1 Yaolhaq
Gevq-a nail gaq
Haoqgavq niil keiv neq, khaq sil gaq-i mail gevq-a nail dai, aqduq aqtsil tsil dai maq gevq-ai thaq-al. Thailhai ngaol-aoq, milnee uqnee khe Khali yaq juq Gaqkhoel Yaolhaq-i mail gevq-a nail ngaol dai, noeq nail ngaol. Khul khi mail dai ngal-aq, haoqgavq niil keiv nail lavqkhoel bhai heldaiq-u phao, lavqkhiq tsail nail geeqlaoq daoq Yaolhaq nail haoqgavq khe-ai maodai dul lai nail ngaol.
Gevq-a nail aqyanq khi mail aqduq
Gevq-a nail aqyanq neq, A.D. 85-95 kovq nail gaiqlaq bhai ngaol. Gevq-a nail aqduq neq, Eilpheilsu meenq bhai ngaol dai, noeq nail ngaol. Milnee uqnee khe Khali juq, Yaolhaq neq, gaqkhoel yaoq juq yaoq-ao nee maqtsil yeel heel jaiq khi Eilpheilsu meenq bhai jaol-a nail ngaol.
Khaq sil gaq bhai gevq bhiq-a nail
1 Haoqgavq niil keiv neq, khaq sil gaq bhai gevq bhiq-a nail dai, bhaqlaoq kheq dai, maq gevq-ai thaq khi ngaol-aoq, Khali yaq juq bhai gevq bhiq thaq nail niil dai, heeq lal nail ngaol. Al ovqtavq, teevq gaq ge gaq haq neq, teevq gaq bhai bivq khi bhi ge, Khali yanq munl teevq munl ge gaq haq neq, teevq munl bhai bivq khi bhi ge nail haqbhoil gevq thaq nail niil dai, noeq nail ngaol.
Khul bhai noeqthunq khi gevq-a nail
Haoqgavq niil keiv neq, Khali yaq juq bhai maq ngel nail phaq cavq lal khi hevq bheeq thailthaiq nail juq nail haoqnao maq ya tsaothel-aivq dai, yaol phaol yaoq dai, gevq bhiq-a nail ngaol. Al ovqtavq, Yaolhaq aivq-i mail cavq nail cov nail phaq neq, aivq nail maivneev nee ya moel khi, aivq nail naqkhaol nee mail ya gaiq-a nail phaq cavq nail ngaol dai, ge bhiq khi, maldil Khali yaq neq, hevqkovq nail phaq ya khi, nqmaq maqluv halyeel ya doevq nail ngaol dai, bhi heeq nia nail haqbhoil gevq-a nail ngaol.
1
Aqdoevq bhi doevq lal nail daoq nail ganl
1 Iqmoeq-u nee mail doevq nail jaol nail daoq nail ganl nvjuq nuljuq jaol nail bha gevq bhoel-ai leevq-a nail ngaol. Aqdoevq bhi doevq lal nail daoq al daoq bhai nvjuq ya gaiq khi, maivneev-i mail ya moel-a nail ngaol. Nvjuq daoq al daoq bhai hel iqsanl ya heldaiq moel khi, thoiq nail iqsanl ya thoiqtsi daiq-a nail ngaol.
2 Aqdoevq doevq nail phaq bhaqlaoq kheq dai dov lal nail bhai nvjuq ya moel khi, al nail ganl salkhil khanq nail ngaol. Al ovqtavq, nvjuq bhai bhaqlaoq khe dai bhi moel lavq-a nail, Aqbhu Miqyail nee mail jaol-a nail nqmaq maqluv halyeel doevq nail phaq nail ganl, nuljuq bhai ge daiq bhiq nail ngaol.
3 Nuljuq iqsanl nvjuq nee mail aqtsaoq ya tsaoq dai, nvjuq-i mail ya gaiq ya moel-a nail juq nuljuq bhai ge daiq bhiq nail ngaol. Ngadao aqtsaoq tsaoq nail neq, Aqbhu Miqyail khi mail aivq nail Yaqyov Yeiqsul Khali nee mail aqtsaoq tsaoq nail phaq pevq nail ngaol.
4 Ngadao lavqkhiq tsail deedee lal nia dai, ganl niil juq nvjuq nuljuq jaol nail bha gevq bhoel-ai leevq-a nail ngaol.
Miqyail neq, aqbhaq pevq nail ganl
5 Nvjuq neq, Yeiqsul-i mail cavq lavq-a cov lavq-a nail daoq bhai ya gaiq khi, nuljuq bhai ge daiq bhiq nail ngaol. Aivq nail daoq al neq, niailhai ngaol. Miqyail neq, aqbhaq pevq nail ngaol. Aivq nail lavqkhoel bhai aqnav teevq peivq-ail maq aol-ail.
6 Ngadao aivq nee mail aqtsaoq tsaoq thailthaiq naol dai ge khi ngaol-aoq, aqnav nail lavqkhoel bhai doevq haq neq, ngadao goiqbhaoq bhaoq nail tsaol-aq pevq khi, maldil tsaq nail lavqkhoel bhai, aqdoevq maq doevq-ail.
7 Thailhai ngaol-aoq, Miqyail aqbhaq nail lavqkhoel bhai jaol nail khe-ai, ngadao iqsanl aqbhaq nail lavqkhoel bhai tsao haq neq, ngadao teevq gaq nee teevq gaq aqtsaoq tsaoq tavq nail ngaol. Al ovqtavq, aivq nail Yaqyov Yeiqsul nail aqsivq ngadao nail oeqbal iqsanl bhai tsiqhaol lavq nail ngaol.
8 Ngadao oeqbal maq aol-ail dai ge haq neq, yovqgavq bhai yovqgavq goiqbhaoq bhaoq nail phaq pevq khi, maldil tsaq nail phaq ngadao nail lavqkhoel bhai maq aol-ail.
9 Ngadao yovqgavq nail oeqbal yovqgavq Miqyail bhai ge dov haq neq, Miqyail saljial ivq khi tsaq nail daol nail gaq pevq nail ngel-i mail, ngadao nail oeqbal bhai aivq phaiq lavq khi, maq tsaq maq daol nail phaq iqsanl bhai tsiqhaol lavq nail ngaol.
10 Oeqbal maq nl daiq haq-al dai, ngadao ge haq neq, Miqyail bhai goiqbhaoq bhaoq nail gaq niil dai, ngadao ge nail khe-ai, dul nail ngaol. Al ovqtavq, aivq nail daoq ngadao nail lavqkhoel bhai maq aol-ail.