6
1-2 Kele anwerne ayeye arrekwelenye areye Christ-akerte angketyale anetyeke. Anwerne ayeye impene areye akwetethe akaltye-irrerlte-anetyenhenge, anwerne anteme arratye akaperte altywere anthurre anetyenhenge Jesus-arteke. Arrantherre ayeye re-anteye awetyeke ahentye anetyakenhe arrantherre aweke-arle iperre. Arrantherre kele itelareme iwerre akurne-ketye ipmentye impemele-akerte, Ngkarteke ilelhemele arrantherre-arle akurne mpwarekenge, Ikwere-werne utepe-irrintye-alpemele. Anwerne arrenhantherrenhe kele akaltyele-antheke nhenge kwatyeke akwerneme-akerte, nhenge iltye anwerne-kenhe arrekantherrenhe akaperteke arrerneme nhenge Utnenge Ngkarte-kenhe arrekantherrenge anetyenhenge. Anwerne arrenhantherrenhe kele akaltyele-antheke Ngkartele-arle ilweke-arle areye akemelhe-ilirtnetyenhe. Anwerne arrenhantherrenhe kele akaltyele-antheke Ngkartele-arle tyerrtye ingkirreke court-eke arrernemele angketyenhe itneke nthakenhe-arle-irretyenhenge.
3 Ye, ayeye arrekwelenye areye ipmentye impetyeke, ayeye arrpenhe impene areyeke akwetethe akaltye-irretyeke nhenge Ngkartele-arle anwernenhe akaltyele-anthetyeke ahentye-anemeke, nhenge yanhe anteme anwerne awethe-ame-awethe Jesus-arteke-irreme arlte arrpe-anenhele.
Arne akurne mpwareke-arle-iperrele anwerne alhwarrpe-irreme Ngkarteke angketyeke
4-6 Awerrirraye! Nhenge angwenhe apeke Jesus-eke atyewe-irreme. Nhenge Ngkartele ayeye Ikwerenhe ikwere imerneme, tyerrtye yanhe re imerte mwantyele awemele, arratye itelareme anteme Jesus, Ngkartenge apurte-irremele re akangkemele anthurre anemele Ngkartele-arle renhe itetheke mpwarekenge. Utnenge Ngkarte-kenhe apetyeme ikwere irrpemele anteme anemele. Re kwenhe itelareme alhilentye Ngkarte-kenhe areye-arle arratye anthurre. Re imerte itirremele, “Arratye kwenhe Utnenge Akngerre nhenge atyengenge arratye warrke-irreme.” Re akenhe nhenhe ingkirreke aweke-arle-iperrele, re Jesus-ketyenge untyeme-irremele renhe ipmentye-iwemele iwerre arrpenhele anteme alheme. Kele nthakenhe-arle-ame anwerne renhe Ngkarte-werne akngetye-alpetyenhe utepelhe-ilemele Renhe apentetyeke? Arrangkwe anthurre-arle, anwerne renhe uyarne akngetye-alpeme rarle akenhe arrekwele Jesus arratye itelareke-arle iperrenge re-anteme renhe alhule-iweke ikwere-ketyenge untyeme-irremele. Alakenhe-arteke kwenhe Jesus-arle arne arntarlkweke-arleke arrernirtneme-arteke, nhenge tyerrtye areyele renhe arerlenge itne Alere Ngkarte-kenhe akurnentye angketyenhenge.
7-8 Angkentye nhenhe awerrirraye! Artwe arrpenhele annge areye ahelheke ngkerneme merne nhenge lyapetyenhenge. Nhenge kwatyele anheme kenhe annge itne lyaperlenge. Nhenge Ngkartele aremele merne annge lyaperlenge, Re akangkemele anthurre aneme. Kenhe ahelhe arrpenhe akenhe aneme, nhenge kwatyele anhemele, arne lyeke-lyeke areyele arrateme, arne akurne arrpenhe areye-arlke. Nhenge Ngkartele ahelhe yanhe renhe aremele, Re itirremele akurne-ilemele alyetyeke. Urreke anteme urele itetyenhe ahelhe yanhe renhe akethe-ante arrernemele. Kele nhenge ahelhe akurne yanhe lyeke-lyeke-akerte re tyerrtye areye-arteke-arle awerlte-anemele-arle, ipmentyele impeme.
9 Atyewe Ngkarte-kenhe atyinhe areye, anwerne kwenhe arrenhantherrenhe alkngarre-ileme arrantherre-arle apeke Ngkarte-ketye untyeme-irreketyenge. Kele anwerne itelareme arrantherre-arle Ikwere iwerre arratyele anemenge. Alakenhe ikwerenge anteme Ngkartele arrenhantherrenhe atnyeneme Ikwere-arrpe.
10 Ngkarte kwenhe mwerre aneme, arratye anthurre Re arrenhantherrenhe akwetethe arerle-aneme Ikwere mwerrentye warrke-irrerlte-anerlenge, Re arrekantherre akangkeme anthurre. Re arrekantherre alkngwirretyakenhele aneme. Rarle areme arrantherre-arle Ikwere ahentye anemenge, Re itelareme arrantherre-arle atyewe Ikwerenhe areyeke ahentye aneme itnenhe arntarnte-arerlte-anemele. Arlte lyete arrantherre alakenhe akwete aneme.
11-12 The kwenhe arrekantherre iletyeke ahentye-aneme atnerrele akwete warrke mwerre mpwarerlte-anetyeke nhenge apurrke-irretyale nhenge arrantherre uyerretyeke-atwetye. Arlte lyete arrantherre kwenhe Ngkarteke akwete nterte akarelherlte-aneme arrenhantherrenhe anthetyeke arne yanhe nhenge arrenhantherrenhe-arle alhilekeke. Rarle kwenhe arrenhantherrenhe arratye anthetyenhe. Alakenhe ikwerenge anteme arrantherre atnerre akwetele Jesus apentewarretyeke nhenge arrantherre arne mwerre akngerre anthurre Ngkarte-ngentyele inetyenhenge. Angwaretyeke anaye tyerrtye yanhe areye arrekwele-arle Ngkarte arratye itelaretyarteke. Yanhe areye kwenhe aneme Ikwere-arle mwantyele akarelhetyarte anekeke. Lyete anteme Re itnenhe antheme nhenge iwenhe-arle Re arrekwele alhileke-iperre.
Iwenhe apeke renhe Ngkartele-arle tyerrtye areye alhileme, Re itnenhe anthemele
13-14 Arrule anthurre Ngkartele Abraham-eke alakenhe ileke, “The kwenhe ngenhe lterrke-ilemele arntarnte-aretyenhe ngkwenge-artweye areye atningke-ame-atningke-irretyenhenge.” Urreke Re nhenhe angketyenhenge, Ngkarte uternelheke, “Arratye kwenhe, The arne ingkirreke anthurre Abraham anthetyenhe.” Genesis 22:16-17.
Yanhe arratye-arle. Tyerrtye arrpenheke arrangkwe, utnenge arrpenheke arrangkwe anerlenge, impene anthurre-arle Ngkarte-arteke, arrangkwe anthurre-arle. Alakenhe ikwerenge anteme nhenge Ngkarte Re-arrpele uternelheke-arle.
15 Abraham-ele akwetethenhe arratye itelaretyarte re Ngkarteke atyenpe akarelhetyarte nhenge renhe arne ingkirreke anthetyenhenge. Kele Ngkartele anteme arratye renhe arne areye antheke nhenge iwenhe renhe-arle re alhilekeke.
16 Kenhe nhenge tyerrtye atherre iwenheke apeke ahele akerremele, anyente apeke arrpenheke angkeme-ketye, “Ye, the kwenhe ngkwenge arratye ileme. Ilerne kwenhe itelareme Ngkartele ilernenhe awemele arerle-aneme. Ayenge apeke ngkwenge urrtyirremele angkerne, kele Ngkartele ayenge awetyenhenge Re ayenge akurne ileme, Re ayenge urrtyalthe akeme.” Nhenge anyente apeke alakenhe angkerlenge, kele arrpenhe ikwere yewe angkeme, ratherre ahele akerrentye impelhetyenhe.
17 Kele alakenhe-arteke anteye nhenge Ngkarte Abraham-eke arrule anthurre angkemele, Re ikwere uternelheke. Arratye yanhe-arle. Kenhe lyete apeke nhenge anwerne apeke angkerreme-ketye, “Ngkartele kwenhe anwernenhe arntarnte-aretyakenhe, Re alhilentye Ikwerenhe mpwaretyakenhe.” Kenhe Ngkarte Re akenhe itirrentye akngarte-iwelhetyakenhe. Alakenhe ikwerenge anteme anwerne kwenhe Renhe arratye itelaretyeke aneme.
18 Ye, Ngkartele anwernenhe arratyentye alhileke; Re urrtyirremele angketyakenhele, Re nhenge alhilemele arritnye Ikwerenhe angkemele, Re antheme iwenhe-arle Re alhilekeke. Re itirrentye akngarte-iwelhetyakenhe nhenge utepe-arlke-irretyakenhele. Alakenhe ikwerenge anteme anwerne akangkemele anetyeke. Ngkartele kwenhe anwernenhe arratye ileke nhenge anwerne Renhe itelaretyenhenge Ikwere-werne anteme alhetyenhe Re anwernenhe arntarnte-aretyeke anteme. Kele anwerne itelareme, anwerne-arle arne ingkirreke inetyenhe Rarle anwernenhe arrwekele alhileke-iperrele.
19-20 Ye, anwerne kwenhe Jesus arratye itelareme akwete Ngkarte-arle anwerneke arratye angkekenge. Re akwete anwernenhe arnterre atnyeneme, Re anwernenhe alhule-iwetyakenhe anetyenhe, anwernenhe impetyakenhele. Itirrewarraye kwertengerle tyatye-arenye areyeke ilthe ameke-ameke-kenhele-arle warrke-irretyarteke, yanhe areye ilthe ameke-amekeke irrpetyarte apmere atyeperre akweke anyente kwenenge. Ngkartele Jesus akngakeke nhenge re kwertengerle impene tyatye-arenye akwete-ante anetyenhenge, Melchizedek-arteke. Jesus anwernekenge arrwekele-irreke-arle. Re apmere impene alkereke kele irrpeke, nthenhele-arle Ngkarte anemeke-arlke, nhenge Re Ngkarteke anwerneke angketyenhenge. Kele anwerne anteme atyenpe ikwere akarelheme.