8
Aqhaqlal Miqyail nail lavqkhoel bhai aqdoevq doevq nail ganl
1 Alheel ngel-i mail, Yeiqsul Khali nail lavqkhoel bhai jaol nail tsaol-aq juq neq, ya sil naol dai, yalkhaq dal nail phaq bhai niil aq-il maq ya daq yaoq-aol.
2 Khul khi mail dai ngal-aq neq, Yeiqsul Khali nail lavqkhoel bhi doevq lal nia nail Aqhaqlal Miqyail nail bhaqaoq neq, oeqbal nail bhaqaoq lavqkhoel khi mail sil nail bhaqaoq lavqkhoel nee ngadao bhai bhi jel-ail lavq-a nail ngaol.
3 Ngadao aqsivq haqjoil bhao nail bhaqda nee, aoldaoq kovqdaoq gaq maq aol-ail. Alheel ngel-i mail, Miqyail neq, aoldaoq kovqdaoq maq nl nia nail phaq bhai, nl-ai thaq nail ngaol. Oeqbal yaq nail haqbhoil Miqyail aivq nail Yaqyov bhai khoel-ai leevq-a nail ngaol. Yaqyov neq, oeqbal nail haqbhoil laol bhiq nail phaq pevq dai, oeqbal yaq juq aqmaol bhao nail khe-ai, aivq iqsanl aqmaol bhao nail ngaol. Miqyail aivq bhai aqsivq haqjoil nail lavqkhoel bhai aol nail oeqbal bhai yalkhaq bhi dal lee-a nail ngaol.
4 Aqsivq haqjoil nail haoqnao maq tsaothe-ail, Aqhaqlal Miqyail nail haoqnao tsaothe nail ngadao juq nail lavqkhoel bhai, aoldaoq kovqdaoq ge-ai thaq nail khe-ai bhee lal dai, aivq alhai nl-a nail ngaol.
5 Khul khi mail dai ngal-aq neq, aqsivq haqjoil bhai tavq nail tsaol-aq neq, aqsivq haqjoil phao khe ganl bhai noeq cov-ai thaq nail neema aol nail ngaol. Thailhai ngaol-aoq, Aqhaqlal Miqyail bhai tavq nail tsaol-aq neq, Aqhaqlal Miqyail bhai tavq nail phaq bhai noeq cov-ai thaq nail ngaol.
6 Aqsivq haqjoil phao khe ganl bhai noeq cov-ai thaq nail tsaol-aq juq neq, ya sil nail ngaol. Aqhaqlal Miqyail bhai noeq cov-ai thaq nail tsaol-aq juq neq, aqdoevq doevq nail phaq khi mail neesal-ovq nail phaq ya nail ngaol.
7 Khul khi mail dai ngal-aq, aqsivq haqjoil phao tavq nail ganl bhai noeq cov-ai thaq nail neema neq, Miqyail bhai genl dev nail ngaol. Alheel nail neema neq, Miqyail nail aoldaoq kovqdaoq nail kov-uvq bhai maq jaol nail nee ovqtavq, jaol khi ngaol-aoq, maq jaol nia-ail.
8 Aqsivq haqjoil nail haoqnao tsaothe nail tsaol-aq juq neq, Miqyail neema tsaq dai, maq nl nia-ail.
9 Miqyail nail Aqhaqlal nuljuq nail lavqkhoel bhai maldil jaol haq neq, nuljuq aqsivq haqjoil nail neekhaol haoqnao maq tsaothe-ail. Aqhaqlal Miqyail nail haoqnao tsaothe nail ngaol. Thailhai ngaol-aoq, tsaol-aq teevq gaq nail lavqkhoel Khali nail Aqhaqlal maq jaol haq neq, tsaol-aq al gaq Khali nee maq tavq-ail.
10 Khali nuljuq nail lavqkhoel bhai jaol haq neq, oeqbal bhaqda nee aqmaol sil khi ngaol-aoq, tsaq nail daol nail phaq bhaqda nee, aqhaqlal ya doevq nail ngaol.
11 Al ovqtavq, Yeiqsul bhai gaoq bhi doevq kovq lal-a nail Miqyail nail Aqhaqlal nuljuq nail lavqkhoel bhai jaol haq neq, Yeiqsul bhai gaoq bhi doevq kovq lal-a nail khe-ai, Miqyail nuljuq nail sil nia nail aqmaol bhai iqsanl, gaoq bhi doevq kovq lal nail ngaol. Aivq nuljuq nail lavqkhoel bhai jaol nail aivq nail Aqhaqlal bhai juq khi alhai nl nail ngaol.
12 Aqivq jaqbheq juq-ol, ngadao juq neq gailjiov bavq nail tsaol-aq juq ngaol. Thailhai ngaol-aoq, aqsivq haqjoil nail neekhaol sil dai nl nail haqbhoil bavq nail maq ngel-ail.
13 Khul khi mail dai ngal-aq, nuljuq aqsivq haqjoil nail haoqnao doevq haq neq, ya sil nail ngaol. Thailhai ngaol-aoq, Aqhaqlal Miqyail bhai juq khi yovqgavq nail oeqbal nl nail aqsivq haqjoil nail neekhaol bhai dev ceiv haq neq, ya doevq nail ngaol.
14 Miqyail nail Aqhaqlal-i mail hevqdaiq bhiq nail tsaol-aq neq, Miqyail nail yaq ngaol.
15 Khul khi mail dai ngal-aq, Miqyail nuljuq bhai yaqkav nail neema bivq lavq-a nail maq ngel-ail. Neema al aol haq neq, geesil nail ngaol. Miqyail nuljuq bhai Aqhaqlal Miqyail nail lavqkhoel nee aivq nail yaq nail neema bivq lavq-a nail ngaol. Alheel ngel-i mail, “Aqbhu-ol, ngaq nail aqbhu-ol” dai, ngadao aivq bhai khul kivq nail ngaol.
16 Ngadao juq neq, Miqyail nail yaq ngaol dai, Aqhaqlal Miqyail khi mail ngadao nail aqhaqlal teevq gaq khe-ai, salkhil khanq nail ngaol.
17 Ngadao neq aivq nail yaq pevq nail ngel-i mail, aivq nail jaiqbhoil ovq nail tsaol-aq ngaol. Miqyail-i mail Khali bhai bivq nail dai khi, lainq-ai thaq nail jaiqbhoil iqsanl, Khali nee mail teevq gaq khe-ai ngadao ya nail ngaol. Khul khi mail dai ngal-aq, khoeq nail jiovq nail phaq bhai Khali nee mail teevq gaq khe-ai ngadao daq haq neq, aivq nee mail teevq gaq khe-ai seiqleiq khaoqsail ya nail ngaol.
Seiqleiq khaoqsail ya nail ganl
18 Yeel niil yeel nail lavqkhoel bhai ya haq ya aoq nail phaq neq, yaqhao ngadao bhai bivq lavq nail seiqleiq khaoqsail nee maq tsiq ceiv tsaol-ail dai, ngal noeq duq-ai thaq nail ngaol.
19 Miqyail-i mail teivq-ai thaq nail yaoq phaq yaoq-ao nee, Miqyail nail yaq juq bhaqlaoq kheq dai dov lee nail bhai ya moel dai, noeqthunq khi daonq thailthaiq nail ngaol.
20 Teivq-ai thaq nail yaoq phaq yaoq-ao nee, lav cov nail phaq bhai, niil aq-il kev dai, daq thailthaiq nail ngaol. Aqyu juq alhai daq movq jaol movq nail ngel-i mail, maq ngel-ail. Miqyail-i mail alhai bhi jaol-a nail ngel-i mail ngaol.
21 Thailhai ngaol-aoq, aqyu juq noeqthunq nail phaq niailhai jiav nail ngaol. Khal teivq-ai thaq nail yaoq phaq yaoq-ao nee lav cov nail phaq nail kov-uvq nee ya jel-ail khi, Miqyail nail yaq juq seiqleiq khaoqsail bhai ya aol lai dai, aqyu juq noeqthunq nail ngaol.
22 Khal teivq-ai thaq nail yaoq phaq yaoq-ao nee mail niil aq-il kev dai, yaq bhao-u nal nail khe-ai, maq daq tsaol-ail tev thail meel thailthaiq nail ngaol dai, ngadao heeq kivq nail ngaol.
23 Teivq-ai thaq nail phaq taivq-ail maq ngel nail, Miqyail-i mail iqmoeq ilmoeq bivq lavq-a nail kovpavq pevq nail Aqhaqlal Miqyail bhai ya-a nail ngadao juq iqsanl, Miqyail nail yaq maldil pevq lal khi, aqmaol niil ya jel-ail khi phal lal nail bhai daonq thailthaiq-u phao, neema lavqkhoel bhai neq, tev thail meel thailthaiq nail ngaol.
24 Ngadao hevqkovq nail phaq ya gaq-u phao maldil ya jel-ail khi phal lal nail ngaol dai, noeqthunq khi daonq thailthaiq nail ngaol. Alheel ngel-i mail, noeqthunq-ai thaq nail phaq bhai ya moel haq neq, maq noeqthunq yaoq-aol. Ya moel-aoq nail phaq bhai khaq sil gaq gaoq noeqthunq nail-aiq.
25 Thailhai ngaol-aoq, ngadao maq ya moel haq nail phaq bhai noeqthunq nail ngel haq neq, ol ol-ail ya daonq nail ngaol.
26 Alhai dul dai, ngadao gaq bhaq-u phao, Aqhaqlal Miqyail tsaojao-ai lavq nail ngaol. Geeqlaoq khalhai ya hal nail dai, ngadao maq heeq kivq-ail. Thailhai ngaol-aoq, Aqhaqlal Miqyail neq, daoq maq bhao dai, ngadao nail haqbhoil Miqyail bhai meel meel-ail geeqlaoq hal deedee nail ngaol.
27 Tsaol-aq yaq nail neema bhai tsaotsel daiq nail Miqyail neq, Aqhaqlal Miqyail nail neema bhai heeq nia nail ngaol. Khul khi mail dai ngal-aq neq, Miqyail neema tsaq nail khe-ai, Miqyail nail tsaol-aq nail haqbhoil Aqhaqlal Miqyail geeqlaoq hal nail ngaol.
28 Miqyail bhai khal gaiq-a nail tsaol-aq nail haqbhoil, iqsanl nail lavqkhoel aivq aqmeeq phaq bhi dov lal nail ngaol dai, ngadao heeq kivq nail ngaol. Miqyail-i mail noeqceiv-ai thaq nail khe-ai, aivq tsaol-aq al juq bhai khul-a nail ngaol.
29 Aivq nail Yaqyov khe-ai dul lai dai, iqmoeq-u nee mail Miqyail heeq nia nail tsaol-aq bhai aivq tsel dov-ai thaq nail ngaol. Yaqyov al gaq bhai, aqivq jaqbheq maodai gaq nail kovtavq bhai aqivq bhi jiovq nail dai khi, Miqyail alhai nl-a nail ngaol.
30 Iqmoeq-u nee Miqyail aivq-i mail tsel dov-ai thaq nail tsaol-aq bhai aivq khul-a nail ngaol. Khul-ai thaq nail tsaol-aq al juq bhai aivq tsaq nail daol nail tsaol-aq bhi pevq lal-a nail ngaol. Tsaq nail daol nail tsaol-aq bhi pevq lal-a nail al juq bhai, aivq nail seiqleiq khaoqsail bivq-a nail ngaol.
Yeiqsul nail lavqkhoel bhai ya moel nail Miqyail nail gaiq-a nail phaq
31 Alheel ngel-i mail, ganl al juq bhai khul ge duq jiav nail-aiq. Ngadao jaol nail phao Miqyail jaol haq neq, yaoq phao yaoq khaq sil gaq jaol khi lav tsoiq nia nail-aiq.
32 Miqyail neq, “Ngaq nail Yaqyov maq bhi cov-ail” dai, maq ge mail, ngadao iqsanl nail haqbhoil aivq nail Yaqyov bivq lavq-a nail ngaol. Thailhai phal-iq neq, aivq nail Yaqyov nee mail teevq gaq khe-ai, aivq khal jiav nail yaoq phaq yaoq-ao nee ngadao bhai bivq lavq nail maq ngel-ail laiq.
33 Miqyail-i mail tsel dov-ai thaq nail tsaol-aq juq nail kovtavq bhai khaq sil gaq oeqbal thaq nia nail-aiq. Miqyail thaq nia nail ngaol. Thailhai ngaol-aoq, Miqyail neq, ngadao bhai oeqbal maq thaq dai, tsaq nail daol nail tsaol-aq bhi pevq lal lavq-a nail ngaol.
34 Khaq sil gaq ngadao bhai ya sil naol dai, yalkhaq gaoq dal nia nail-aiq. Yeiqsul Khali dal nia nail ngaol. Thailhai ngaol-aoq, aivq neq, yalkhaq maq dal dai, ngadao nail haqbhoil khanqsil-a nail ngaol. Aivq sil-a nail teevq-eel maq ngel-ail. Aivq gaoq doevq kovq lal-a nail ngaol. Al ovqtavq, Miqyail nail lavqmal phao jaoldeel khi mail, ngadao nail haqbhoil geeqlaoq hal thailthaiq nail ngaol.
35 Khali nail goil nail gaiq-a nail lavqkhoel ngadao jaol-u phao, khul phaq ngadao juq bhai lav pav nia nail-aiq. Haq nail aoq nail phaq, noeq dee noeq deel nail phaq, khoeq nail jiovq nail phaq, moevq nail sivq nail phaq, aqgaq aqdoi maq jiav nail phaq, geesil nail phaq, thaoma-i mail heivq lavq nail niil juq laiq.
36 Jalliq lavqkhoel bhai gevq-ai thaq nail khe-ai,
“Naoq nail haqbhoil
teevq n n lao
nvjuq heivq nail
bhai ya daq
thailthaiq nail ngaol.
Heivq naol dai,
ge ceiv-ai thaq nail
yaol khe-ai,
yu nvjuq bhai
saol-nvq-ai
thaq nail ngaol” dai,
gevq-ai thaq nail ngaol.
37 Thailhai ngaol-aoq, ngadao bhai gaiq-a nail gaq bhaqda nee, al juq iqsanl bhai ngadao gaq gil lai-a nail ngaol.
38 Khul khi mail dai ngal-aq neq, sil nail phaq maqkhaiq, doevq nail phaq maqkhaiq, nqtavq gaqkhoel maqkhaiq, nqtavq khi miltsaq nail gaiqlaq bhai uvthaiq nail juq maqkhaiq, niil aq-il jiav nail khul phaq maqkhaiq, yaqhao jiav lee nail khul phaq maqkhaiq, bhaqaoq khul phaq maqkhaiq,
39 daqmoe phaq maqkhaiq, aqnavq phaq maqkhaiq, khal teivq-ai thaq nail yaoq phaq yaoq-ao nee maqkhaiq, ngadao nail Heeqphaq Yeiqsul Khali bhaqda nee, Miqyail nail goil nail gaiq-a nail lavqkhoel, ngadao bhai maq lav pav nia-ail dai, ngal neema thaqtsaol nail ngaol.