8
Sisas ai sɨhefɨ Godɨmbo sai-randeimbɨ bogorɨ adükar-ani
1 Ranɨ-moatükunɨ ranahandɨ nɨmɨndɨ hondü hoafɨ ro wataporɨmbo-arɨhundɨ ranana sɨhefɨ moanɨ yahurai Godɨmbo sai-randeimbɨ bogorɨ adükarɨ ai sünambe God Bogorɨ Hondü-mayu ranahandɨ haŋgɨfoanɨ amaru.
2 Ranambe-ani aiana Godɨmbo sai-randeimbɨ bogorɨ adükarɨ ratüpurɨ ranani ratüpurɨyuhü moanɨ sürühoeimbɨ fondɨ ranambe anüŋgu. Fondɨ ra sapo Godɨmbo hoafɨyo-rambo ser worɨ hondü Adükarɨ ai mafondeandɨ ranambe, ŋga nindou ai worɨ ra moai fondundɨ.
3 Muŋguambo nindou dɨdemo sapo Godɨmbo sɨhou-rundeimbɨ bogorɨ adükarɨ nɨŋgomo arundɨ ra Godɨmbo moanɨ saimbo moatükunɨ sɨhefembo asu nɨnɨhondɨ hɨfokoefeyoanɨ horɨ kefoefe-rambohündambo anɨŋgomo. Ranɨmbo-hündambo-anɨmbo sɨhefɨ Godɨmbo sai-randeimbɨ bogorɨ adükarɨ ranai-amboanɨ nɨnɨ-moatükunɨyo ra awi Godɨmbo mbɨsɨhend-amboane.
4 Sisas ranai hɨfɨ ndanɨhü mbanüŋgu-mbonana, ai ŋgɨrɨ Godɨmbo sai-randeimbɨmbo nüŋgu, sapo nindou bɨdɨfɨrɨ ai Suda-yei ahɨnümbɨ hohoanɨmo ranɨ-süŋgumbo Godɨmbo moanɨ saimbo moatükunɨ sɨhou-arundɨ nindou ranai manɨŋgomo-ndambo wambo.
5 Moanɨ sürühoeimbɨ fondɨ ranambe Godɨmbo sɨhou-rundeimbɨ ratüpurɨ yaru arundɨ fondɨ ranana moanɨ safɨ hondü sünambeahɨ eŋgoro ranahandambo sɨsam-ane. Moses ai sapo sɨsamɨ moatükunɨ ser worɨ-mayo ra fondɨfembo yahuhaya-mboyuambe God ai ahambo hoafɨyundohü yahuya,
“Se ranɨ-moatükunɨ ra randowandühɨ ana, sapo hɨfɨ wafuambe muŋguambo moatükunɨ refembo safɨ hondü sɨsamɨrɨhe nafuimehanɨnɨ rananɨmbo ranɨ-süŋgundo worɨmbondandɨ,” Kisim Bek 25:40
mehundo.
6 Ŋga haponda Sisas ai Godɨmbo sai-randeimbɨ bogorɨ adükarɨ ratüpurɨ ranɨfihɨ türe haya ratüpurayu hu ranana amurɨ-yomondɨ ratüpurɨ ŋgasündeandeimbɨ hond-ane. Sapo hoafɨ femɨndɨ aboedɨ safɨ sɨhefembo moatükunɨ Godɨndɨ nendɨ asu Godɨ-mayu ranahei mbusümo dɨdɨboado-mareandɨ ranana moanɨ aboedɨ mbumundɨ hamɨndɨ hond-ane. Ranɨ-moatükunɨ ra sapo aboedɨ hamɨndɨ hondü horombo hoafɨfimbɨhündɨ süŋgu wambo.
Sɨmborɨ hoafɨ femɨndɨ sɨhefe ai horombodɨdɨ ranahambo ŋgasündeamboane
7 Horombo weaŋgurühɨdɨdɨ hoafɨ femɨndɨ sɨhefe-mayo ra moanɨ aboedɨ ndombarɨhoai-mbonana, asu ŋgɨrɨ süŋgunɨ ŋgorü tükümefeyo ranai tüküfeyo, ŋga ranana wanɨyo.
8 Ŋga asu God ai ahandɨ nendɨ ranaheimbo papɨ-hoafɨrandürühɨ yahuya,
“Adükarɨ ai yahuya, Awi süŋguna ro Israerɨhündɨ asu Sudahündɨ ranɨ-babɨdɨmbo
sɨmborɨ hoafɨ femɨndɨ sɨhefemboayahɨ ranɨ si ra tükündɨfemboe.
9 Ranɨ hoafɨ femɨndɨ sɨhefe moatükunɨ ranana ŋgɨrɨ sapo ahei amoao mamɨ-babɨdɨmbo Isip hɨfambeahɨndɨ koakoma-rɨhandürɨ hahɨ
ranɨ-sɨmboanɨ hoafɨ fɨrɨhamɨndɨ masɨheheandɨ nahurai-yopoanɨ, ŋga wanɨ.
Nindou ranai wandɨ hoafɨ femɨndɨ sɨhefe ra ndofe süŋgufekoate-mayei-amboyahɨ
asu ro-amboanɨ aheimbo moanɨ yarɨhe hɨnɨŋgɨmarɨhearü, Adükarɨ ramehu.
10 Awi süŋgunambo ana Israerɨhündɨ babɨdɨmbo ndanɨ
hoafɨ femɨndɨ sɨhefe ndandɨhe ndahurai-anɨmbo randɨheamboyahɨ.
Ro wandɨ-mayo ahɨnümbɨ hohoanɨmo ahei hohoanɨmoambe hɨnɨŋgɨndɨheandühɨ
asu ahei ŋgusüfo fihü sürü papɨndɨhɨ hɨnɨŋgɨndɨheamboyahɨ.
Ro ahei God-ndamboyahɨ
asu ai wandɨ nendɨ-ndeimboyei.
11 Nindou mamɨ ai-amboanɨ ŋgɨrɨ ahandɨ mamɨ ŋgoafɨhündɨ nindou-mayu ranahambo yamundeandürɨ
asu ahandɨ sɨrambeahɨndɨ nindou ranaheimbo hoafɨndundürühɨ,
‘Se Adükarɨ fɨfɨrɨndɨhorɨ,’ mbüsu.
Nɨmboe muŋguambo nindou ai ndürɨmbayei asu ndürɨ-koateayei
aiana wambo fɨfɨrɨndɨ-hindɨrɨmboyei.
12 Ro hɨpoambondɨ-handürühɨ ahei moaruwai hohoanɨmo ranɨmbo amboawiyei mbɨsa hɨnɨŋgɨndɨhearühɨ,
asu ahei mamɨkarɨ hohoanɨmo ranahambo moanɨ mɨtanɨndɨ-hamɨndɨ-handürɨmboyahɨ,” Jeremaia 31:31-34
mehu.
13 God ai sɨmborɨ hoafɨ femɨndɨ sɨhefe ranahambo sɨmbor-ane yahu wataporɨmbo-randühɨyu asu hoafɨ ranambo ai weaŋgurühɨdɨdɨ-mayo ranahambo muŋguna wamɨndafɨmbo-mareandɨ. Asu nɨne-moatükunɨ sapo ai wamɨndafɨyowohü sümboayo ranana ŋgɨrɨ amɨtata awarɨndɨhoeyo.