4
Maldil saqlaq maq ngel nail juq nail ganl
1 Aqhaqlal Miqyail bhaqlaoq kheq dai niailhai ge nail ngaol. Haoqnao naosaq khe aqn aqyanq nail lavqkhoel, tsaol-aq teevq pav ganav juq neema thaqtsaol nail phaq bhai khaonq haq nail ngaol. Aqyu juq neq, goiqbhaoq bhaoq nail aqheel juq nail daoq khi mail neivq juq nail daoq naldaiq nail ngaol.
2 Neivq al juq, goiqbhaoq bhaoq nia nail tsaol-aq bhai juq juq-ail, alhai cavq bhiq cov bhiq nail ngaol. Aqyu juq nail heeq nia nail neema bhai neivq juq-i mail, tsaq nail maq tsaq nail phaq maq tselpav nia dai, bhi pevq ail-a nail ngaol.
3 Khaqma maq ya hevq, maq ya maol ail nail nee ovqtavq, jaqjaq daoldaol teevq pav ganav juq iqsanl maq ya jaq maq ya daol-ail dai, aqyu juq ge nail ngaol. Neema thaqtsaol khi maldil tsaq nail phaq bhai heeq nia nail tsaol-aq ngaq bhai tsiqeeq tsiqeeq-ail jaq nia dai, jaqjaq daoldaol al juq Miqyail-i mail teivq-ai thaq khi ngaol-aoq, thaq jaq thaq daol dai, aqyu juq lav tsoiq nail ngaol.
4 Miqyail-i mail teivq-ai thaq nail yaoq phaq yaoq-ao nee, aqmeeq ngaol. Miqyail bhai tsiqeeq tsiqeeq-ail hav bhoel haq neq, khul phaq bhai iqsanl maq ya khaonq ha-ail.
5 Khul khi mail dai ngal-aq neq, Miqyail nail daoq bhaqda nee maqkhaiq, geeqlaoq hal nail bhaqda nee maqkhaiq, al juq meeq lal haol lal-aoq nail ngaol.
Yeiqsul Khali nail haqbhoil mao-ail meeq nail yaqkav
6 Aqivq jaqbheq Khali yaq juq bhai naol ganl niil juq cavq bhiq cov bhiq haq neq, naol neq, naoq-i mail tsaothe nail neema thaqtsaol nail phaq bhai tavq nail maldil tsaq nail phaq khi meeq deedee nail cavq nail cov nail phaq nail lavqkhoel nee eeq lal-a nail Yeiqsul Khali nail meeq nail yaqkav teevq gaq pevq lal nail ngaol.
7 Aqphiq joiqmaoq juq-i mail ge nail, Miqyail bhai maq ev nail ganqje nail daoq juq bhai thaq naldaiq. Thailhai ngaol-aoq, Miqyail bhai ev lal nia dai, naol aqmeeq-ai nl jao jao yaoq.
8 Khul khi mail dai ngal-aq neq, aqsivq haqjoil phao gaq aol lal dai, nl jao jao nail juq neq, ganl micil ganav tsoiq nail ngaol. Thailhai ngaol-aoq, Miqyail bhai ev nail phaq neq, yaoq phaq yaoq-ao nee nail lavqkhoel bhai ganl tsoiq nail ngaol. Niil yeel nail haqbhoil maqkhaiq, yaqhao khe yeel nail haqbhoil maqkhaiq, ganl tsoiq nail ngaol.
9 Daoq niil daoq neq, saljial ivq khi, maldil hav bhoel heeq phaq-ail tsaq nail daoq ngaol.
10 Ngadao aqdoevq doevq nail Miqyail bhai noeqthunq thailthaiq nail ngel-i mail, laijai laijai-ail ganl nl thailthaiq nail ngaol. Aivq neq, tsaol-aq iqsanl nail Hevqkovq nail gaq ngaol. Aivq neema thaqtsaol nail tsaol-aq nail haqbhoil a dai nee maqtsil, Hevqkovq nail gaq ngaol.
11 Ganl niil juq iqsanl yu bhai daoq bivq khi cavq bhiq cov bhiq yaoq.
12 Naol yaqkhaq yaquv pevq nail bhai tsaol-aq teevq gaq-ail khal ge movq-ail thaq bhi ge. Daoq ge-u phao maqkhaiq, ganl nl-u phao maqkhaiq, Yeiqsul bhai neema thaqtsaol nail tsaol-aq juq nail haqbhoil saol oil duq bhi pevq yaoq. Naol nail goil nail gaiq-a nail phaq, neema thaqtsaol nail phaq khi, aqmeeq aqhaol phaq, niil juq bhai iqsanl aqyu juq nail haqbhoil saol oil duq bhi pevq yaoq.
13 Ngal kev lee-u phao kev dai, yu bhai Jalliq ge daiq bhiq nail, gaq bivq nail dai khi, cavq bhiq cov bhiq nail, niil juq bhai laijai nail lavqkhoel nee nl nl-ail jaol yaoq.
14 Khali yaq munl bhai heldaiq phail nail juq naoq nail kovtavq bhai aqlavq bavq dav-u phao, aqyu juq Miqyail nail haqbhoil gedan khi, aivq nail daoq ge ge-ail, naoq bhai aqhaqlal phao khe kovpavq bivq lavq-a nail ngaol. Naol kovpavq al ya-a nail khe-ai, aqmeeq-ai nl-ail yaoq dei-eiq.
15 Naoq-i mail nl nail ganl eeq lal heel lal thailthaiq nail bhai tsaol-aq iqsanl ya moel dai, al juq bhai neema kev nail lavqkhoel nee, mailma-ail nl yaoq.
16 Aqmeeq-ai yaolphaol yaolphaol-ail, aqdoevq doevq yaoq. Naol cavq bhiq cov bhiq-u phao iqsanl, aqmeeq-ai yaolphaol yaoq. Al juq nail haoqnao neema ivqdao dai, doevq-ail yaoq. Naol alhai doevq haq neq, naoq bhai maqkhaiq, naoq nail daoq bhai ya gaiq-a nail tsaol-aq bhai maqkhaiq, hevqkovq nail ngaol.