21
Ayeye alkere alkarle uthene ahelhe alkarle uthene-akerte
1 Ikwere-iperrele the ahelhe arrpenhe uthene alkere arrpenhe uthene areke, alkarle-arle arrpenhe. The ahelhe arrekwelenye, alkere arrekwelenye uyarne areme, kwatye alaye anteye the uyarne aremele.
2 Kele the anteme apmere akngerre Ngkarte-kenhe areke, apmere yanhe Jerusalem, arrekwelenye anetyakenhe, alkarle kwenhe yanhe aneme. Re kwenhe alkere akertne-ngentyele atyenge-werne-atheke kwene-akerle apetyetyame. Apmere yanhe re kwenhe mwerre akngerre anthurre aneke. Nhenge marle-arle mantere mwerre akngerreke irrpeme-arteke nhenge re mpwarelherlenge anewe inetyeke, alakenhe re-arteke apmere akngerre yanhe re mwerre akngerre anthurre aneke.
3 The anteme arrpenhe aweke chair mwerre akngerre yanhe ikwerenge-ntyele arlkerlenge alakenhe angkemele, “Ngkarte kwenhe tyerrtye areyenge anetyenhe. Re kwenhe itnekenge anetyenhe. Itne kwenhe ikwerenhe areye anetyenhe. Ngkarte kwenhe Re-arrpe itnekenge anetyenhe, Re Ngkarte itnekenhe anetyenhe. Re itnenhe mwantyele arntarnte-aretyenhe nhenge alartetye itnekenhe anthurre anemele.
4 Re alkngultye alknge itnekenhe-ngentyele arlkngetyenhe nhenge yanhe-ngentyele itne awethe alhwarrpe anetyakenhe anetyenhenge. Itne-arle awethe ilwetyakenhele anetyenhe nhenge akayale artnetyakenhe-arle anetyenhe, arrangketyakenhe anetyenhe, arnteme-arle awelhetyakenhe anetyenhe, arne areyele-arle tyerrtye areye alhwarrpele-anthetyartenge kele uyerreke.”
5 Ngkarte anteme, chair mwerre akngerre yanhe ikwerele-arle anetyameke, atyenge angkemele, “Araye! The kwenhe lyete arne ingkirreke alkarle-ileme!” Re atyenge angkeke: “Nhenhe areye pipe-ke intelhe-ilaye The ngkwenge ileke, unte-arle Ayenge-ante thenterlenge re akenhe aneme-arle. The kwenhe arne ingkirreke mpwareme nhenge ayenge-arle mpwaretyeke angkeke.”
6 Re atyenge awethe angkeke, “The arne ingkirreke anthurre mpwareke Ayenge-arle angkeke-iperre. Ayenge kwenhe arrwekele anthurre aneme, arne anetyakenhenge-urrke, Ayenge itethe akwete aneke, Ayenge akwete anetyenhe nhenge arne ingkirreke uyerrerlenge. Ayenge-arle itethe akwete-ante anetyenhe. Awerrirraye, nhenge angwenhe apeke kwatyeke angkethakwe-irrerlenge, kwatye nhenge itethe-arle anthemeke, kele anteme The mwantyele-arle kwatye antheme nhenge kwatye pintye-ngentyele itethe-werne akngetyerlenge, itne antywetyenhenge akwete-ante anteme anemele.
7 Arrantherre apeke lterrke akwete arrentye-ketye aneme Atyenge-ketye artepe untyeme-irretyale anetyeke kele The arrenhantherrenhe akwete mwantyele arntarnte-arerle-aneme. Ayenge Ngkarte arrekantherrenhe anetyenhe arrantherre kwenhe Atyenge-artweye areye arratye anthurre anetyenhe.
8 Kenhe tyerrtye areye nhenge ateralthe-arle aneme, nhenge tyerrtye areye Ayenge-arle arratye itelaretyakenhe anekeke, tyerrtye areye nhenge arne akurne-arle akwetethe mpwarerlte-anemeke, tyerrtye areye apure anetyakenhe nhenge tyerrtye arrpenhe areyenge-arle interremeke, tyerrtye areyele-arle arrwengkwelthele uthnemeke, tyerrtye areye nhenge ngkarte urrtyirrentye-arle tnakemeke, tyerrtye areye urrtyirreme-arle ilerle-apeme. Tyerrtye nhenhe ingkirreke kwenhe atherre-ngare ilwetyenhe; itne apmere ahelhe nhenheleke-amparre ilwetyenhe, urreke itne awethe ilwetyenhe, ure alkngenthe akngerrenge ure kwerte arntirte-arle ntyerle-anemeke.”
Ayeye apmere alkarle Jerusalem-akerte
9 Itelareme alkere-arenye 7-pele apanthe 7-akerte, yanhe areyele kwenhe arne akurne ingkirreke-arle ahelhe-werne-atheke thelekeke. Alkere-arenye anyente yanhe areye-ngentyele apetyemele atyenge angkeke, “Mpe. The ngkwenge arelhe yanhe renhe imernetyenhenge anewe-arle-aketyenheke Yepe-yepe Akwerrke Ngkarte-kenheke.”
10 Kele Utnenge Ngkarte-kenhe atyenge-arleke irrpeke, alkere-arenyele anteme ayenge apwerte akertne anthurre-werne akngeke. Re atyenge apmere Ngkarte-kenhe-arrpe Jerusalem imerneke, alkere-ngentyele-arle apetyeke Ngkarte-ngentyele.
11 Apmere yanhe re kwenhe imparrkeye anthurre nhenge alkngenthe imparrkeye Ngkarte-kenhele, kelathe-arteke apeke arne iwenhe apeke atyeperre anthurre-arle apeke imparrkemeke alkngenthe atherrke-atherrke mwerre akngerre-akerte-arteke.
12 Kenhe arrkngerte akngerrele apmere yanhe utepe-akeke. Arrkngerte yanhe ikwerenge arriwe 12-akerte aneke, arriwe-arrpeke itweke alkere-arenye tnetyame renhe ilpemele. Kenhe arriwe arrpe-anenheke arrpenhele intelhe-ileke-arle arritnye areye alere artwe Israel-kenhe areyeke. Alere 12-pele nhenhe areye-ngentyele Israel-kenheke-artweye areye-arle atningke-ame-atningke-irreke-arle, akwetethe anthurre-arle.
13 Arriwe 12-pele akenhe arrkngertenge alakenhe tnerrirreke: urrpetye Ikngerrele tneke, urrpetye arrpenheme Antekerrele tneke, urrpetye arrpenheme Ayerrerele tneke, urrpetye arrpenhe Alturlele tneke.
14 Arrkngerte yanhe re apwerte athirnte 12 akertnele tneke. Kenhe arritnye artwe areye-kenhe apwerte athirnte yanhe areyeke aneke. Arrantherre itelareme, artwe twelve-pele Yepe-Yepe Akwerrkele-arle yernekeke angkentye ilerle-apetyeke, arritnye itnekenhe yanhe ikwerele aneke.
15 Alkere-arenye atyenge-arle angketyameke arne arratyentye arntwirrkeke gold-engentyele-arle mpwarekeke, re arne yanhele apmere akngerre yanhe arrkernetyeke, arrkngerte iwenhe-atheke, arriwe iwenhe atheke, arlpentye apeke, arlenge apeke irremeke.
16 Apmere yanhe re square-arteke aneke, nhenge yarte akngerre-arteke arrkngertele utepe-akeke. Re arne arlpentye yanhe atningke-ngare ahelheke-arleke arrerneke apmere yanhe arrkernetyeke. Ikngerre-ampinyele arlpentye anthurre aneke, kilometre 2,400-eke-atwetye. Alakenhe re-anteye re arrkngerte-arrpe arrkerneke. Kenhe antekerre-ampinyele arlpentye anthurre aneke, kilometre 2,400-eke-atwetye. Kenhe ayerrere-ampinyele arlpentye anthurre aneke, kilometre 2,400-eke-atwetye. Kenhe alturle-ampinyele arlpentye anthurre aneke anteye, kilometre 2,400-eke-atwetye. Ahelhe-ngentyele akertne-werne atheke apmere yanhe kilometre 2,400-eke-atwetye anteye tneke.
17 Alakenhe re-anteye re arrkngerte-arrpe arrkerneke, apmere yanhele-arle utepe-akemeke, itne anteke anthurre. Arrkngerte-arrpe, re metre 66-eke-atwetye anteke aneke.
18 The areke arrkngerte yanhe renhe mwerre akngerre anthurre-arle. Arrkngerte apele nhenge apwerte atherrke-atherrke-ntyele mpwareke-arle. Apmere re mwerre akngerre anthurre anteye aneke, re apele gold-engentyele mpwareke-arle, re alknge pwarrtyeme kelathele-arteke.
19-20 The apwerte athirnte 12 areke arrkngerte kwene ikwerele anerlenge arlkenye arrpenhe-akerte-arle. Apwerte athirnte 12-ke apwerte atyeperre areye aneke arlkenye arrpenhe areye mwerre-akerte, arrpenheme atherrke-atherrke, arrpenhe areye alkere-alkere-arteke, arrpenhe areye mperlkere, arrpenheme athetheke, arrpenheme arrerlkere, arrpenheme urrperle anthurre aneke. Itne kwenhe ingkirreke arlkenye mwerre akngerre anthurre aneke apwerte athirnte 12-eke-arlenge.
21 The areke arriwe 12-pele mwerre akngerre anthurre anteye aneke. Arrpenhele itnenhe apwerte mperlkere mwerre akngerrenge-ntyele mpwareke-arle apwerte nhenge pearl arritnye-arle. The areke anteye iwerre arlpentye apmere kwene yanhele mwerre akngerre anthurre interlenge nhenge gold-engentyele-arle mpwarekeke, re akenhe arrpenhe anthurre aneke, arrerlkere anthurre re aneke kelathe-arteke renhe akethe anthurre-arle areme nhenge ulkere.
22 The akenhe tyatye akngerre apmere yanhe ikwerele aretyakenhe aneke tyerrtye areye-arle irrperlenge Ngkarte tnakewarretyeke Ngkarte-arle kwenhe Yepe-Yepe Akwerrke uthene yanhe ikwerele-arle anerle-anerreke. Tyerrtye ingkirrekele Renhe-atherrenhe akethe anthurre akwetethe arerlte-aneke.
23 Apmere yanhe rarle atnyentye apeke arlennge apeke pwarrtyetyeke ahentye anetyakenhe apmere yanhe ikwerenge, Ngkarte Re-arrpe apmere yanheke alkngenthe anetyenhe, Jesus-inpe, Yepe-yepe Akwerrke-arle anemeke, re kwenhe alkngenthe itnekenhe anetyenhe anteye.
24 Kenhe tyerrtye ingkirrekele mwerre anteme untherlte-anetyenhe nhenge arltele-arteke anerlenge alkngenthe-arle Ngkarte-ngentyele-arle Yepe-yepe Akwerrke-ngentyele-arle itneke arrtyernerlenge. Kenhe alartetye areye apmere arrpe-anenhe-ngentyele kwenhe apwerte ngkweltye-arlke, mantere-arlke, arne mwerre akngerre arrpenhe areye-arlke, apmere yanhe ikwere-werne akngetyetyenhe Ngkarte akertne utyernemele tnaketyeke.
25 Yanhe ikwerele kwenhe arlte akwetethe anerle-anetyenhe. Kenhe arriwe 12-pele kwenhe akwetethe altywere anerlte-anetyenhe. Arrpenhe areyele arriwe itnenhe altywere-ileme-ketye, rarle kwenhe ingwe-irretyakenhenge anetyenhe awethe.
26 Kenhe tyerrtye areye apmere arrpe-anenhe-ngentyele kwenhe apwerte ngkweltye-arlke, mantere-arlke, arne mwerre akngerre arrpenhe areye-arlke, apmere yanhe ikwere-werne Ngkarteke akngetyetyenhe Ngkarte-arle impene akngerre anthurre anerlenge.
27 Itne kwenhe arne akurne areye akngetyetyakenhe anetyenhe arne mwerre akngerre areye-ante ware. Kenhe yanhe areyele arne akurne-arle mpwarerlte-anemeke, yanhe areye-arle urrtyirremeke, apmere yanheke irrpetyakenhe anetyenhe. Kenhe Ngkarte-kenhe areye-ante ware irrpetyenhe, yanhe areye Ngkartenge-arle akwete-ante anetyenheke Yepe-yepe Akwerrkele-arle arritnye itnekenhe pipe-nge intelhe-ilekenge.