16
Goil nail gaiq-a nail daoq cavq gaiq lee-a nail ganl
1 Geiqjeiq meenq bhai jaol nail, Khali yaq munl bhai tsaojao-ai nail gaq pevq nail ngadao nail nailma Philbheiq bhai, ngal nuljuq jaol nail bha bhi lal naol.
2 Miqyail nail tsaol-aq nl heeq phaq-ail pevq nail khe-ai, nuljuq Yeiqsul nail maivphaoq bhai heldaiq khi aivq bhai hav yaoq dei-eiq. Aivq khul phaq loq khi ngaol-aoq, tsaojao-ai bhiq yaoq. Khul khi mail dai ngal-aq neq, aivq tsaol-aq maodai gaq bhai tsaojao-ai bhiq nail nee ovqtavq, ngaq bhai iqsanl tsaojao-ai lavq-a nail ngaol.
3 Ngaq-ai nee mail Yeiqsul Khali nail ganl tsao nl nail Bhilgillav khi aivq nail yovjil Aqgullav bhai, ngal noeq moel naol geiq dai, cavq bhiq ail dei-eiq.
4 Ngal ya jel-ail dai, aqyu nvq maolyaq ngaq nail haqbhoil khanqsil tseq nail ngaol. Ngal taivq-ail aqyu nvq maolyaq bhai tsiq eeq nail maq ngel-ail. Yu nail jeq-e jaq-a pevq nail Khali yaq munl iqsanl, aqyu nvq maolyaq bhai tsiq eeq nail ngaol.
5 Aqyu nvq maolyaq nail ilkhaol bhai jil lai nail Khali yaq munl juq bhai iqsanl, ngal noeq moel naol geiq dai, cavq bhiq-ail dei-eiq. Aqsil-aq milkhaoq lavqkhoel khe iqmoeq ilmoeq Khali yaq pevq lal-a nail, ngal mao-ail gaiq-a nail Ilbhailnail bhai iqsanl, ngal noeq moel naol geiq dai, cavq bhiq-ail dei-eiq.
6 Nuljuq nail haqbhoil ganl nl deedee nail Maqlil bhai iqsanl, ngal noeq moel naol geiq dai, cavq bhiq ail dei-eiq.
7 Ngaq-ai nee mail thaonq bhai aol-a nail ngaq nail jeq-e jaq-a Aqdaolniv khi Yulniv bhai iqsanl, ngal noeq moel naol geiq dai, cavq bhiq ail dei-eiq. Aqyu nvq gaq neq, gaqkhoel juq nail lavqkhoel aqmil dov nail tsaol-aq ngaol. Ngal Khali yaq maq pevq lal-u nee mail, aqyu nvq gaq Khali yaq pevq lal-a nail ngaol.
8 Yeiqsul nail lavqkhoel ngal mao-ail gaiq-a nail Aqbhaqlil bhai iqsanl, ngal noeq moel naol geiq dai, cavq bhiq-ail dei-eiq.
9 Ngaq-ai nee mail Khali nail ganl tsao nl nail Ullaqbhaq khi, ngal mao-ail gaiq-a nail Saqdaqkhul bhai iqsanl, ngal noeqmoel naol geiq dai, cavq bhiq ail dei-eiq.
10 Khali nail haqbhoil mee nia phaq laonqdaiq nail phaq bhai gaq lai-a nail Aqbheiqleil khi Aqlildaolbhul nail miqsaol yovyaq bhai iqsanl, ngal noeq moel naol geiq dai, cavq bhiq ail dei-eiq.
11 Ngaq nail jeq-e jaq-a pevq nail Heiqloldil khi Yeiqsul nail lavqkhoel bhai jaol nail Naqgiqsul nail miqsaol yovyaq bhai iqsanl, ngal noeq moel naol geiq dai, cavq bhiq ail dei-eiq.
12 Miqyail nail haqbhoil laijai khi ganl nl nail ngaq nail nailma Daqlulphilnav khi Daqlulphaosav bhai maqkhaiq, Miqyail nail ganl bhai laijai deedee nail, ngal mao-ail gaiq-a nail nailma Bheiqlaqsil bhai maqkhaiq, ngal noeq moel naol geiq dai, cavq bhiq-ail dei-eiq.
13 Yeiqsul nail lavqkhoel bhai tsel dov-ai thaq nail Lulphul khi, ngaq nail aqma khe-ai saol-nvq-ai thaq nail aivq nail aqma bhai iqsanl, ngal noeq moel naol geiq dai, cavq bhiq-ail dei-eiq.
14 Aqsoqgaqleil, Phaqleiqgoq, Heiqlaqmeiq, Bhallaolbhal, Heiqlaqmal khi aqyu juq nee mail jaol nail aqivq jaqbheq juq bhai, ngal noeq moel naol geiq dai, cavq bhiq ail dei-eiq.
15 Phillaollul, Yuliv, Neiqlul, Neiqlul nail nailma khi Aolloqphal bhai, ngal noeq moel naol geiq dai, cavq bhiq ail dei-eiq. Al ovqtavq, aqyu juq nee mail jaol nail Khali yaq iqsanl bhai gail, ngal noeq moel naol dai gail cavq bhiq ail dei-eiq.
16 Nuljuq teevq gaq nee teevq gaq meeq nail haol nail lavqkhoel nee aqlavq he yaoq. Nvjuq nuljuq bhai noeq moel nail ngaol dai, Khali yaq munl iqsanl mail daoq cavq cavq bhoel-ai lavq-a nail ngaol.
17 Aqivq jaqbheq juq-ol, nuljuq-i mail ya saol-a nail ganl juq bhai maq tsaq maq dul lai nail daoq cavq lavq-a nail juq bhai yaolphaol yaoq. Aqyu juq neq, yu bhai bhi gaoq bhi gail ail khi, hevq bheeq nail ngel-i mail, aqyu juq bhai gail jao jao yaoq dai, ngal nuljuq bhai hal nail ngaol.
18 Alheel juq neq, ngadao nail Heeqphaq Khali nail haqbhoil ganl nl nail tsaol-aq maq ngel-ail. Yovqgavq nail ovqmav nail haqbhoil nl-ail teevq-eel ngaol. Aqyu juq neq, naldaiq meeq nail daoq khi tsiqeeq nail daoq bhai juq juq-ail khi, neema lavqkhoel aqmeeq aqhaol haol nail tsaol-aq bhai goiqbhaoq bhaoq khi mul ya nail ngaol.
19 Nuljuq Miqyail nail daoq naldaiq deedee nail ngaol dai, milkhaoq doi dai, gaiq doi ail-a nail ngel-i mail, ngal lavqkhiq tsail-ail nial. A dai nee maqtsil, nuljuq aqmeeq phaq bhai heeq nia khi, haqeiv nail phaq neema lavqkhoel bhai teevq peivq-ail maq aol dai, ngal oil movq-ail nial.
20 Neesal bhi ovq nail Miqyail neq, mao-ail maq maoq lal mail nuljuq nail aqkhil phaqyal kov-uvq nee neivq Saqdaq bhai naoq peiv nail ngaol. Ngadao nail Heeqphaq Yeiqsul nail geeqlaoq eeljaol nuljuq nail kovtavq bhai jiav dei-eiq.
21 Ngaq-ai nee mail ganl nl thailthaiq nail Tilmolseiq khi, ngaq nail jeq-e jaq-a Lulgil, Yaqsoq khi Saolsilphaqtav aqyu juq nuljuq bhai iqsanl noeq moel naol dai, daoq cavq cavq bhoel-ai lavq-a nail ngaol.
22 Ngal neq, Paolluv nail haqbhoil haoqgavq niil gevq thailthaiq nail Deiqlaqtil ngaol. Yeiqsul nail lavqkhoel nee ngal nuljuq bhai noeq moel naol dai, gevq bhoel-ai lavq-a nail ngaol.
23 Ngaq bhai maqkhaiq, Khali yaq teevq munl munl laoq bhai maqkhaiq, hav khi bhi jaq bhi daol thailthaiq nail Gaqyul iqsanl, “Ngal nuljuq bhai noeq moel naol” dai, daoq cavq cavq bhoel-ai lavq-a nail ngaol. Meenq niil meenq nail phul bhai heldaiq phail nail Eillaqdul khi ngadao nail aqivq jaqbheq Gaoqthu iqsanl, nuljuq bhai noeq moel naol dai, daoq cavq cavq bhoel-ai lavq-a nail ngaol.
24 Ngadao nail Heeqphaq Yeiqsul Khali nail geeqlaoq eeljaol nuljuq iqsanl nail kovtavq bhai bhi jiav dei-eiq.
Haoqnao naosaq khe Paolluv nail geeqlaoq hal daoq
25 Miqyail bhai thaqeeq thaqheel bhel. Khul khi mail dai ngal-aq, aivq neq, ngal cavq nail lavqkhiq tsail nail geeqlaoq daoq khi Yeiqsul Khali nail ganl ngal daoq cavq cavq nail khe-ai, nuljuq bhai gaq bhi kav lal nail ngaol. Ngaq-i mail cavq nail cov nail geeqlaoq daoq niil neq, milnee uqnee nee daoqceevq oil tsail-ai thaq khi ngaol-aoq, niil aq-il bhaqlaoq kheq dai, dov lal-a nail ngaol.
26 Jeq-e jaq-a iqsanl mail neema thaqtsaol lal khi naldaiq nia lal dai, nqmaq maqluv halyeel doevq nail Miqyail-i mail daoq bivq-ai thaq nail khe-ai, oiltsail-ai thaq nail al, niil aq-il phaodaiq lavq khi, Miqyail nail haqbhoil gedan nail juq nail haoqgavq bhaqda nee, oiltsail-ai thaq nail al bhai, tsaol-aq iqsanl mail ya heeq kivq khi ya moel-a nail ngaol.
27 Miqyail aivq teevq gaq taivq-ail neenoeq neekha teevq bhee aol nail ngaol. Yeiqsul Khali bhaqda nee, nqmaq maqluv halyeel Miqyail bhai tsiqeeq tsiq heel bhel. Aqmiq.