PORI MA ESÉ ARAÍEN TIMOTIN UVAMAN AMEIN BOMPON MINO
(1 Timoti)
Timotini Esé Bompon Ma Uvanteí Pákenai Afova Vaya Ino
Ma ma kanú manaú bompon ma uvaman monó doran banta amikhein mai 1Timotin má 2 Timotin má inká Taitusin ma san ma sian amá ukhein baya maen AD sikisti-fo (64) ráké sikisti-seveni (67) ráké ma aúban mi uvanten mino.
Oo siádan baya vá o ukí páké ma erikhein baya vá ano siyáken AD sikisti-fo (64) fin ma Sisa Nero ano ma monó nanin banta ariyá eimpin pasa Porin aren naifo ída ino. Karavusi finte utúantan maen evaránen bei yoran mo araí uren ma varu kayofin naren eúken mino. Kiriti vá Masedonia vá Akaiá barafin ma vain baru Nikoporisi vá Troasi vá Miretusi vá inká Korini vá Efesasí bá ino. Inká Speini varafá inan orikhen ne sen iniyan mino. Monó doraríen noren enóbíkan evaránen karavusi fáken mo khauren maen kó tiantáden AD sikisti-seveni (67) fin aruan puren mino. Béi ma monó doraríen nóken mi esé ma Timotin uvaman amikhein bompon má inká Taitusin ma uvaman amikhein bompon má uvanten mino. Inká kó tiantáden purino ma sirákan mi kan dádasí en uvaman Timotin amen mino.
Ma vompon ma uvantein banta ino.
Baya varen orin banta Pori ino.
Uvarein orana ino.
AD sikisti-tari (63) ráké sikisti-sikisi (66) ráké ma aúban mino. Mai maen Porin ma karavusi fintena utúantan ma evaránen bei yoran mo yorein pimpá ino.
Ma vompon ma uvantein baru ino.
Masedoniá inon ten iniyan mino.
Ma vompon ma uvaman amikhein banta ino.
Timoti maen Porini eyo iyampon báken kama arona varen ma Pori má Efesasí o monó doran bantaí ein pumara ino. Ínaimpáké Pori ma Masedoniá barafá oríkan maen béi monó dorarí ono van Efesasí para varen mino.
Nái ana vará ma vompon uvanten nafino.
Timoti maen pumaran bákan mi mantaan ákona uven monó dorarí ino van ará ákona amin baya siamiyáken kama ineine amikhen mino.
1
Pori Ma Susu Sein Baya Ino
Tetin tiya uren ma evaránen tivíkein Tiyarafenu vá inká tetin ovaránen e sivirante ne siré ma ave ukheruna vanta Yisas Karaisin má ano ma aní uren aposeri yoran timikhein banta séi Pori anon ma vompon uvaré uno.
*Monó avúavápin ma se sanin uron an dakhein banta Timoti vaípái ma vompon uvamádé uno. Teti Sifóe Tiyarafenu vá tetisi Bafan Yisas Karaisin mái sarisari vá arunaná bá ará kusin má ano vá en má bano.
Kampun Monó Baya Sin Kayoi Aaman Vaya Ino
Téi ma Masedoniá orono van iyáké maé éin nan Efesasí bákeya vá mai ma kampun bayafó ma vanasi afova amiyain kéká tiamesin ída máan tino van mi éin me ayópá é uno. *Mai ma vetí anafu aráoni avúavá ma mamádáken ma ara ara kampun baya kayo e sen oriyan bain mano ída kanaíen betin ayaintin Tiyarafenurá mumunan uren betin ma aya ono van iyain daná afová inten mino. Máan tinten mifo mai ano vetíi ineine anan máden asuse urantin maen aruve asivein avúavá anan baranten mifo ída vá áesin mai avúavá barano. Mai van mi Yisasin ánain ma vákuriyain kékápin ná ena ma moéken avábá in avúavasá bano. Betí ankan aú ma avusese intin ma kama yaná bá namu yaná bá ma yaíden afová in ineine ma vantin inká pura mumunan má ma vantin mi ena ma moéken avábá in avúavá afoká inten mino.
Máan tinten mifo manáa kampun afova ma amin kéká ano mai avúava sinta inka me ampiren beni ana ída vain baya sen orera iyan mino. Betí ankan nan man baya afová ukhein kéká ino sen banasi ano afová ino van mi inikhen mino. Máan tiyan mifo mai ma kana siyá uno siren ma vanasi siamiyain bayai ana ída uron mi afová ukhen mino.
*Tetí ankan ma afová ukhé tiferuna vanasi ano ma Tiyarafenui man baya ánain ma funtáden bákurin manon man baya kama ukhen mino. Máan tukhen mifo funtákein avúavá ma variyain nanin banta ina va man baya uvanten naino. Ída ino. Man baya ma yurafuriyáken ma Tiyarafenui vaya átakharé iyain kéká bá ume avúavá ma variyain kayo vá inká Tiyarafenui kantasí ukhein danasinta ma oyan amin kéká bá ino. Inká béin nan ma afon karí iyain kéká bá be anóe afóen má ena nanin banta vá ma aruan puriyain kéká bá ino. 10 Inká pamúkuí ma iyain kayo vá banta ano fi áa anasi ano fi ma vaéden beraran pamúkuí iyain kéká bá inká banta ano ma arona vanta avíden sarií iyain kayo vá ino. Inká kampun baya sin kéká bá ena nanin banta iyáantáden ma ída avúavápin kaé iyain kayo vá inan man baya van mino. Banasi ano ma mai avúava sinta vá minó ara ara namu avúava sinta vá ma variyain manon Tiyarafenu ano ma fura sikhein avúaváká bano van ma setin afova simikhein baya ánain ída yakhafiyan mino. 11 Mai ma setí ankan afova simikhein mai Tiyarafenui fanu sikhein kama vaya ino. Tiyarafenu ano séin nan mai kama vaya vá banasi siameno sikhen mino.
Tiyarafenui Sarisari Van Ma Pori Susu Sikhein Baya Ino
12  *Tetisi Bafan Yisas Karaisi ano séin nan kanaíen beni yorarí inten mino siren mi séin aní uráken ma ákona simiyain nan mi véin tusu siantiyá uno. 13  *Pefá kama anan iyá uno siré maé oyampá baya siyáké ben ánain ma vákuriyá ein kéká dakhádé ariyaré uno. Máan tiyaré umpo Bafan mano ma séin nan arunan uren tivirein mai fara va ino, séi ída véin afová é mumunan ukharé ékun mino. 14 Bafan Tiyarafenu ano séin moéken tarisari uren mi Yisas Karaisimpin ma vain mumunan má avábá bá maman téin túpin bíkasinten mino.
15  *Ume nanin banta aya uré avirano van mi Yisas Karaisi ma varafin erikhá mai fura vayan tiamé umpo vá minó ano véintasá mumunan ono. Namu avúavá baran kéká esantaré téi moéké ume vanta uron mi vá uno. 16 Máan tukhékun mifo Yisas Karaisi ano ída ainen téin uman timen mifo mai ma moéken umeí iyain nanin banta aní intin onano van mi Tiyarafenu ano séi nan moéken arunan uren tiviren mino. Máan turantin béintá ma mumunan inain nanin banta ano fara van oriyan ban aunan baranten mino. 17 Máan tukhanti vá mai ma fara van oriyan ban Tiyarafenun avisá daní iyáke kákan bí ameno. Para vara seyo veyáká anan Tiyarafenu váken inká ída furinton para van oriyan ban Kin bákan mana nanin banta ano véin ída kanaíen oné iyan mino. Pura ino.
Pori Ma Timotin Nan Mantaan Ná Ákona Ono Sein Baya Ino
18 Te sanin Timoti oe, fefá ma sakhanampa vaya siádan ma varé ein nan mi ma vaya kayo ákonaé timiyá uno. Áesin ná ma vaya kayo ano éin ákona uantanti vá Bafani yorampin báke namu yaná bá ákona e aruvono. 19 Yisas Karaisintá ákona mumunan kaúde vá minó damú puntákein ineine ana vá barano. Mai fara vara seyo, manáa nanin banta ano mai avúavá me ampiren ída funtákein avúavá mo varan maen betíi mumunan mano sipi ma oriyaren onámanáká mo kuvanten barákein an dakhen mino. 20  *Imeneusin nú Areksanda nú ano máan avúavái variyaré íká míkan nan mano afova máden Tiyarafenun ída oyampá baya sino van mi míkan avían Ban Anon ayampin kaé uno.
* 1:2 Apo 16:1-3; Tai 1:4 * 1:4 1Ti 4:7; Tai 1:14 * 1:8 Rom 7:12, 16 * 1:12 Apo 9:15; 1Ko 15:9-10; Kar 1:15-16 * 1:13 Apo 8:3; 9:1-5 * 1:15 Ruk 19:10 * 1:20 1Ko 5:5; 2Ti 4:14-15