran da garam suda wain i gamp fain mingꞌa Idzip,
8 impruꞌ da Yosef utupan da rain rusan santan da ramanggan utupan santan. Da narun rusan mpruꞌan da apu gan angu rungꞌ impa imingꞌ intap Gosen.
9 Garam mpada karis da garam mpada hos irut arangan impruꞌ ruan yaban. Da rib fadan igi utup tsiraꞌ bingan.
10 Gubuꞌ ribarangan bawaꞌa mingꞌa mumai tura wit i uda nidzun gin mingꞌa Atad, uts da mpui Yordan, da singisiang tsiraꞌ bingan imunti i Yakop. Da Yosef itip impa i ramanggan i nigi isangꞌ gubuꞌ 7.
11 Garam Kanan mpada gamp igi itsanga nam pumuꞌa badzab mingꞌa mumai tura wit gin mingꞌa Atad da ini, “Garam Idzip aga isantingꞌ nam maran gaiban tsiraꞌ bingan.” Ibinigi da ifaringꞌ mumai igi Abel Mitsraim, wainggan “garam Idzip maran gaiban gan.”
12 Ibinigi da Yakop narun rusan yatsungꞌ nan ibi arangan nidan da ribarangan:
13 Ribarangan iyu ramanggan ifa Kanan da irim i tauf bampun mingꞌa intap Makpela, uts da Mamri, intap Abraham rima nam ntsuman gin da Efron, garam Hit ugu, isu mumai rima badzabin.
14 Gubuꞌ Yosef rima ramanggan sib da irut rain rusan da rib ruta fadan ugu impruꞌ ruan itip iba Idzip.
Yosef Iyafa Rain Rusan Wangun
15 Gubuꞌ Yosef rain rusan tsanganda bida ramanggan mampa sib da ini ibiani, “Bida Yosef maran rufura asub agi nanga rutin ugu da bubida anungꞌ i agi?”
16 Ibinigi da ribarangan irim nan ifan da Yosef da ini ibiani, “U ramanggam irim nan bida ani mungꞌ da agai da imus mampan:
17 ‘Agam wani wabiani da Yosef: Dzi gut i agu i u siata raim rusam nanggan maisan nanga yaba i agu.’ Ibinigi da maram wantuꞌ ramanggam Anutu gan garam guman agai da wasiat aga nanggangꞌ maisan rai.” Gubuꞌ ribarangan nan gan fawaꞌa da Yosef, da arangan irang.
18 Da arangan rain rusan impruꞌ ruan iba da yidzaꞌ fagan da itauf maran iruꞌ arangan maran da ini, “Aga rim runggangꞌ da agu isu u garam gumam utaꞌ angu.”
19 Da bitsintaꞌ Yosef ini, “Agam anungꞌ ratan u. Dzi wasangꞌ i uda Anutu mumai gan da rima nam mungaꞌ da agam u. Imaꞌ.
20 Agam ini wayada dzi da bitsintaꞌ Anutu yitam i agam nanggam maisan igi isu nam ngarubini, i rima garam ampi bingan nanggan mpadan sib. Da iwaꞌ ibinigi.
21 Ibinigi da agam anungꞌ ratan u. Dzi bungꞌ arim agam da narum rusam sib.” Da Yosef iyafa rain rusan wangun i nan mantsingan bida nigi.
Yosef Nanggan Mampan
22 Yosef da rain rusan da gan utupan impa Idzip. Arangan impa isangꞌ udzuf 110,
23 da itsangan narunggan Ifraim rumpun rusan. Da arangan iyu Manase narunggan Makir narun rusan isu i gan ibinigi.
24 Da Yosef ini da rain rusan ibiani, “Dzi su uts i mampan. Da Anutu bungꞌ ampa tayangꞌ agam da nau agam sinungꞌ intap aruani nafa intap arangan ragada mungꞌ da Abraham, Isak da Yakop ugu.”
25 Da Yosef ini da Israil narun rusan i tsafa ruan nidzun angu da ini, “Gubuꞌ Anutu uda agam waꞌa sinungꞌ intap ani da agam wau dzi riniuriatsangꞌ nampruꞌ.”
26 Ibinigi da Yosef udzufan waꞌa 110 sib da imamp da itip riniuriatsan i mingꞌa gubuꞌ guntiꞌ da irim i bugis da igingꞌ Idzip.